‘Ka Ua ua Atu rai i te Ruaine Anga’

MANGANUI ua atu te tangata i roto i te au enua Metiterenia e tanu ana i te nu tamara ki roto i to ratou au paepae. E au tumu rakau matauia teia no to ratou purotu e te reka tikai i te kaianga i to ratou ua. I runga ravao ra, e ua ua ana ratou tere atu i te anere mataiti.

I roto i tana pee, kua akaaite te Ariki ko Solomona o Iseraera i taito i te tu o tetai tamaine manea Sulami mei to te nu tamara rai. (E Peʼe na Solomona 7:7) Te akakite ra te puka Plants of the Bible e: “Ko te kupu Epera no te nu tamara e ‘tàmâr.’ . . . Kua riro mai ei akairo na te ngati Iuda no te tu taurekareka e te purotu e e tapa putuputu ana ratou ei ingoa no te au tamaine.” Ei akaraanga, kua tapaia te ingoa Tamara ki runga i tetai tuaine purotu o Solomona, na te mama ke ra. (2 Samuela 13:1) Te tapa nei rai tetai au metua i ta ratou au tamaine ki tera ingoa.

Kare e ko te au vaine manea ua te akaaiteia ana ki te nu tamara. Kua imene te tata taramo e: “Ka ruperupe te tangata tuatua-tika mei te nu tamara ra; ka tupu ïa mei te arezi i Lebanona ra. Ko tei tanumia i roto i te are o Iehova ra, ka ruperupe ïa i te au paepae o to tatou Atua: Ka ua rai ïa, e tae ua atu ki te ruaine anga ra; ka ki i te tapou, e e vai mata ua ra.”​—Salamo 92:12-14.

Na roto i te tuatua akatutu, ko te aronga e tavini tiratiratu ra i te Atua i te tangata metua anga e maata tikai te aiteite ra ki te tu manea o te nu tamara. “E korona kakā te upoko inaina, kia rokoia atu tei te arataa tuatua-tika ra,” i karanga ai te Pipiria. (Maseli 16:31) Noatu e te paruparu atura te maroiroi o te kopapa no te pakari anga, ka rauka i te au tangata metua i te tamou marie i to ratou ririnui i te pae vaerua na te rave putuputuanga i te apii i te Tuatua a te Atua, i te Pipiria. (Salamo 1:1-3; Ieremia 17:7, 8) No ta ratou au tuatua memeitaki e to ratou akaraanga manea, kua riro te au taeake pakari akarongo ei au tumu maata no te akamaroiroi i etai ke e te uua anga atu mei tetai mataiti ki tetai. (Tito 2:2-5; Ebera 13:15, 16) Mei te nu tamara rai, ka ua ua atu rai te au taeake pakari i to ratou ruaine anga.