Aruaruanga i to te Atua Akakoroanga i Teia Tuatau

“E i mate oki [a Karaiti] no te tangata ravarai, kia kore te aronga e ora ra e akono akaou ia ratou uaorai i te ora anga nei.”​—2 KORINETIA 5:15.

1. E akakite mai i te tupuanga ki tetai mitinari i roto i tana tukuanga angaanga.

“NO MATOU te toroka mua tei tae ki roto i te oire motutaa Aperika i muri ake i te openga o te tamakianga i reira,” i maara ai tetai mitinari ko Aaron tona ingoa. * “Kare i rauka ana ia matou te komunikeiti atu ki te putuputuanga meangiti i reira, e kua anoanoia matou i te akono i te au inangaro o te au taeake. I te pae mai i te kai, kakau, e te puka Pipiria, kua apai atu matou i tetai kopi o te vitio Jehovah’s Witnesses​—The Organization Behind the Name. * E maata tikai te au tangata inangaro tei akaputu mai i te akarakara i te reira i roto i te ‘are teata’ o te oire​—e are kikau maatamaata ma tetai vitio e tetai tivi​—e e rua o matou taime i te akaarianga i te reira. E manganui te au apii Pipiria tei tupu mai mei te reira akaariarianga teata tataki tai. Te taka meitaki ra, e kua puapinga tikai ta matou au tautaanga katoatoa.”

2. (a) Eaa te au Kerititiano e iki ei i te taangaanga i to ratou oraanga i roto i ta te Atua tavinianga? (e) Eaa te au uianga ta tatou ka uriuri i teianei?

² Eaa ra a Aaron e tona au oa i akono ei i te reira angaanga ngata tikai? No te mea kua akaperepere ratou i te atinga oko o Iesu Karaiti, kua akatapu ratou i to ratou oraanga ki te Atua e kua inangaro ratou i te taangaanga i te reira i te rotai anga ki to te Atua akakoroanga. Mei ia ratou rai, kua iki pouroa te au Kerititiano akatapuia ‘kia kore e akono akaou ia ratou uaorai i te ora anga nei’ mari ra kia rave ma to ratou maroiroi katoa no te puapinga o “te evangelia.” (2 Korinetia 5:15; 1 Korinetia 9:23) Kua kite ratou e me pou ana te tuatau o teia akatereanga o te au mea nei, pouroa te au moni e te turanga teitei katoatoa i roto i te ao nei, kare e puapinga akaou. No reira i te rauka anga te oraanga e te oraanga maroiroi, te inangaro ra ratou i te taangaanga i teia au mea nei i te rotaianga ki to te Atua akakoroanga. (Koheleta 12:1) Akapeea tatou i te raveanga i teia? Ka kitea e tatou te mataku kore e te maroiroi i te rave anga i te reira kiea? E eaa te au atianga no te tavinianga e tuera maira kia tatou?

Raveanga i te Au Takainga Puapinga e te Tau

3. Eaa te au takainga mua te kapiti maira i te raveanga i to te Atua anoano?

³ No te au Kerititiano mou, ko te rave anga i to te Atua anoano, e angaanga te reira no te roaanga o te oraanga. Tei matauia, e akamata ana te reira ki te au takainga mua mei te piri atu anga ki te Apii Orometua Teokaratiki, te tatauanga i te Pipiria i te au ra ravarai, te piri atu anga ki roto i te angaanga tutuanga, e te tere marie atu anga ki te papetitoanga. E te akonoia ra te tereanga ki mua, ka akamaara tatou i te au tuatua a te apotetoro ko Paulo e: “Ka akamanako tikai i teianei au tuatua; ko taau ïa e rave auraka e tivata; kia kite te tangata katoa i te tupu anga o toou kite.” (1 Timoteo 4:15) Kare te reira tupuanga ei akapaapaa ia koe uaorai mari ra e akaataanga i to tatou tautaanga kia rave i to te Atua anoano ma te karapii kore. I te akonoanga i te reira aerenga, te akaari maira e te akatika ra tatou i te Atua kia arataki i to tatou au takainga i roto i te au mea ravarai no te oraanga, e e kite atu aia ia tatou i te raveanga i te reira.​—Salamo 32:8.

4. Akapeea tatou i te akapae ke anga i te au manako mataku?

⁴ Inara, ko te tu emiemi me kore te akamanako maataanga ia tatou uaorai, ka riro ei tapupuanga i to tatou tereanga ki mua i roto i ta tatou tavinianga i te Atua. (Koheleta 11:4) No reira, i mua ake ka kite mai ei tatou i te rekareka mou tikai i te tavinianga i te Atua e tetai ke, penei ka inangaroia tatou kia autu na mua i to tatou uaorai au manako  mataku. Ko Erik, ei akaraanga, te akamanako ra i te tavini atu i roto i tetai putuputuanga reo ke. Inara kua manamanata aia: ‘Ka meitaki ua ainei au i reira? Ka reka ainei au i te au taeake? Ka reka ainei ratou iaku?’ Te akakite maira aia e: “Kua kite mai au i te openga iora e ka inangaroia au i te akamanako maata atu i te au taeake kare iaku rai. Kua iki mai au e kare au e akamanako akaou atu i te reira e kia oronga karapii kore ua i taku ka rauka i te oronga. Kua pure au no te tauturu e kua akono au i taku au parani. I teianei, kua mataora tikai au i taku tavinianga i reira.” (Roma 4:20) Ae, no te maata i to tatou tavinianga i te Atua e etai atu ma te karapii kore, ka kite mai tatou i te mataora e te tu mareka ua.

5. Eaa tatou ka anoanoia ai kia parani meitaki i te aruaruanga i to te Atua akakoroanga? Akatutu mai.

⁵ Kia puapinga tikai i te aruaruanga i to te Atua akakoroanga, te umuumu katoaia ra e kia parani meitaki tatou i ta tatou au angaanga. Ka kopae pakari tatou i te maanianga kia maata te kaiou te ka akatuikaa ia tatou ki teia akatereanga e ka akakotinga i to tatou tu rangatira kia rave i ta te Atua angaanga. Te akamaara maira te Pipiria ia tatou e: “Ka riro te tangata kaiou ei tavini ki te tangata tei oronga mai.” (Maseli 22:7, NW) I te irinakianga ia Iehova e te tukuanga i te au mea pae vaerua na mua, ka tauturu ia tatou i te akono meitaki i te au mea aere. Ei akatauanga, e noo pouroa ana a Guoming e tona nga tuaine e to ratou metua vaine ki roto i tetai ngai e aka moni te au are e e aka angaanga te kimi i tetai ngai angaanga tinamou. Na te taangaanga meitaki anga i te moni e na te tua anga i te au kaiou, kua mako ua to ratou noo anga noatu me kare ratou pouroa e angaanga ana. “I tetai au taime, kare matou pouroa e koi moni ana,” i karanga ai a Guoming. “Inara, kua tamou ua atu rai matou i roto i te angaanga orometua painia e kua akono meitaki katoa i to matou metua vaine. Kua mataora matou e kare a Mami e inangaro ana ia matou kia akaruke i te au aruaruanga pae vaerua kia rauka ia matou i te oko mai i te au apinga manea nona no te oraanga.”​—2 Korinetia 12:14; Ebera 13:5.

6. Eaa te au akaraanga e akaari maira e akapeea tatou i te rotaianga i to tatou oraanga ki to te Atua akakoroanga?

⁶ Me te pou ra toou taime i te au aruaruanga o te ao nei​—i te pae moni me kore i tetai atu aruaruanga​—penei ka anoanoia te au tauianga maata i te tukuanga i to te Atua akakoroanga na mua. Kare te reira au tauianga e tupu viviki ua ana, e te au tarevake anga i roto i taau au tautaanga mua, auraka kia manakoia e kua puapinga kore. E akamanako ana ia Koichi i tona manamanata e, e maata roa tona taime ki te tarekarekaanga. Kua apii ana a Koichi i te Pipiria i tona mapu anga, inara no te au mataiti e manganui, te apinga maata i roto i tona oraanga koia oki ko te au apinga kangakanga vitio. I tetai ra kua karanga a Koichi kiaia uaorai e: ‘Teaa nei koe? Tei roto koe i te 30 anga o toou mataiti, e kare roa aau apinga puapinga e rave nei i roto i toou oraanga!’ Kua akamata akaou a Koichi i tana apii o te Pipiria e kua ariki i te tauturu mei te putuputuanga. Noatu e kua marie ua te tauianga i te tupu anga, kare aia i tuku ana i te au. Ma te pure maata e te akamaroiroi anga takinga meitaki mei etai ke, kua rauka iaia i te openga te autuanga ki runga i tona inangaro tau kore. (Luka 11:9) Te mataora nei a Koichi i teianei i te tavinianga ei tavini tauturu.

E Apii i te Tu Tau Meitaki

7. Eaa tatou ka anoanoia ai kia tau meitaki i te raveanga i ta te Atua angaanga?

⁷ I te aruaruanga i to te Atua akakoroanga, te tau ra ki ta tatou au raveanga ngakau tae. Auraka rava tatou e emiemi, me kore e kope i te raveanga i te reira. (Ebera 6:11, 12) Noatu rai, kare a Iehova e inangaro ia tatou kia akaroiroi tatou ia tatou uaorai​—i te pae kopapa, pae manako, me kore te manako ngakau. I te akakite akaaka anga e kare e rauka ia tatou i te akatupu i to te Atua akakoroanga i roto i to tatou uaorai maroiroi, te akakaka ra iaia e te akaari katoa ra i te tu tau meitaki. (1 Petero 4:11) Te taputou maira a Iehova i te oronga mai kia tatou i te maroiroi te umuumuia ra kia rave i tona anoano, inara auraka roa tatou e maro rava ia tatou uaorai i te ka rauka i to tatou au kotinga anga, i te tautaanga i te rave i te au apinga kare aia e manako maira kia rave tatou. (2 Korinetia 4:7) Kia tavini ua atu rai i te Atua ma te kore e akaroiroi ia tatou uaorai, ka anoanoia tatou i te akatuanga meitaki i to tatou maroiroi.

8. Eaa tei tupu i te oronga anga tetai Kerititiano mapu i tona maroiroi katoa ki te ao e kia Iehova katoa, e eaa te tauianga tana i rave?

⁸ Ei akatauanga, ia Ji Hye, e noo ana i Asia Itinga,  e rua ona mataiti i te angaanga anga i roto i tetai angaanga akaaoanga tikai iaia e painia ra. “Kua tauta au i te oronga i toku maroiroi kia Iehova e ki te ao katoa,” i nana ai, “inara e rima ua oku ora e moe ana i te po. I te openga, kare oku maroiroi akaou i te pae manako no te tuatua mou, e kare oku mataora anga i roto i te au apinga pae vaerua.” Kia rauka i te tavini ia Iehova ma tona ‘ngakau, vaerua, manako, e te ririnui katoa,’ kua kimi a Ji Hye i tetai angaanga mama mai. (Mareko 12:30) “Noatu te taomianga mei toku pamiri kia aruaru i te puapinga i te pae moni, kua tauta au i te tuku i te akakoroanga o te Atua na mua,” i karanga ai aia. “Kua rava ua taku moni e koi nei no te au apinga e anoanoia ra, mei te kakau tau. E e meitaki katoa e te moe meitaki nei au! Kua kite mai au i te mataora i roto i taku angaanga orometua, e e maroiroi atu au i teianei i te pae vaerua. Te tumu no te mea kare oki e maata ana toku taime ki te reira au akarekaanga e te au tamanamanataanga o te ao nei.”​—Koheleta 4:6; Mataio 6:24, 28-30.

9. Akapeea ta tatou au tautaanga i te akakeuanga i te au tangata i roto i te ngai tutu anga?

⁹ Kare e rauka i te katoatoa i te tavini i te Atua ei tangata tutu evangeria tamou. Me te aro atura koe i te ruaine anga, te maki, me kore tetai atu au kotingaanga, e akamaara e te ariki rekareka maira a Iehova i toou tiratiratu e i taau tavinianga ua ka rauka ia koe i te oronga atu ma te ngakau katoa. (Luka 21:2, 3) No reira, auraka rava tatou e manako meangiti ua i te puapinga o te akakeuanga o ta tatou au tautaanga ki runga i etai ke, noatu e kua kotingaia te reira. Ei akaraanga, penei e kua atoro atu tatou i nga mea are ua e kua kite mai e kare e tangata e inangaro ana i te akarongo mai ki ta tatou karere. I muri ake i to tatou akarukeanga, penei ka tuatua te au tangata ngutuare i muri roa mai no runga i ta tatou atoro atu anga, noatu me kare e tangata i vai mai ana i te ngutupa kia tatou! Kare tatou e irinaki atu ana e ka ariu meitaki mai te aronga pouroa e akarongo maira i te tuatua meitaki, inara e aronga tetai te ka ariu mai. (Mataio 13:19-23) Penei ka ariu mai tetai atu i muri roa mai me taui ana te au turanga i roto i te ao nei me kore i roto i to ratou oraanga. Noatu e eaa te turanga, na te rave anga i te ka rauka ia tatou i roto i te angaanga orometua, te rave ra tatou i ta te Atua angaanga. “E oa rave angaanga oki [tatou] no te Atua.”​—1 Korinetia 3:9.

10. Eaa te au atianga e tuera maira no te katoatoa i roto i te putuputuanga?

¹⁰ Kapiti katoa atu, ka rauka ia tatou pouroa i te tauturu i to tatou au mema pamiri e to tatou au taeake e te au tuaine pae vaerua. (Galatia 6:10) To tatou akakeuanga meitaki ki runga i etai ke, ka riro ei mea puapinga maata e no te tuatau roa. (Koheleta 11:1, 6) Me rave te aronga pakari e te au tavini tauturu i ta ratou au angaanga ma te maroiroi, te tauturu ra ratou i te turanga pae vaerua e te tu  tinamou o te putuputuanga, e ka akamaata atu te reira i te angaanga Kerititiano. Te akapapuia ra tatou e me “maata [ta tatou] rave anga i te angaanga a te Atu,” kare ta tatou angaanga i te “mea puapinga kore.”​—1 Korinetia 15:58.

Aruaruanga i to te Atua Akakoroanga ei Angaanga

11. I te pae mai i te angaanga kapiti atu anga ki to tatou putuputuanga, eaa tetai atu au atianga te tuera maira kia tatou?

¹¹ Ei au Kerititiano, e mataora ana tatou i te oraanga, e te inangaro ra tatou i te akakaka i te Atua i roto pouroa i ta tatou au apinga e rave ra. (1 Korinetia 10:31) Me akono tiratiratu tatou ia tatou uaorai ki te tutu anga i te tuatua meitaki o te Patireia e te apiianga i tetai ke kia akono i te au apinga katoatoa ta Iesu i akaue mai, ka kite mai tatou i te au mataara puapinga tikai no te tavinianga e tuera maira kia tatou. (Mataio 24:14; 28:19, 20) I te pae i te angaanga kapiti atu anga ki te putuputuanga i to tatou ngai, penei ka rauka ia tatou te au atianga kia tavini atu i te ngai e umuumu maataia ra te tauturu, noatu me i roto i tetai atu ngai tutu anga, reo ke, me kore enua ke. Te aronga pakari e te au tavini tauturu tau tei kare i akaipoipo ake, penei ka patiia kia aere atu ki te Apii Terenianga Orometua, e i muri ake kia tavini atu ki roto i te au putuputuanga e umuumuia ra te tauturu o te au Kerititiano pakari, me i roto i to ratou uaorai enua me kore i tetai enua ke atu. Te au tokorua akaipoipo tei roto i te angaanga orometua tavini, penei ka tau i te aere atu ki te terenianga mitinari Gileada e kia tavini atu ki roto i tetai enua ke. E te inangaro uaia ra rai te aronga tauturu kia rave i te au tu angaanga tukeke i Betela e i te patuanga e te akonoanga i te au ngai uipaanga e te au opati manga.

12, 13. (a) Akapeea koe i te ikianga e teiea au mataara no te tavinianga taau ka aruaru? (e) Akatutu mai e akapeea te kite tei rauka mai i roto i tetai angaanga i riro ei ei puapinga i roto i tetai angaanga ke atu.

¹² Eaa te au tu tavinianga taau ka aruaru? Ei tavini akatapuia no Iehova, kia akara ua rai koe kiaia e ki tana akaaerenga no te aratakianga. Ka tauturu mai tona ‘vaerua meitaki’ ia koe kia akono i te ikianga tau. (Nehemia 9:20) E taki ana tetai tukuanga angaanga ki tetai atu, e taau i kite mai e te au kite karape ka rauka mai i roto i tetai tu tavinianga, penei ka riro ei puapinga katoa i roto i tetai atu tukuanga angaanga i muri mai.

¹³ Ei akatauanga, e angaanga putuputu ana a Dennis e tana vaine, ko Jenny, i runga i te au angaanga no te patuanga i te Are Uipaanga Patireia. I muri ake i te taii atu anga te Uriia Katrina ki te tua tonga o Marike, kua pati atu raua i te tauturu i te aronga e anoano tauturu ra. Te akakite maira a Dennis e: “I te taangaanga anga i te au tu kite karape tei rauka ia maua i te patu anga i te au Are Uipaanga Patireia kia tauturu atu i te au taeake, kua akatupu i te mataora maata kia maua. Te tu arikianga tei akaariia mai e te aronga ta matou i  tauturu atu, e akapumaanaanga tikai ki te ngakau. Te maataanga o te au pupu tauturu ke atu, e iti ua to ratou puapinga i te patu akaouanga. Kua oti i te Au Kite o Iehova i te akaou me kore i te patu akaou e 5,300 au kainga e tere atu e te au Are Uipaanga Patireia e manganui. Kua kite mai te au tangata i teia e kua akaari mai i teianei i te inangaro maata i roto i ta matou karere.”

14. Eaa taau ka rave me ka inangaro koe i te aruaru i te angaanga orometua tamou?

¹⁴ Ka rauka ainei ia koe i te aruaru i ta te Atua akakoroanga na te ikianga i te angaanga orometua tamou ei angaanga tinamouia naau? Me ko te reira ia, papu e ka rauka ia koe te au akameitakianga e manganui. Me kare toou au turanga i teianei e akatika ia koe i te rave i te reira, penei ka rauka tetai tauianga. E pure mei ia Nehemia rai i tona inangaro anga i te apai i tetai angaanga puapinga maata tikai: “E te Atu, . . . e akamanuia mai i ta to tavini.” (Nehemia 1:11) E oti, i te irinakianga ki roto i “tei akarongo i te pure ra,” e tauta i te angaanga kia rotai atu ki taau patianga. (Salamo 65:2) Kia akameitaki a Iehova i taau au tautaanga i te tavini maata atu iaia, ka anoanoia koe na mua kia akono i taua au tautaanga. Me iki ake koe i te apai i te angaanga orometua tamou, e noo rai koe ki taau ikianga. I te aerenga o te tuatau, ka tupu mai toou kite, e ka maata katoa mai toou mataora.

E Oraanga Puapinga Tikai

15. (a) Akapeea tatou i te puapinga anga na te tuatuaanga e te tatauanga no runga i te au tangata tei tavini i te Atua no te au tuatau roa? (e) E taiku mai i tetai tua oraanga tei riro ei akamaroiroianga tikai kia koe.

¹⁵ Eaa te au tupuanga taau ka kite mai mei te aruaruanga i to te Atua akakoroanga? E tuatua atu ki te au tangata tei tavini ia Iehova no te tuatau roa, ki te aronga tikai tei akapou i te au mataiti e manganui ki roto i te angaanga orometua tamou. E oraanga puapinga tikai ta ratou e akono ra! (Maseli 10:22) Ka akakite mai ratou kia koe e kare rava a Iehova i topa ana i te tauturu ia ratou, i roto tikai i te au turanga ngata kia rauka ia ratou te au apinga tikai e anoano ra ratou e te vai atura. (Philipi 4:11-13) Mei te 1955 ki te 1961, kua nenei The Watchtower i te au putunga tua o te au tua oraanga o te aronga tiratiratu i raro i te ingoa “Pursuing My Purpose in Life.” Mei te reira taime mai, e anere ua atu te au tua oraanga tei neneiia. Te akakite maira te tua oraanga tataki tai i te tu maroiroi e te rekareka te akamaara ra ia tatou i te tu tei kiteaia i roto i te puka Pipiria o Angaanga. I te tatauanga i te reira au tua oraanga umere tikai, ka akakeu te reira ia koe kia karanga e, ‘Ko te tu oraanga te reira taku e inangaro ra i te akono!’

16. Eaa te akariro ra i te oraanga o tetai Kerititiano ei akakoroanga tinamou e te mataora?

¹⁶ Te maara nei ia Aaron, tei taikuia i te akamataanga e: “I Aperika, e aravei putuputu ana au i te au mapu tei tikoti aere ua i te enua i te kimianga i tetai akakoroanga i roto i te oraanga. Kare te maataanga i kite mai ana i tetai akakoroanga. Inara teia oki tatou, e aruaru nei i to te Atua akakoroanga na te akakiteanga i te tuatua meitaki o te Patireia, e kua mataora tatou i tetai oraanga pakari e te puapinga tikai. Kua kite meitaki tikai tatou e e maata atu te mataora i te orongaanga i to te rave mai.”​—Angaanga 20:35.

17. Eaa te tumu ka aruaru ei i to te Atua akakoroanga i teianei?

¹⁷ Akapeea koe? Eaa taau akakoroanga e aruaru ra? Me kare aau akakoroanga pae vaerua taka meitaki, ka viviki te au akakoroanga ke atu i te akapou i toou taime e toou maroiroi katoa. Eaa koe ka kaimoumou ei i toou oraanga puapinga ki runga i te ao akatutu ua o te akatereanga o Satani? Kare e roa atu ana, me tupu mai te “mate maata,” ka puapinga kore ua te au apinga nui materia e te au turanga o te ao nei. Ko te apinga puapinga atu koia oki ko to tatou pirianga kia Iehova. Mei teaa tikai to tatou mataora e kua tavini tatou i te Atua e etai ke e kua aruaru pu tikai i to te Atua akakoroanga i roto i to tatou oraanga!​—Mataio 24:21; Apokalupo 7:14, 15.

[Au Tataanga Rikiriki i Raro]

Ka Rauka Ainei ia Koe te Akataka?

• Eaa to Iehova manako i to tatou tavinianga iaia?

• Akapeea te tu tau e te tu tau meitaki i te tauturuanga ia tatou i te tavini i te Atua e etai ke?

• Eaa te au atianga no te tavinianga te tuera maira kia tatou?

• Akapeea tatou i te aratakianga i tetai oraanga puapinga mou tikai i teianei?

[Au Uianga Apii]

[Au Tutu i te kapi 23]

Ka anoano tatou i te tu tau meitaki i te tavini ua atu rai ia Iehova ma te ngakau tae

[Au Tutu i te kapi 24]

E maata te au tu tavinianga i roto i te angaanga tapu