Au Ikianga te ka Arataki ki te Mataora

“INANGARO ua atu au e kua rauka iaku i te akatuke i te au mea taku i rave!” E ia ra taime i tuatua ana koe i taua mea ra kia koe uaorai? Ka inangaro tatou pouroa i te rave i te au ikianga kare e akataitaia ia tatou, i te au ikianga tikai ka akatuke i te tu o to tatou oraanga. Akapeea ra e rauka ai ia tatou te rave i te au ikianga te ka arataki ki te mataora?

Te mea mua, ka anoano tatou i tetai au turanga tau tikai kia irinaki. Te vaira ainei taua au tu turanga ra? Maata te tangata kare e irinaki ana i te reira. Kia tau ki tetai kimikimianga i Marike, e 75 patene o te tamariki koreti kua vaitata i te karatuati tei irinaki e kare e turanga akapera no te tika e te tarevake, e te tu tukeke o te au irinakianga no te meitaki e te kino tei runga ua te reira i te “au tu puapinga tataki tai e te au peu tuketuke.”

Te tau ra ainei te manako e ko te au turanga akono tau tei runga ua te reira i ta tetai uaorai me kore i ta te katoatoa e manako ra? Kare, kare i te mea tau. Naringa e tikaanga to te tangata kia rave i ta ratou uaorai i inangaro, ka tupu te oripu ua. Koai ia ka inangaro i te noo ki tetai ngai kare e ture, kare e are akavaanga, e kare e akava? Tetai, kare to tetai uaorai manako e riro ei aratakianga tau kia irinakiia. Penei ka iki tatou i te rave i tetai mea tei irinaki tatou e kua tika, e i muri ake ra kua kitea mai e kua tarevake tatou. E tika roa e, te akapapu maira te tuatua enua katoa o te tangata i te tika o teia kaveinga Pipiria e: “Kare tei te tangata e aere nei, i te akono i tona uaorai takainga tapuae.” (Ieremia 10:23) Ka aere tatou i reira kiea, no tetai aratakianga i te rave anga i te au ikianga no runga i te au akaaoanga puapinga o te oraanga?

Te tau ua ra te tutara mapu tei taikuia i roto i te atikara i mua ake, kia aere kia Iesu. Mei ta tatou i kite, i te pau anga i te uianga a taua mapu ra, kua taiku atu a Iesu i te Ture a te Atua. Kua kite a Iesu  e ko te Atua ko Iehova te Tumu teitei rava atu o te kite e te pakari e kua kite Aia eaa te mea meitaki rava atu no Tana au mea ora i anga. I reira, kua na ko atura Iesu e: “Kare taku uaorai i taku e apii nei, nana ra, na tei tono mai iaku nei.” (Ioane 7:16) E tika roa e, e tumu irinakiia te Tuatua a te Atua no te aratakianga ka tauturu ia tatou i te rave i te au ikianga tau i roto i te oraanga. Ka akamanako ana tatou i etai au kaveinga ka kiteaia i roto i te Tuatua a te Atua, e me taangaangaia ka akamaata atu i to tatou mataora.

Te Ture Auro

I roto i tana Tuatua rongonui i runga i te Maunga, kua apii a Iesu i tetai kaveinga tumu te ka tauturu ia tatou i te rave i te au ikianga tau i roto i to tatou au pirianga ki etai ke. Teia tana tuatua: “E te au mea katoa ta kotou i anoano ia etai ke ra, na reira katoa kotou ia ratou.” (Mataio 7:12) Teia kaveinga no te tu akono e kapiki putuputuia ana e ko te Ture Auro.

Kua taangaanga ana tetai aronga i te tuatua mei teia rai na roto i te tu tau kore e: “Auraka e rave atu ki etai ke taau kare e inangaro ana kia raveia mai kia koe.” Ei akaari atu i te tuke i rotopu i te Ture Auro e te tu tau kore e taangaangaia ra te reira, ka akamanako ana i te parapore a Iesu no te tangata Samaria. Kua taia tetai tangata ngati Iuda e kua akarukeia kia mate i te pae mataara. Kua kite tetai taunga e tetai tangata ngati Levi iaia inara kua na te pae ua mai iaia e aere atura. No te mea kare a raua apinga i rave atu ana kia maata atu te kino o taua tangata ra, ka karangaia i reira e kua tau to raua tu ki te tua tau kore o te Ture Auro. I tetai tua, kua tapu te tangata Samaria i te tauturu. Kua takai aia i te au putaputa o taua tangata ra e kua apai iaia ki tetai are tapaeanga. Tana i rave no taua tangata ra, ko tana rai ia ka inangaro kia raveia mai kiaia. Kua taangaanga aia i te Ture Auro​—e ko te ikianga tika tana i rave.​—Luka 10:30-37.

E maata ua atu te au mataara ka rauka ia tatou i te taangaanga i teia kaveinga no te tu akono te ka akatupu i te mataora. Peea me neke mai tetai pamiri ou ki toou ngai e noo ra. Kore ei koe aere e aravei ma te ariki atu ia ratou? Penei e tauturu i te akamatau ia ratou ki taua ngai ra e te akono katoa atu i ta ratou au uianga e te au anoano. Na te akaari vave anga na mua i te manako aroa, ka akatupu ia koe i te au pirianga memeitaki ki toou au tangata tupu. Ka rauka katoa ia koe te marekaanga i te kite e ko taau i rave ka akarekareka te reira i te Atua. Kare ainei tera i te ikianga tau?

Au Ikianga tei Akatumuia ki Runga i te Aroa no Etai Ke

Kapiti atu ki te Ture Auro, kua oronga mai a Iesu i tetai aratakianga ke mai te ka tauturu ia koe i te rave i te au ikianga tau. I te uiia atu anga e eaa te akauenga maata roa atu i roto i te Ture a Mose, kua pau atura Iesu e: “‘E aroa atu koe i to Atua ia Iehova ma to ngakau katoa, e ma to meta katoa, e ma to manako katoa.’ Ko te akauenga maata roa atu teia e te mea mua. Te rua, mei te reira rai, koia oki, ‘E aroa atu koe i toou tangata tupu mei te aroa ia koe uaorai.’ Ei runga i teia nei nga ture vai ei te Ture katoa, e te au Peroveta.”​—Mataio 22:36-40, NW.

Te po i mua ake i tona matenga, kua oronga a Iesu i “te akauenga ou,” ki tana au pipi, kia aroa i tetai e tetai. (Ioane 13:34) Eaa aia i karanga ai i taua akauenga ra e e mea ou? E oti akera, kare ainei aia i akamarama ke mai ana e ko te aroa i to ratou tangata tupu tetai o te nga akauenga e rua i vai ei te Ture katoa ki runga? I raro i te Ture a Mose, kua akaueia te ngati Iseraela e: “E aroa ra koe i to tangata tupu mei toou aroa ia koe uaorai na.” (Levitiku 19:18) I teianei ra, kua akaue a Iesu i tana au pipi kia akamaata rava atu i ta ratou ka rave. I taua po rai, kua akakite a Iesu ki tana au pipi e ka oronga aia i tona oraanga no ratou. E oti kua akakite aia kia ratou e: “Teia taku akauenga, kia aroa kotou ia kotou uaorai, mei iaku i aroa ia kotou. Kia oronga te tangata i tona uaorai ora no tona au taunga, kare rava e tangata aroa maata atu i te reira.” (Ioane 15:12, 13) Ae, e akauenga ou roa teia i te mea te umuumu maira te reira i te tuku anga i te au anoano o te au tangata ke na mua ake i toou uaorai.

E maata ua atu te au mataara ka rauka ia tatou te akaari i te aroa karapii kore, na te aere mamao roa atu anga ki vao roa ake i te akono anga i to tatou uaorai au anoano. Ei akaraanga, peea i reira me te noo ra koe i roto i tetai apatimani e kua inangaro koe i te akarongo imene tangi maata ua atu ei ki toou navenaveanga kareka ra  te akariri ra i to taeake i te pae mai. Ka inangaro ainei koe i te akamaru mai i taau tamataora kia noo au ua ana to taeake? Tera te aiteanga, ka tuku ainei koe i te turanga o to taeake na mua ake i toou uaorai?

Ka akamanako ana i tetai turanga ke mai. I tetai ra anu e te maata i te kiona i Kanata, kua atoroia mai tetai tangata pakarikari e tetai nga Kite o Iehova. I te taime e pukapuka ra ratou, kua taiku atu taua tangata ra e e maki pukuatu tona no reira kare e rauka iaia i te akaatea i te kiona i mua i tona kainga. Mei tetai ora i muri mai, kua rongo aia i te parara tuapara. Kua oki mai te nga Kite i te akaateatea i te mataara e te ara kakenga e tae atu ei ki mua i tona ngutupa. “Teia ra kua kite mata tikai au i te aroa Kerititiano mou,” i tata ai aia i roto i tana reta ki te opati manga o te Au Kite o Iehova i Kanata. “Kua akameitaki maata atu te reira e kua taui i toku manako ekoko no runga i te maataanga i te ao o teia tuatau. Kua akaketaketa roa atu te reira i toku akangateiteianga maata tei vai ke ana no ta kotou au tautaanga i teia ao katoa.” Ae, ko te iki kia oronga atu i te tauturu, noatu te akaraanga meangiti, ka akatukia te reira i etai ke na roto i te tu tau. E mataora maata tikai te ka rauka i roto i te rave anga i taua au tu ikianga akaatinga ra!

Au Ikianga Akatumuia ki Runga i te Aroa i te Atua

Tetai tumu ke mai ka tau tatou kia akamanako me rave tatou i tetai au ikianga koia oki ko ta Iesu i akataka mai e ko te akauenga maata roa atu​—e kia aroa tatou i te Atua. I orongaia te au tuatua a Iesu ki te ngati Iuda, no te mea tei roto ke ana ratou i tetai pirianga akatapuia kia Iehova. Noatu ra, kua anoanoia rai te au ngati Iseraela ravarai kia iki e me ka tavini ratou i to ratou Atua ma te ngakau katoa e te aroa ngakau katoa.​—Deuteronomi 30:15, 16.

Mei te reira rai te au ikianga taau ka rave, ka akaata mai te reira e mei teaa tikai toou manako ngakau no runga i te Atua. Ei akatauanga, i toou inangaro akaperepere no te puapinga tau o te Pipiria e maata ua maira, te aro katoa atura koe i tetai ikianga. Ka inangaro ainei koe i te rave putuputu ua rai i tetai apii Pipiria, ma te akakoroanga kia riro mai ei pipi na Iesu? Papu e ka riro te iki anga i te reira ei apai mai i te mataora noou, no te mea kua akakite a Iesu e: “E mataora to te aronga tei manako i to ratou anoano i te pae vaerua.”​—Mataio 5:3, NW

Kare tatou i kite e me kua taitaia rai te tutara mapu i tana ikianga e me kare. Inara, kua kite tatou e eaa te manako o te apotetoro ko Petero i muri ake i te aru anga ia Iesu Karaiti no te au mataiti e manganui. Mei te mataiti 64 T.N., i te openga o tona oraanga e vaitata maira, kua akamaroiroi a Petero i tona au oa irinaki e: “Ka akamaroiroi, kia rokoia mai kotou e [te Atua] ma te au, ma te topata kore, e te apa kore.” (2 Petero 1:14; 3:14) Te taka meitaki ra e kare a Petero i taitaia ana i te ikianga tana i rave i te 30 mataiti tuma i muao, e kua akamaroiroi aia i etai ke kia mou marie ki te ikianga ta ratou i rave.

Te aiteanga o te aru i te ako a Petero koia oki ko te rave i tetai ikianga kia ariki i te au apainga ta te riro anga ei pipi na Iesu e akataka maira, e te akono anga i te au akauenga a te Atua. (Luka 9:23; 1 Ioane 5:3) Ka akaraanga ngata paa teia, inara tei ia tatou te taputou akapumaana a Iesu e: “E aere mai kotou kiaku nei, ko te aronga katoa i  roiroi, e te aronga teiaa i te apainga, naku e akaanga i to kotou roi. Ka rave mai i taku amo ki rungao ia kotou, e kia apiiia kotou e au; te maru nei au, e ngakau akaaka toku, e rauka oki ia kotou te akaangaroianga i to kotou vaerua. Te maru nei taku amo, e te māmā nei taku apainga.”​—Mataio 11:28-30.

Ka akamanako ana i tei tupu kia Arthur. Te tae anga ki te ngauru mataiti, kua akamata a Arthur i te apii akatangi vaiorini, te manako anga no tetai ngai angaanga kite takake. Te tae anga tona mataiti ki te 14, kua akatinamou aia iaia uaorai ei tangata akatangi vaiorini. Noatu te reira, kare rai aia i mataora ana. E au uianga ua rai ta tona papa no runga i te aiteanga o te oraanga e e pati ana i te au puapii akonoanga ki tona kainga; inara kare roa aia e mareka ana i ta ratou au pauanga. Ei pamiri, e uriuri ana ratou e me te vai nei tikai te Atua e no teaa ra aia i akatika ua ai i te kino. I reira kua akamata te papa o Arthur i tetai uriurianga ki te Au Kite o Iehova. Kua mareka tikai te papa o Arthur i taua pukapukaanga, e kua arataki atu te reira ki tetai apiianga Pipiria na te pamiri katoa.

I muri mai, kua marama iora a Arthur mei te au Tuatua Tapu e no teaa te Atua i akatika ua ai i te mamae, e kua kite meitaki iora aia te akakoroanga o te oraanga. Kapiti atu ki e toru au mema o tona pamiri, kua rave a Arthur i tetai ikianga tei kore i riro ei akataitaia iaia. Kua akatapu aia i tona oraanga kia Iehova. “Mataora tikai au e kua akameitaki mai a Iehova iaku ki te kite o te tuatua mou e kua akaora mai aia iaku mei te tu akarere tei matauia i roto i te aronga kite karape i te akatangi imene. Noatu eaa te tu ka rave ua te tangata i tetai ua atu mea, kia puapingaia.”

Te mataora ua nei rai a Arthur i te akatangitangi vaiorini ei tamataora i tona au taeake, inara kare tona oraanga i akatumuia ki runga i te reira. Mari ra kua akatumuia tona oraanga ki runga i tana tavinianga i te Atua. Kua tavini mai ana aia i ko i tetai opati manga o te Au Kite o Iehova. Mei ia Arthur e te au mirioni ua atu, auraka ra mei te tutara mapu apinga maata, ka rauka katoa ia koe te rave i tetai ikianga te ka apai mai i te mataora maata roa atu noou​—koia oki te ariki anga i te patianga a Iesu kia riro ei pipi nana.

[Tutu i te kapi 6]

Taau ikianga e aka tuke ta te reira ka akatupu ki te oraanga o etai ke

[Tutu i te kapi 7]

Kare ainei koe e inangaro i te apii i te Pipiria e kia riro mai ei pipi na Iesu?