“Eaa te Tuatua-Mou?”

KUA uiia ma te tu aviri tera uianga kia Iesu e te Kavana Roma ko Ponotio Pilato. Kare aia e anoano ra i tetai pauanga, e kare a Iesu i pau atu ana iaia. Penei kua kite a Pilato e e ngata te akamarama i te aiteanga o te tuatua mou.​—Ioane 18:38.

Ko teia tu akavaavaa i te tuatua mou te arikiia ra e te manganui anga o te tangata i teia tuatau, kapiti mai te au arataki akonoanga, te aronga apii, e te aronga poritiki. Te irinaki ra ratou e ko te tuatua mou​—i te tu akono tau e te tuatua mou i te pae vaerua tikai​—kare i te tika takiri inara kua akakotingaia e ka taui ua rai. Ko teia, i reira, te manakoanga e ka tau rai e na te tangata uaorai e iki i te mea meitaki e te mea kino. (Isaia 5:20, 21) Te akatika katoa ra i te manakoanga e ka tau te tangata kia kopae i te au tu puapinga e te au akonoanga tau e raveia ana e te au uki tei topa ki muri no te mea kua taito te reira.

Ko te tuatua tei akakeu i te uianga a Pilato, e mea tau kia akara matatioia. Kua tuatua a Iesu e: “I anau mai ei au nei, i aere mai ei au ki te ao nei, e akakite i te tuatua-mou.” (Ioane 18:37) Kare te tuatua mou kia Iesu i te tumu tuatua papu kore, rauka ngata i te akamarama. Kua taputou aia ki tana au pipi e: “Ka kite ïa kotou i te tuatua-mou, e na te tuatua-mou kotou e akarangatira.”​—Ioane 8:32.

Ka kitea te reira tuatua mou kiea? I tetai atianga, kua pure a Iesu ki te Atua e: “Ko te tuatua aau na te tuatua-mou.” (Ioane 17:17) Ko te Pipiria, tei akauruia e te Atua kia tataia, ka akaari mai i te tuatua mou te oronga maira i te aratakianga irinakiia e te manakonakoanga papu tikai no te tuatau ki mua—​te oraanga mutu kore.​—2 Timoteo 3:15-17.

Kua kopae manako kore ua a Pilato i te atianga kia apii i taua tuatua mou ra. Akapeea koe? Eaa koe kore ei e ui atu ki te Au Kite o Iehova e eaa tikai “te tuatua-mou” ta Iesu i apii mai? Ka rekareka ratou i te akakite atu i tera tuatua mou kia koe.