Te Tutara Apinganui tei Rave i Tetai Ikianga Puapinga Kore

E TANGATA tiratiratu te tutara apinganui, e akono i te ture, e te akono atua. I te aere anga kia Iesu, kua tuturi aia ki raro e kua pati iora e: “E te Orometua meitaki, e akapeea au nei e raukaʼi iaku te ora mutu kore?”

I te pau anga, kua akakite a Iesu e e rauka ai te ora ka anoanoia taua tangata ra kia akono i te au akauenga a te Atua. I te patiia atu anga kia akataka meitaki mai, kua na ko maira Iesu e: “Auraka koe e ta ua, Auraka koe e akaturi, Auraka koe e keia, Auraka koe kia riro ei kite pikikaa, E akangateitei i to metua tane, e to metua vaine,” “E aroa atu i to tangata tupu mei te aroa ia koe uaorai.” E au akauenga tumu teia i roto i te Ture tei orongaia kia Mose. I reira kua karanga atura taua tangata ra e: “Kua ope te reira i te akonoia e au, mei toku ou anga mai: eaa ua te toe iaku?”​—Mataio 19:16-20.

Kua akara iora a Iesu iaia kua “aroa atura iaia” e kua na ko atura e: ‘Te toe nei rai tetai mea ia koe; ka aere, ka oko i taau apinga, ka apai atu ei na te putaua, e apinga taau i te rangi i reira: e aere mai oki, ka aru mai ei iaku.’​—Mareko 10:17-21.

I reira rai kua rokoia poitirere uaia taua tutara mapu ra e tetai aka ikianga puapinga. Eaa ra tana ka rave? Ka oronga puareinga ua ainei aia i tona au apinga materia maata kia riro mai ei pipi na Iesu, me ka tapu mai rai aia i tona apinga? Ka umuumu ua atu ainei aia i te au apinga o runga nei te enua, me ka umuumu aia i te au apinga o runga i te rangi? Kare e kore kua riro teia ei ikianga ngata tikai kiaia. Te taka ua ra tona inangaro i te au mea pae vaerua, no te mea kua akono aia i te Ture e kua kimi e eaa akaou atu tana ka rave kia rauka te akaperepereanga a te Atua. Tana i iki? Kua ‘aere atura aia ma te aue, e apinga maata oki tona.’​—Mareko 10:22.

Kare te ikianga a te tutara mapu i te mea pakari. Naringa aia i riro mai ei pipi tiratiratu na Iesu, ka rauka iaia tana e kimi ra​—te ora mutu kore. Kare i akakiteia mai ana kia tatou e eaa tei tupu ki taua mapu ra. Inara kua kite  tatou e, mei te a ngauru mataiti i muri mai, kua akataneaia e te nuku vaeau o Roma a Ierusalema e te maataanga o Iudea. E manganui te au tangata ngati Iuda tei pou to ratou au apinga maata e to ratou au oraanga.

E tuke takiri ra oki te tutara mapu ki te apotetoro ko Petero e etai atu tei rave i te ikianga tau. Kua ‘akaruke ratou i te au mea katoa’ e kua aru ia Iesu. Kua puapinga maata tikai ratou i taua ikianga ra! Kua akakite a Iesu kia ratou e e maata ua atu ta ratou ka rauka mai i ta ratou i akaruke. Ei runga ravao, ka rauka ia ratou te ora mutu kore. Kare ta ratou ikianga e riro ei taitaia anga no ratou a muri mai.​—Mataio 19:27-29.

E au ikianga pouroa ta tatou e aro ana i roto i te oraanga​—ngoie ua tetai papaki, e ngata tetai papaki. Eaa ta Iesu i tuatua mai no runga i taua au tu ikianga ra? Ka ariki ainei koe i tana ako? Na te iki anga kia rave i te reira, ka akameitaki maata roaia koe. Ka akamanako ana tatou i teianei e akapeea tatou me aru ia Iesu e e puapingaia ai mei tana i tuatua.