E Noo ma te Akamanako i Apopo

“AURAKA e apiapi i to apopo,” i tuatua ai a Iesu Karaiti i roto i tana apiianga rongonui i runga i te maunga i Galilea. Kia tau ki te urianga i roto i The New English Bible, kua na ko atu rai a Iesu e: “Na apopo rai e akono iaia uaorai.”​—Mataio 6:34.

Eaa i toou manako te aiteanga o taua au tuatua ra e, “na apopo rai e akono iaia uaorai”? Te karanga maira ainei te reira e kia noo koe no teia ra ua e kia akangaropoina atu i apopo? Te tau tikai ra ainei te reira ki ta Iesu e tana au pipi e irinaki ra?

“Auraka e Apiapi”

I na ka tatau ana kia koe uaorai i te katoaanga o ta Iesu au tuatua te ka kiteaia i roto ia Mataio 6:25-32. I tetai tuanga kua akakite aia e: “Auraka e apiapi i to kotou ora, i ta kotou e kai, e ta kotou e inu, e te kakau no to kotou kopapa. . . . Ka akara na i te au manu o te reva nei: kare ratou i tanu, kare oki i kokoti, kare oki o ratou are kai; na to kotou Metua i te ao ra i angai ia ratou. . . . Koai oki to kotou, e tika kia akaroa atu i tona tu, kia apiapi aia, e okotai ake kubiti? E eaa kotou e apiapi ei i te kakau? Ka maara na i te au lili o te enua, te peea nei to ratou tupu; kare ratou i angaanga, kare oki i iro . . . E teianei, auraka kotou e apiapi ua, ka na ko ei ra, Eaa ua ta matou kia kai? e, Eaa oki ta matou kia inu? e, Eaa to matou kakau kia kakau? (Te kimi ra oki te au etene i taua au mea katoa ra:) kua kite oki to kotou Metua i te ao ra e, kia rauka taua au mea katoa ra ia kotou e tikaʼi.”

Te taopenga ra a Iesu i teia tuanga o tana apiianga ki e rua nga akoanga. Te mea mua: “E na mua ra kotou i te kimi i te basileia o te Atua, e te tuatua-tika nana ra; e kapiti katoaia mai taua au mea katoa ra ia kotou.” Te rua: “E teianei, auraka e apiapi i to apopo ra; na apopo e apiapi i tana uaorai. Ko te rā ko tona uaorai kino, oti ra ua ïa.”​—Mataio 6:33, 34.

 Kua Kite to Kotou Metua i ta Kotou e Anoano Ra

I toou manako e te akaparuparu ra a Iesu i tana au pipi, kapiti mai te aronga tanutanu, mei ‘te tanu, te kokoti, me kore i te akaputu i ta ratou kai ki roto i te are kai’? Me kore mei ‘te angaanga e te iro’ koia oki te taviriviri kia rauka te kakau tei anoanoia e ratou? (Maseli 21:5; 24:30-34; Koheleta 11:4) Papu roa e kare. Me ka akamutu ratou i te angaanga, kare e ekoko e ka taopenga mai ratou i te ‘ori aere ua i te tuatau mou,’ ma te kore e apinga ei kai me kore ei aao.​—Maseli 20:4.

Akapeea no runga i te manako apiapi? Te karanga ra ainei a Iesu e kare takiri tana aronga e akarongo maira e kite i te manako apiapi? Kare te reira i te manako tau. Kua kite ana a Iesu uaorai i te tu ngakau taitaia oonu e te manako apiapi i te po ka opuia ai aia e ka tamateia ai.​—Luka 22:44.

Te akakite tika ua maira a Iesu i tetai tuatua tika puapinga. Kare rava te manako apiapi puapinga kore ua e tauturu ia koe kia autu i tetai ua atu manamanata taau e kite ra. Ei akaraanga, kare te reira e, tauturu ia koe kia roa atu i te ora anga. Kare te reira e “kapiti mai i te okotai kupiti ki [toou] oraanga,” i akakite ei a Iesu. (Mataio 6:27) Ka riro ra te maata o te manako apiapi no te tuatau roa, i te akapoto mai i toou oraanga.

E akoanga tau tikai tana e te takake rava. E maata ua atu te au apinga e apiapi ana tatou te kare rava e tupu ana. Kua kite te tangata poritiki o Peritane ko Winston Churchill i teia no runga i te au tuatau taitaia o te Tamaki II o te Ao. No runga i tetai o tona au manako apiapi i taua taime ra kua tata aia e: “Me akamanako au no runga i teia au manamanata nei e maara ana iaku te tua o te tangata pakari tei akakite i mua ake ka mate ei aia e e maata ua atu te au tu ngata i roto i tona oraanga, te maataanga kare rava i tupu ana.” Te tika ua ra te tu pakari o te akono anga i ta te ra okotai ka apai mai, mei te mea tikai e te riro ra te au taomianga e te au taitaia e kite ra tatou i te akatupu viviki ua i te manako apiapi maata ki roto ia tatou.

‘E na Mua i te Kimi i te Patireia o te Atua’

Inara, e maata atu ta Iesu e manako ra i to te oraanga pae kopapa ua e te pae manako ngakau o tana aronga e akarongo maira. Kua kite aia e ka riro te manako apiapi no runga i te au mea e anoanoia ra no te oraanga, pera katoa te anoano  pakari no te au apinga e te au mea e navenave ei ra, i te akataruri ke mei te au apinga maata atu te puapinga. (Philipi 1:10) Penei ka manako koe e ‘eaa atu ia tei maata atu te puapinga i te rauka anga mai te au mea e anoanoia ra no te oraanga?’ Te pauanga koia oki ko te au mea pae vaerua i roto i ta tatou akamorianga i te Atua. Te apinga maata rava atu i roto i to tatou oraanga, i akaketaketa mai ei a Iesu, koia oki kia ‘na mua i te kimi i te basileia o te Atua, e te tuatua-tika nana ra.’​—Mataio 6:33.

I to Iesu tuatau, e manganui te tangata e umuumu pakari ra i te au apinga materia. Ko te akaputuputu i te apinga nui to ratou akakoroanga maata roa atu. Inara kua raurau a Iesu, i tona aronga e akarongo maira kia akatuke i to ratou manakonakoanga. Ei iti tangata akatapuia ki te Atua, ko ta ratou “apainga” katoa koia oki kia “mataku i te Atua mou e te akono i tana au akauenga.”​—Koheleta 12:13, NW.

Ko te varenga ua ki te au apinga materia​—“te manako apiapi i te au mea o teia akatereanga o te au mea nei e te navenave pikikaa ua o te apinga nui”​— ka riro ei takino i to ratou turanga pae vaerua. (Mataio 13:22, NW) “Te aronga e marō e kia maata te apinga,” i tata ai te apotetoro ko Paulo, “e rokoia ïa e te timataanga, e te ereere, e te anoano neneva e manganui, e kino ei ra, e maremo takiri atu ei te tangata ki roto i te pou e te mate.” (1 Timoteo 6:9) Ei tauturu ia ratou i te kopae i teia “ereere,” kua akamaara atu a Iesu i tana au pipi e kua kite to ratou Metua i te rangi e ka anoano ratou i teia au apinga pouroa. Ka akono te Atua ia ratou mei tana rai e akono ra i “te au manu o te reva.” (Mataio 6:26, 32) Kare e tuku ua atu i te manako apiapi kia akaaere ia ratou, kia rave ra ratou i te au mea pouroa ka rauka ia ratou i te akono i taua au mea ra e oti ka akaruke ei i te au mea ravarai ma te irinaki pu tikai, ki roto ia Iehova.​—Philipi 4:6, 7.

I te tuatua anga a Iesu e “na apopo e akono iaia uaorai,” tera te aiteanga o tana tuatua auraka tatou e akatika i te manako apiapi no runga i te ka tupu apopo kia akamaata atu i to tatou au manamanata o teia ra. Te urianga a tetai Pipiria ke i tana tuatua e: “Auraka e manamanata i to apopo; ka rava ua tona uaorai au manamanata. Eiaa e akamaata atu i te au manamanata ta te au ra tataki tai e apai maira.”​—Mataio 6:34, Today’s English Version.

“Kia Tae Toou Basileia”

Inara e aka tuke maata to rotopu i te kore e manamanata puapinga kore ua i apopo e te kore takiri e akamanako atu i te reira. Kare rava a Iesu i akamaroiroi ana i tana au pipi kia kopae i te akamanako i apopo. Kare roa mari ra, kua raurau atu aia ia ratou kia akamanako meitaki i te tuatau ki mua. Ka tau tika rai ratou kia pure no te au anoano o teianei​—ta ratou kai no te au ra ravarai. Te mea mua ra, kia pure ratou no te au apinga ka tupu i te tuatau ki mua—​no te Patireia o te Atua kia tae mai e no te anoano o te Atua kia raveia i te enua nei.​—Mataio 6:9-11.

Auraka tatou kia riro mei te au tangata o te tuatau o Noa. Kua pou ua to ratou taime i ‘te kaikai e te inu, te akaipoipo, e te orongaia kia akaipoipoia’ e ‘kare rava ratou i kite’ ana i te vaitata anga taua au mea ra i te tupu. Eaa te openga? “E rokoia iora ratou e te diluvi, e ope takiri akera ratou i te mate.” (Mataio 24:36-42) Kua taangaanga te apotetoro ko Petero i taua tupuanga tuatua enua ra ei akamaara ia tatou i te anoano kia noo ma te akamanako i apopo. “E teianei ka pou anake taua au mea katoa nei,” i tata ai aia, “mei te aa ra to kotou tu e tikaʼi i te tuatua tapu e te akono i te Atua; I te tatari anga, e te [“tamou vaitata anga ki te manako,” NW] kia tae mai taua rā o te Atua ra.”​—2 Petero 3:5-7, 11, 12.

Akaputu i te Apinga i te Rangi

Ae kia ‘tamou vaitata tatou ki te manako’ i te ra o Iehova. I te akapera anga ka akameitaki maata roaia atu te mataara e taangaanga ra tatou i to tatou taime, maroiroi, tareni, au apinga, e te tu kite. Eiaa tatou kia varenga ua i te aruaru i te au apinga materia​—i te au mea e umuumuia ra me kore i te au mea navenave o te oraanga​—e meangiti ua rai i reira to tatou taime no te au angaanga e akaata maira i te tu “akono i te Atua.” Penei i te akaraanga te rauka vave maira te puapinga i te akatinamou ua ki teia ra, inara e tuatau poto ua to taua au puapinga ra. E pakari roa atu, i akakite ei a Iesu, kia ‘akaputu i te apinga na [tatou uaorai] ki runga i te rangi’ i to runga nei i te enua.​—Mataio 6:19, 20.

 Kua akapakari mai a Iesu i te manako i roto i tana akatutuanga no runga i tetai tangata tei akatupu i te au parani maata no te tuatau ki mua. Kare te Atua i akamanakoia ana i roto i taua au parani ra. E uua meitaki tikai te enua o taua tangata ra. Kua manako aia e vavai i tona au are kai e kia akatu i te au are mamaata atu kia rauka iaia i te noo marie i tetai oraanga akaangaroi, kia kaikai, kia inu, e kia rekareka marie. Eaa ra te tarevake i te reira? Kua mate aia i mua ake ka kite ei aia i te rekareka no tana angaanga. Tei kino roa atu ra oki, kare i rauka iaia i te akatupu i tetai pirianga ki te Atua. Kua taopenga iora Iesu e: “Ko te tu ïa o te tangata i akaputuputu i te apinga nona uaorai, kare i maata tona apinga i te Atua ra.”​—Luka 12:15-21; Maseli 19:21.

Eaa Taau ka Rave?

Auraka e aru i te tarevake o taua tangata ra ta Iesu i akataka mai. E kimi kia kitea e eaa to te Atua akakoroanga no apopo, e oti ka akamou ei i toou oraanga ki runga i te reira. Kare te Atua i akaruke poiri ua mai i te tangata no runga i tana ka rave. “Kare a te Atu ra a Iehova mea i rave,” i tata ai te peroveta i taito ko Amosa, “mari ra kia akakite i tana tuatua ngaro ki tona ra au tavini ki te au peroveta.” (Amosa 3:7) Ko ta Iehova i akakite ki tona au peroveta ka rauka ia koe i teianei, i roto i tana Tuatua akauruia, te Pipiria.​—2 Timoteo 3:16, 17.

E tai apinga ta te Pipiria e akakite maira koia oki, eaa ta te tuatau e vaitata maira ka apai mai, te ka akatuke takiri i te ao katoa nei na roto i tetai tu kare roa i tupu ana i mua ana. Kua akakite a Iesu e: “E mate maata tei te reira tuatau, kare ïa mei muatangana mai i teianei ao, e tae rava akenei i teianei rā, e kare oki a muri atu.” (Mataio 24:21) Kare e rauka i te tangata i te arai i taua akakoroanga ra. Ae, kare e tumuanga tau no te aronga akamori mou ka inangaro ei i te arai i te reira. No teaa ra? No te mea na teia tupuanga e takore takiri i te au kino katoatoa i runga nei i te enua, e ka apai mai te reira i “te rangi ou e te enua ou,” koia oki i tetai kavamani ou i te rangi e tetai taiate tangata ou i te enua nei. I roto i taua ao ou ra, na te Atua “e orei i te roi-mata [o te au tangata]; e e kore rava te mate, e te aue, e te mii; e te mamae oki, e kore katoa ïa; no te mea kua kore te au mea taito.”​—Apokalupo 21:1-4.

Kare ainei i reira i te mea tau, kia akapou i te taime i teianei i te kimi matatio i ta te Pipiria e tuatua maira no runga i taua tupuanga ra? Ka anoano ainei koe i tetai tauturu i te rave i te reira? E pati i te Au Kite o Iehova kia tauturu ia koe. Me kore e tata ki te aronga nenei o teia makatini. No reira, e akapapu meitaki e kia noo eiaa no teia ra ua mari ra no tetai apopo umere tikai.

[Au Tutu i te kapi 7]

“Auraka e apiapi . . . Na apopo e apiapi i tana uaorai”