“Marekaia Tikai Au i Tana Tautaanga Pakari”

A GÜNTER GRASS, e tangata Tiamani tata e tei re i te Nobel Prize no te Tata Puka i te mataiti 1999, kua nenei i te puka tua nona uaorai i te mataiti 2006. I roto i reira, kua akataka mai aia i te taime i ikiia ai aia ki roto i te tua paruruanga o Tiamani. I roto rai i taua puka ra, te akakite ra aia no tetai tangata tei akanoo i tetai akaraanga puapinga tikai kiaia tei kore roa i ngaropoina iaia tere atu i tetai 60 tuma mataiti. E tangata okotai tera tei akakoromaki i te takinga kino anga no tona akarongo.

I roto i tetai uiuianga tei neneiia ki roto i te nuti pepa o te au ra ravarai ko te Frankfurter Allgemeine Zeitung, kua maara ia Grass teia tangata umere tikai, tei patoi i te taangaanga i tetai apinga tamaki. Kua karanga a Grass e, ko tera tangata “kare aia e kapiti atu ana ki tetai ua atu o te au pupu matauia no te aerenga manako, ei Nazi, ei Communist, me kore ei Socialist. Koia tetai o te Au Kite o Iehova.” Kare e maara ana ia Grass te ingoa o taua Kite ra tei kapiki aia e, ko Kare-matou-e-rave-ana-i-tera. Ko te aronga kimikimi o te Au Kite o Iehova kua akakite mai i taua tangata ra e ko Joachim Alfermann. Kua papaia putuputuia aia e kua taakamaia, e oti kua tukuia atu kia noo koia anake ua. Inara kua vai ngaueue kore a Alfermann e kare rava i taangaanga ana i tetai apinga tamaki.

“Marekaia tikai au i tana tautaanga pakari,” i karanga ai a Grass. “Kua ui au kiaku uaorai e: Akapeea roa ai i rauka ai iaia te akakoromakianga? Akapeea aia i te raveanga i tei reira?” I muri ake i te akakoromakianga i te au tautaanga roa i te akakino i tona tu tiratiratu ki te Atua, kua tukuia atu a Alfermann ki roto i te puakapa tamamaeanga o Stutthof i roto ia Peperuare i te mataiti 1944. I te akamataraangaia i roto ia Aperira mataiti 1945, kua ora mai aia i te tamakianga e kua vai ua atu rai ei Kite tiratiratu no Iehova e tae ua atu ki tona mate anga i te mataiti 1998.

Ko Alfermann tetai o te 13,400 Au Kite​—i Tiamani e i roto i te au enua tei nooia e te Nazi​—tei takinokinoia ei au tutakianga no to ratou akarongo. Kua aru ratou i te aratakianga a te Pipiria, kia vai neutara ua i te angaanga poritiki e te patoi i te taangaanga i tetai apinga tamaki. (Mataio 26:52; Ioane 18:36) Kua tiria atu mei tetai 4,200 Au Kite ki roto i te au puakapa tamamaeanga, e kua mate atu e 1,490. I teia tuatau rai, ko te ikianga ta ratou e rave ra, te riro ra ei mea umere ki te manganui o te aronga kare e ariu atu ana ki to ratou akarongo, inara te marekaia ra e to ratou tu ngaueue kore.

[Tutu i te kapi 32]

Joachim Alfermann