Rekareka i te “Re Anga ma te Punua Mamoe”

I ROTO i tetai reta tana i tata i te mataiti 1971, kua akamanako a Carey W. Barber no runga i te 50 mataiti mua i te angaanga anga na te Atua mou: “E tuke ake rai te meitaki o te au mataiti i roto i te angaanga a Iehova. Te taokotaianga ki tona iti tangata; te paruruanga mei te aronga rave kino o to Satani ao; te manakonakoanga o te autuanga ma te Punua Mamoe, ko Iesu Karaiti; e te akairo papu o to Iehova aroa i te apai kapiti mai i te au maru e te merengoanga oonu tei riro ei paruru i te ngakau e i te oronga mai i te manakonakoanga mou no te autuanga openga.”

E ono mataiti i muri mai, kua akamata te Taeake ko Barber, tetai Kerititiano akatainuia, i te tavini ei mema no te Pupu Akaaere o te Au Kite o Iehova. I roto i taua turanga ra i te 30 mataiti tei aru mai, kua akara mou atu rai aia ki te “re anga ma te Punua Mamoe.” Kua rauka iaia te reira na te vai tiratiratu ua anga e mate ua atu aia i te tae anga tona mataiti ki te 101 i te Tapati, Aperira ra 8, mataiti 2007.​—1 Korinetia 15:57.

Anauia i Peritane i te mataiti 1905, kua papetitoia a Carey Barber i Winnipeg, i Kanata, i te mataiti 1921. E rua mataiti i muri mai kua neke atu raua ko tona maanga ko Norman ki Brooklyn, New York, i te tauturu i tetai angaanga ou. I taua taime ra, te mea ra to Iehova iti tangata ka akamata i te nenei i ta ratou uaorai au puka no te akatotoa anga i te tuatua meitaki o te Patireia ki “te au pa enua ravarai.” (Mataio 24:14) Tetai tukuanga angaanga mua a te Taeake ko Barber koia oki ko te akatere i tetai ngai neneianga meangiti ua. I roto i te au apinga tei neneiia koia ko te au ikuikuanga a te ture no te au oroanga e raveia ra e te Akavaanga Teitei Rava o Marike. Tetai taime i muri mai, kua angaanga te Taeake ko Barber ki roto i te Tipatimani Tavini Anga, i te akamou anga ki runga i te au mea no te putuputuanga e te angaanga tutuanga takapini i te enua.

I roto i taua turanga ra, kua tukatau meitaki te Taeake ko Barber i te mataiti 1948 i te tukuia atu anga aia ei orometua tutaka, te atoro i te au akaputuputuanga e te au putuputuanga i roto i te tuanga opunga pouroa o Marike. Kua akakite aia e e reka tikai aia i te reva ou i roto i te angaanga tutu ki te papuriki. Kua riro teia tukuanga angaanga ei akaaravei i te au taeake e te au tuaine ki te Taeake ko Barber. Kua riro tona tu viviki i te manako e te maroiroi i te angaanga orometua ei mea puapinga i muri mai i tona aere anga ki te Apii Pipiria Punanga Tiaki o Gileada no te 26 o te pupu. I te tuatau o te apii, kua aravei aia i tetai oa apii no Kanata mai, ko Sydney Lee Brewer. I muri ake i te karatuatianga kua akaipoipo raua e kua akapou i to raua orote akaipoipo i roto i tetai tere poto ua i te tavini i te au putuputuanga i Chicago, i Illinois. Kua riro tikai te Tuaine Barber ei tokorua puapinga e ei tumu tauturu mou ki tana tane i te rua ngauru mataiti i te tavini kapiti anga i roto i te angaanga orometua tutaka.

Te aronga tei aravei ana i te Taeake ko Barber e tei kite ana iaia i tona au rau ngauru mataiti ei akaaere tapere e te kotinga me kore i te 30 mataiti tei pou iaia i te angaanga anga e i te tutaka anga ei mema no te Pupu Akaaere ka maara ua rai ia ratou tana au akoanga e te au tuatua akamaroiroi. E tumuanga tau tikai to tatou kia pereperekavana i tona “re anga ma te Punua Mamoe.”