‘Akakakau ia Kotou Uaorai ki te Manako Akaaka’

NO TETAI oire rongonui mai teia tangata. Kua rauka iaia te turanga o te anau mai anga ei tangata Roma e kare e kore no roto mai aia i tetai pamiri rongonui. Ko Saula taua tangata ra, kua rauka iaia tetai o te au apiianga meimeitaki rava atu o te anere mataiti mua T.N. E tuatua ana aia e rua reo e no roto aia i tetai pupu akonoanga ngati Iuda rongonui​—ko te au Pharisea.

Kua matau ua a Saula i te akavaavaa i te au tangata noa ua nei e te akaparau i tona uaorai tu tuatua tika. (Luka 18:11, 12; Angaanga 26:5) Ko te tu rai ia o to Saula au oa Pharisea i te akateitei ia ratou uaorai e e mea inangaro na ratou te turanga papanunui e te au taoonga akangateitei. (Mataio 23:6, 7; Luka 11:43) Penei no te piri ana ki taua au tangata ra i akateitei ei a Saula. Kua kite tatou e e tangata maroiroi aia i te takingakino i te au Kerititiano. Te au mataiti i muri mai, te riro anga aia ko te apotetoro ko Paulo, kua kapiki aia iaia i te mapuanga e e tangata ‘akakino, e te takinga-kino, e te rave kino.’​—1 Timoteo 1:13.

Ae, kua riro mai a Saula ei Kerititiano, ko te apotetoro ko Paulo, e kua taui takiri tona tu. Ei apotetoro Kerititiano, kua akakite akaaka ua aia e e tangata “iti rava [aia] i te iti i te aronga tapu ravarai.” (Ephesia 3:8) E tangata tutu evangeria meitaki tikai aia, inara kare aia i apai ana i te akangateiteianga nona uaorai. Mari ra, kua oronga pouroa aia i te akangateiteianga ki te Atua. (1 Korinetia 3:5-9; 2 Korinetia 11:7) Na Paulo oki i ako atu i te au oa Kerititiano e: “Ka akakakau ia kotou uaorai ki te ngakau aroa ua, te takinga meitaki, te manako akaaka, te tu maru, e te akakoromakianga roa.”​—Kolosa 3:12, NW.

Te tau ra ainei taua akoanga ra no to tatou nei 21 anere mataiti? E puapinga ainei to te taakaaka? E akairo tika tikai ainei te tu akaaka no te tu toa?

 E Akaaka Ainei te Mana Katoatoa Tei Anga Mai?

No tetai ua atu uriurianga no runga i te tu akaaka kia akamanako uaia rai to te Atua manako. No teaa ra? No te mea koia to tatou Mana Ngateitei e koia Tei Anga mai ia tatou. Me akaaiteia atu kiaia, ka anoanoia tatou kia ariki i to tatou uaorai au kotinga. Te irinaki nei tatou ki runga iaia. “I te Mana katoatoa ra, kare i kitea e tatou kia kimi: tei maata i te mana,” i tuatua ai te tangata pakari ko Eliu. (Iobu 37:23) Ae, ka riro te akamanako ua anga i te ao maata e pini ua ake ia tatou ei tupuanga taakaaka tikai! “Ka nānā na i to kotou mata ki runga, ka akara,” i pati maira te peroveta ko Isaia. “Naai te reira i anga? te arataki ra aia i taua au nuku ra ki vao ma te tatauia: kua tapa anakeia to ratou au ingoa e ia; no tona ra ririnui, e te mana maata, i kore ei tetai i ngaro.”​—Isaia 40:26.

I te pae mai i tona mana katoatoa, e akaaka katoa te Atua ko Iehova. Kua pure te Ariki ko Davida kiaia e: “Kua oronga katoa mai koe kiaku i te paruru ora naau: e na toou [“tu akaaka,” NW] i maataʼi au.” (2 Samuela 22:36) E akaaka te Atua i roto i te tu e te akamanako maira aia i te au tangata akaaka ua e tauta ra i te akamareka iaia, e te akaaroa maira ia ratou. Mei te mea rai e te piko maira a Iehova mei te rangi, i te takinga meitaki anga i te aronga i mataku i te Atua.​—Salamo 113:5-7.

E mea akaperepere katoa na Iehova, te tu akaaka o tona au tavini. Kua tata te apotetoro ko Petero e: “E patoi te Atua i tei nengonengo, e oronga mai i te meitaki no tei akaaka.” (1 Petero 5:5) To te Atua manako no runga i te parau, kua akakite tetai tata Pipiria e: “Te rikarika rā Iehova i te aronga katoa i parau te ngakau ra.” (Maseli 16:5) Akapeea ra i riro ei te tu akaaka ei akairo no te tu toa?

Te Mea Kare i te Tu Akaaka

Kare te tu akaaka i aiteite ki te tu taakamaia. I roto i tetai au peu taito, tei matauia ko te tangata akaaka, e tuikaa​—e tangata taparuparu, puapinga kore, moraro ua. I tetai tua, te akaketaketa maira te Pipiria e ka akatupu mai te manako akaaka i te tu ngateitei. Ei akatauanga, kua tata te tangata pakari e: “Te tutaki o te taakaaka e te mataku ia Iehova, ko te apinga nui ïa, ko te ngateitei ïa, ko te ora ïa.” (Maseli 22:4) E i roto ia Salamo 138:6, ka tatau tatou e: “Teitei ua rai a Iehova, ka akono mairai aia i tei akaaka; kareka te nengonengo ra, ei te mamao ke aia e akara mai ei.”

Kare te aiteanga o te taakaaka e kare o tetai tu kite me kore kare ana apinga e rauka i te rave. Ei  akaraanga, kare rava a Iesu Karaiti i tuatua ana e kare aia i te Tamaiti anau tai na Iehova, e kare rava aia i akapikikaa ua ana e kare tana angaanga orometua i te enua nei i te mea puapinga. (Mareko 14:61, 62; Ioane 6:51) E oti akera kua akaari a Iesu i te tu akaaka na te oronga anga i te akangateiteianga ki tona Metua e na te taangaanga anga i tona mana ei tavini e ei tauturu i etai ke e kare ei tutara e ei akatinai mate ia ratou.

E Akairo no te Tu Toa

Kare roa e ekoko e, kua kiteaia a Iesu Karaiti ki tona au taeake na roto “i te au angaanga mana.” (Angaanga 2:22) Kareka i roto i te mata o tetai aronga, koia “tei akaaka roa atu i o te tangata nei.” (Daniela 4:17, NW) Kare aia i noo anake ua i tetai oraanga akatietie kore mari ra kua apii putuputu katoa aia i te puapinga o te tu akaaka. (Luka 9:48; Ioane 13:2-16) Tera ra, kare tona tu akaaka i akaparuparu ana iaia. E tu mataku kore tikai tona i te paruru anga i te ingoa o tona Metua e i te akatupu anga i tana angaanga orometua. (Philipi 2:6-8) I roto i te Pipiria, kua akatutuia mai a Iesu ei riona ngakau toa. (Apokalupo 5:5) Te akaari maira te akaraanga a Iesu e te rotai ra te tu akaaka ki te tu toa tau e te maroiroi.

Ia tatou e tauta ra i te tatanu i te tu akaaka tika tikai, ka kite tatou e ka anoanoia te tauta pakari i roto i te akariro anga i te manako akaaka ei tuanga no te oraanga. Te o maira te kauraro ua rai ki te anoano o te Atua auraka ra te aru i te arataa ngoie ua kare e patoianga me kore e tuku ua atu ki te au anoano o te kopapa. No te akatupu i te tu akaaka ka inangaroia te tu toa tau, no te mea ka anoanoia tatou kia vaoo i to tatou uaorai au anoano kia rauka i te tavini ia Iehova e te au anoano o etai ke ma te karapii kore.

Te Au Puapinga o te Tu Akaaka

Ko te tu akaaka ka o mai te rangatiraanga mei te tu parau me kore te ngakau parau. Te taangaanga ra te au Tuatua Tapu i te tuatua “manako akaaka” ei akataka mai i te reira. (Ephesia 4:2, NW) E tupu mai ana te aerenga manako akaaka na te akara matatio tikai anga ia tatou uaorai​—to tatou au ngai maroiroi e te paruparu, te au mea i puapingaia ai tatou e tei puapinga kore. Kua oronga mai a Paulo i te akoanga meitaki no runga i teia i tona tata anga e: ‘Teia taku tuatua kia kotou eiaa e maata te manako iaia uaorai, i tei tau iaia kia manako; ka akono tikai ra i te manako.’ (Roma 12:3) Tetai ua atu e aru ra i taua ako ra te akaari maira aia i te tu akaaka.

E kitea katoaia mai ana te tu akaaka me tuku tatou ma te ngakau tae i te anoano o etai ke i runga atu i to tatou. I te akauruangaia, kua ako atu a Paulo i te au Kerititiano e: “Auraka takiri e mea e raveia ma te taumāro, e te akanengonengo puapinga kore; [“ei manako akaaka ra ma te akamanako e i maata atu etai ke ia tatou,” NW].” (Philipi 2:3) Te rotai ra teia ki te akauenga a Iesu ki tana au pipi e: “E tei rai i roto ia kotou nei, ei tavini ïa no kotou. Te akateitei iaia uaorai, e akamoraroia ïa; e te akamoraro iaia uaorai, e akateiteiia ïa.”​—Mataio 23:11, 12.

Ae, ka arataki te manako akaaka ki te akangateiteianga i mua i te aroaro o te Atua. Te akaketaketa maira te pipi ko Iakobo i taua manako ra i tona tata anga e: “Ka taakaaka na kotou ki mua i te aroaro o te Atu, e nana kotou e akateitei.” (Iakobo 4:10) Koai ra te ka kore e inangaro kia akangateiteiia e te Atua?

Kua riro te ngere i te tu akaaka i te akatupu i te oripu maata e te manamanata i rotopu i te au pupu tangata e i rotopu i te au tangata tataki tai. I tetai tua, kua riro te taakaaka ei akatupu mai i te au tupuanga memeitaki. Ka rauka ia tatou te pumaana no te akaperepereanga a te Atua. (Mika 6:8) Ka rauka ia tatou kia rekareka i te  manako au no te mea e ngoie atu no te tangata akaaka kia mataora e kia mareka ua, i te tangata nengonengo. (Salamo 101:5) Ka ngoie atu e ka mareka roa atu to tatou au pirianga ki te pamiri, te au taeake, te au oa, e etai ke atu. Ko te aronga akaaka ka kopae ratou i te pekapeka e te taumaro, e tu te ka taki vave atu ki te riri, te ke, te makitakita, e te akamoupuku.​—Iakobo 3:14-16.

Ae, e mataara meitaki tikai te tatanu anga i te manako akaaka no te akamou marie i te au pirianga memeitaki ki etai ke. Ka tauturu te reira ia tatou i te aro atu anga i te au akaaoanga o tetai ao kaipenu, e te akarere. Ma te tauturu a te Atua, kua autu te apotetoro ko Paulo ki rungao i te tu akateitei e te parau tei tupu kiaia i mua ana. Kia akapera katoa tatou, i te takore atu i tetai ua atu tu manako nengonengo me kore i te aerenga manako e e meitaki atu tatou i etai ke. “Ko te parau to te mate ra na mua, e te ngakau nengonengo ra, to te inga ïa na mua,” e akamatakite maira te Pipiria. (Maseli 16:18) Na te aru anga i te akaraanga e te ako a Paulo, ka kite ia tatou i te pakari o te ‘akakakau anga ia tatou uaorai ki te manako akaaka.’​—Kolosa 3:12, NW.

[Tutu i te kapi 4]

Kua autu a Paulo ki rungao i te tu akateitei e te parau

[Tutu i te kapi 7]

Ka tauturu te manako akaaka ia tatou i te akamou marie i te au pirianga memeitaki ki etai ke

[Akameitakianga no te Tutu i te kapi 5]

Anglo-Australian Observatory/David Malin Images