Kimianga ki Roto i ‘te Au Mea Oonu o te Atua Ra’

‘E kimi oki te vaerua i te au mea katoa nei, e te au mea oonu o te Atua ra.’​—1 KORINETIA 2:10.

1. Eaa tetai au tuatua mou Pipiria te akatupu ra i te mataora ki te aronga apiipii Pipiria ou?

E MAARA ana i te maataanga ia tatou i roto i te putuputuanga Kerititiano i to tatou mataora i to tatou apii mua anga i te tuatua mou. Kua kite mai tatou i te puapinga o te ingoa o Iehova, eaa te tumu i akatika ua ai aia i te mamaeanga, eaa tetai pae tangata ka aere ei ki te rangi, e eaa ta te tuatau ki mua e oronga maira no te au tangata tiratiratu ravarai. Penei kua akara ana tatou ki roto i te Pipiria i mua atu ana, inara kua uunaia te reira au apinga mei ia tatou, mei tei uunaia mei te maataanga o te tangata ravarai. Mei tetai tangata rai tatou e akara atura i te akau na roto i te tai. Ma te kore e apinga tauturu i te akara, kare aia e kite atu i te au apinga manea i raro i te tai. Inara ma te tauturu o tetai titia tai me kore tetai poti e io to raro, ka mataora aia i te kite atu no te taime mua i te au toka karakara, te au ika, e te au remu, e tetai atu au mea umere. Mei te reira katoa rai, i te akamataanga tetai tangata i te tauturu ia tatou kia marama i te au Tuatua Tapu, kua rauka ia tatou i ta tatou kite anga mua o ‘te au mea oonu o te Atua ra.’​—1 Korinetia 2:8-10.

2. Eaa te mataora i te apiianga mei te Tuatua a te Atua ka openga kore ei?

² Ka merengo ua ainei tatou ma tetai kite i rungarunga ua no te tuatua mou Pipiria? Ko te tuatua ‘te au mea oonu o te Atua ra’ te kapiti maira te maramaanga i te kite o te Atua e akakiteia maira ki te au Kerititiano na roto i te vaerua tapu inara tei uunaia ki etai ke. (1 Korinetia 2:7) Kare to Iehova pakari i kotingaia e ka kite mai tatou i te mataora maata i te kimikimianga i tana au ravenga! Kare rava tatou e kite i te au  apinga pouroa no runga i te kite pakari o te au arataa a te Atua. Te mataora ta tatou i kite mai i to tatou kite mua anga i te au tumu apiianga Pipiria ka vai ua rai ki roto ia tatou me kimi tamou ua atu rai tatou i ‘te au mea oonu o te Atua ra.’

3. Eaa tatou ka anoano ei i tetai maramaanga taka meitaki no te au tumu o to tatou au irinakianga?

³ Eaa tatou ka anoanoia ai kia marama i te reira “au mea oonu”? I te maramaanga kare anake ua i ta tatou e irinaki ra mari ra i te tumu i irinaki ei tatou i te reira​—te au akatumuanga o to tatou au irinakianga​—e akamaroiroi ana i to tatou akarongo e te irinakianga papu tikai. Te akakite maira te au Tuatua Tapu kia tatou kia taangaanga i to tatou “mana no te akamanako anga” “kia taka tikai [kia tatou uaorai] i to te Atua ra anoano, tei meitaki, e te tau, e te apa kore oki.” (Roma 12:1, 2, NW) I te maramaanga i te tumu i pati mai ei a Iehova ia tatou kia akono i tetai tu oraanga, ka akaketaketa i to tatou akakoroanga kia akarongo kiaia. No reira, ka oronga mai te kite no “te au mea oonu” i te maroiroi kia tatou i te patoi i te piri atu ki roto i te au angaanga tau kore e ka akakeu ia tatou kia “maroiroi i te au angaanga memeitaki ra.”​—Tito 2:14.

4. Eaa te o maira i te apii Pipiria?

⁴ I te maramaanga i te au mea oonu, te umuumuia ra te apii. Inara, kare te apiianga e aite atu ki te tatau tika ua anga i tetai apinga. Te kapiti maira te reira i te akara matatio anga i te akakiteanga kia kitea e akapeea te reira i te piri atu anga ki ta tatou i kite ke ana. (2 Timoteo 1:13) Te o maira te akamanakoanga i te au tumuanga no runga i tei akakiteia mai. Kapitiia mai i roto i te apii Pipiria ko te akamanako oonuanga e akapeea tatou i te taangaanga i ta tatou i kite mai i te akonoanga i te au ikianga pakari e te tauturu anga i etai ke. Pera katoa, i te mea e kua ‘akauruia te tuatua tapu katoa i tataia ra e te Atua, e e mea meitakiia,’ ka tau tatou kia kapiti mai i “te au mea katoa ra no roto mai i te vaa o te Atua ra” ki roto i ta tatou apii. (2 Timoteo 3:16, 17; Mataio 4:4) E angaanga pakari te apii i te Pipiria! Inara e mea mataora katoa te reira, e kare ‘te au mea oonu o te Atua ra’ e ngata roa ana i te marama.

Tauturu a Iehova i Tei Akaaka kia Marama

5. Koai te ka marama i ‘te au mea oonu o te Atua ra’?

⁵ Noatu e kare koe i kite ana i te apii e kare koe i matau i te apii, auraka koe e manako e kare koe e marama i ‘te au mea oonu o te Atua ra.’ I te tuatau o ta Iesu angaanga orometua i te enua nei, kua akakite mai a Iehova i tetai maramaanga no Tana akakoroanga, kare ki te aronga pakari e te kite, mari ra ki te aronga tangata apii koreia e te noa ua oki tei akaari i te tu akaaka kia apiiia e te tavini o te Atua. Mei te tamariki rai ratou me akaaiteia atu ki te aronga tei apiiia i roto i te au apii. (Mataio 11:25; Angaanga 4:13) No runga i te au mea “ta te Atua ïa i vaio no te aronga i inangaro iaia ra,” kua tata te apotetoro ko Paulo ki tona au taeake irinaki e: ‘Kua akakite maira te Atua ia tatou i taua au mea ra i tona vaerua: e kimi oki te vaerua i te au mea katoa nei, e te au mea oonu o te Atua ra.’​—1 Korinetia 2:9, 10.

6. Eaa te aiteanga ia 1 Korinetia 2:10?

⁶ Akapeea te vaerua o te Atua i te kimianga ‘i te au mea katoa nei, e te au mea oonu o te Atua ra’? E kia oronga ua ki te Kerititiano tataki tai i tetai eeuanga no te tuatua mou, kua taangaanga a Iehova i tona vaerua kia arataki i tana akaaerenga, ko tei oronga ki to te Atua iti tangata taokotaiia i tetai maramaanga i te Pipiria. (Angaanga 20:28; Ephesia 4:3-6) Takapini i te ao  nei, e rekareka ana te au putuputuanga katoatoa i tetai porokaramu aiteite no te apii Pipiria. No te au mataiti e manganui, kua uriuri ratou i te katoaanga o te au apiianga Pipiria. Kua angaanga te vaerua tapu na roto i te putuputuanga kia tauturu i te au tangata i te akono i te tu e anoanoia ra i te marama i ‘te au mea oonu o te Atua ra.’​—Angaanga 5:32.

Eaa te O Maira ki ‘te Au Mea Oonu o te Atua Ra’

7. Eaa te manganui o te tangata i kore ei i marama i ‘te au mea oonu o te Atua ra’?

⁷ Auraka tatou e manako e e ngata ua ana i te marama i te “au mea oonu.” E uunaia ana te kite no ‘te au mea oonu o te Atua ra’ mei te maataanga o te tangata, kare no te mea e e ngata rava te kite pakari o te Atua i te rauka anga mai, mari ra no te mea te akavare ra a Satani i te tangata kia patoi i te tauturu ta Iehova e oronga maira na roto i Tana akaaerenga.​—2 Korinetia 4:3, 4.

8. Eaa te au apinga oonu ta Paulo e taiku ra i roto i te pene toru o tana reta ki to Ephesia?

⁸ Te akaari maira te pene toru o te reta a Paulo ki to Ephesia e te kapiti maira i roto i ‘te au mea oonu o te Atua ra’ te au tuatua mou e manganui ta te maataanga o te iti tangata o Iehova e marama meitaki ra, mei te akatakaanga o te Uanga taputouia, te ikianga i te aronga mei rotopu i te iti tangata ma te manakonakoanga no te rangi, e te Patireia o te Mesia. Kua tata a Paulo e: ‘Ko tei kore i akakiteia mai ki te tangata i te au uki i muatangana ra, mei tei akakiteia mai e te vaerua i teianei ki tana au aposetolo tapu ra e te au peroveta nana ra; E ei aronga tuanga katoa te au etene, ei kapitianga okotai rai, e kia rauka katoa tei tuatuaia mai e ia i te Mesia.’ Kua karanga a Paulo e kua akaueia aia kia “akakite ki te au tangata ravarai i te kapitianga o te tuatua ngaro, i uunaia mei muatangana mai o teianei ao i roto i te Atua.”​—Ephesia 3:5-9.

9. Eaa i riro ei ei tikaanga kia marama i ‘te au mea oonu o te Atua ra’?

⁹ Kua akamarama atu a Paulo i te anoano o te Atua ‘kia akakite i te ekalesia i teianei te pakari tumatatini o te Atua i te ao ra.’ (Ephesia 3:10) E puapinga katoa ana te au angera na te akara anga e te marama anga i te kite pakari o Iehova i roto i tana au raveanga ki te putuputuanga Kerititiano. E tikaanga manea tikai to tatou kia marama i te au apinga ta te au angera e inangaro katoa ra i te kite! (1 Peteroo 1:10-12) E oti, kua karanga a Paulo kia aruaru tatou i te ‘kite ma te aronga tapu katoa ra, i te tipoto, e te tiroa, e te oonu, e te teitei’ o te irinakianga Kerititiano. (Ephesia 3:11, 18) Ka akamanako ana tatou i teianei i tetai au akaraanga o te au mea oonu te ka akamaata atu i to tatou maramaanga.

Au Akaraanga o te Au Mea Oonu

10, 11. Kia tau ki ta te au Tuatua Tapu, i naea a Iesu i riro mai ei e ko te tuanga mua o te “uanga” a te “vaine” a te Atua i te rangi?

¹⁰ Kua kite tatou e ko Iesu te tuanga mua o te “uanga” a te “vaine” a te Atua i te rangi ra, te taikuia ra ia Genese 3:15. Kia akamaata atu i to tatou maramaanga, penei ka ui tatou e: ‘I naea a Iesu i riro mai ei e ko te Uanga taputouia? I te tuatau ainei i mua ake i tona riro anga mai ei tangata, i tona anau mai anga ei tangata, i tona papetitoanga, me kore i tona akatuakaouia anga ainei?’

¹¹ Kua taputou te Atua e ko te tuanga o tana akaaerenga i te rangi, te taikuia ra i roto i te totou e ko tana “vaine” ia, ka anau mai i tetai uanga te ka akaparuparu i te mimiti o te ovi. Inara kua pou te au tauatini mataiti, e kare te vaine a te Atua i anau mai ana i tetai uanga te ka rauka i te takore ia Satani e tana au angaanga. Tei tupu, kua kapiki te totou a Isaia iaia e ko “tei pa” e kua “aue tona ngakau.” (Isaia 54:1, 5, 6) I te openga ra, kua anauia a Iesu i Betelehema. Inara i muri ua ake i tona papetitoanga, i tona akatainuangaia e te vaerua kia riro mai ei tamaiti vaerua na te Atua, i karanga ai a Iehova e ko: ‘Taku Tamaiti teia.’ (Mataio 3:17; Ioane 3:3) I te openga iora kua oronga te tuanga mua o te “uanga” a te vaine iaia uaorai. I muri mai, kua akatainu e kua akatapu katoaia te au pipi e te vaerua tapu. No tetai tuatau roa kua manako te “vaine” a Iehova iaia uaorai e mei tetai vaine “kare i anau,” inara i te openga iora kua rauka iaia i te ‘maeva atu.’​—Isaia 54:1; Galatia 3:29.

12, 13. Eaa te au irava e akaari maira e ko te au Kerititiano akatainuia i runga nei i te enua “te tavini akono meitaki e te pakari”?

 ¹² Te rua o te akaraanga no te au mea oonu tei akakiteia mai kia tatou, tei runga te reira i ta te Atua akakoroanga kia iki e 144,000 mei rotopu i te au tangata ravarai. (Apokalupo 14:1, 4) Kua ariki tatou i te apiianga e ko te au Kerititiano akatainuia i runga nei i te enua i roto i tetai ua atu tuatau, “te tavini akono meitaki e te pakari” ta Iesu i karanga ai e te oronga ra i te “kai” ki tona ngutuare. (Mataio 24:45) Eaa te au irava Pipiria e akapapu maira e kua tano rai teia akamaramaanga? Peneiake te taiku ra a Iesu ki tetai ua atu Kerititiano tei akamaroiroi i tona au taeake ma te kai pae vaerua?

¹³ Kua akakite te Atua ki te pa enua o Iseraela e: “Ko kotou toku kite, e toku tavini i ikiia e au ra.” (Isaia 43:10) Inara ia Nisana 11 i te mataiti 33 T.N., kua akakite a Iesu ki te au arataki o Iseraela e kua kopae te Atua i to ratou pa enua ei tavini Nona. Kua karanga aia e: “E apai keia te basileia o te Atua nei ia kotou, e tukuia atu ki te aronga e akaua mai i te ua ra.” Kua karanga a Iesu ki te reira pupu tangata e: “I na, kua vaio taneaia to kotou nei are.” (Mataio 21:43; 23:38) Ei tavini no Iehova, kare te ngutuare o Iseraela i tiratiratu ana e kare katoa i akono meitaki ana. (Isaia 29:13, 14) I muri mai i taua ra rai, i to Iesu uianga e: “Koai te tavini akono meitaki e te pakari?” te ui tikai ra aia e, ‘Ko teiea pa enua akono meitaki te ka pau atu ia Iseraela kia riro mai e ko ta te Atua tavini tiratiratu?’ Kua oronga mai te apotetoro ko Paulo i te pauanga i tona karanga anga ki te putuputuanga o te au Kerititano akatainuia e: ‘E kau taunga ariki kotou, e iti-tangata tapu, e aronga okoia.’ (1 Petero 1:4; 2:9) Kua riro mai te reira iti tangata pae vaerua, “te Iseraela o te Atua,” e ko te tavini ou o Iehova. (Galatia 6:16) Mei te mea e kua riro te au mema pouroa o Iseraela taito ei “tavini” okotai, ko te au Kerititiano akatainuia i runga nei i te enua i tetai ua atu tuatau “te tavini akono meitaki e te pakari” okotai. E tikaanga manea tikai e kua rauka ia tatou i te “kai” na roto i te tavini o te Atua!

Ka Mataora te Apii Uaorai

14. Eaa te apii Pipiria, kare i te tatau ua anga, ka mataora atu ei?

¹⁴ Me akakiteia mai kia tatou i tetai maramaanga ou no te Tuatua Tapu, kare ainei e e mataora ana tatou i te tu e akamaroiroi ana te reira i to tatou akarongo? No reira te apii Pipiria, kare i te tatau ua anga, ka mataora atu ei. No reira, me tatau koe i te au puka Kerititiano, e ui koe kia koe uaorai e: ‘Akapeea teia akamaramaanga i te aite atu anga ki taku i marama ke ana no runga i te reira tumu manako? Eaa tetai atu au irava Tuatua Tapu me kore au maroanga taku e maara nei te ka turuturu maata rava atu i te au taopenga anga te orongaia maira i roto i teia atikara?’ Me te umuumu akaouia ra tetai kimikimianga, e tata koe i te uianga ka inangaro koe kia pauia, e e akariro i te reira tumu manako ei apiianga no te tuatau ki mua.

15. Eaa te au apiianga ka mataoraia, e akapeea te reira i te riroanga ei mea puapinga tikai?

¹⁵ Eaa te apiianga te ka oronga mai kia koe i te rekareka no tetai kite ou? Te au apiianga mei tetai akara matatio anga i te au tu koreromotu ta te Atua i papau atu no te puapinga o te au tangata ravarai e mea mataoraia. Ka rauka ia koe i te akaketaketa i toou akarongo na te apiianga i te au totou te tou atura kia Iesu Karaiti me kore tetai uriurianga o te au irava o tetai o te au puka totou o te Pipiria. Ei akaketaketa katoa i te akarongo, ko te akara akaou anga i te tuatua enua o te Au Kite o Iehova i teia tuatau nei, i te taangaanga anga i te puka Jehovah’s Witnesses​—Proclaimers of God’s Kingdom, me ka rauka ia koe teia puka i roto i toou reo. * E te uriuri akaou  anga i te au itiu takere o te “Au Uianga a te Aronga Tatau” tei neneiia i roto i Te Punanga Tiaki, papu ei e ka arataki ia koe ki tetai maramaanga meitaki atu o tetai au irava tikai. E akamanako meitaki i te akamaramaanga o te Tuatua Tapu e taangaangaia ra kia taeria te au taopenga anga e orongaia maira. Ka tauturu teia ia koe i te tereni i toou “kite ngakau” e kia akatupu i te tu kite. (Ebera 5:14, NW) Ia koe e apii ra, e tata i te au manako ki raro, penei i roto i taau uaorai kopi o te Pipiria me kore i runga i tetai vaanga pepa kia riro taau apii ei mea puapinga tikai kia koe e ki taau aronga e tauturu ra.

Tauturu i te Aronga Ou kia Mataora i te Apii Pipiria

16. Akapeea koe i te tauturuanga i te au mapu kia mataora i te apii Pipiria?

¹⁶ E maata ta te au metua ka rauka i te rave kia akakeu i te inangaro pae vaerua o ta ratou tamariki. Auraka e manako kore i te kite karape o te au mapu kia marama i te au mea oonu. Me oronga koe i tetai tumu tuatua ki te au tamariki ei kimikimianga, i te teateamamaoanga no tetai apii Pipiria a te pamiri, ka rauka ia koe i te ui kia ratou e eaa ta ratou i tamou mai. I roto i te apii pamiri, ka rauka katoa i te kapiti mai i te au tuatau akamatauanga kia tauturu i te au mapu kia apii i te paruru i to ratou akarongo e kia akapapu e ta ratou e apii ra e mea tika tikai. E pera katoa, ka rauka ia koe i te taangaanga i te poroutia “See the Good Land” * kia apii i te au enua o te Pipiria e kia akataka meitaki i ta kotou e tatau ra i roto i ta kotou tatauanga Pipiria i te epetoma.

17. Eaa tatou ka anoanoia ai kia tau meitaki i ta tatou au apiianga uaorai o te Pipiria?

¹⁷ Ka riro te au apiianga uaorai no runga i te Pipiria ei mataora tikai e te akamaroiroi ra i te akarongo, inara e akamatakite e auraka e tuku i te reira kia akakore i te tuatau o taau akapapaanga no te au uipaanga putuputuanga. Ko te au uipaanga tetai ravenga akaou e ikuiku ana a Iehova ia tatou na roto i “te tavini akono meitaki e te pakari.” Inara, penei ka tauturu tetai atu au kimikimianga ia koe i te akono i te au paupauanga puapinga maata i ko i te au uipaanga​—ei akaraanga, i te au Apii Puka a te Putuputuanga me kore i te taime o te tatauanga Pipiria i te epetoma no te Apii Orometua Teokaratiki.

18. Eaa i puapingaia ai te tautaanga kia apii i ‘te au mea oonu o te Atua ra’?

¹⁸ Ka tauturu te apiianga oonu i te Tuatua a te Atua ia koe kia akapiri vaitata atu kia Iehova. I te akaarianga i te puapinga o te reira apiianga, te karanga ra te Pipiria e: “E akapuanga oki tei te pakari, e akapuanga tei te moni; teia ra te meitaki o te pakari, na taua pakari oki e oronga mai i te ora i te aronga pu ra.” (Koheleta 7:12) No reira, te tautaanga e umuumuia ra kia akaoonu i toou maramaanga o te au mea pae vaerua, e mea puapinga tikai. Te taputou maira te Pipiria ki te aronga e kimi tamou ra e: ‘Ka rauka ia koe te kite i te Atua.’​—Maseli 2:4, 5.

[Au Tataanga Rikiriki i Raro]

Ka Rauka Ainei ia Koe te Akataka?

• Eaa ‘te au mea oonu o te Atua ra’?

• Eaa ka kore ei e akaotianga ki ta tatou apiianga o te au apinga oonu?

• Eaa te mataora i te maramaanga i ‘te au mea oonu o te Atua ra’ i tuera ai ki te au Kerititiano katoatoa?

• Akapeea koe i te puapinga maata atu anga mei ‘te au mea oonu o te Atua ra’?

[Au Uianga Apii]

[Tutu i te kapi 28]

I naea a Iesu i riro mai ei e ko te Uanga taputouia?

[Tutu i te kapi 31]

Ka rauka te au metua i te oronga i te au tumu manako ki ta ratou au tamariki no te kimikimianga i te teateamamaoanga no te apii pamiri