Kua Kite Au i te Irinaki Pu Tikai ki Roto ia Iehova
Tua Oraanga
Kua Kite Au i te Irinaki Pu Tikai ki Roto ia Iehova
Akakiteia e Aubrey Baxter
Tetai aiai Maanakai i te mataiti 1940, kua ta tetai nga tangata iaku, na te moto mai anga iaku e topa atura au ki runga i te one. Te tu ua maira e rua nga akava i te pae mai, inara kare i tauturu mai ana iaku kua tuatua akakino mai ra, e oti kua akameitaki atu i nga tangata akakoro kino. I akamata mai te au mea tei tupu i roto i toku oraanga e tei taki atu ki teia ravenga kino mei te rima mataiti i mua atu, iaku e angaanga ra i roto i tetai maina ko ngarau. I na kia akamarama atu au.
KO AU te toru o e a tamaroa, i anauia au i te mataiti 1913 i Swansea, e oire i te pae tai i New South Wales, i Autireria. Te tae anga toku mataiti ki te rima, kua rokoia te katoatoa i to matou pamiri e te maki matakuia koia te puru Paniora, tei tamate e mirioni ua atu au oraanga i te ao katoa. Te mea mataora ra kua ora pouroa mai matou. Inara i te mataiti 1933, kua tupu te tumatetenga i te mate anga a Mama e 47 ona mataiti. E vaine akono Atua, e i muao kua rauka mai iaia e rua nga voriumu o te puka Light, e tauturu no te apiianga Pipiria e tua aereia ra e te Au Kite o Iehova.
I taua taime ra, te angaanga ra au i roto i te maina ko ngarau. No te mea i tetai au taime e maata te angaanga i ko i taku ngai angaanga, e i tetai au taime e muteki ua, no reira e apai ana au i nga puka ki te angaanga e ka tatau ei na te turama anga ki te mori i tamouia ki runga i toku pare kumete. Kare i roa ana kua kite mai au e kua kitea e au te tuatua mou. Kua akamata katoa au i te akarongorongo ki te au apiianga Pipiria e akakiteia maira e te Au Kite na roto i te ratio. Ei akamaata roa atu i toku rekareka, kua akamata a Papa e toku teina e nga tuakana i te inangaro i te tuatua mou o te Pipiria.
I te mataiti 1935 kua tupu akaou tetai tumatetenga i te rokoia anga toku teina a Billy, e te nimonia e kua mate. E 16 rai ona mataiti. Inara i teia taime, kua riro te manakonakoanga o te tuakaouanga ei akapumaana i toku pamiri. (Angaanga ) Kia pou tetai tuatau, kua akatapu a Papa e toku nga tuakana ko Verner raua ko Harold, e pera katoa ta raua nga vaine i to ratou oraanga ki te Atua. I roto i toku pamiri tikai ko au ua te ora nei. Inara, te ora nei rai te rua o ta Verner vaine ko Marjorie, e te vaine a Harold ko Elizabeth, e te maroiroi nei rai i roto i te angaanga a Iehova. 24:15
Apii i te Irinaki ki Roto ia Iehova
No muri mai i te mataiti 1935 i aravei ei au i te Au Kite o Iehova no te taime mua i te tapae mai anga tetai vaine Ukarania na runga i te patikara ki to matou kainga. I te Tapati tei aru mai, kua tae au ki taku uipaanga Kerititiano mua, e e tai epetoma i muri mai, kua piri atu au ki tetai pupu no te angaanga orometua. Kua oronga mai te Kite e akaaere ra i te uipaanga no te angaanga tutuanga i tetai au puka rikiriki e ki toku aka poitirere, kua tonoia atu au ko au anake rai! I ko i taku ngutupa mua, e aka ru tikai toku e vare ua atu au e kia tuera te enua e kia apuku atu iaku! Inara e oaoa ua te tangata ngutuare e kua ariki mai i te puka.
E akakeuanga oonu tikai ta te au irava mei ia Koheleta 12:1 e Mataio 28:19, 20 i akatupu ki runga iaku, e kua inangaro au kia riro mai ei painia, me kore ei orometua tamou. Kua turu mai a Papa i taku ikianga. Noatu kare i papetitoia ake, kua akataka au kia akamata i te ra 15 o Tiurai i te mataiti 1936. I taua ra ra, kua aere atu au ki te opati manga o te Au Kite o Iehova i Sydney, te ngai i patiia mai ei au kia angaanga kapiti ki tetai pupu painia e 12 i Dulwich Hill te oire i vao mai ia Sydney. Kua akamatau ratou iaku ki te taviri akataka rima ua no te titona ta te au painia e taangaanga ra i taua taime ra ei maani varaoa kia akaiti mai te oko o te kai.
Painia Anga i Roto i te Vao Tita
I muri ake i toku papetitoanga i muri mai i taua mataiti ra, kua tukuia atu au ki te tuanga maata o Queensland ma tetai nga painia e rua—ko Aubrey Wills raua ko Clive Shade. Ta matou au apinga ko te vani o Aubrey, e au patikara, e tetai ponikarapu ei akatangi aere i te au apiianga Pipiria, e kie tei riro ei kainga no matou no te toru mataiti tei aru mai, e toru roi, e kaingakai, e tetai pani auri ei tunu kai. Tetai aiai noku te taime i te tunu kai, manako au i te akapapa i tetai kaikai “manea tikai” tei kairoia te vetitaporo ki te poreti. Inara kare okotai ia matou i rauka ana i te kai i te reira. E oroenua ra tetai i te pae mai i na kua oake atu au i te reira nana. Kua ongi ua aia i te reira, takiri i tona katu e kua aere atu! Te openga rai ia i toku kite tunu kai.
I te taime tei aereia, kua manako matou e e akatuanga i ta matou ngai e angaanga ra ki roto i e toru tuanga, e tai tuanga i te tangata okotai kia viviki i te oti. I te openga o te ra, e mamao roa ana au mei to matou puakapa i te oki mai ki te kainga, e i tetai au taime e moe atu ana au i te po ki ko i tetai au tangata maoraora i vao i te oire. Tetai taime i moe au ki runga i tetai roi manea i roto i te pia manuiri o tetai pama puakatoro, e i tera mai po i takoto ua au ki runga i te taua repo o tetai kapakapa no te aronga arumaki kangakuru (kangaroo) e te au putunga kiri manu pe. E moe putuputu ana au ki roto i te ngangaere. E tai taime, kua koropiniia au mei te ngai mamao mai e te au puakaoa taetaevao (dingos), ka mataku rai koe i ta ratou aue akaevaeva i roto i te poiri. I muri ake i taua po kare au i varea ana e te moe, kua kitea mai e au e kare ko au ta ratou e inangaro maira mari ra ko te au toetoenga kiko manu tei titiriia ki te pae ua mai.
Tutu Anga na Runga i te Motoka Akatangi
Kua taangaanga meitaki tikai matou i te motoka akatangi ei akakite i te Patireia o te Atua. I te oire maata o Townsville i te tua tokerau o Queensland, kua
akatika te akava ia matou kia noo ki roto i te tuanga maata o te oire. Inara kua riro te apii tei rekotiia ei akariri i tetai au mema o te Salvation Army, tei akakite mai e kia aere matou. I to matou patoi anga, e toko rima ia ratou tei aere mai i te ruru i to matou vani. I taua taime ra tei roto au e akataka ra i te au apinga akatangi! Akara anga kare i te mea meitaki kia maro atu i to matou tikaanga, i reira i te akaatea anga taua au tangata ra, kua akaruke matou i taua ngai ra.I Bundaberg kua oronga mai tetai tangata tei akakeuia, i tetai poti kia matou kia rauka ia matou i te akatangi atu mei te Kauvai Burnett, e tae ra na roto i te oire. Kua akatika atu a Aubrey raua ko Clive na runga i te poti ma te au apinga akatangi e kua noo mai au ki ko i te are ta matou i tarau. Taua po ra, kua tangi pu ua te rekoti o te reo ririnui o Joseph F. Rutherford mei te ngai maata mai o te Au Kite o Iehova, na roto ia Bundaberg, i te akakite i te karere ririnui a te Pipiria. E mea papu roa e, e au taime mataora tikai te reira tei anoanoia te tu mataku kore e te akarongo o te iti tangata o te Atua.
Maata Atu te Au Akaaoanga ta te Tamaki i Akatupu
I muri ua ake i te akamata anga te Tamaki II o te Ao i roto ia Tepetema mataiti 1939, kua uriuri The Watchtower o Noema 1 i te aiteanga o te turanga neutara Kerititiano i roto i te porotiki e te tamaki. I muri mai, kua rekareka tikai au e kua riro mai taua apiianga puapinga ra ei tauturu maata iaku. Inara, e toru mataiti i muri ake i te angaanga kapiti anga, kua tae mai ta matou au tukuanga angaanga keke ko Aubrey, ko Clive, e au. Kua akataoongaia au ei akaaere tutaka i te tua tokerau o Queensland, e tukuanga angaanga tei riro ei timata putuputu ua rai i toku irinakianga i roto ia Iehova.
I roto ia Aukute i te mataiti 1940, kua tavini au i roto i te putuputuanga i Townsville, e a painia i reira—ko Percy raua ko Ilma Iszlaub * e tungane e te tuaine ko Norman raua ko Beatrice Bellotti. E ono mataiti i muri mai, kua riro mai a Beatrice ei vaine akaipoipo naku. Tetai aiai Maanakai i te oti mai anga tetai pupu o matou i te akakitekite i te pae mataara, i tupu ei te taanga tei taikuia atu i te akamataanga. Inara kua riro teia tu tau kore, ei akamaroiroi roa atu iaku i roto i te angaanga a Iehova.
E rua nga tuaine, ko Una raua ko Merle Kilpatrick, e rave maroiroi ra i te angaanga tutu aere i te tua tokerau. E tai ra tei mataora tikai au i te angaanga kapiti anga kia raua i roto i te angaanga orometua, e kua pati mai raua iaku kia oe ia raua ki tetai tua mai i te kauvai ki te kainga o tetai pamiri tei inangaro i te apii. Tera i reira ka kau au ki ko i te poti tei tapekaia ki tetai tua mai, oe akaou mai, e oti ka apai ei nga tuaine ki tetai tua. Kareka kia tae atu au ki ko i te poti, kare ua e oe! Kua kite matou i muri mai e kua unaia e tetai tangata patoi. Inara kare tana ravenga i tapu ana ia matou. E maata toku au mataiti i angaanga ana ei tangata tauturu i te aronga maremo e te maroiroi nei rai au i te kau. I reira kua takai au i te taura tutau ki runga i toku kopu, kua kika atu i te poti ki tetai tua mai i te nga tuaine, e oti kua kika akaou mai ia raua. Kua akameitaki mai a Iehova i ta matou au tautaanga, no te mea kua riro mai taua pamiri ra tei inangaro i te apii ei Au Kite i muri mai.
Raro i te Marumaru o Iehova
No te au akakoroanga paruru, kua tuku te au vaeau i tetai arai mataara vaitata ua mai ki te oire
ko Innisfail. No te mea te noo ra au i reira, ka tikaia au kia tiki i te au pepa akatika no te tomo ki roto i te oire, tei riro ei mea puapinga maata me atoro mai te au komono no ko i te opati manga o te Au Kite o Iehova. Me apai ia ratou ki tetai tua mai i te arai mataara, e uuna ana au ia ratou ki roto i tetai ngai ngaro i raro ake i te nooanga o muri i toku motoka.E vaitoia ana te penitini i taua taime ra, e e maata te au apinga akaoro e apinga maani gas tei tukuia ki roto. E rauka ai te akakututu i te matini, ka akangote mai teia apinga i te gas mei roto i te ngarau vera. Me aere au i te po e apai ana au i tetai au pute ngarau tei apapaia ki runga ake i te ngai e pipini ra te taeake i roto. Me tapu i te ngai i araiia te mataara, e akavarenga ana au i te au tiaki na te vaoo anga i te matini kia taka viviki ua e na te akapapu anga e kia vera kino ua atu ei te ngai vairanga ngarau. “Me tamate au i te matini,” i ava maata atu ei au ki te au tiaki i tetai o taua au po ra, “ka kanga au i te vaito no te kairo anga i te gas e te matangi, e e ngata tikai i te akamata akaou.” No te mareka kore i te vera, te turituri, e te auai repo, kua akara viviki ua te au tiaki i te motoka e oti kua tuku ia matou kia aere.
I taua tuatau ra, kua tukuia atu au kia akaaere i tetai uruoaanga i Townsville no te Au Kite i reira. Te vaitoia ra te kai, e e rauka mai ei ta matou e anoano ra ka inangaroia tetai akatikaanga mei te akavanui i reira. I taua taime ra, te uri aere ia ra to tatou au taeake Kerititiano ki roto i te are auri no to ratou turanga neutara. No reira i te pati anga au kia aravei i te akavanui, kua akamanako au e me, ‘E tu pakari ainei teia, me te tatiaeae ua atu nei au i te taika?’ Noatu ra, kua aere atu rai au mei tei akaueia mai.
Iaia e noo ra i muri i tetai kaingakai maatamaata, kua pati mai te akavanui iaku kia noo ki raro. I te akakite anga atu kiaia i te akakoroanga o toku tere, kua maitu iora aia e kua akara matariki ua mai iaku. E oti kua akamaru mai e kua ui mai e, “Eaa te maata o te kai taau ka inangaro?” Kua oake atu au i te papaanga no nga mea apinga iti ua tei anoanoia tikai. Kua akara aia i te reira e kua karanga mai e: “Akara anga kare e rava. E ngari ake paa e tataki rua atu matou i te reira.” Kua akaruke au i tona opati, ma te akameitaki oonu ia Iehova, koia i apii mai iaku i tetai apiianga akaou o te irinaki i roto iaia.
I roto ia Tianuare mataiti 1941 kua araiia te angaanga a te Au Kite o Iehova i Autireria. E maata te tangata tei tarotokaka ia matou e tei akaapa katoa mai e te aroro ra matou no te Tiapani! Tetai taime, e rua nga motoka ki i te au akava e te au vaeau tei tomo poiri ua ki roto i te Pama Patireia, e potonga enua i runga i te Atherton Plateau ta matou i oko mai ei tanu kai. E mori pata tikinara ta ratou e kimi ra tei tapepeia e te taangaanga ra matou ei tuku tikinara ki te enemi. Kua akaapa katoaia matou i te tanu i te koni na roto i te tu o te tukuanga karere muna te ka rauka ua kia tatauia mai mei runga i te pairere! Inara e pikikaa ua rai teia au tapepeanga.
No te araianga, kua anoanoia matou kia matakite—e kia kikite ma te karaperape—me tua i te au puka. Ei akaraanga, i te tukuia mai anga te puka Children, kua rave mai au e tai pia i Brisbane, kua aere atu ki te tua tokerau na runga i te rerue, e kua vaoo i tetai au puka i te au ngai tapuanga e putuputuanga to reira. Ei akavarenga i te aronga tutaka o te akava e te vaeau kia kore e vai i te pia, kua apai au i tetai keke koi punupunu e kua tapekapeka i te reira ki runga i te pia i mua ake ka tae atu ei. Noatu e mama ua, kare rava taua ravenga ra e puapinga kore ana. Ki te rekarekaanga o to Iehova iti tangata, ko te araianga—tei akatakaia e te akavaanga o te ture e “kare i tau i te ture, kare i kimi meitakiia, e te teiaa”—kua takoreia te reira i roto ia Tiunu mataiti 1943.
Kapikiia no te Angaanga Vaeau
I te mataiti i muao, kua kapikiia mai a Aubrey Wills, Norman Bellotti, e au no te angaanga vaeau. Kua otaia mai a Aubrey raua ko Norman e tai epetoma i mua ake iaku e kua akautungaia e ono marama i roto i te are auri. I taua taime ra, kua raveia e te opati mere te au makatini Watchtower tei tukuia ki te Au Kite tei matau uaia, kare ra i raveia te au mea tei tukuia ki tetai aronga tatau ke atu. Ta matou angaanga koia oki kia kimi i tetai o teia au tangata, kopi mai i te au makatini, e ka tua ai i te au kopi ki te au taeake Kite. Na roto i teia mataara, kua rauka putuputu ua rai ta matou kai pae vaerua.
I te tukuia mai anga taku utunga ono marama, i reira rai kua tuku atu au i tetai patianga patoi i te reira, mei tei ikuikuia mai e te opati manga i Sydney. To matou akakoroanga kia akaroa atu i te
tuatau e tukuia mai ei te utunga e na te rauka roa mai anga tetai tangata ei akono i te angaanga. Kua taangaanga au i toku turanga rangatira i te atoro i tetai papaki o te Au Kite e 21 tei akamouauriia i te tua tokerau o Queensland. Tei roto te maataanga i te are auri okotai, e ko te tiaki i reira e makitakita tikai aia ia matou. I te akamaara atu anga au iaia e te atoro ua maira te orometua o te au akonoanga ke i to ratou au tangata i reira, kua riri tikai aia. “Naringa tei iaku te tika,” i vaa maata mai ei aia, “ka akatupati pouroaia te Au Kite o Iehova kia pupuiia!” Kua taki viviki atu te au tiaki iaku ki vao.I te tae anga te taime no taku patianga no te oroanga, kua rauka mai toku roia mei tei akaueia e te ture. Ko te tikaanga ra oki, naku rai i rave i taku oroanga, tei anoanoia kia irinaki mou tikai ki runga ia Iehova. E kare rava aia i akataitaia ana iaku. (Luka 12:11, 12; Philipi 4:6, 7) Te mea umere, kua puapingaia te patianga no te mea kua kiteaia mai tetai au tarevake o te karaka i roto i te au pepa akaapaanga!
I te mataiti 1944, kua tukuia atu au ki tetai kotinga maatamaata tei kapiti katoatoa mai te tua Tonga o Autireria, te tua tokerau o Victoria, e te oire maata o New South Wales ko Sydney. Tera mai mataiti, kua raveia tetai kamupeini i te ao katoa no te tuatua anga ki te papuriki, e kua anoanoia te au vaa tuatua katoatoa kia akapapa i tana uaorai akoanga, i te akatumu anga i te reira ki runga i tetai papaanga okotai ua kapi tei orongaia atu. Kua riro te oake anga i tetai akoanga no te okotai ora i te akatupu mai i tetai akaaoanga ou, inara kua rave rai matou i te reira ma te irinaki pu tikai ki roto ia Iehova, e kua akameitaki mai aia i ta matou au tautaanga.
Akaipoipoanga e te Au Apainga Ou
I roto ia Tiurai mataiti 1946, kua akaipoipo maua ko Beatrice Bellotti, e kua tavini kapiti maua ei nga painia. To maua kainga e karavani me kore e terera rakau. Anauia ta maua tamaine okotai rai ko Jannyce (Jann), i roto ia Titema mataiti 1950. E maata te au ngai i painia ai maua, kapiti mai i te oire ko Kempsey, i New South Wales, i reira ko matou ua rai te Au Kite. Te au Tapati pouroa e aere ana matou ki ko i te are uipaanga o te oire, e kua papa ua au i te oake i tetai akoanga ki te papuriki ta matou i akakite takere ana na roto i te au vaanga pepa. No etai au marama ko Beatrice ua rai raua ko te pepe ko Jann te nga tokorua i reira. Inara i muri ua mai, kua akamata tetai aronga i te aere tataki tai mai. Teia tuatau e rua o Kempsey nga putuputuanga uua e vai nei.
Te tae anga a Jann ki te rua mataiti, kua akanoo ua matou ki Brisbane. I te pou anga tona tuatau aere apii, kua painia kapiti matou ei pamiri no e a mataiti i New South Wales i te oire ko Cessnock i mua ake ka oki akaou ei ki Brisbane i te tauturu i te mama maki o Beatrice. I teia taime nei, kua rauka iaku te tikaanga manea no te tavini anga ei tangata pakari i roto i te Putuputuanga o Chermside.
Akameitaki tikai maua ko Beatrice ia Iehova no tana au akameitakianga openga kore, tei kapiti mai i te tikaanga manea o te tauturu anga e 32 tangata kia kite iaia. Noku uaorai, te akameitaki nei au ia Iehova no taku vaine akaperepere, noatu te maru e te muteki ua, e mataku kore ra aia i te tamaki no te tuatua mou o te Pipiria. Kua riro tona aroa no te Atua, tona irinakianga i roto iaia, e tona ‘mata ngoie ua’ ei akariro iaia ei vaine e ei metua vaine akono meitaki tikai. (Mataio 6:22, 23, NW; Maseli 12:4) Kapiti mai iaia, ka rauka iaku kia tuatua ma toku ngakau katoa e: “E ao to te tangata e irinaki kia Iehova.”—Ieremia 17:7.
[Tataanga Rikiriki i Raro]
^ para. 19 Tei roto te tua oraanga o Percy Iszlaub i te itiu o Me 15, mataiti 1981, o teia makatini.
[Tutu i te kapi 9]
Kua taangaanga matou i teia motoka akatangi i te tua apatokerau o Queensland
[Tutu i te kapi 10]
Tauturu anga i te nga tuaine Kilpatrick i te apai i to raua apinga akaoro i te tuatau ua i te tua apatokerau o Queensland
[Tutu i te kapi 12]
To maua ra akaipoipoanga