Te Akaaoanga o te Tu Akaaka

KI TE tangata e manganui, penei i te akara anga kare paa o te tu akaaka puapinga i roto i te ao o teia tuatau. Te aronga e akatere ra e tei akara anga e ko te mea puapinga roaia atu, ko te aronga akateitei ia ia ratou uaorai, te ngakau parau, te aronga tei maro kia tau ki to ratou uaorai anoano. E noinoi ana te maataanga o te tangata i te tu oraanga o te aronga apinga nui e te rongonui, kare ra i to te aronga akaaka e te maru. E inangaro ua ana te aronga tei puapingaia i te akapaapaa e no to ratou uaorai maroiroi i puapingaia ai ratou. Kare e taakaaka mari ra, kua apai rai ratou i te akameitakianga no ratou uaorai.

Kua tuatua tetai tangata kimikimi i Kanata no runga i te “akamataanga o te tu akaparau e ‘ko au ua ake’” i tona enua. Te manako ra tetai aronga e te noo nei tatou i roto i tetai taiate tei puapinga roa atu toku uaorai anoano i to te apainga e te kite ra e te maata ua atura te tangata i teia tuatau i te manako ua ia ratou uaorai. I roto i taua tu ao ra, i te akara anga kare te tu akaaka i te tu inangaroia.

E tika, e iti ua rai te kare e akatika ki te manako e te meitaki ua ra te tu akaaka no tetai aronga, i te mea e ngoie ua i te noo kapiti e te aronga akatietie kore. Inara, i roto i to tatou ao akarere, te mataku ra tetai papaki e me e tu akaaka to ratou, ka manako mai tetai aronga e e paruparu ratou.

Kua totou te Tuatua a te Atua, te Pipiria e, i to tatou nei tuatau e riro te tangata ei “akatietie, ei nengonengo.” (2 Timoteo 3:1, 2) Kare ainei koe e akatika e te akatupuia nei teia totou? Te kite ra ainei koe i te puapinga o te taakaaka? Me kore penei te manako ra koe e ko te tangata akaaka ka karangaia aia e e tangata paruparu, e te ngoie ua i te akavare?

Te oronga maira ra te Pipiria i te au tumu tau no te akaperepere e te tatanu i te tu akaaka. Te oronga maira te reira i te manako tau e te papu no taua tu ra e te akaari maira e ko te tu akaaka mou tikai e akairo te reira no te tu toa, kare no te tu paruparu. Ka akamarama mai te atikara e aru mai nei e no teaa ra.

[Tutu i te kapi 3]

Eaa ra to tatou manako ngakau no runga i te au mea puapinga ta tatou i rave?