“Ariki Mai i Taku Apinga Aroa, Ine”

KO TEIA au tuatua kua tataia ki roto i tetai reta tei tae mai ki te opati manga o te Au Kite o Iehova i Rutia. Kua aru mai teia reta i tetai aka pia maatamaata kua ki i te au pea totini uruuru.

Kua akauia mai teia apinga aroa e Alla e 67 ona mataiti, koia tetai o te Au Kite o Iehova e tavini ra i roto i tetai putuputuanga i te Itinga Mamao o Rutia. I tavini ana a Alla ia Iehova no tetai ngauru tuma mataiti, i te rave maroiroi anga i te tutuanga i te nuti meitaki o te Patireia. Inara, kua maki poitirereia aia e kua akamate takiri tetai tuanga o tona kopapa. No tei akakeuia e te aroa, ina, kua aru a Alla i te mataara te aite atura ki tetai vaine Kerititiano o te anere mataiti mua ko Doreka, tei tui i te au kakau no tona au taeake akarongo.​—Angaanga 9:36, 39.

I roto i tana reta, kua tata a Alla e: “Kare toku nga vaevae e angaanga ana inara te angaanga nei rai toku nga rima. No reira e tutu aere ana au na te tata reta anga.” Kua karanga katoa aia e: “Kua akamanako mai au, e i toku nga rima e angaanga nei rai, ka taviriviri au i tetai au pea totini maanaana. Ka inangaro au i teia au totini kia orongaia atu no te au taeake e te au tuaine te ka aere ka akatu i te au Are Uipaanga Patireia i te au ngai anu, mei te Itinga Mamao e Tiperia.”

No runga i tana au pipi mou tikai, kua tuatua a Iesu Karaiti e: “Ko te mea teia e kite ei te tangata katoa e e pipi kotou naku, kia aroa kotou ia kotou uaorai.” (Ioane 13:35) Ko te aroa mei ta Alla rai i akaari ko te akairo akatakaanga ia no te au pipi mou a Iesu.