Aru i te Tangata Maata no te Akariroanga i te Tangata ei Pipi

“E matakite i to kotou akarongo anga.”​—LUKA 8:18.

1, 2. Eaa koe ka akamanako ei e i akapeea a Iesu i te akono anga i te tangata i roto i tana angaanga orometua?

TE AKATUPU ra a Iesu Karaiti i tana tuanga ei Puapii Maata e te Tangata Akariro i te Tangata ei Pipi i tona karanga anga ki tana au pipi e: “E matakite i to kotou akarongo anga.” (Luka 8:16-18) Te tau ra te reira kaveinga ki taau angaanga orometua ei Kerititiano. Me akamanako meitaki koe i te ikuikuanga pae vaerua, ka taangaanga koe i te reira e ka puapinga koe ei tangata tutu i te Patireia. E tika, kare koe e rongo i te reo o Iesu i teia tuatau, inara ka rauka ia koe i te tatau i tana i tuatua e i rave, mei tei akakiteia mai i roto i te au Tuatua Tapu. Eaa ta te reira e akakite maira no runga i te tu i akono ei a Iesu i te tangata i roto i tana angaanga orometua?

² E tangata tutu evangeria meitaki tikai a Iesu no te tuatua meitaki e e puapii takake rava no te tuatua mou a te Tuatua Tapu. (Luka 8:1; Ioane 8:28) Te angaanga no te akariroanga i te tangata ei pipi, te o katoa maira te tutu anga e te apiianga, inara e kite mai ana tetai pae Kerititiano e aronga tutu evangeria meitaki ratou, i te tu ngata i te apii meitaki atu i te au tangata. I te mea e te o maira i roto i te tutu anga te akakiteanga i tetai karere, tei matauia, i te apiianga i te tangata no runga ia Iehova e tona au akakoroanga, te o maira e kia akatupu tetai tangata e akariro ra i te tangata ei pipi, i tetai pirianga kia ratou. (Mataio 28:19, 20) Ka rauka teia i te raveia na te aruanga ia Iesu Karaiti, te Puapii Maata e te Tangata Akariro i te Tangata ei Pipi.​—Ioane 13:13.

3. Me aru koe ia Iesu, akapeea te reira i te akakeuanga i taau au tautaanga kia akariro i te tangata ei pipi?

³ Me aru koe i te au ravenga a Iesu no te apiianga, te aru ra koe i te akoanga a te apotetoro ko Paulo e: “Ei aerenga akono meitaki to kotou i te aronga ki vao ra, ma te taporoporo oki i te tuatau. Ei tuatua aroa ua anake ta kotou, kia rapakauia i te tai, i te kite anga i te mea tika kia tuatua atu ki te tangata katoa ra.” (Kolosa 4:5, 6) I te aruanga ia Iesu i roto i te angaanga akariroanga i te tangata ei pipi, te anoanoia ra te tautaanga, inara ka akapuapinga atu te reira i taau apiianga no te mea ka tauturu te reira ia koe kia ‘kite i te mea tika kia tuatua atu ki te tangata katoa ra’ kia tau ki tona uaorai anoano.

 Kua Akamaroiroi a Iesu i Etai Ke kia Tuatua

4. Eaa ka rauka ai kia karangaia e e tangata akarongo meitaki a Iesu?

⁴ Mei te tamarikianga mai, e angaanga matau na Iesu i te akarongo ki te au tangata e te akamaroiroi ia ratou kia akakite mai i to ratou au manako. Ei akaraanga, e 12 ona mataiti, kua kite mai tona nga metua iaia i rotopu i te au orometua i roto i te iero, “te akarongo atura e te ui atura kia ratou.” (Luka 2:46) Kare a Iesu i aere ana ki te iero kia taakama i te au orometua no runga i tona kite. Kua aere aia ki reira i te akarongo, noatu e e kua ui katoa aia i te au uianga. No tona inangaro i te akarongo meitaki, penei ko tetai tu ia i akaperepere ei te Atua e te tangata katoa iaia.​—Luka 2:52.

5, 6. Akapeaa tatou i kite ei e kua akarongo a Iesu i te au akakiteanga a te aronga tana i apii atu?

⁵ I muri ake i tona papetitoanga e te akatainuia anga ei Mesia, kua akono tamou a Iesu i tona inangaro i te akarongo atu ki te tangata. Kare aia i varenga ua i tana e apii ra e kua ngaropoina iaia te aronga tei aere mai i te akarongo kiaia i te tuatuaanga. E putuputu te taime, ka tapu aia, ka ui atu i to ratou manako, e ka akarongo atu ki ta ratou pauanga. (Mataio 16:13-15) Ei akaraanga, i muri ake i te mateanga te tungane o Mareta, ko Lazaro, kua akakite a Iesu kiaia e: “E te tangata ora katoa nei e akarongo mai iaku ra, kare rava atu ïa e mate.” E oti kua ui atu a Iesu kiaia e: ‘Kua irinaki ainei koe i te reira?’ E papu e kua akarongo a Iesu ia Mareta e pau maira e: ‘E te Atu, ae; kua akarongo au e, ko koe te Mesia, te Tamaiti a te Atua.’ (Ioane 11:26, 27) Eaa ana ia te merengoanga i te rongo anga ia Mareta e akakite ra i tona akarongo i roto i te reira tu!

⁶ I te akaruke anga te manganui o te au pipi ia Iesu, kua inangaro aia i te akarongo ki te manako o tana au apotetoro. E no reira kua ui aia e: “Ka aere katoa ainei kotou? Kua karanga aturā Simona Petero kiaia, E te Atu, ka aere tika matou kiaai ra? tei ia koe te tuatua o te ora mutu kore ra. Kua akarongo akenei oki matou, e kua kite oki matou e, ko koe te Mesia, te Tamaiti a te Atua ora.” (Ioane 6:66-69) Eaa ana ia to Iesu mareka anga i taua au tuatua ra! Ka mataora tikai koe me akakite mai tetai tangata apii Pipiria i te reira tu akakiteanga i tona akarongo.

Kua Akarongo a Iesu ma te Akangateitei

7. Eaa te maataanga o te au Samaria i akarongo ei ia Iesu?

⁷ Ko tetai tumu akaou i puapinga ai a Iesu ei tangata akariro i te tangata ei pipi, koia oki kua tangi aia i te tangata e ma te ngateitei kua akarongo atu kia ratou. Ei akatauanga, i tetai atianga, kua tutu atu a Iesu ki tetai vaine Samaria i te pae i te punavai o Iakoba i Sikara. I roto i taua uriurianga, kare e na Iesu ua te tuatua; kua akarongo aia ki ta te vaine e akakite maira. Iaia e akarongo ra ki te vaine, kua kite mai a Iesu i tona inangaro i roto i te akamorianga e kua akakite atu kiaia e te kimi ra te Atua i te aronga te ka akamori Iaia ma te vaerua e te tuatua mou. Kua akaari a Iesu i te akangateitei e te inangaro no teia vaine, e kua akakite atu teia vaine ki etai ke no runga iaia, e e “manganui maira te tangata no taua oire i Samaria ra i akarongo kiaia.”​—Ioane 4:5-29, 39-42.

8. Akapeea te tu tangata no te akakite ua mai i to ratou au manako i te tauturu anga ia koe i te akamata i te au pukapukaanga i roto i te angaanga orometua?

⁸ Tei matauia e mataora ana te tangata i te akakite mai i to ratou au manako. Ei akaraanga, e reka ana te aronga o Atene i taito i te akakite i to ratou au manako e te akarongo atu ki tetai apinga ou. Kua taki atu teia ki te akoanga puapinga a te apotetoro ko Paulo ki runga ia Areopago i roto i taua oire ra. (Angaanga 17:18-34) I te akamataanga i tetai pukapukaanga ki tetai tangata ngutuare i roto i taau angaanga tutuanga i teia tuatau, penei ka karanga koe e, “Te aere mai nei au no te mea te inangaro nei au i te akarongo i toou manako no runga [i tetai tumu manako].” E akarongo ki te manako o te tangata, e e pau atu i te reira, me kore e ui i tetai uianga no runga i te reira. E oti e akaari takinga meitaki atu i ta te Pipiria e akakite maira no runga i te tumu tuatua.

Kua Kite a Iesu i Tana ka Tuatua

9. Eaa ta Iesu i rave i mua ake i te ‘akatakaanga i te tuatua i tataia ra’ kia Keleopa e tona taeake?

⁹ E tangata komakoma a Iesu. I te pae mai  i te akarongo meitaki, e matakite ana aia i te manako o te tangata, e kua kite meitaki aia i tana ka tuatua atu. (Mataio 9:4; 12:22-30; Luka 9:46, 47) Ei akatutuanga: I muri poto ua ake i to Iesu akatuakaouanga, te aaere ra nga pipi e rua ana mei Ierusalema ki Emausa. “E te tuatua ua ra raua ma te akaeatu raua raua uaorai,” te karanga ra te tataanga Evangeria e, “kua kapiti ua mairā Iesu i reirao, e aere katoa atura ratou. Kua akakoreia ra te kite i to raua mata, kare atura raua i kite iaia. Kua tuatua maira aia kia raua, Eaa tenana tuatua ta korua e tuatua aere ua ana, ma te iriea? Kua karanga atura tetai, ko Keleopa te ingoa, na ko atura kiaia, Ko koe anake ana paa te tangata ke i Ierusalema nei, kare i kite i te au mea i tupu i reira i eianei puke rā? Kua tuatua maira aia kia raua, ‘Eaa ïa au mea?’” Kua akarongo atu te Puapii Maata, ia raua e akamarama maira e kua apii a Iesu o Nazareta i te au tangata, e kua rave i te au temeio, e kua tamateia. I teianei te karanga ra tetai pae e kua akatuakaouia mai aia mei te mate. Kua tuku ua a Iesu ia Keleopa e tona taeake kia akakite mai i to raua manako. E oti kua akamarama atu aia i ta raua ka anoanoia i te kite, i te ‘akatakaanga i te tuatua i tataia ra’ kia raua.​—Luka 24:13-27, 32.

10. Akapeea koe e kite ei e eaa te manako akonoanga o tetai tangata taau ka aravei atu i roto i taau angaanga orometua?

¹⁰ Penei kare koe i kite i te manako akonoanga o tetai tangata ngutuare tikai. Kia kite mai i te reira, penei ka karanga koe e e reka ana koe i te akarongo i te manako o te tangata no runga i te pure. E oti penei ka ui atu koe e, “I toou manako te akarongo tikai ra tetai tangata ki te au pure?” Penei ka akaari maata mai te pauanga i te manako e te irinaki akonoanga o tera tangata. Me e tangata irinaki akonoanga aia, penei ka rauka ia koe i te kite maata atu i tona manako na te uianga e, “I toou manako te akarongo maira te Atua i te au pure katoatoa, me kore e au pure ainei tetai kare aia e mareka ana?” Ka taki atu te reira au uianga ki tetai pukapukaanga maru ua. Me te tau ra i te oronga i tetai manako Tuatua Tapu, ka inangaro koe i te rave i te reira ma te mako, auraka e patoi atu i ta te tangata e irinaki ra. Me mataora aia i te akarongo kia koe, penei ka rekareka aia me oki akaou mai koe. Inara akapeea me ka ui mai aia i tetai uianga e kare e rauka ia koe i te pau atu? E rave koe i tetai kimikimianga e oti ka oki atu ei ma te papa meitaki i te oronga atu i “te manako i roto ia kotou na, ma te maru e te kauraro marie atu.”​—1 Petero 3:15.

Kua Apii a Iesu i te Aronga Tei Tau

11. Eaa te ka tauturu ia koe i te kimi i te aronga e tau ra kia apiia?

¹¹ Kua rauka i te tangata apa kore ko Iesu i te kite tei tauturu iaia i te akataka i te aronga tei tau kia apiiia. E kite mai ana tatou e e akaaoanga i te kimi i te aronga tei “akonoia no te ora mutu kore.” (Angaanga 13:48) Kua kite katoa mai rai te au apotetoro ta Iesu i karanga atu ei e: “E te oire e te vila ta kotou e tomo, e ui atu i to reira tangata e tau.” (Mataio 10:11) Mei te au apotetoro rai a Iesu, kia kimi koe i te au tangata e inangaro ra i te akarongo e kia apiiia te tuatua mou a te Pipiria. Ka kite mai koe i te aronga tau na te akarongo meitakianga ki te au tangata katoatoa, i te akamanakoanga i te tu o te tangata tataki tai.

12. Akapeea e rauka ai ia koe i te tauturu ua atu i tetai tangata tei inangaro i te akarongo mai?

 ¹² I muri ake i te akarukeanga i tetai tangata tei akaari i te inangaro i roto i te karere o te Patireia, ka meitaki koe i te akamanako ua atu i tona au anoano i te pae vaerua. Me tata koe i taau i kite mai i muri ake i te pukapukaanga ki tetai tangata no runga i te tuatua meitaki, ka rauka teia i te tauturu ia koe i te akono ua atu rai i te tangata i te pae vaerua. I te au atoro akaouanga, ka anoanoia koe kia akarongo me ka inangaro koe i te kite maata atu i te au irinakianga, te tu, me kore te au turanga o te tangata tataki tai.

13. Eaa te ka tauturu ia koe kia kite i te au manako o tetai tangata no runga i te Pipiria?

¹³ Akapeea koe i te akamaroiroi anga i te au tangata kia akakite mai kia koe i to ratou manako no runga i te Tuatua a te Atua? I roto i tetai au ngai, e mea meitaki i te ui atu e, “Kua kite mai ana koe i te tu ngata i te marama i te Pipiria?” Te pauanga ki te reira uianga, e akakite putuputu mai ana i te tu o te tangata ki te au mea pae vaerua. Ko tetai mataara koia oki kia tatau i tetai irava e kia ui atu e, “Te tano ra tera kia koe?” Mei ia Iesu rai, e maata taau ka akatupu i roto i taau angaanga orometua na te taangaanga anga i te au uianga meitaki. Inara, ka anoanoia te tu matakite.

Kua Taangaanga Meitaki a Iesu i te Au Uianga

14. Ma te kore e uiui marokiakia ua atu i te tangata, akapeea koe i te akamanako atu anga i to ratou au manako?

¹⁴ E akaari i te akamanakoanga no te manako o etai ke, auraka ra e taakama ia ratou. E aru i te ravenga a Iesu. Kare aia i te tangata uiui marokiakia, kua taangaanga ra aia i te au uianga te akakeu ra i te manako. E tangata akarongo maru katoa a Iesu tei akaoraora i te au tangata ngakau tae e tei akono meitaki ia ratou. (Mataio 11:28) Kua ngoie ua te au tu tangata katoatoa i te aravei iaia ma to ratou au manamanata. (Mareko 1:40; 5:35, 36; 10:13, 17, 46, 47) Me ka ngoie ua i tetai tangata i te akakite atu kia koe i to ratou manako no runga i te Pipiria e ta te reira au apiianga, kia kopae koe i te uiui marokiakia ua atu ia ratou.

15, 16. Akapeea koe i te kapiti anga mai i te au tangata ki roto i te au pukapukaanga no runga i te au mea no te akonoanga?

¹⁵ Kapiti atu ki te taangaanga anga i te au uianga puapinga, ka rauka ia koe i te akamaroiroi i te pukapukaanga na te tuatuaanga i tetai apinga umere e oti e akarongo atu ki ta ratou pauanga. Ei akatauanga, kua karanga a Iesu kia Nikodemo e: “Kia kore te tangata e anau akaou ra, kare aia e kite i te basileia o te Atua ra.” (Ioane 3:3) E umere rava tikai te reira au tuatua kia Nikodemo e kare aia i emiemi ana i te pau atu e te akarongo atu kia Iesu. (Ioane 3:4-20) Penei ka rauka ia koe i te kapiti mai i te au tangata i roto i te au pukapukaanga mei te reira tu rai.

¹⁶ I teia tuatau, te tu akaraanga o te au akonoanga ou e manganui, kua riro ei pukapukaanga i roto i te reira au ngai mei ia Aperika, Europa Itinga, e Marike Ratino. I roto i teia au ngai nei, ka rauka ua ia koe i te akamata atu i tetai pukapukaanga i te na ko anga e: “Te manamanata nei au e e maata tikai te au akonoanga. Inara te irinaki nei au e kare e roaia atu ana ka kite tatou i te au tangata mei te au pa enua ravarai i te taokotaiia anga ki roto i te akamori mou. Kare ainei te reira e tangi reka ana kia koe?” Na te tuatuaanga i tetai apinga umere tikai no runga i toou manakonakoanga, penei ka rauka ia koe i te maani i te au tangata kia akakite mai i to ratou manako. E e mama ua te au uianga i te pauia me e rua pauanga tano. (Mataio 17:25) I muri ake i te pauanga te tangata ngutuare i taau uianga, e pau rai koe i te reira ma tetai irava okotai me kore e rua. (Isaia 11:9; Zephania 3:9) Na te akarongo meitakianga e te akamanakoanga i te pauanga a te tangata, ka kite mai koe e eaa taau ka uriuri me oki akaou koe.

Kua Akarongo a Iesu ki te Tamariki

17. Eaa te akaari maira e kua akamanako atu a Iesu i te tamariki?

¹⁷ E inangaro to Iesu, kare i roto anake ua i te aronga mamaata mari ra i te au tamariki katoa. Kua kite aia i te au mea tarekareka ta te tamariki e kanga ana e te au apinga ta ratou e pukapuka ana. Tetai taime e pati ana aia i te au tamariki kia aere mai kiaia. (Luka 7:31, 32; 18:15-17) E manganui te tamariki i rotopu i te aronga tei  akarongo kia Iesu. I te akapaapaaanga te au tamariki tamaroa i te Mesia, kua kite mai a Iesu i te reira e kua akaari e kua totouia e te au Tuatua Tapu te reira. (Mataio 14:21; 15:38; 21:15, 16) I teia tuatau, e manganui te au tamariki e riro maira ei au pipi na Iesu. E no reira akapeea koe i te tauturu ia ratou?

18, 19. Akapeea koe i te tauturu i taau tamaiti i te pae vaerua?

¹⁸ Kia tauturu i taau tamaiti i te pae vaerua, ka tau koe kia akarongo kiaia. Ka anoanoia koe kia marama i tona au manako kare e rotai ana ki te manakoanga o Iehova. Noatu e eaa ta taau tamaiti ka akakite mai, e mea meitaki i te pau atu na mua ki tetai tuatua memeitaki. Ka rauka ia koe i reira i te taangaanga i te au irava tau kia tauturu i taau tamaiti kia marama i to Iehova manako no runga i te au mea.

¹⁹ E tuatau rai to te au uianga. Inara kare te tamariki e reka ana kia uiuiia. E kia akateiaa i taau tamaiti kia pau i tetai au uianga pakari, kore koe e akakite poto ua i tetai apinga no runga ia koe uaorai. Tei runga ua i te manako e uriuriia ra, penei ka karanga koe e, i manako ana koe i tetai tu tikai e e akamarama atu i te tumu no te reira. E oti ka ui koe e, “I manako akapera ana ainei koe?” Penei ka taki atu te pauanga a taau tamaiti ki tetai uriurianga tauturu e te akamaroiroi no te Tuatua Tapu.

E Aru ua Atu i te Tangata Maata Tei Akariro i te Tangata ei Pipi

20, 21. Eaa koe ka anoanoia ai kia riro ei tangata akarongo meitaki i roto i taau angaanga akariroanga i te tangata ei pipi?

²⁰ Me te uriuri ra koe i tetai tumu manako ki taau tamaiti me kore ki tetai tangata ua atu, e puapinga maata te akarongo meitaki. Ae, e akakiteanga te reira no te aroa. Na te akarongo anga, te akono ra koe i tetai tu akaaka, e te tangata taau e tuatua ra, te akaariia ra te ngateitei e te akamanakoanga takinga meitaki. E tika, te umuumu maira te akarongo e kia akarongo koe ki te au manako o te reira tangata.

²¹ Ia koe e piri atura ki roto i te angaanga orometua Kerititiano, e akarongo meitaki ua atu rai ki te au tangata ngutuare. Me akarongo meitaki koe i ta ratou e akakite maira, penei ka kite mai koe i te au tuanga tikai o te tuatua mou Pipiria, ta ratou ka inangaro i te kite mai. E oti e tauta i te tauturu ia ratou na te taangaanga anga i te au tu ravenga tukeke a Iesu no te apiianga. Ia koe e rave ra i te reira, ka akameitakiia koe ma te rekareka e te merengo anga no te mea te aru ra koe i te Tangata Maata tei Akariro i te Tangata ei Pipi.

Akapeea Koe me Pau?

• Akapeea a Iesu i te akamaroiroianga i etai ke kia akakite mai i to ratou au manako?

• Eaa a Iesu i akarongo ei ki te aronga tana e apii atura?

• Akapeea koe i te taangaanga anga i te au uianga i roto i taau angaanga orometua?

• Eaa taau ka rave i te tauturu i te au tamariki i te pae vaerua?

[Au Uianga Apii]

[Tutu i te kapi 28]

I te tutu anga, e mea tau kia akarongo

[Tutu i te kapi 30]

Ka aru tatou ia Iesu me tauturu tatou i te tamariki i te pae vaerua