E Mea Ora te Tuatua a Iehova

Au Manako Maata mei te Au Puka a Nahuma, Habakuka, e Zephania

KUA akatanea ke ia ana e te mana tutara o Asura a Samaria, te oire maata o te patireia tino ngauru o Iseraela. Kua roa katoa akenei a Asura i te tamataku ua anga i to Iuda. E karere ta te peroveta ko Nahuma o Iuda na te oire maata o Asura, ko Nineve. Tei roto i te puka Pipiria a Nahuma tei tataia i mua ake i te mataiti 632 M.T.N., taua karere ra.

Aru mai, ko te Patireia o Babulonia te mana tutara tei tu mai, e na te au ariki rai o Kaledea e tutara ana i tetai au taime. Penei i te mataiti 628 M.T.N., i akaotiia ai te puka a Habakuka, te akakite ra te reira e ka akapeea a Iehova me taangaanga i taua mana tutara o te ao ra ei rima rave nona i te rave anga i te akavaanga e eaa i te openga te ka tupu kia Babulonia.

No mua roa atu te peroveta ko Zephania o Iuda i totou ei ia Nahuma raua ko Habakuka. I te totou anga tere atu i te 40 mataiti i mua ake i te akapouanga o Ierusalema i te mataiti 607 M.T.N., kua akakite aia i tetai karere no te mate e te manakonakoanga no Iuda. Tei roto katoa i te puka Pipiria a Zephania te au akakiteanga patoi i te au pa enua ke mai.

“AUE TO TE OIRE TOTO E!”

(Nahuma 1:1–​3:19)

“Te tuatua ia Nineve ra” no ko mai i te Atua ko Iehova, tei ‘kore e rapurapu i te riri e maata ra te mana.’ Noatu e “e akapuanga ketaketa [a Iehova] i te rā tumatetenga ra” ki te aronga e kimi ra i te akaruruanga i roto iaia, ka akapouia rai a Nineve.​—Nahuma 1:1, 3, 7.

“E akaoki mai oki a Iehova i te meitaki o Iakoba.” Inara mei ‘te liona aeae,’ rai a Asura i te tamataku i te patireia o te iti tangata o te Atua. Ka ‘taʼu na e Iehova te au kariota o Nineve ki te auai; e e pou tona au liona ou ki te koke.’ (Nahuma 2:2, 12, 13) “Aue to te oire toto e!”​—ko Nineve. “Te aronga katoa i kite i te rongo  [iaia] ra, e pokarakara ïa te rima” ma te rekareka.​—Nahuma 3:1, 19.

Pauia te Au Uianga Tuatua Tapu:

1:9​—Eaa te aiteanga o te “rave akapou rava” angaia a Nineve no Iuda? Te aiteanga ka ora takiri mai mei ia Asura; “kare e tu rua mai te mate i te tupu anga.” I te tuatua anga mei te mea rai e kua kore a Nineve, kua tata a Nahuma e: “I na, tei runga i te au maunga te vaevae o tei apai mai i te tuatua meitaki, o tei tutu aere i te au; e akono koe, e Iuda, i taau ra au ravenga tapu ra.”​—Nahuma 1:15.

2:6​—Eaa te “au ngutupa o te au kauvai ra” tei akatueraia? Te tou nei teia au ngutupa ki te au ngai ngaangaa i roto i te au patu o Nineve tei ngaangaa i te vai o te Kauvai Tigerisi. I te mataiti 632 M.T.N. i te tu mai anga te nuku o Babulonia e to Madai i te tamaki ia Nineve, kare aia i mataku ana. I te mea te paruru meitakiia ra i muri ake i tona au patu teitei, kua manako aia iaia uaorai e mei te oire kare e rauka kia tomoia. Inara no te maata o te ua kua ki e kua maringi ua te Tigerisi. Kia tau ki te tangata tuatua enua ko Diodorus, kua “tomo tetai tuanga o te oire i te vai e kua inga tetai ngai o te patu ki raro.” Kua tuera iora te au ngutupa, e mei tei totouia, kua akapou vivikiia atura a Nineve mei te teita maro e pou viviki ua i te ai.​—Nahuma 1:8-10.

3:4​—Na teea tu i aite ei a Nineve mei te vaine akaturi? Kua pikikaa oki a Nineve i te au enua na te taputou anga i tetai pirianga oa e te tauturu kia ratou inara e amo teiaa ua rai tei tukuia ki runga ia ratou. Ei akaraanga, kua oronga mai a Asura i tetai tauturu ki te ariki o Iuda o Ahaza i te patoi atu i te orureau a Suria e Iseraela. Inara i te openga, ‘kua aere maira te ariki o Asura kia Ahaza e taeko ra iaia.’​—2 Paraleipomeno 28:20.

Au Apiianga no Tatou:

1:2-6. Te akaari maira to Iehova riri otooto ki runga i tona au enemi tei kore i oronga i te akangateiteianga kiaia anake ua, e te tapapa maira aia i tona aronga akamori kia oronga i te akangateiteianga kiaia anake ua.​—Exodo 20:5.

1:10. Kare ua i rauka ana i te au patu mamaata e te anere ua atu o to ratou au punanga i te tapu i te akatupuanga o ta Iehova tuatua no Nineve. Kare te au enemi o to Iehova iti tangata i teia tuatau e ora i te au akavaanga rikarika a te Atua.​—Maseli 2:22; Daniela 2:44.

‘TE TANGATA TUATUA-TIKA RA KA ORA IA’

(Habakuka 1:1–​3:19)

Te nga pene mua e rua o te puka a Habakuka e pukapukaanga te reira i rotopu i te peroveta e te Atua ko Iehova. No te taitaia te tupu ra i roto ia Iuda, kua ui a Habakuka ki te Atua e: “Eaa ra koe i akakite mai ei iaku nei i te kino, akara uaʼi koe i te mate nei?” I te pau anga, kua karanga atura a Iehova e: “Te akatu nei au i te Kaledea, e iti-tangata aroa kore e te viviki.” Kua poitirere roa te peroveta e ka taangaanga te Atua “i te aronga āru” ei akautunga ia Iuda. (Habakuka 1:3, 6, 13) Kua akapapuia atu kia Habakuka e ko te tangata tuatua tika ka ora ia, kareka te enemi kare ia e ora i te akautungaanga. Tetai katoa kua rekoti a Habakuka e rima au mate te ka akatupuia ki runga i te enemi ko Kaledea.​—Habakuka 2:4.

Na roto i te pure kia tangiia mai, te akakite ra a Habakuka na roto i te “mea tangi akapaapaa” i te au akatutuanga o to Iehova mana vavaria i te au tuatau i topa, mei te au mea rai tei tupu i te Tai Muramura, i roto i te metepara, e i Ieriko. Te akakite katoa ra te peroveta i te aerenga mai a Iehova ma te riri maata me tae mai a Aramakito. Te taopenga ra te pure ki te au tuatua e: “Ko te Atu ra ko Iehova, ko toku ïa maroiroi; nana e akariro i toku vaevae mei to te aili, e ka aaere au iaia na runga i taku au ngai teitei.”​—Habakuka 3:1, 19.

Pauia te Au Uianga Tuatua Tapu:

1:5, 6​—No teaa ra te akatuia mai anga to Kaledea kia tamaki ia Ierusalema i akara anga ngata ai ki te ngati Iuda kia irinaki? Kia tae te taime i akamata ai a Habakuka i te totou,  tei raro ke ana a Iuda i te akakeuanga ririnui a Aiphiti. (2 Ariki 23:29, 30, 34) Noatu e te ririnui ua maira to Babulonia, kare ra i mate ake i to ratou nuku vaeau a Pharao Necho. (Ieremia 46:2) Tetai katoa, tei Ierusalema te iero o Iehova, e kua tutara mai ana te kopu ariki o David i reira kare i tamanamanataia ana. Ki te ngati Iuda o taua tuatau ra, ko te “angaanga” a te Atua i akatika ai i to Kaledea kia akapou ia Ierusalema, i te akara anga e mea ngata kia akamanakoia. Noatu te ngata kia irinaki i te tangi anga o te au tuatua a Habakuka kia ratou, kua “tae tika mai” rai taua orama no te akapouanga a to Babulonia ia Ierusalema, i te mataiti 607 M.T.N.​—Habakuka 2:3.

2:5, NW​—Koai te “tangata ririnui ra,” e no teaa ra “kare e tupu tona akakoroanga”? Ko teia “tangata ririnui” o Babulonia tei taangaanga i to ratou kite karape i te tamaki kia autu ki rungao i te au enua, e maata tona au tuanga. Kua riro te tongi anga i te re ei akariro iaia mei te tangata rai kua kona i te wina. Inara kare aia e puapingaia i te akaputuputu mai i te pa enua kiaia, no te mea ka taangaanga a Iehova i to Madai e to Peresia kia taakama iaia. Ko taua “tangata” i teia tuatau e maata tona au tuanga koia oki ko te au mana tutara poritiki. Kua kona katoa aia i te irinaki kiaia uaorai e tona uaorai puapinga e te kaki pangia kore kia akamaata ua atu rai iaia. Inara kare e tupu tona akakoroanga i ‘te akaputu mai i te pa enua katoa kiaia uaorai.’ Ko te Patireia ua rai o te Atua te ka rauka i te taokotai i te tangata.​—Mataio 6:9, 10.

Au Apiianga no Tatou:

1:1-4; 1:12–​2:1. Kua ui a Habakuka i tetai au uianga ngakau tae tikai, e kua pau mai a Iehova iaia. Te akarongo maira te Atua mou ki te pure a tona au tavini tiratiratu.

2:1, NW. Mei ia Habakuka, e tau tatou kia vai matakite ua e te maroiroi i te pae vaerua. Kia papa ua rai tatou i te akatikatika i to tatou manako kia tau ki tetai ua atu “ako,” me kore akatanotanoanga ka orongaia mai kia tatou.

2:3; 3:16. Ia tatou e tatari nei ma te akarongo, no te tae mai anga te ra o Iehova, auraka roa kia ngaro to tatou tu manako rapurapu.

2:4. Kia ora atu i te ra akavaanga a Iehova e aere maira, ka anoanoia tatou kia akakoromaki atu rai ma te tiratiratu.​—Ebera 10:36-38.

2:6, 7, 9, 12, 15, 19. Kua papu tikai te aue o te tangata e noinoi ra i te apinga tika kore, e inangaro ra i te kino, e rave ra i te tu tau kore, me kore e piri ra ki roto i te akamori itoro. Ka anoanoia tatou kia matakite, e kia patoi atu i teia au tu e teia au angaanga.

2:11. Me kare tatou e akakite atea ua i te tu rave kino o teianei ao, ka ‘kapiki mai oki te toka i roto i te patu.’ E mea puapinga kia tutu atu rai tatou ma te mataku kore, i te karere o te Patireia!

3:6. Kare e rauka i tetai ua atu apinga i te tapu ia Iehova me rave aia i tana akavaanga, e kare katoa e rauka i te au akaaereanga a te tangata noatu te akara anga tinamou mei te au maunga rai e te au tuaivi.

3:13. Kua rauka ia tatou te akapapuanga e kare e rave marikonga kore uaia te akapouanga a Aramakito. Ka akaora a Iehova i tona au tavini tiratiratu.

3:17-19. Noatu e ka rokoia tatou e te au turanga ngata i mua ake e i te tuatau ia Aramakito, ka rauka ia tatou kia irinaki papu e ka oronga mai a Iehova i te “maroiroi” ia tatou e tavini ua atura rai iaia ma te rekareka.

“KUA VAITATA OKI TE RĀ O IEHOVA”

(Zephania 1:1–​3:20)

Te totoa ua ra te akamorianga a Baala i Iuda. Na roto i tona peroveta ko Zephania te akakite ra a Iehova e: “E e akatika au i taku rima ki runga ia Iuda, e ki runga katoa i to Ierusalema ravarai.” Te akamatakite maira a Zephania e: “Kua vaitata oki te rā o Iehova.” (Zephania 1:4, 7, 14) Ko te aronga ua e rave ra i tana e umuumu maira te ka “uunaia” a taua ra ra.​—Zephania 2:3.

“Aue . . . te oire akateimaa e”​—ko Ierusalema! “E tapapa mai ana ra iaku, te tuatua mairā Iehova, e kia tae ki te rā e tu ei au ki  runga i taku e ka noni ra; teia oki taku i akakoro ana e akaputuputu i te pa enua . . . kia riringi atu au i toku mainaina ki runga ia ratou.” Inara te taputou maira te Atua e: “E akatupu oki au i to kotou ingoa, e te paapaa ia kotou, i roto i te pa enua katoa o te enua nei, kia taruri ke au i to kotou tuikaa anga ki mua i to kotou mata.”​—Zephania 3:1, 8, 20.

Pauia te Au Uianga Tuatua Tapu:

2:13, 14​—Noai te “reo te ka tangi” i roto ia Nineve ko tei akatanea takiriia? I te mea e ka riro a Nineve ei ngai noo anga no te au puaka taae e te au manu o te reva, ko te reo te ka tangi aere te tuatua ra te reira i te tangitangi o te manu e me kore i te tangi o te matangi na roto i te au maramarama o te au are akarukeia.

3:9​—Eaa ra te “vaa viivii kore” e e akapeea ana me tuatua i te reira? Ko te tuatua mou a te Atua tei kiteaia i roto i tana Tuatua, i te Pipiria. Te kapiti maira te reira i te au apiianga katoatoa a te Pipiria. Te tuatua nei tatou i te reira na te irinaki anga i te tuatua mou, na te apii anga i etai ke ma te tika meitaki, e na te noo anga kia rotai ki te anoano o te Atua.

Au Apiianga no Tatou:

1:8. Tetai papaki i te tuatau o Zephania i te akaraanga te umuumu ra kia arikiia mai e te au pa enua takapini ia ratou na te “kakau [anga] i te kakau no tai enua ke.” E kamakura tikai no te iti tangata o Iehova i teia tuatau kia aru atu i teia ao na taua au mataara ra!

1:12; 3:5, 16. Kua tono ua rai a Iehova i tona au peroveta kia akamatakite i tona iti tangata no runga i tana au tuatua tau. Kua rave aia i te reira noatu e​—mei te ota i noo ua i raro i te takere o te vairanga uaina​—e maata ua atu te ngati Iuda tei noo ua kare e akamanako atu ana i te karere. I te ra maata o Iehova e vaitata maira, kare e tuku ua atu ki te tu manako kore o te tangata kia ‘akaparuka ua i to tatou rima,’ ka anoanoia ra tatou kia akakite ua atu rai i te karere o te Patireia ma te tuku kore.

2:3. Ko Iehova anake rai te ka rauka i te akaora mai ia tatou i te ra e riri ei aia. Kia vai tamou rai i roto i tana akaperepereanga, ka anoanoia tatou kia “kimi ia Iehova” na te apii marie anga i tana Tuatua, i te Pipiria; te pure marie ma te pati i tana aratakianga; e te akavaitata atu kiaia. Ka anoanoia tatou kia “kimi i te tuatua-tika” na te akono anga i te oraanga ma e te tau. E ka anoanoia tatou kia “kimi i te akaaka” na te tatanu anga i te tu akaaka e te kauraro.

2:4-15; 3:1-5. I te ra e rave ei a Iehova i tana akavaanga, ka rokoia a Kerititome e te au pa enua katoatoa tei takinga kino ana i te iti tangata o te Atua, e taua openga kino rai tei tupu ana kia Ierusalema i taito, e te au pa enua i vao mai. (Apokalupo 16:14, 16; 18:4-8) Kia akakite ua atu rai tatou ma te mataku kore i ta te Atua au akavaanga.

3:8, 9. Ia tatou e tapapa atura i te ra o Iehova, ka akateatea mamao tatou kia ora na te apii anga kia kite i te tuatua i te “vaa viivii kore” e kia ‘tautopa i te ingoa o te Atua’ na te rave anga i tetai akatapuanga uaorai kiaia. Kia tavini katoa tatou ia Iehova “ma te manako okotai” i te taokotai anga atu ki tona iti tangata e te oronga anga kiaia “i te atinga akapaapaa” ei apinga aroa.​—Ebera 13:15, NW.

“Te Rapurapu Roa Maira”

Kua imene te tata taramo e: “E roa poto ake, e kare ua te tangata kino ra, koia tika rai, ka akara koe i tona ngai, e kare ua!” (Salamo 37:10) Me akamanako tatou i tei totouia no runga ia Nineve i roto i te puka a Nahuma e no runga ia Babulonia e te apoteiti ko Iuda i roto i te puka a Habakuka, kare roa tatou e ekoko e ka tupu rai te au tuatua a te tata taramo. Eaa ra te roa i to tatou tatari ua atu anga?

“Kua vaitata te rā maata o Iehova,” e na ko maira a Zephania 1:14. “Kua vaitata, e te rapurapu roa maira.” Te akaari katoa maira te puka a Zephania kia tatou e akapeea tatou e uunaia ai a taua ra ra, e eaa te ka anoanoia kia rave tatou i teianei i te akateatea mamao anga no te ora. E tika rava e, “e mea ora oki te tuatua a te Atua, e te ririnui.”​—Ebera 4:12.

[Au Tutu i te kapi 8]

Kare ua i rauka ana i te au patu mamaata o Nineve i te tapu i te akatupuanga o te totou a Nahuma

[Akameitakianga]

Randy Olson/​National Geographic Image Collection