Au Uianga a te Aronga Tatau

E mea tau ainei no tetai o te Au Kite o Iehova kia aere ki te akaipoipo o tetai kopu tangata me kore taeake kare i te Kite?

E au akakoroanga mataora tikai te taime o te au akaipoipoanga, e te marama uaia ra te tumu ka inangaro ei tetai Kerititiano kia piri atu ki taua akakoroanga mataora ra. E tika e e mea tau rai no te au mapu ou tei patiia mai kia akarongo ki to ratou au metua me kore au tiaki, no te mea na ratou te tika openga no taua mea ra. (Ephesia 6:1-3) Inara akapeea i reira me pati tetai tangata kare i tetai o te Au Kite o Iehova, i tana vaine Kerititiano kia aru iaia ki tetai akaipoipoanga i roto i te are pure? Penei ka akatika tona akava ngakau iaia kia aere ma te akakoroanga kia akara ua kare ra kia piri ki roto i tetai ua atu au angaanga akonoanga e o atura ki taua akakoroanga ra.

Ko te tikaanga i reira, me ka aere ki tetai akaipoipoanga e me kare, naau uaorai te reira ikianga e rave. Inara kia kite te au Kerititiano ravarai e tei runga iaia uaorai tana apainga i mua ia Iehova, e kia akamanakoia te au kaveinga Tuatua Tapu me rave i tetai ikianga no te aere ki te akaipoipoanga o tetai tangata kare i te Kite.

Tei maata roa atu i roto i te manako o tetai Kerititiano koia oki, ko te anoano kia rauka te akaperepereanga a te Atua. Kua akakite a Iesu e: “E Vaerua te Atua, e te aronga e akamori iaia ra, kia akamori ma te vaerua e te tuatua-mou ra e tikaʼi.” (Ioane 4:24) No reira, kare te Au Kite o Iehova e piri ana ki roto i te au angaanga a tetai akonoanga ke, mei te pure, te au peu rave matauia, me kore te au angaanga akamaaraanga kare e rotai ana ki te tuatua mou a te Pipiria.​—2 Korinetia 6:14-17.

Te ariki ra te Kerititiano e penei ka riro katoa tana ikianga i te akamaitu i etai ke. Me iki koe kia aere, ka riri ainei toou kopu tangata me kare koe e piri atu ki te au angaanga tamataora pouroa o te akaipoipo? Ka anoano katoaia kia akamanakoia e eaa ta teia ka akatupu ki runga i te au oa irinaki. (Roma 14:13) Noatu e ka manako koe e e etai au mema o toou ngutuare e kare e tarevake i te aere ki te akaipoipo o tetai tangata kare i te Kite, kare ainei teia e akatupu i tetai turanga ngata ki to au taeake e te au tuaine pae vaerua? Kare ainei te reira e takino i te akava ngakau o tetai aronga?

E riro ana rai te au angaanga akaipoipo e o maira te au kopu tangata kare i te Kite i te akatupu i tetai au turanga ngata. Peea me patiia mai koe kia riro ei apee i roto i te akaipoipo? Me kore peea me kare toou tokorua i te Kite e te inangaro ra kia piri ki roto i te au angaanga katoatoa ka raveia? Mei te mea e ka akaipoipo ki ko i te retita e na tetai akavanui me kore opita o te kavamani e rave i te akaipoipoanga, te apinga ua rai ka o mai me aere, ko te riro ei kite ki tetai angaanga tikaia e te ture.

Inara, ko tetai angaanga akaipoipo ka raveia ki roto i tetai are no te akonoanga me kore na tetai orometua e rave, e au manamanata ke atu ia e o maira. Kia rotai ki toou akava ngakau tereniia e te Pipiria e kia kopae i te akaoko atu i toou au irinakianga Atua me kore i te rave i tetai mea te ka riro ei taakama i te pupu o te akaipoipo, penei ka iki koe auraka e aere. (Maseli 22:3) Penei ka rauka ia koe i te kopae i te taomianga ki runga i toou pamiri e ia koe uaorai na te akamarama anga i toou irinakianga Pipiria i mua ake, te akakite anga e eaa taau ka inangaro i te piri ki roto me kore penei e ravenga ke atu taau e manako ra.

I muri ake i te akamanako meitaki anga i te au mea katoatoa, penei ka iki tetai au Kerititiano e penei kare e tarevake i te aere ki tetai akaipoipo kare no te Kite, ei tangata matakitaki ua. Inara me te kite ra te Kerititiano e penei me tae ki reira, ka timataia aia kia akaoko i te au kaveinga a te Atua, penei ka taopenga aia e e maata atu te kino ka tupu, i te meitaki. Me ka iki aia eiaa e aere ki te akaipoipoanga inara, kia aere ei manuiri patiia ki te tamataoraanga ka raveia a muri ake, kia akapapu meitaki aia e kia “rave anake ïa ma te akakakā i te Atua.” (1 Korinetia 10:31) I te rave anga i taua au ikianga ra, “ei runga iaia uaorai ta te tangata ravarai apainga.” (Galatia 6:5) No reira, noatu eaa taau ka iki, e akamaara e ko te tamou marie i te akava ngakau meitaki i mua i te Atua ko Iehova tei puapinga atu.