Eaa te Mea Puapinga i Roto i Toou Oraanga?

E NGAI angaanga ta Kenny i ko i tetai kamupani okooko rongonui, e akaoro ana aia i te motoka oko maata no tetai enua ke, e apatimani oko maata tona i roto i tetai tuanga puapinga o tetai oire maatamaata. Ei tangata kite karape i te rere kopupu, e mea navenave nana kia topa mai no te au tauatini ua atu tapuae mei runga mai ki raro. E tu oraanga puapinga ainei tera? Kia tau ki The Wall Street Journal, kua tuatua aia e: “Teia au e 45 oku mataiti, kare e kaveinga i roto i toku oraanga . . . E puapinga kore ua rai toku oraanga.”

Kua angaanga pakari tikai a Elyn kia riro mai ei tangata karape i te tupaorooro aiti. I te openga kua rongonui aia. Kua rauka ia Elyn te turanga rongonui tana i inangaro. “Inara teiea ua ai te mataora kia kite au?” i nana ai ma te taitaia. “Maromaroa kino tikai au. Ka rokoia mai au e te ruaineanga, e noatu e e tinamou toku turanga i te pae moni, ka puapinga kore ua rai te oraanga me ko tera ua te tumu no teia oraanga.”

 Kua rongonui no tona kite karape i te taangaanga i te au tu kara, ko to Hideo oraanga, no tana au angaanga ati ua. Kare aia i oko ana i tana angaanga ati; kua manako aia e me akapera aia ka akamoraroia te turanga ngateitei o tana angaanga ati. Vaitata atu ki te openga o tona oraanga e 98 mataiti, kua oronga ua aia i te maataanga o tana au angaanga ati ki tetai runanga apinga. Kua akapou aia i tona oraanga ki te au aruaruanga o te angaanga ati. Inara, kare roa ona marekaanga, i te manako anga e ka pou iaia tetai tuatau mutu kore i te akameitaki takiri anga i tana angaanga ati.

Tetai aronga e maata ua atu to ratou taime e pou ana i te tauturu i etai ke. Ka rave ana ei akaraanga, i tetai tangata pitiniti maata no tetai kamupani maani teata i Hollywood. Ei tauturu peretiteni no tetai o te au kamupani maani teata maata rava atu i Marike, e piri ana aia ki te aronga tamataora rongonui e e noo ana i roto i tetai ngai nooanga no te aronga moni ua. I te aere anga aia ki te orote i Kamupotia, kua aere mai tetai tamaine ki konei iaia i te pati moni, iaia e kaikai ra i ko i tetai are kai i Phnom Penh. Kua oake atu aia e tai tara e te vai venevene. Kua rekareka taua tamaine ra. Inara, i tera mai po tei reira akaou rai aia e patipati ra. Kua kite mai aia e e maata roa atu i te tauturu poto ua te ka anoanoia.

I tetai mataiti i muri mai, kua manako teia tangata pitiniti maata i te taui i tana ngai angaanga​—mei te angaanga na te pitiniti tamataora ki te tauturu i te putaua i Kamupotia. Kua akamata aia i tetai apii te ka riro ei oronga i te ngai nooanga, te kai, e te apiianga. Kareka ra, te noo ua ra aia i roto i tetai turanga oripu ua o te manako​—te rekareka e te merengo maata no tana e rauka ra i te rave, kapiti mai i te taitaia e te mareka kore no te maata ua maira te au manamanata ka anoanoia aia kia akono.

Pouroa teia aronga e a i taikuia atu kua manako tikai ratou e kua kite ratou e eaa ta ratou e inangaro ra i roto i te oraanga. Inara, e turanga puapinga kore ua rai ta ratou i kite mai i te openga i te taeria anga e ratou te akakoroanga ta ratou i angaanga pakari kia rauka. Eaa ra toou akakoroanga i te oraanga? Eaa te mea mua i roto i toou oraanga? Te papu ra ainei ia koe e, kare koe e rokoia e te taitaia a muri ake no te tu e noo ra koe i toou oraanga?