Tatanu i te Au Tu ka Tauturu ia Koe kia Akariro i te Tangata ei Pipi

“Ka aere . . . e akariro i to te pa enua katoa ei pipi.”​—MATAIO 28:19.

1. Eaa te au kite karape e te au tu te anoanoia ra e tetai au tavini o te Atua i te tuatau i topa?

TETAI taime ka anoanoia te au tavini o Iehova kia akatupu i te au kite karape e te au tu te ka tauturu ia ratou i te rave i tona anoano. Ei akatauanga, i ta te Atua akauenga, kua akaruke a Aberahama raua ko Sara i te oire puapinga o Ura, e kua anoano iora i te au tu e te au kite karape e umuumuia ra e te aronga noo puakapa. (Ebera 11:8, 9, 15) I te aratakianga i te ngati Iseraela ki roto i te Enua Taputouia, kua anoanoia a Iosua kia mataku kore, kia irinaki papu ki roto ia Iehova, e kia rauka te kite no runga i tana Ture. (Iosua 1:7-9) E noatu te au kite karape tei rauka ke ana ia Bezaleela raua ko Aholiaba, papu ei e kua akameitaki atuia me kore kua akatupu atuia e te vaerua o te Atua kia puapinga te reira au tane i te piri atu e kia akatere i te angaanga patuanga i te tapenakara e te au angaanga te piri atura ki te reira.​—Exodo 31:1-11.

2. Eaa te au uianga ka uriuri tatou te piri atura ki te angaanga akariroanga i te tangata ei pipi?

² I te au anere mataiti i muri roa mai, kua oronga a Iesu Karaiti ki tana au pipi i teia akaueanga e: “Ka aere . . . e akariro i to te pa enua katoa ei pipi; . . . Ma te apii atu ia ratou, kia akono i te au mea katoa taku i akaue atu kia kotou.” (Mataio 28:19, 20) Kare rava te tangata i mua ana i orongaia ana teia tikaanga manea kia rave i tetai angaanga mei teia rai. Eaa te au tu e umuumuia ra no te angaanga akariroanga i te tangata ei pipi? Akapeea tatou i te tatanuanga i te reira au tu?

Akaari i te Aroa Oonu no te Atua

3. Te akaueanga kia akariro i te tangata ei pipi, te oronga maira i teea atianga no tatou?

³ I te araveianga i te au tangata e te tautaanga i te akakeu ia ratou kia akamori i te Atua mou, te umuumuia ra e kia aroa oonu tatou ia Iehova. Ka rauka te ngati Iseraela i te akapapu i to ratou aroa no te Atua na te akarongo anga ma te ngakau tae ki tana au ture, te oronga anga i te au atinga tau, e te akapaapaaanga iaia na roto i te imene. (Deuteronomi 10:12, 13; 30:19, 20; Salamo 21:13; 96:1, 2; 138:5) Ei aronga akariro i te tangata ei pipi, e akono katoa ana tatou i te au ture a te Atua, inara e akaari katoa ana tatou i to tatou aroa no Iehova na te akakiteanga ki etai ke no runga iaia e tana au akakoroanga. Ka anoanoia tatou i te tuatua ma te irinaki papu tikai, i te ikianga i te au tuatua tau kia akakite i to tatou  au manako ngakau tae no runga i to tatou manakonakoanga tei orongaia mai e te Atua.​—1 Tesalonia 1:5; 1 Petero 3:15.

4. Eaa ra a Iesu i mataora ai i te apii i te au tangata no runga ia Iehova?

⁴ No tona aroa oonu no Iehova, kua kite mai a Iesu i te mataora maata i te tuatuaanga no runga i to te Atua au akakoroanga, te Patireia, e te akamorianga mou. (Luka 8:1; Ioane 4:23, 24, 31) Ko te tikaanga, kua karanga a Iesu e: “Teia taku kai, ko te akono i tona anoano, to tei tono mai iaku ra, ma te akaoti i tana angaanga.” (Ioane 4:34) Te taiku ra teia tuatua a te tata taramo kia Iesu e: “E mea tau naku te rave i toou anoano, e taku Atua; te vai nei oki taau ture tei roto i toku nei ngakau. I tuatua ana au i te tuatua-tika i roto i te uipa anga maata; i na! kare rava toku vaa i muteki i te reira, kua kite oki koe, e Iehova.”​—Salamo 40:8, 9; Ebera 10:7-10.

5, 6. Eaa te tu puapinga maata e anoanoia ra e te aronga e akariro ra i te tangata ei pipi?

⁵ Akakeuia e te aroa no te Atua, tetai taime e akakite ana te aronga ou koi apii ua akenei i te tuatua mou Pipiria, no runga ia Iehova e te Patireia ma te irinaki papu tikai e kua puapingaia ratou i te akakeuanga i etai ke i te akara matatio i te au Tuatua Tapu. (Ioane 1:41) Ko te aroa no te Atua te tu puapinga maata e akakeu ra ia tatou kia piri ki roto i te angaanga akariroanga i te tangata ei pipi. Kia tauta tatou i reira kia akono maroiroi i te reira aroa na te tatau putuputu e te akamanako oonu i runga i tana Tuatua.​—1 Timoteo 4:6, 15; Apokalupo 2:4.

⁶ Kare e ekoko, ko te aroa ia Iehova tei tauturu ia Iesu Karaiti kia riro mai ei puapii maroiroi. Inara kare ko te reira anake ua te tumu i puapinga ai aia ei tangata tutu no te Patireia. No reira, eaa tetai atu tu i puapinga ai a Iesu ei tangata akariro i te tangata ei pipi?

Akaari i te Manako Aroa no te Tangata

7, 8. Akapeea a Iesu i te akamanako atu anga i te au tangata?

⁷ Kua akamanako a Iesu i te au tangata e kua akaari i te inangaro maata i roto ia ratou. I mua ake katoa i tona riro anga mai ei tangata, ei “pu rave angaanga,” no te Atua, e mareka ana aia i te au apinga te piri atura ki te tangata. (Maseli 8:30, 31, NW) Ei tangata i te enua nei, kua tangi aroa a Iesu i te au tangata, i te akaoraoraanga i te aronga tei aere mai kiaia. (Mataio 11:28-30) Kua akaata a Iesu i to Iehova uaorai aroa e te tangi aroa, e ko te apinga teia tei akakeu i te tangata ki te akamorianga i te Atua mou anake. Kua akarongo te au tu tangata ravarai kia Iesu no te mea kua akaari aia i te manako aroa no ratou e to ratou au turanga.​—Luka 7:36-50; 18:15-17; 19:1-10.

⁸ I te uianga tetai tangata e eaa tana ka rave kia rauka te ora mutu kore, “akara aturā Iesu iaia, aroa atura iaia.” (Mareko 10:17-21) No runga i tetai au tangata tei apiiia e Iesu i Betania, te tatau ra tatou e: “E akaperepere a Iesu ia Mareta, e tona teina, e ia Lazaro oki.” (Ioane 11:1, 5) Kua manako maata tikai a Iesu i te au tangata, e kua akakoromaki aia i tona roiroi kia rauka i te apii atu ia ratou. (Mareko 6:30-34) No te reira manako oonu e te aroa no te au tangata, i puapinga maata rava atu ei a Iesu i tetai ua atu tangata i te aratakianga i te au tangata tataki tai ki te akamori mou.

9. Eaa to Paulo tu ei tangata akariro i te tangata ei pipi?

⁹ Kua akamanako oonu katoa te apotetoro ko Paulo i te au tangata tana i tutu atu. Ei akatauanga, kua akakite aia ki te aronga tei riro mai ei au Kerititiano i Tesalonia e: “No te maata o to matou aroa ia kotou, kua tika rava ia matou i te oronga atu i te evangelia a te Atua ia kotou na, e auraka oki i te reira anake, ko matou katoa uaorai oki, no te mea kua riro kotou ei akaperepere na matou.” Ei tupuanga i te au tautaanga takinga meitaki a Paulo, kua ‘ariu mai tetai pae i Tesalonia mei te au idolo maira, e kua akamori i te Atua ora.’ (1 Tesalonia 1:9; 2:8) Me e akamanakoanga tika tikai to tatou no te au tangata, mei ia Iesu rai raua ko Paulo, ka kite katoa mai tatou i te mataora i te kiteanga i te tuatua meitaki i te itaeanga i te au ngakau o te aronga tei “akonoia no te ora mutu kore.”​—Angaanga 13:48.

Akatutu i te Vaerua Akaatinga Uaorai

10, 11. Eaa ka anoanoia ai te vaerua akaatinga uaorai ia tatou e tauta ra i te akariro i te tangata ei pipi?

¹⁰ Te aronga puapinga i te akariro i te tangata ei pipi, e vaerua akaatinga uaorai to ratou. Kare ratou e akara ana e ko te rauka anga te apinga nui te mea puapinga rava atuia. Ko te tikaanga, kua akakite a Iesu ki tana au pipi e: “Te akao ngata e o te aronga apinga nui, ki te basileia o te Atua!” Kua  poitirere te au pipi i te akarongo anga i teia, inara kua karanga a Iesu e: “E te au tamariki e, te akao ngata e o te aronga i irinaki i te apinga, ki te basileia o te Atua! E akao ngoie ake te kamela na roto i te puta nira, i te tangata apinga nui kia akao ki roto i te basileia o te Atua ra.” (Mareko 10:23-25) Kua akamaroiroi a Iesu i tetai tu oraanga ngoie ua ki tana au pipi kia rauka ia ratou i te akamanako tamou ki runga i te akariroanga i te tangata ei pipi. (Mataio 6:22-24, 33) Eaa ra te vaerua akaatinga uaorai ka tauturu ei ia tatou i te akariro i te tangata ei pipi?

¹¹ I te apiianga i te au apinga pouroa ta Iesu i akaue mai, te umuumuia ra te tautaanga maata. Te tauta ra tetai tangata e akariro ra i te tangata ei pipi i te akono i tetai apii Pipiria ma tetai tangata inangaro i te au epetoma ravarai. Kia akamaata atu i to ratou au atianga kia kimi i te aronga inangaro tikai, kua taui tetai pae aronga tutu i te Patireia mei te angaanga tinamou ki te angaanga ta tuangaia. E au tauatini ua atu Kerititiano tei apii i tetai reo ke i te tautaanga i te itae i tetai au pupu tangata tikai i roto i to ratou ngai. Tetai atu aronga e akariro ra i te tangata ei pipi, kua akaruke i te kainga e kua neke atu ki tetai ngai ke me kore tetai enua ke kia piri maata atu ki roto i te kokotianga. (Mataio 9:37, 38) Pouroa teia au mea nei, te anoanoia maira te vaerua akaatinga uaorai. Inara e maata atu te anoanoia ra kia puapinga ei tangata akariro i te tangata ei pipi.

E Akakoromaki Inara Auraka e Kaimoumou Taime

12, 13. Eaa te akakoromaki i puapinga ai i te akariroanga i te tangata ei pipi?

¹² Ko te akakoromaki tetai tu akaou te ka tauturu ia tatou kia akariro i te au tangata ei pipi. Te anoano maira ta tatou karere Kerititiano kia rave rapurapuia te reira, inara te akariroanga i te tangata ei pipi, e anoano maataia ana te tuatau roa e te umuumuia maira te akakoromaki. (1 Korinetia 7:29) Kua akakoromaki a Iesu i tona teina ko Iakobo. Noatu e kua matau meitaki a Iakobo i te au angaanga tutuanga a Iesu, no tetai tuatau, e apinga tetai tei tapupu iaia mei te riro anga mai ei pipi. (Ioane 7:5) Inara, i roto i tetai tuatau poto ua, i rotopu i to Karaiti mate anga e te ra i te Penetekote 33 T.N., i te akaraanga kua riro mai a Iakobo ei pipi, no te mea te akakite maira te Tuatua Tapu e kua taokotai atu aia ma tona metua vaine, e tona ai taeake, e te au apotetoro no tetai pureanga. (Angaanga 1:13, 14) Kua tere meitaki a Iakobo ki mua i te pae vaerua, i te akonoanga i muri mai i te au apainga teimaa i roto i te putuputuanga Kerititiano.​—Angaanga 15:13; 1 Korinetia 15:7.

¹³ Mei te aronga tanu kai rai, te tatanu ra te au Kerititiano i te au apinga e tupu marie ana​—te maramaanga i te Tuatua a te Atua, te aroa no Iehova, e te tu vaerua mei to Karaiti rai. Te anoano maira teia i te akakoromaki. Kua tata a Iakobo e: “E akakoromaki, e aku au taeake, e kia tae mai te Atu ra. I na oki te tanu-kai ra, te tatari marie ua ra aia i te kai meitaki o te enua nei, te akakoromaki marie ra oki i te reira, e kia rauka mai te ua momua e te ua openga ra. E akakoromaki katoa oki kotou; e akatinamou tikai i to kotou ngakau: kua vaitata rava taua aerenga mai o te Atu ra.” (Iakobo 5:7, 8) Te raurau ra a Iakobo i te au taeake irinaki kia ‘akakoromaki, e tae roa mai te Atu ra.’ Me kare te au pipi e marama ana i tetai apinga, kua akamarama me kore kua akatutu marie a Iesu i teia au mea aere. (Mataio 13:10-23; Luka 19:11; 21:7; Angaanga 1:6-8) I teianei e tei rotopu te Atu ia tatou, te anoano katoaia ra te akakoromaki ia tatou e tauta ra i te akariro i te tangata ei pipi. Te aronga tei riro mai ei au pipi na Iesu i to tatou tuatau, ka umuumu katoaia te ikuikuanga tamou marie.​—Ioane 14:9.

14. Noatu to tatou akakoromaki, akapeea tatou i te taangaanga meitaki anga i to tatou taime ei aronga akariro i te tangata ei pipi?

 ¹⁴ Noatu to tatou tu akakoromaki, kare te tuatua e uua mai i roto i te maataanga o te au tangata ta tatou ka akamata i te apii atu i te Pipiria. (Mataio 13:18-23) No reira, i muri ake i ta tatou tautaanga meitaki tikai i te tauturu ia ratou, kare tatou e akapou taime akaou ki te reira au tangata e ka kimi atu i te aronga te ka akaperepere maata atu i te tuatua mou Pipiria. (Koheleta 3:1, 6) E tika rai, penei ka anoano katoa te aronga tei ariki mai i te tauturu maata kia taui i to ratou au manako, au tu, e te au mea puapinga i roto i te oraanga. No reira ka akakoromaki tatou, mei ia Iesu rai i te akakoromaki anga i te au pipi tei ngata i te akatupu i te tu akamanakoanga tau.​—Mareko 9:33-37; 10:35-45.

Akatupu i te Apii Marie Anga Atu

15, 16. Eaa i puapinga ai te tu ngoie ua e te akateateamamao meitaki me akariro tatou i te tangata ei pipi?

¹⁵ Te aroa no te Atua, te akamanakoanga no te au tangata, te vaerua akaatinga uaorai, e te akakoromaki, e au tumu puapinga maata te reira e puapinga ai te akariroanga i te tangata ei pipi. Ka anoano katoaia te au kite karape no te apiianga kia akatupuia, no te mea te tauturu ra te reira ia tatou kia akamarama i te au mea i roto i tetai tu taka meitaki, e te ngoie ua. Ei akaraanga, no te tu ngoie ua, e puapinga tikai te au tuatua anga e manganui a te Puapii Maata, ko Iesu Karaiti. Penei te maara ra ia koe teia au tuatua a Iesu mei teia e: “Ka akaputu ra i te apinga na kotou ki runga i te rangi.” “Auraka te mea tapu e apaiia atu na te puaka-aoa.” “E akatikaia ra te pakari e tana ra au tamariki.” “E apai mari i ta Kaisara kia Kaisara; e ta te Atua ra, e apai ïa ki te Atua.” (Mataio 6:20; 7:6; 11:19; 22:21) E tika, kare a Iesu i taangaanga ua ana i te au tuatua potopoto. Kua apii aia ma te taka meitaki e kua akamarama i te au apinga me te tau ra te reira. Akapeea koe i te aruanga i ta Iesu tu apiianga?

¹⁶ Ko te akapapaanga meitaki te taviri ki te tu apiianga ngoie ua e te taka meitaki. Me kare tetai orometua e akateateamamao meitaki, ka varenga ua aia i te tuatua. Penei ka tangarongaro aia i te au manako puapinga i roto i tana tuatuaanga maata, i te akakiteanga i te au apinga katoatoa tana i kite no runga i tetai tumu manako. Ei tukeanga, tetai orometua tei akateateamamao meitaki, te akamanako ra i te tangata tana e apii ra, te akamanako oonu ra ki runga i te tumu tuatua, e ka oronga taka meitaki ua i te ka anoanoia. (Maseli 15:28; 1 Korinetia 2:1, 2) Ka akamanako aia i te maata o te kite o te tangata apii e eaa te au manako maata tana ka akakite i roto i te apii. Penei e manganui te au akatakaanga umere tikai ta te orometua i kite mai no runga i te tumu manako, inara e akatupuia ana te tu taka meitaki na te akakoreanga i te akakitekiteanga puapinga kore.

17. Akapeea tatou i te tauturuanga i te tangata kia akamanako meitaki no runga i te au Tuatua Tapu?

¹⁷ Kare aia i oronga ua i te au tikaanga kia ratou, kua tauturu katoa ra a Iesu i te tangata kia akamanako meitaki. I tetai atianga, ei akaraanga, kua ui aia e: “Eaa toou manako, e Simona? ei iaai ra te ui ariki no teianei ao e umuumu atu ei i te apinga uipa e te telo? Ei ta ratou uaorai tamariki aina, e ei te tangata ke aina?” (Mataio 17:25) Penei e mataora tikai ana tatou i te akamarama i te Pipiria, e ka tapu tatou ia tatou uaorai kia tuku i te tangata apiipii kia akakite mai i tona manako me kore i te akamarama mai i tetai apinga e uriuriia ra i roto i tetai apii Pipiria i te kainga. E tikai, auraka tatou e akateimaa i te tangata ki te au uianga. Mari ra, ma te tu tau, te au akatutuanga meitaki, e te au uianga akamanako meitakiia, ka rauka ia tatou i te tauturu ia ratou kia ariki i te au manako o te Tuatua Tapu e orongaia maira i roto i ta tatou au puka tei akatumuia ki runga i te Pipiria.

18. Eaa te o maira i te akatupu i te “apii marie anga atu”?

 ¹⁸ Te tuatua ra te au Tuatua Tapu no runga i te “apii marie anga atu.” (2 Timoteo 4:2; Tito 1:9) E maata atu te o maira i roto i te reira tu kite i te apii, i te tauturu ua anga i tetai tangata kia tamou ngakau ua i te au tikaanga. Kia tauta tatou i te tauturu i te tangata apiipii Pipiria kia marama i te tuke i rotopu i te tuatua mou e te tarevake, te meitaki e te kino, te pakari e te neneva. Ia tatou e rave ra i teia e te tauta ra i te tatanu i te aroa no Iehova ki roto i te ngakau o te tangata, penei ka kite mai aia i te tumu ka akarongo ei aia Kiaia.

E Piri Maroiroi ki te Akariroanga i te Tangata ei Pipi

19. Akapeea te au Kerititiano katoatoa i te tauturuanga i te akariroanga i te tangata ei pipi?

¹⁹ Te putuputuanga Kerititiano, e akaaerenga te reira no te akariroanga i te tangata ei pipi. Me riro mai tetai tangata ou ei pipi, ko te Kite o Iehova tei kite mai iaia e tei tauturu iaia kia kite mai i ta te Pipiria e apii maira, kare e koia anake ua te mataora ana. Me akanoo ana te au tangata i tetai pupu kimi tangata kia kimi i tetai tamaiti tei ngaro, penei ko tetai mema okotai ua o te pupu te ka kite mai tikai i te tamaiti. Inara, me taokotai akaouia te tamaiti ki te nga metua, ka mataora te katoatoa tei piri mai ki roto i te kimianga. (Luka 15:6, 7) Mei te reira rai, ka o mai te katoatoa i te akariroanga i te tangata ei pipi. Te piri atura te au Kerititiano katoatoa ki roto i te kimianga i te aronga te ka riro mai ei au pipi na Iesu. E me akamata ana tetai tangata ou i te aere mai ki te au uipaanga i ko i te Are Uipaanga Patireia, ka o mai te au Kerititiano katoatoa i te tauturu i te akatupu i tona arikianga no te akamori mou. (1 Korinetia 14:24, 25) No reira, ka rekareka te au Kerititiano katoatoa e e anere ua atu tauatini pipi ou e rauka ana i te au mataiti ravarai.

20. Eaa taau ka tau i te rave me ka inangaro koe i te apii i etai ke i te tuatua mou o te Pipiria?

²⁰ Ka mataora te au Kerititiano tiratiratu e manganui i te apii i tetai tangata no runga ia Iehova e te akamori mou. Inara, noatu ta ratou au tautaanga, kare i rauka ia ratou i te rave i te reira. Me ko toou turanga te reira, e akamaroiroi ua atu rai i toou aroa no Iehova, kia akamanako i te au tangata, kia akaatinga uaorai, kia akakoromaki marie, e kia kimi i te au mataara i te akamaata atu i toou kite karape i te apiianga. Tei runga ravao, e pure koe no runga i toou inangaro i te apii atu i te tuatua mou. (Koheleta 11:1) Kia kite mai koe i te pumaana i te kiteanga e pouroa taau au apinga e rave ra i roto i te tavinianga ia Iehova, te tauturu ra i te angaanga i te akariroanga i te tangata ei pipi, te akakaka ra i te Atua.

Ka Rauka Ainei ia Koe te Akataka?

• Eaa ka riro ei te akariroanga i te tangata ei pipi, ei timata i to tatou aroa no te Atua?

• Eaa te au tu e anoanoia ra e te aronga e akariro ra i te tangata ei pipi?

• Eaa te o maira i roto i te “apii marie anga atu”?

[Au Uianga Apii]

[Tutu i te kapi 21]

Na te akariroanga i te tangata ei pipi, te akatutu maira te au Kerititiano i to ratou aroa oonu no te Atua

[Tutu i te kapi 23]

Eaa te aronga e akariro ra i te tangata ei pipi, ka anoanoia ai kia akamanako atu i etai ke?

[Tutu i te kapi 24]

Eaa tetai au tu e anoanoia ra e te aronga e akariro ra i te tangata ei pipi?

[Tutu i te kapi 25]

E rekareka katoatoa ana te au Kerititiano me kite i te au tupuanga meitaki no te akariroanga i te tangata ei pipi