E Pipiria Ainei ta Iesu?

KARE, kare a Iesu Pipiria. Eaa te tumu? No te mea ko ta tatou Pipiria katoa i teia tuatau nei kare ia i to Iesu taime. Inara, e akono ana te au tunako i te au akaputuanga o te au pokaikai tataia tei riro mai ei tuanga no te Pipiria ta tatou e kite nei. Kua tatau a Iesu i te pokaikai a Isaia i ko i te tunako i Nazareta. (Luka 4:16, 17) Kua akarongo te apotetoro ko Paulo i “te tatau anga i te ture ma te au peroveta ra” i Anetioka i Pisidia. (Angaanga 13:14, 15) E kua tuatua te pipi ko Iakobo ia Mose e “te tatauia mai nei oki aia i roto i te au sunago i te au sabati katoa.”​—Angaanga 15:21.

E au pokaikai o te Tuatua Tapu ainei ta te au tangata tataki tai i te anere mataiti mua? Te taka meitaki ra e, e pokaikai ta te eunuka o Etiopia, e tangata mana no te Ariki Vaine ko Kanedake, no te mea ‘te noo ra ki rungao i tana kariota, e te tatau ra oki i ta Isaia peroveta ra’ i te aravei atu anga te pipi ko Philipa iaia i runga i te mataara ki Gaza. (Angaanga 8:26-30) Kua pati atu te apotetoro ko Paulo ia Timoteo kia apai mai i “te au buka, kia maata atura te au pepa kiri ra.” (2 Timoteo 4:13) Noatu e kare a Paulo i karanga ana e eaa tei reira au pokaikai, ka tau rai e e au tuanga te reira no te Tuatua Tapu Epera.

Kia tau ki ta Alan Millard, e poropeta no te au reo Semite, i roto i te ngati Iuda, ko te aronga e pokaikai Tuatua Tapu ta ratou ko te aronga ua o “te pupu tane takake i Paretaina, ko te aronga katoatoa kua karanga e kua apiiia, ko tetai o te au Pharisea e te au puapii mei a Nikodemo rai.” Ko te tumu, i tetai tua, no te okoanga. Te tamanako ra a Millard e “te oko e ono ki te ngauru denari no te kopi a Isaia” e te karanga ra e ko te Pipiria Epera katoa “ka kapi e 15 ki te 20 au rora,” me kore ko te okoanga koia oki ko te moni angaanga penei no tetai ono marama.

Kare te Pipiria i karanga ana e me e au kopi pokaikai Pipiria rai ta Iesu me kore ta tana au pipi. Inara, e mea papu tikai e kua kite meitaki tikai a Iesu i te au Tuatua Tapu, e te tukatau i te taiku mai me kore piapa ua aia i te tuatua mai i te au Tuatua Tapu. (Mataio 4:4, 7, 10; 19:4, 5) Kare ainei teia e akakeu ia tatou i teia tuatau kia riro mai ei aronga kite matau tikai i te Pipiria, i te mea e ka peke ua i te oko e te ngoie ua e rauka mai ei te reira?