Ka Rauka Ainei te Tu Taokotai i Teianei Ao?

TE VAITATA roa maira ainei te au no to tatou ao me tei te kena roa ainei o te tumatetenga? I te akara anga ka tau rai kia uriuri meitaki ia nga manako roa ai.

I tetai tua, te tuatua ra tetai au arataki o teia ao ma te irinaki tikai e ko te akakoroanga kia tupu te au i te ao katoa ka rauka ua te reira​—penei me kare e rauka e mea mataku tikai kia akamanakoia e mei teaa ra te turanga e manakonakoia ra no te ao. I tetai tua, e manganui ua atu te mataku nei i te au uianga mei teia: Ko teea au pa enua ra tei tu i te au apinga tamaki no te akapouanga i te manganui? Ka toa ainei ratou i te taangaanga i te reira? Eaa ra te ka tupu me rave ratou i te reira?

Te akaari maira te tuatua enua e ko te tu ekaikai e te akavaavaa kua roa akenei i te arai ua anga i tetai ua atu manakonakoanga no te tu taokotai, e na te akonoanga e akakino putuputu roa atu ana i te au manamanata e kare i takore atu i te reira. “Ko tetai ua atu apinga e akamavete ra i te tangata ka akatupu te reira i te pekapeka, e ko te akonoanga tetai tumu pakari roa atu no te akamaveteanga,” i tata ai te tangata tata tianara ko James A. Haught. “Noatu te irinakianga matauia e na te akonoanga e akakeu ana i te tangata kia ‘meitaki,’ te taka meitaki ua ra e, na te reira e akanauru ana i tetai au tangata kia rave i tetai au angaanga viivii tikai.” Mei te reira rai te manako o te tangata tata puka ko Steven Weinberg. “No tetai au tangata meitaki kia rave i te kino,” i tata ai aia, “ko te akonoanga te akanauru ana ia ratou kia akapera.”

E manakonakoanga ainei tetai no to tatou ao kia taokotaiia? Ae! Inara kare ko te tangata me kore ko te au akonoanga a te tangata te tumu o te tu taokotai o teia ao, mei ta tatou ka kite.

[Tataanga i te kapi 3]

Te aite ra ainei te ao mei tetai pomu akaaruru rima rai tei papa ua i te aruru?