Te Turu ra Ainei Koe i to Iehova Tu Ngateitei?
Te Turu ra Ainei Koe i to Iehova Tu Ngateitei?
“Ka tuatua i rotopu i te pa enua e, ko Iehova te ariki.”—SALAMO 96:10.
1, 2. (a) Eaa te tupuanga maata roa atu i tupu ana ia Okotopa 29 T.N.? (e) Eaa te aiteanga o ta taua tupuanga ra kia Iesu?
I ROTO ia Okotopa 29 T.N. kua tupu mai tetai tupuanga maata rava atu, kare i kiteaia ana i mua ana i runga i te enua nei. Kua tata mai te tangata tata Evangeria ko Mataio e: “E oti akerā Iesu i te bapetizoia, kake maira aia ki runga mei raro mai i te vai; e i na, veveteia akera te rangi iaia, akara akera [a Ioane Papetito ra] i te Vaerua o te Atua i te eke anga mai mei te kukupa, e te to anga mai ki rungao [ia Iesu]: E i na, ko te reo maira no te rangi, i te na ko anga mai e, Taku Tamaiti akaperepere teia, kua mareka rava au iaia.” Ko teia tetai o te au tupuanga tokoiti ua tei tataia e te aronga tata Evangeria toko a.—Mataio 3:16, 17; Mareko 1:9-11; Luka 3:21, 22; Ioane 1:32-34.
2 Te riringi anga mai i te vaerua tapu ki rungao ia Iesu kua akatakaia aia e ko Tei Akatainuia, ko te aiteanga o te tuatua ko te Mesia, me kore ko te Karaiti. (Ioane 1:33) I te openga iora, kua mama mai te “uanga” taputouia! Koia tei tu i mua ia Ioane Papetito nona te pooavae te ka akaparuparuia e Satani e koia te ka akaparuparu i te mimiti o te enemi maata o Iehova e Tona tu ngateitei. (Genese 3:15) Mei taua taime mai, kua kite pu tikai a Iesu e ka tauta aia i te akatupu i to Iehova au akakoroanga no runga i Tona tu ngateitei e te Patireia.
3. Akapeea a Iesu i te akateateamamao anga iaia uaorai no te tuanga tana ka rave i te turu anga i to Iehova tu ngateitei?
3 Kia akateateamamaoia no te angaanga te ka orongaia mai, ‘kua oki mairā Iesu mei Ioridana mai, ma te ki i te vaerua tapu, e aratakiia aia e te vaerua ki te medebara.’ (Luka 4:1; Mareko 1:12) E 40 ra iaia i reira ra, kua rauka ia Iesu i te akamanako pakari tikai i te maroanga no te tu ngateitei tei akatupuia mai e Satani e no runga i te mataara Tana ka rave i te turu anga i to Iehova tu ngateitei. Te o maira ki roto i taua maroanga te au mea ora kite pakari katoatoa—to te rangi e to te enua nei. No reira e akamanako meitaki ana tatou i to Iesu tu akarongo mou e te akara anga e eaa ta tatou ka rave i te akaari anga e te inangaro katoa ra tatou i te turu i to Iehova tu ngateitei.—Iobu 1:6-12; 2:2-6.
Akaari Akaouia Mai te Maroanga no te Tu Ngateitei
4. Eaa ta Satani angaanga i rave ana i te akaari akaou anga mai i te maroanga no te tu ngateitei?
4 E tika rai, te kite ua ra a Satani i te au tupuanga tei taikuia mai. Kua tuku viviki mai aia i tana tamaki anga ki runga i te “uanga” maata a te “vaine” a te Atua. (Genese 3:15) E toru taime te timataanga a Satani ia Iesu, i te karanga anga e e rave a Iesu i te mea te ka puapingaia aia kare i ta tona Metua e inangaro maira iaia kia rave. Na te toru o te timataanga tikai i akaari akaou mai i te maroanga no te tu ngateitei. Na te akaari anga kia Iesu “i te au basileia katoa o te ao nei, e to ratou kakā,” kua tuatua taitoito maira a Satani kia Iesu e: “E oronga atu au i teianei au mea katoa kia koe, kia akatopa mai koe ki raro e akamori mai iaku.” I te kite pu tikai anga e tei te Tiaporo te akatere anga tikai “i te au basileia katoa o te ao,” kua akaari a Iesu i Tona turanga no runga i te maroanga no te tu ngateitei na te pau anga e: “E aere ke atu koe e Satani, kua oti oki i te tataia, ‘Ko toou Atua ra ko Iehova taau e akamori, e koia anake rai taau e akarongo.’”—Mataio 4:8-10.
5. Eaa te angaanga ngata ta Iesu i akatupu?
5 Kua akataka marama mai to Iesu oraanga katoa e te turu anga i to Iehova tu ngateitei ko te akakoroanga maata rava atu ia kiaia. Kua kite pu tikai a Iesu e e mea tau kia vai akarongo mou ua rai aia e mate ua atu i te rima o Satani—tei akakite totouia mai i te akaparuparuia anga te pooavae o te “uanga” a te vaine—i te akapapu anga mai i te tikaanga o te tu ngateitei o te Atua. (Mataio 16:21; 17:12) Kua akamarama katoa mai aia e e ravenga akamanaia e Iehova te Patireia o te Atua ei akavi ia Satani meameaau e te akaoki akaou mai i te au e te tu tau ki te au mea katoa i angaia. (Mataio 6:9, 10) Eaa i reira ta Iesu i rave ana i te akatupu i teia angaanga ngata?
“Vaitata Mai nei te Basileia o te Atua”
6. Akapeea a Iesu i te akakite anga mai e ko te Patireia ta te Atua ravenga no te ‘akakore anga i te angaanga a te diabolo’?
6 Ei akamata anga, kua “aere aturā Iesu ki Galilea, i te tuatua aere anga i te evangelia o te basileia o te Atua ra, Na ko atura, Kua tae ki te tuatau, kua vaitata mai nei te basileia o te Atua.” (Mareko 1:14, 15) Ko te tika, kua tuatua aia e: “E tutu aere rai au i te evangelia o te basileia o te Atua i te au oire ke atu e tikaʼi; i tonokia mai ei oki au.” (Luka 4:18-21, 43) Kua aaere a Iesu mei te tiroa e te tipoto o te enua, “i te tutu aere anga i te tuatua meitaki i te basileia o te Atua.” (Luka 8:1) Kua rave katoa a Iesu i te au akairo ririnui e manganui—i te angai anga i te urupu tangata, i te akamaru anga i te reva kino, i te rapakau anga i te maki, e te akatu anga mai i tei mate. Na roto i teia au temeio, kua akapapu mai a Iesu e ka rauka i te Atua i te akakore i te au kino ravarai e te au mamae tei tupu mai no te meameaau i Edene e pera katoa i te ‘akakore anga i te angaanga a te diabolo.’—1 Ioane 3:8.
7. Eaa ta Iesu i akaue ki tana au pipi kia rave, e eaa tei tupu mai?
7 Kia akakite tikaiia te tuatua meitaki o te Patireia ra, kua akaputuputu mai a Iesu i tetai pupu o te au pipi akarongo mou e kua tereni atura ia ratou i roto i taua angaanga ra. Te mea mua, kua akaue aia i tana au apotetoro e 12 e “kua tono atura aia ia ratou kia tutu aere i te basileia no te Atua.” (Luka 9:1, 2) E oti, kua tono atura aia e 70 kia akakite aere i te karere e: “Kua vaitata mai nei te basileia o te Atua kia kotou na.” (Luka 10:1, 8, 9) Te oki anga mai e te ripoti anga mai te au pipi kia Iesu tei rauka ia ratou i te rave i roto i te angaanga tutu anga i te Patireia, kua pau maira aia e: “Kua kite au ia Satani i te topa anga, mei te uira no runga i te rangi ra.”—Luka 10:17, 18.
8. Eaa ta te oraanga katoa o Iesu e akataka marama maira?
8 Kua angaanga pakari tikai a Iesu e kare e atianga i topa ana i te akakitekite anga i te Patireia. Kare aia i akamutu ana i te angaanga, i te angaanga anga i te ao e te po, pera katoa i te akaruke anga i te tu meitaki o te oraanga. “E ana to te suoli; e toanga to te manu o te reva; kareka te Tamaiti a te tangata nei, kare ona e urunga upoko,” i karanga ai aia. (Luka 9:58; Mareko 6:31; Ioane 4:31-34) I mua ua ake i tona mateanga, kua akakite a Iesu ma te mataku kore ki mua ia Ponotio Pilato e: “I anau mai ei au nei, i aere mai ei au ki te ao nei, e akakite i te tuatua-mou.” (Ioane 18:37) Te akataka marama ua maira to Iesu oraanga katoa e kua aere mai aia, kare e kia riro ua ei puapii maata me kore ei tangata rave i te angaanga temeio me kore ei Akaora akaatinga ua iaia uaorai, inara ei turu i to Iehova anoano ngateitei e kia akakitekite aere i to te Atua tu i te akatupu anga i taua anoano ra na roto i te Patireia.—Ioane 14:6.
“Kua Oti”
9. I akapeea a Satani i te autu anga i te akaparuparu i te pooavae o te “uanga” a te vaine a te Atua?
9 Te au mea ravarai ta Iesu i rave no te Patireia kare roa te Enemi Maata, ko Satani te Tiaporo i mareka ana. Kua ripiti putuputuia mai na roto i te tuanga i te enua nei o tana “uanga”—te poritiki e te akonoanga—e kua tauta a Satani i te tamate i te “uanga” a te vaine a te Atua. Mei te tuatau i anauia mai ei aia e tae ua atu ki te openga o tona oraanga i runga i te enua nei, kua riro mai a Iesu ei takete na Satani e tona au oa tauturu. I te openga ra, i te tuatau tupu anga rau i te mataiti 33 T.N., kua tae mai te tuatau no te Tamaiti a te tangata kia orongaia ki roto i nga rima o te Enemi Maata kia akaparuparuia tona pooavae. (Mataio 20:18, 19; Luka 18:31-33) Te akaari meitaki maira te au papaanga Evangeria e akapeea te au tangata—mei ia Iuda Ikariota ki te kau taunga maata, te au tata tuatua, te au Pharisea, e te au Roma—i te akavareia anga e Satani kia akaapa atu ia Iesu e kia tamate mamae atu iaia ki runga i tetai rakau tamamae anga.—Angaanga 2:22, 23.
10. Eaa te mea puapinga maata rava atu ta Iesu i akatupu i tona mateanga i runga i te rakau tamamae anga?
10 Eaa taau e manako ra i toou manako anga ia Iesu i runga i te rakau tamamae anga te mamae ra i tetai mate marie e te kino pakari? Penei e te maara ra ia koe te atinga oko ta Iesu i oronga karapii kore no te au tangata ara. (Mataio 20:28; Ioane 15:13) Penei te umere ra koe i te aroa maata ta Iehova i akaari mai na te oronga anga mai i taua atinga ra. (Ioane 3:16) Penei te manako ra koe mei te opita vaeau Roma tei akakeuia kia tuatua e: “Ko te Tamaiti tikai teia a te Atua.” (Mataio 27:54) E au pauanga tau tikai teia. I tetai tua, kia maara ra i ta Iesu au tuatua openga i runga i te rakau tamamae anga e: “Kua oti.” (Ioane 19:30) Eaa tei oti? Noatu e kua rauka ia Iesu i te akatupu i te au mea ravarai na roto i tona oraanga e tona mate, kare ainei tikai e no te akatikatika anga i te maroanga no to Iehova tu ngateitei i aere mai ei a Iesu ki te enua nei? E kare ainei e kua akakiteia mai e ei “uanga” ra, ka tupu te timataanga pakari kiaia i roto i nga rima o Satani kia akakore atu i te akakino anga i te ingoa o Iehova? (Isaia 53:3-7) E au apainga teimaa teia, inara kua akatupu pouroa a Iesu i te reira. E ravenga maata tikai!
11. Eaa ta Iesu ka rave i te akatupu pouroa anga i te totou tei akakiteia i Edene?
11 No tona tu akarongo mou e te tiratiratu, kua akatuia mai a Iesu, kare ei tangata mari ra ei ‘vaerua ora.’ (1 Korinetia 15:45; 1 Petero 3:18) Ta Iehova taputou ki tana Tamaiti akakakaia koia oki: “Ka noo koe ki toku rima katau nei, e kia akariroia e au to au enemi ei pange vaevae noou.” (Salamo 110:1) Ko te “au enemi” te kapiti maira i te akaapa maata, ko Satani, e te aronga katoatoa tei riro mai ei “uanga” nana. Ei Ariki no te Patireia Mesia o Iehova, ko Iesu Karaiti te ka arataki i te takore pouroa anga i te aronga meameaau, i te rangi e i te enua nei. (Apokalupo 12:7-9; 19:11-16; 20:1-3, 10) Ka tupu mai i reira te akatupu anga i te totou i roto ia Genese 3:15 pera katoa te pure ta Iesu i apii ana ki tana au pipi e: “Kia tae toou basileia. Kia akonoia toou anoano i te enua nei, mei tei te ao katoa na.”—Mataio 6:10; Philipi 2:8-11.
E Akaraanga kia Aruia
12, 13. (a) Eaa te pauanga ki te tuatua meitaki o te Patireia e kiteaia ra i teia tuatau? (e) Eaa ta tatou ka akamanako i te aru anga i te au takainga vaevae o Karaiti?
12 I teia tuatau, te tutu aereia nei te tuatua meitaki o te Patireia i te au enua e manganui, mei ta Iesu i totou mai e ka tupu te reira. (Mataio 24:14) Tei tupu mai, e mirioni ua atu au tangata tei akatapu i to ratou oraanga ki te Atua. Te rekareka ra ratou no te au akameitakianga ta te Patireia ka apai mai. Te akara ra ratou ki mua i te noo anga ma te au e te tinamou e tuatau ua atu i runga i te enua parataito, e te akakite rekareka aere ra ratou ki tetai ke i to ratou manakonakoanga. (Salamo 37:11; 2 Petero 3:13) Ko koe ainei tetai o teia aronga akakite aere i te Patireia? Me ko koe tetai, kia akameitakiia koe. Inara, e apinga ke atu ta tatou tataki tai ka akamanako i teianei.
13 Kua tata te apotetoro ko Petero e: “I mate katoa oki te Mesia uaorai no kotou; e kua vaoo oki i te akaraanga na kotou, kia aru kotou i tona takainga vaevae.” (1 Petero 2:21) E akara ana e i roto i teia akatauanga, kare a Petero i taiku mai ana i to Iesu maroiroi no te tutu aere anga me kore i tona kite no te apiianga, inara no tona mamae. Ei kite mata, kua kite meitaki a Petero i te maata o ta Iesu ariki puareinga ua anga kia mamae aia kia kauraro atu ki to Iehova tu ngateitei e kia akapapu ia Satani e koia rai te pikikaa. No reira, na roto i teea au tu e rauka ai ia tatou i te aru i to Iesu takainga vaevae? Ka ui tatou kia tatou uaorai e: ‘Ka anoano ainei au kia tamamaeia au kia turu atu e kia akangateitei atu i to Iehova tu ngateitei? Te akaari ra ainei au i te tu e akono ra au i toku oraanga e te rave anga i taku angaanga orometua ra e ko to Iehova tu ngateitei te mea puapinga maata rava atu kiaku?’—Kolosa 3:17.
14, 15. (a) Akapeea a Iesu i te ariu atu anga ki te au manako tarevake e te au mea oronga uaia mai, e no teaa ra? (e) Ko teea maroanga ta tatou ka akamanako ua rai? (Kapiti mai i te au tuatua i roto i te pia “E Turu i to Iehova Tua.”)
14 I te au ra ravarai, te aro nei tatou i te au timataanga e te au ikianga, me mamaata me e mea rikiriki. Eaa te tumu te akataka maira i ta tatou pauanga? Ei akaraanga, me aro atu tatou i te timataanga i te rave i tetai apinga te ka akakino mai i to tatou turanga Kerititiano, akapeea tatou me ariu atu? I to Petero karanga anga kia Iesu e kia takinga meitaki aia iaia uaorai, akapeea a Iesu i te pau atu anga? “Ka aere ke atu koe, e Satani, ki muri iaku,” i karanga ai a Iesu. “Kare koe i tau i ta te Atua ra, ko ta te tangata ra taau i tau.” (Mataio 16:21-23) Me ka orongaia mai tetai akameitakianga i te pae moni me kore i te akamaata atu i te angaanga te ka tamanamanata i to tatou oraanga i te pae vaerua, ka ariu ainei tatou mei ia Iesu rai? I to Iesu kite anga e “ka tiki mai [te aronga tei kite mai i tana au temeio] iaia e kave e akaariki,” kua aere viviki ke atu aia mei ia ratou.—Ioane 6:15.
15 Eaa ra a Iesu i patoi pakari ei i teia atianga e tetai atu au atianga? No te mea kua kite aia e e apinga puapinga maata atu tetai te o maira kare e ko tona uaorai ora me kore tana e manako ra e meitaki nona uaorai. Ko te anoano o tona Metua tana e inangaro ra i te rave e te turu i to Iehova tu ngateitei noatu e eaa te ka tupu mai. (Mataio 26:50-54) No reira, me kare e taka meitaki tikai ana te maroanga kia tatou i te au taime ravarai, mei ia Iesu rai, te vai ra te kino no te tuku anga i te au me kore te rave anga i te mea tarevake. No teaa ra? No te mea ka topa ngoie ua tatou ki te au ravenga pakari a Satani, koia tei kite i te akariro i te mea tarevake ei mea manea, mei tana i rave ana i te timataanga ia Eva.—2 Korinetia 11:14; 1 Timoteo 2:14.
16. Eaa to tatou akakoroanga maata i te tauturu anga i tetai ke?
16 I roto i ta tatou angaanga orometua, te tauta ra tatou i te tuatua ki te au tangata no runga i te au mea ta ratou e manako ra e kia akaari i te au pauanga a te Pipiria kia ratou. Ko tetai mataara tau teia i te akakeu i to ratou inangaro i te apii i te Pipiria. Inara, ko te mea maata atu, ko to tatou akakoroanga kare e kia tauturu ua i te au tangata kia kite ra e eaa ta te Pipiria e karanga ra me kore eaa te au akameitakianga ta te Patireia o te Atua ka oronga mai. E tauturu tatou ia ratou kia marama i te maroanga tikai. Te inangaro ra ainei ratou kia riro mai ei au Kerititiano mou e te apai anga i to ratou “rakau tamamae anga” e kia tamamaeia no te Patireia? (Mareko 8:34, NW) Kua papa ainei ratou i te kapiti mai ki roto i te pupu o te aronga te turu ra i to Iehova tu ngateitei e ka rauka i te akapapu ia Satani ei pikikaa e ei akakino ra? (Maseli 27:11) E akangateiteianga no tatou i te tauturu ia tatou uaorai e i tetai ke kia akapera rai.—1 Timoteo 4:16.
Me Riro Mai te Atua “i Rungao i te Au Mea Katoa i te Au Ngai Ravarai”
17, 18. Eaa te tuatau kaka ta tatou e akara atura ki mua me akaari tatou e te turu ra tatou i to Iehova tu ngateitei?
17 Ia tatou e rave maroiroi ra i te ka rauka ia tatou i te rave i teianei i te akaari na roto i to tatou tu e ta tatou angaanga orometua e te turu ra tatou i to Iehova tu ngateitei, te akara ra tatou ki mua ki te tuatau “ka tuku atu ei [a Iesu Karaiti] i te basileia ki te Atua, ki te Metua ra.” Aea te reira e tupu ei? Kua akamarama mai te apotetoro ko Paulo e: “Kia ope rava te aronga au, e te mana, e te maroiroi, i te akakoreia e ia. E iaia oki te au, e kia ope rava te au enemi katoa i te tukuia e ia ki raro ake i ona vaevae. . . . Ei reira e kitea puiaʼi e, i raro katoa ake te Tamaiti uaorai iaia, i tei tuku i te au mea katoa i raro ake iaia ra; kia riro ko te Atua i rungao i te au mea katoa i te au ngai ravarai.”—1 Korinetia 15:24, 25, 28.
18 Me riro mai te Atua “i rungao i te au mea katoa i te au ngai ravarai”—e tuatau kaka tikai te reira! Ka rauka i te Patireia i te akatupu i tana akakoroanga. Te aronga katoatoa te patoi ra i to Iehova tu ngateitei ka takore takiriia. Ka akaoki akaouia mai te au e te tu tau i te ao katoa e pini ua ake. I roto i te au tuatua a te tata taramo, ka imene te au mea katoa i angaia e: “O atu kia Iehova i te kakā e tau ki tona ra ingoa . . . Ka tuatua i rotopu i te pa enua e, ko Iehova te ariki.”—Salamo 96:8, 10.
Ka Rauka Ainei ia Koe te Pau?
• Akapeea a Iesu i te akaari anga mai i tona turanga ki te tu ngateitei o te Atua?
• Eaa ra te mea puapinga maata rava atu ta Iesu i akaoti na roto i tana angaanga orometua e tona mateanga?
• Na roto i teea au mataara e rauka ai ia tatou i te aru i to Iesu akaraanga i te akaari anga e te turu ra tatou i to Iehova tu ngateitei?
[Au Uianga Apii]
[Pia/Au Tutu i te kapi 29]
E TURU I TO IEHOVA TUA
Mei ta te au taeake e manganui i kite i Korea e i tetai ngai ke atu, me aro atu te au Kerititiano i te au timataanga pakari tikai, kia akamanako meitaki tikai i te tumu i tupu ei taua au timataanga kia ratou.
“Ko tei tauturu mai ia matou kia tamou marie,” i karanga ai tetai o te Au Kite o Iehova tei akamou auriia i te tuatau akatere anga a te Toviete o mua ana, “koia oki ko te marama meitaki anga i te maroanga tei tupu mai i Edene —te maroanga no to te Atua tikaanga kia tutara. . . . Kua kite matou e e atianga to matou i te turu i ta Iehova tutaraanga. . . . Na teia i akaketaketa ia matou e i tauturu ia matou kia akono marie i to matou tu tiratiratu.”
Kua akamarama mai tetai Kite e eaa tei tauturu iaia e te au taeake Kite i roto i tetai puakapa akatuikaa. “Na Iehova i turu mai ia matou,” i karanga ai aia. “Noatu te au turanga ngata, kua vai araara ua matou i te pae vaerua. E akamaroiroi ua ana matou i tetai e tetai na te akamaaraara anga i te au manako tau e te turu ra matou i to Iehova tua no runga i te maroanga no te tu ngateitei i te ao katoa e pini ua ake.”
[Tutu i te kapi 26]
Akapeea a Iesu i te turu anga i to Iehova tu ngateitei i te timataia anga aia e Satani?
[Tutu i te kapi 28]
Eaa tei akatupuia no to Iesu mate?