E Puapii Pae Vaerua Ainei Toou?

TE MAPU ou ua ra e 16 mataiti, kua riro mai a Uzia ei ariki no te patireia apatonga o Iuda. Kua tere atu i te 50 mataiti tona tutara anga, mei te pae openga o te iva ki te tuanga mua o te varu anere mataiti M.T.N. Mei to Uzia mapu anga mai, “kua rave aia i te mea tika ki mua i te aroaro o Iehova.” Eaa tei akakeu iaia kia aru i tetai arataa tiratiratu? Te akakite ra te rekoti tuatua enua e: “Te kimi ra [Uzia] i te Atua i te au rā o Zekaria ra, [“te tumu korero tei mataku i te Atua mou ra,” NW] e te kimi ra aia ia Iehova ra, kua akamanuia maira te Atua i tana ra.”​—2 Paraleipomeno 26:1, 4, 5.

Kare i maata tei kiteaia no runga ia Zekaria, te puapii o te ariki, i te pae mai i teia papaanga i roto i te Pipiria. Inara, ei “tumu korero tei mataku i te Atua mou ra,” e akakeuanga tau tikai ta Zekaria i akaari ki taua tutara mapu ra kia rave i te mea tika. Te akakite ra The Expositor’s Bible e te taka meitaki ua ra e ko Zekaria “e tangata nakirokiro i te au apiianga tapu, pakari maata tona i te pae vaerua, e te tukatau i te apii atu i tona kite.” Kua taopenga tetai tangata apii Pipiria no runga ia Zekaria e: “Kua nakirokiro meitaki tikai aia i roto i te totou e . . . e tangata kite, ngakau tae, e te meitaki; e i te akara anga, e akakeuanga maata tikai tona ki runga ia Uzia.”

Kua apai mai to Uzia arataa tiratiratu i te au akameitakianga e manganui, e “kua maroiroi rava oki aia” no te mea “kua tauturu maira te Atua iaia.” Ae, no tona puapinga i te pae vaerua i puapinga ai tana au tautaanga noa ua nei “i te au rā o Zekaria.” (2 Paraleipomeno 26:6-8) I muri ake i to Uzia puapinga angaia, kua akaruke aia i te apiianga a tona puapii, ko Zekaria. “Kua akateiteiia [to Uzia] ngakau e mate atura: kua rave oki aia i te ara i tona Atua ia Iehova ra.” Tei tupu no tetai angaanga akangateitei kore, kua rokoia aia e tetai maki pakiri viivii, tei akaparuparu takiri iaia, e kare atura i rauka iaia i te rave i tana au apainga o te taoonga ariki.​—2 Paraleipomeno 26:16-21.

E tangata ainei taau i kite penei tei tau kia kapikiia e e tumu korero, e puapii, tei akakeu ia koe ‘kia kimi i te Atua’? Ka tau rai teia noatu e e mapu ua koe me kore kua pou toou tuatau mapu, e me e tane koe me kore e vaine. E akaperepere i taua puapii ra, no te mea ka riro tana ako ei tauturu ia koe kia rave atu rai te mea tau i mua i te aroaro o Iehova. E akarongo ki teia Kerititiano pakari, e e akamanako meitaki i te ako tana e oronga maira. Auraka roa koe kia ariu ke mei te au tuatua pakari a taua “tumu korero tei mataku i te Atua mou ra.”​—Maseli 1:5; 12:15; 19:20.