Ka Riro Ainei te Orote Peikani ei Orote Kerititiano?

I TE tuatau anu i te mataiti 2004, kua tupu mai tetai taumaroanga pakari tikai i Itaria i te tuatau o te Kiritimiti. Kua turu tetai pae o te aronga akaaere apii e te au puapii i te manako i te akaiti mai me kore i te takore rava atu i tetai akakite anga ki te au peu akonoanga no te Kiritimiti. Kua turu ratou i teia no te akangateitei atu i te au tamariki apii kare i te Katorika me kore kare i te Porotetani. Inara, kua maro tetai pae o te aronga akaaere apii e te au puapii e tetai atu aronga e kia akangateiteiia rai e kia vai ua rai te au peu akonoanga.

Inara, i te pae mai i teia taumaroanga, noea mai te au peu akonoanga e manganui no te Kiritimiti i akamataia ai? Te tae anga te taumaroanga ki te openga, kua akakite mai te nutipepa Vatikana te L’Osservatore Romano i etai au akakite anga umere tikai.

No runga i te ra i akonoia ai te Kiritimiti, te karanga ra te nutipepa na te Katorika e: “I roto i tetai tamanakoanga tuatua enua, kare i kiteaia e eaa tikai te ra i anauia mai ei a Iesu no te mea i roto i te tuatua enua o Roma, kare i taiku papu tikai ia mai te reira i roto i te au tareanga tangata rongonui a te emepera o te reira tuatau e te kimikimi anga i te au anere mataiti. . . . Te ra 25 o Titema, tei kite meitakiia, na te Ekaretia o Roma i iki mai i te reira i te a anere  mataiti. Ko teia ra i Roma peikani kua akatapuia ki te atua o te Ra . . . Noatu e kua akapapu takereia mai te Akonoanga Kerititiano i Roma na roto i tetai Tataanga a Constantine, te rave putuputuia ra rai te tua no . . . te atua o te Ra, i rotopu tikai i te au vaeau. Ko te au oroa tei taikuia mai i runga akenei, kua rave pouroaia i te ra 25 o Titema, tei akamata mai mei te peu akonoanga rongonui. Na teia i oronga i te manako ki te Ekaretia o Roma no te akatupu anga i tetai akaaiteanga akonoanga Kerititiano i taua ra ra na te mono anga i te atua o te Ra ki te Ra tika tikai no te Tu Tika, ko Iesu Karaiti, i te iki anga i te reira ei ra no te akamaara anga i tona anau anga.”

Akapeea ra te pu rakau Kiritimiti, tei riro mai i teianei ei tuanga no te peu akonoanga a te Katorika?

Kua tou mai te atikara i roto i te nutipepa Katorika e i taua tuatau taito ra, e manganui te au rau rakau matie, mei te “au atava o te paina kua manakoia ana e e au mea manamana me kore e au mana vairakau to ratou te ka rauka i te akakore atu i te au maki.” Te akakite maira te reira e: “I te aiai i mua ake i te Kiritimiti, i te ra 24 o Titema, ka akamaaraia a Adamu raua ko Eva ma te tua rongonui maata rava no te Pu Rakau no tetai enua Parataito . . . Tano tikai ko te pu apara tikai te pu rakau, inara i te mea e kare te pu apara e tano ana i te tuatau anu, kua akatuia i reira tetai pu rakau paina ki runga i te paata e kua tamoumouia tetai au apara ki runga i tona au atava me kore, ei akatutu anga i te aerenga mai o te Akaora i te tuatau ki mua, e kua maaniia te au kai oroa ki te au pitikiti venevene punupunu ei au akairo no te Kai Oroa o Iesu, pera katoa te au raore e te au apinga aroa na te tamariki.” Akapeea te tuatau i muri ake i te reira?

I te taiku anga mai e kua akamataia te taangaanga anga i te pu rakau Kiritimiti i Tiamani i te mataiti 16 anere mataiti, kua taiku mai te L’Osservatore Romano e: “Ko Itaria tetai o te au enua openga tei ariki i te pu rakau Kiritimiti, no te mea no te koumuumu aereia anga e e peu na te Porotetani i te taangaanga i te au pu rakau Kiritimiti e no reira kia monoia te reira e te roi pepe [te are Anau akaariari anga].” Na te Pope Paul VI “i akamata i te peu akonoanga no te akatu anga [i roto i te paepae o St. Peter, i Roma] i te pu rakau Kiritimiti maatamaata” i te pae mai i te are Anau akaariari anga.

Ka ariki ainei koe e ka oronga mai tetai arataki akonoanga i tetai akaaiteanga Kerititiano ki tetai au tupuanga e te au akairo tei akamata mai te reira au tumuanga ra mei roto mai i te au angaanga peikani taito ra? No runga i te aerenga tau, te ako maira te au Tuatua Tapu i te au Kerititiano mou e: “Eaa to te tuatua-tika tau anga i te tuatua-tika kore? e eaa to te mārama tau anga i te poiri?”​—2 Korinetia 6:14-17.

[Au Tutu i te kapi 8, 9]

Pu rakau Kiritimiti (i tetai tua mai o te kapi) e te are Anau akaariari anga i ko i te Vatikana

[Akameitakianga]

© 2003 BiblePlaces.com

[Tutu i te kapi 9]

Te atua o te ra

[Akameitakianga]

Museum Wiesbaden