Kare Rava te Taoonga tei Angaia Noou ra e Manuia

“Te taoonga ra noou i angaiaʼi ra, kare ïa e manuia.”​—ISAIA 54:17.

1, 2. Akapeea te au tupuanga ki te Au Kite o Iehova i Arapania i te akatutuanga mai i te tikaanga o Isaia 54:17?

I TE au ngauru mataiti i topa, i roto i tetai enua meangiti e maunga ua i te pae tonga itinga o Europa, te vai ra tetai pupu Kerititiano mataku kore. Kua tauta pakari te kavamani Komuniti atua kore i te takore ia ratou. Inara, kare i rauka ana te tamamaeanga, te au puakapa takinokinoanga, e te au akaapaanga pikikaa a te nuti, i te takore ia ratou. Koai ratou? Ko te Au Kite o Iehova i Arapania. Noatu e kua ngata tikai i te taokotai atu e te tutu aere, to ratou tamou marie i roto i te au ngauru mataiti, kua akateitei e kua akangateitei atu i te akonoanga Kerititiano e kua akapaapaaia te ingoa o Iehova. I te mataiti i topa akenei i te akatapuanga to ratou manga ou, kua karanga tetai Kite tiratiratu tei tavini ana no tetai tuatua roa e: “Noatu te au tautaanga pakari a Satani, e ruti ua ana rai aia, e e autu ua ana rai a Iehova!”

² E akapapuanga tikai teia i te tikaanga o te taputou a te Atua ki tona iti tangata mei tei rekotiia ia Isaia 54:17 e: “Te taoonga ra noou i angaiaʼi ra, kare ïa e manuia; e te au vaa katoa e patoi ia koe, i te akava anga ra, naau ïa e akaapa atu.” Kua akapapu mai te tuatua enua e kare rava e rauka i te ao o Satani i te rave i tetai apinga kia tapu i te au tavini akatapuia i te akamori i te Atua ko Iehova.

Au Tautaanga Puapinga Kore a Satani

3, 4. (a) Eaa te kapiti maira ki te au taoonga tamaki a Satani? (e) I teea mataara i puapinga kore ei te taoonga tamaki a te Tiaporo?

³ Ko te au taoonga tamaki tei taangaangaia i runga i te aronga akamori mou, te kapiti maira te au araianga, pupu takinokino, te au are auri, e te ‘akatikaanga i te takinga-kino a te ture.’ (Salamo 94:20) Ko te tikaanga, i roto i tetai au enua, e te apii nei te Au Kite o Iehova i teia atikara tikai, te ‘timataia’ nei teia au Kerititiano mou no to ratou tiratiratu ki te Atua.​—Apokalupo 2:10.

⁴ Ei akaraanga, kua ripoti tetai opati manga o te Au Kite o Iehova e, i roto anake ua i tetai mataiti okotai, e 32 au akavaanga kua taiaia te au tavini o te Atua ia ratou e piri atura ki roto i  te angaanga orometua. Pera katoa, e 59 au tupuanga kua opuia te au Kite e te akava​—te mapu tamariki e te ruaine, tane e te vaine​—te tutu aere ra i te ngai tangata. Tetai pae, kua akairoia to ratou mangamanga rima, kua neneiia, e kua akamou auriia ei aronga kino. Tetai pae kua tamatakuia e ka taiaia ratou. I roto i tetai enua akaou, kua tere atu i te 1,100 au akavaanga i teianei tei akapapaia o te Au Kite o Iehova tei opuia, akautungaia, me kore kua papaia. E 200 e tere atu o teia au akavaanga, kua tupu i te ra i akaputu ei ratou i te akamaara i te mate o Iesu! Noatu te reira, kua tauturu te vaerua o Iehova i tona iti tangata kia ora ua atu rai noatu te au taomianga pakari tikai, i roto i teia au enua nei e tetai au enua ke atu. (Zekaria 4:6) Kare e rauka te riri pakari o te enemi i te tapu i te aronga e akapaapaa ra ia Iehova. Ae, papu ia tatou e kare rava e taoonga e autu i runga i te akakoroanga a te Atua.

Akaapaia te Au Vaa Pikikaa

5. Eaa te au vaa pikikaa tei patoi i te au tavini o Iehova i roto i te anere mataiti mua?

⁵ Kua totou a Isaia e ka akaapa te iti tangata o te Atua i tetai ua atu vaa tei patoi ia ratou. I roto i te anere mataiti mua, kua riro putuputu te au Kerititiano ei tumu no te tapepe pikikaa, e kua akatutuia ratou ei aronga rave kino. Te au tuatua tei kiteaia ia Angaanga 16:20, 21 e au akaapaanga matauia te reira: “Ko nga tangata teia i taoriori kino i to tatou nei oire, . . . e te apii nei i te tuatua kare e tau i te ture kia āriki tatou, e kia akono, no Roma oki tatou.” I tetai atianga, kua tauta te aronga patoi akonoanga i te akakeu i te au tutara o te oire kia patoi i te au pipi a Karaiti, i te karanga anga e: ‘Ko te au tangata taruri ke teia i te pa enua ravarai e teia mai nei rai oki; e kare anake e tau ta ratou tuatua i ta Kaisara ra.’ (Angaanga 17:6, 7) Kua karangaia te apotetoro ko Paulo ei “tangata pekapeka” e te tutara o tetai akapupuanga te taoriori ra e “pini ua ake te enua katoatoa.”​—Angaanga 24:2-5.

6, 7. Eaa tetai mataara e akaapa nei te au Kerititiano mou i te au tuatua akakino ia ratou?

⁶ Kua tau i reira, e kare tatou e poitirere ana e kua aro atu te au Kerititiano i teia tuatau i te au tapepe pikikaa akakoro, te akakinoanga, e te au akaapaanga kino. Te akapeea nei tatou i te akaapaanga i teia au tuatua akakino?​—Isaia 54:17.

⁷ E patoi putuputuia ana taua au akaapaanga e te tuatua pikikaa e te tu meitaki o te Au Kite o Iehova. (1 Petero 2:12) Me ka rauka te au Kerititiano i te akapapu mai e e aronga akono ratou i te ture e ei au tangata mako i te tu akono tau tei akaari i te akamanakoanga tika tikai no te oraanga o to ratou au tangata tupu, te akaari maira te reira e e pikikaa te au akaapaanga no runga ia ratou. Te akapapu maira to tatou tu meitaki i te reira. Me kite mai te aronga e akarakara maira i to tatou tamou marie i roto i te au angaanga memeitaki, e akakeu putuputuia ana ratou kia akakaka i to tatou Metua i te rangi e kia ariki i te tu oraanga teitei rava o tona au tavini.​—Isaia 60:14; Mataio 5:14-16.

8. (a) Eaa ka tau ei i tetai taime kia paruru i to tatou turanga Tuatua Tapu? (e) I te aruanga ia Karaiti, akapeea tatou i te akaapaanga i te au vaa pikikaa?

⁸ Kapiti atu ki to tatou tu Kerititiano, penei i tetai au taime ka umuumuia tatou kia paruru mataku kore i to tatou turanga Tuatua Tapu. Tetai mataara koia oki na te patianga ki te au kavamani e te au akavaanga no te paruruanga. (Esetera 8:3; Angaanga 22:25-29; 25:10-12) Ia Iesu i te enua nei, i tetai taime kua maro atu aia ki tana aronga akaapa, i te patoianga i ta ratou au akaapaanga pikikaa. (Mataio 12:34-37; 15:1-11) I te aruanga ia Iesu, e ariki ana tatou i te atianga kia oronga i tetai akamaramaanga taka meitaki ki etai ke no runga i ta tatou au irinakianga ngakau tae. (1 Petero 3:15) Auraka rava tatou e tuku i te taitoito i te apii, i te angaanga, me kore mei te au kopu tangata irinaki kore e tapu ia tatou mei te akakiteanga i te tuatua mou no te Tuatua a te Atua.​—2 Petero 3:3, 4.

Ierusalema​—“E Toka Teiaa”

9. Ko teea Ierusalema te akatutuia nei e ko te “toka teiaa” tei taikuia ia Zekaria 12:3, e koai te komono o te reira i runga nei i te enua?

⁹ Te akakite maira te totou a Zekaria i te tumu i patoi ei te au pa enua i te au Kerititiano mou. E akatau ana i ta Zekaria 12:3 e akakite  maira e: “E i taua rā ra e akariro ei au ia Ierusalema ei toka teiaa na te au tangata katoa ra.” Ko teiea Ierusalema ta teia totou e tou atura? Te totou a Zekaria no runga ia Ierusalema, te akonoia ra ki te “Ierusalema i te ao ra,” te Patireia i te rangi, e kua kapikiia atu te au Kerititiano akatainuia ki reira. (Ebera 12:22) E manga pupu ua teia au ariki o te Patireia o te Mesia e toe nei i te enua. Kapiti atu ki to ratou au oa, te “mamoe ke atu,” te raurau ra ratou i te au tangata kia ariu mai ki te Patireia o te Atua koi vai ra rai te tuatau. (Ioane 10:16; Apokalupo 11:15) Akapeea te au pa enua i te ariu atu anga ki teia patianga? E eaa te turuanga ta Iehova e oronga ana ki te aronga akamori mou i teia tuatau? Ka kite mai tatou ia tatou e akara matatio ra i te aiteanga o Zekaria penei 12. I te raveanga i te reira, ka rauka ia tatou i te akapapuanga e ‘kare e taoonga e autu’ i te aronga akatainuia a te Atua e to ratou au oa akatapuia.

10. (a) Eaa te iti tangata o te Atua i akakinoia ai? (e) Eaa tei tupu ki te aronga tei tauta i te akaatea i te “toka teiaa”?

¹⁰ Te akakite maira a Zekaria 12:3 e kua “tipupuia” te au pa enua. Akapeea teia i te tupuanga? Kua akaue te Atua e kia tutu aereia te tuatua meitaki no te Patireia. E akono pakari ana te Au Kite o Iehova i teia apainga kia tutu aere. Inara, ko te akakiteanga i te Patireia e ko te manakonakoanga anake uaia no te au tangata ravarai, kua riro “ei toka teiaa” ki te au pa enua. Kua tauta ratou i te akaatea i te reira na te tamanamanata anga i te aronga tutu i te Patireia. I te rave anga i te reira, kua kokoti te au pa enua tamanamanata i te ‘tipupu anga ia ratou uaorai’ i te mutumutu anga i te au ngai e manganui. Kua akakino katoaia to ratou au turanga ia ratou e aro atura i te autuanga puapinga kore akama tikai. Kare e rauka ia ratou i te akamurare i te aronga akamori mou, tei akaperepere i te tikaanga manea i te akakitekiteanga i te “evangelia mutu kore” o te Patireia Mesia o te Atua i mua ake i te openga o teia akatereanga o te au mea nei. (Apokalupo 14:6) I te kite anga i te kino e raveia ra ki te au tavini o Iehova, te karanga ra tetai tiaki mouauri i roto i tetai enua i Aperika e: ‘Te kaimoumou ra kotou i to kotou maroiroi i te takinokinoanga i teia pupu tangata nei. Kare rava ratou e tuku i te au. Ka maata ua atu rai ratou.’

11. Akapeea te Atua i te akatupuanga i tana taputou tei tataia i roto ia Zekaria 12:4?

¹¹ Tatau ia Zekaria 12:4. Ei tuatua akatutuanga kua taputou a Iehova e ka akamatapo e ka ‘akamataku’ aia i te aronga e tamaki maira i tona au karere Patireia mataku kore. Kua akono aia i tana tuatua. Ei akaraanga, i roto i tetai enua kua araiia te akamori mou, kare i rauka ana te aronga patoi i te tapu i te kai pae vaerua i te itaeanga i te iti tangata o te Atua. Kua karanga katoa tetai nuti pepa e te taangaanga ra te Au Kite o Iehova i te au kopupu kia tari i te au puka Pipiria i roto i te enua! Kua tika te taputou a te Atua ki tona au tavini tiratiratu e: “E akapuera atu ei au i oku mata, e te au oroenua katoa a te tangata ra e taia e au ki te matapo.” Ma te riri otooto, kare te au enemi o te Patireia e kite e ka akapeea ratou. Inara, kua irinaki tatou e ka akaora a Iehova i tona iti  tangata ei pupu tangata e ka akono aia ia ratou.​—2 Ariki 6:15-19.

12. (a) I teea tu a Iesu akamata ai i tetai ai iaia i te enua nei? (e) Akapeea te toenga o te aronga akatainuia i te akaka anga i tetai ai i te pae vaerua?

¹² Tatau ia Zekaria 12:5, 6. “Te au tutara i Iuda” te taiku ra ki te aronga akaaere i rotopu i te iti tangata o te Atua. Kua akamatutu a Iehova i teia aronga nei ma te maroiroi ririnui no te au apinga o tona Patireia i te enua nei. I tetai atianga, kua akakite a Iesu ki tana au pipi e: “I aere mai au e apai mai i te ai i te ao nei.” (Luka12:49) E tika rai, kua akaka aia i tetai ai. Na roto i tana angaanga tutu anga maroiroi, kua akariro a Iesu i te Patireia o te Atua e ko te maroanga puapinga rava atu i mua i te au tangata. Kua akaka teia i tetai tauetonoanga kino pakari tei akatupu i te taumaroanga maata i roto katoa i taua pa enua ngati Iuda ra. (Mataio 4:17, 25; 10:5-7, 17-20) Mei te reira katoa, “mei te paakiumu [rai] i roto i te vaie ra, e mei te rama ai i roto i te ruru sitona,” te akaka nei te au pipi e aru ra ia Iesu i to tatou tuatau nei, i te au apinga i te pae vaerua. Kua akakite pakari mai te puka o te mataiti 1917 ko The Finished Mystery * i te pikikaa o Kerititome. Kua riri tikai te au orometua i te reira. I teia au taime ua nei, te Tuatua Patireia Nu. 37, “Te Vaitata Maira te Openga no te Akonoanga Pikikaa!” kua akakeu i te au tangata e manganui kia akono i ta ratou ikianga me ka ariki me kore ka patoi ratou i te Patireia o te Atua.

 Akaoraia “te Au Puakapa o Iuda”

13. Eaa te akaariia maira e te tuatua “te au puakapa o Iuda,” e eaa a Iehova i akaora ei te aronga tei takinoia?

¹³ Tatau ia Zekaria 12:7, 8. I roto ia Iseraela taito, e apinga matauia te au puakapa i roto i te enua, i tetai au taime e taangaangaia ana e te au tiaki mamoe e te aronga tanutanu. Ko ratou te aronga mua te ka kite mai i te kino e ka anoanoia te paruruanga me tamaki mai ake tetai pa enua enemi i te oire o Ierusalema. Ko te tuatua “te au puakapa o Iuda” te akakite maira e te toenga o te aronga akatainuia i to tatou tuatau nei tei vao ratou i te ngai atea, i na tera tuatua ei, kare i roto i te au oire paruruia. Te paruru mataku kore ra ratou i te au inangaro o te Patireia o te Mesia. Ka akaora a Iehova Sabaota i “te au puakapa o Iuda” na mua no te mea ko ratou te takete mua o ta Satani tamakianga.

14. Akapeea a Iehova i te paruruanga i te aronga i roto i “te au puakapa o Iuda” e te akonoanga kia kore ratou e apikepike?

¹⁴ E tika rai, te akapapu maira te rekoti tuatua enua e te paruru nei a Iehova i teia au komono akatainuia o te Patireia i roto i to ratou “puakapa” i vao i te ngai atea. * Te akono ra aia kia kore ratou e “apikepike” mei tera te tu e kua maani aia ia ratou kia maroiroi e kia mataku kore mei ia Davida rai, te ariki tumu toa.

15. Eaa a Iehova i ‘aruaru ei kia pou te au pa enua katoa’ e i teea taime aia e rave ei i te reira?

¹⁵ Tatau ia Zekaria 12:9. Eaa ra a Iehova i ‘aruaru ei kia pou te pa enua katoa’? No te mea te patoitoi tamou ra ratou i te Patireia o te Mesia. No te akakoko anga e te takinga kino anga i te iti tangata o te Atua, ka akavaia ratou. Kare e roa atu ana ka rave te au rima rave o Satani i te enua nei i tetai tamakianga openga ki runga i te aronga akamori mou o te Atua, te ka arataki atu ki tetai turanga i te ao tei akatakaia mai i roto i te Pipiria e ko Aramagido. (Apokalupo 16:13-16) I te pau atu anga ki te reira ta anga, ka paruru te Akava Teitei i tona au tavini e akatapu ra i tona ingoa i rotopu i te au pa enua.​—Ezekiela 38:14-18, 22, 23.

16, 17. (a) Eaa ‘te tuanga o te au tavini o Iehova’? (e) To tatou tu akakoromaki i te au kaitamaki a Satani, te akapapu maira i teaa?

¹⁶ Kare e rauka i tetai taoonga tamaki a Satani i te akaparuparu i te akarongo me kore i te akakore i te maroiroi o te iti tangata o te Atua i te ao katoa nei. To tatou au i te pae vaerua, tei tupu mai ma to Iehova mana akaora, ko “te tuanga teia o te au tavini o Iehova.” (Isaia 54:17) Kare rava e rauka i tetai tangata i te akakore i to tatou au e te turanga puapinga meitaki i te pae vaerua. (Salamo 118:6) Ka akamura ua atu rai a Satani i te patoianga e ka tauta i te akatupu i te taomianga. To tatou tamou marie tiratiratu i te aro atu anga i te akakinoanga, e akapapuangaia e te noo maira te vaerua o te Atua ki rungao ia tatou. (1 Petero 4:14) Ko te tuatua meitaki o to Iehova Patireia akanooia, te akakitekiteia nei i te ao katoa. Mei te au araianga umere, e manganui te ‘au toka maka’ akatutu no te patoianga tei peiia ki runga i te iti tangata o te Atua. Inara, ma to Iehova maroiroi, kua autu tona au tavini i te reira au toka maka, na te akakoreanga i to ratou puapinga. (Zekaria 9:15) Kare te toenga o te aronga akatainuia e to ratou au oa tiratiratu e rauka i te tapuia!

¹⁷ Te akara atura tatou ki te akaoraanga takiri mei te au kaitamakianga a te Tiaporo. Kua akapumaanaia tatou i te akapapuanga tikai e ‘te taoonga ra noou i angaiaʼi ra, kare ïa e manuia; e te au vaa katoa e patoi ia koe, i te akava anga ra, naau ïa e akaapa atu’!

[Au Tataanga Rikiriki i Raro]

Akapeea Koe me Pau?

• Eaa te akaari maira e kare rava te taoonga tamaki a Satani e puapingaia?

• Akapeea a Ierusalema i te rangi i te riroanga ei “toka teiaa”?

• Akapeea a Iehova i te akaoraanga i “te au puakapa o Iuda”?

• Ia tatou e vaitata atura kia Aramakito, eaa te reira e akapapu maira kia koe?

[Au Uianga Apii]

[Au Tutu i te kapi 21]

Kua vai tiratiratu te au tangata o Iehova i Arapania noatu te au kaitamaki a Satani

[Tutu i te kapi 23]

Kua patoi a Iesu i te au akaapaanga pikikaa

[Au Tutu i te kapi 24]

Kare rava e taoonga tamaki e patoi ra i te aronga e akakitekite ra i te tuatua meitaki e puapingaia