Maara Ainei ia Koe?

Te ariki rekareka ra koe i te tatau anga i te au itiu ou o Te Punanga Tiaki? Akara ana ra, me ka rauka ia koe i te pau i te au uianga ka aru mai:

• Eaa ra te “Koreromotu Taito” i puapinga mutu kore ei?

Ko Tei Tata mai i te reira, kare i te atua kino tikai, inara e Atua aroa, a Iehova. Kua taiku ua mai rai a Iesu e tana au pipi mua i te au Tuatua Tapu Epera. Te vai ra i roto i reira te akoanga tau no te oraanga i te au ra ravarai e te oronga maira i tetai manakonakoanga umere no te tuatau ki mua.​—9/1, kapi 4-7.

• Eaa ra tei akatupuia na te akatika anga i te tuatau kia pati mei to Adamu raua ko Eva ara anga?

Kua tere atu i teia au tauatini mataiti, kua akapapuia mai e e pikikaa a Satani​—kua mate a Adamu raua ko Eva e ta raua anau e mirioni ua atu. Kua akaari mai te tuatau e kare te au tangata e meitaki roa atu kia akatakake mai mei te Atua e kare o ratou tikaanga e kare katoa e rauka ia ratou uaorai i te akono i to ratou au takainga tapuae.​—9/15, kapi 6-7.

• Eaa ra a Iakoba kare i akaapaia no te akatutuanga iaia uaorai e ko Esau?

E e tikaanga rai to Iakoba ki te akameitakianga a tona metua, i te oko anga mai i te taoonga mataiapo mei ia Esau. I te kite anga aia e kua akameitakiia aia e Iakoba, kare a Isaaka i umuumu ana i te taui i te reira. E kua akakite ke mai ana te Atua i te reira inara te inangaro tikai ra aia kia orongaia te akameitakianga kia Iakoba.​—10/1, kapi 31.

• Na roto i teea tu te akapapu maira to tatou akava ngakau e kare te tangata i te mea tupu ua mai?

I roto i te au tangata ravarai e te au peu akonoanga, kua inangaro te au tangata i te tauturu atu i tetai ke, noatu e te rave anga i te reira te tuku ra ia ratou uaorai ki roto i te kino. Kare e ko taua tu akamanakoanga karapii kore te tapapaia ra me e e au manu ua te au tangata te tauta ra kia ora mai noatu e eaa te ka tupu mai.​—10/15, kapi 20.

• Eaa ra tatou ka karanga ai e e akaaka te Atua, e na roto i teea tu i te akaari anga mai aia i teia tu?

Ei Mana Ngateitei e Tei Anga mai ia tatou, kare o te Atua au kotinga anga mei ia tatou rai. Inara, kia tau ki ta 2 Samuela 22:36, e akaaka te Atua i roto i te tu e te akamanako maira aia i te au tangata akaaka ua e tauta ra i te akamareka iaia, e te akaaroa maira aia ia ratou. Te piko maira aia mei te rangi, i te takinga meitaki anga i te aronga i mataku i te Atua.​—11/1, kapi 4-5.

• Akapeea te au potera taito i te akapapu anga mai i te tataanga Pipiria?

Kua kiteaia mai e te aronga ko apinga taito te au potopotonga potera i Samaria e te vai ra i roto i reira e itu ingoa no te uanga tangata tei rekotiia i roto ia Iosua 17:1-6. Te akapapu maira te au potopotonga no Arada mai i te akakiteanga no runga i te au ngutuare kau taunga e te ingoa o te Atua. Te akataka maira te au potera no Lakisa i te turanga poritiki e te tu kononinoni maata tei tupu i Iuda i mua ake ka tamaki atu ei a Babulonia.​—11/15, kapi 12-14.

• Na teaa i arataki atu i te manako e na Luka i tata i te puka o Angaanga?

Ta Luka Evangeria e te puka no te Angaanga a te Au Aposetolo kua tataia kia Teophilo, i te akakite anga mai e na Luka i tata i teia nga reta. Te taangaanga anga i te tuatua e ko “matou” te akaari maira e kua kapiti atu ana a Luka ki roto i tetai au tupuanga. (Angaanga 16:8-15)​—11/15, kapi 18.

• Akapeea tetai Kerititiano i te akamanakoanga i te arumaki manu e te tautai?

Mei to Noa tuatau, kua akatika te Atua i te au tangata kia ta e kia kai i te au animara. Inara, te akaketaketa maira teia akauenga kia akataeia to ratou toto e kia akangateiteiia te oraanga animara no te mea na te Atua i anga mai i te reira. Kare te au Kerititiano e ta ei tamataoraanga me kore no te mataora i te arumakianga me kore te tamateanga. E puapinga maata kia akarongo ki te au ture a Kaisara e te akamanako i te akava ngakau o tetai ke. (Roma 14:13)​—12/1, kapi 31.