Ngakau Aroa i Roto i te Ao Kino

KUA rokoia tetai tangata i Puruniti e te aka maki kino e mariri. Ka anoano vivikiia kia apai iaia ki tetai are maki. Ka akapeea ra oki? Kare e motoka e rauka, ei apai iaia. Kua aere mai e rua ona nga taeake i te tauturu iaia. Kua tuku raua iaia ki runga i te patikara e kua opara aere atu iaia na runga i te au ngai maunga ma te roiroi no te rima ora. Kua kave atu raua iaia ki ko i tetai pati tei apai atu iaia i reira ki te are maki vaitata roa mai. Nga mea ra ua i muri mai, kua meitaki maata roa mai aia.

I tetai tua mai o teianei ao, i muri ake i te tumatetenga o te Uriia Katrina, tei takino roa i te tuanga ngai o te Ava o Marike i roto ia Aukute mataiti 2005, kua kite mai tetai pupu tangata tauturu i tetai are kua paii i raro ake i te au tumu rakau ingainga. Kua pou i te au tangata tauturu, e aronga ke takiri kare te pu ngutuare i kite, taua ra katoa ra i te akaateatea i te teita e te au tumu rakau ingainga ki te au keke matini. “Kare takiri e rava te au akameitakianga no teia [au tangata],” i karanga ai te pu ngutuare.

Te maataanga o te au ripoti akareka ua a te nuti no runga ua te reira i te au angaanga kikino e te viivii. Kareka te au angaanga ngakau aroa e te takinga meitaki i te au ra ravarai te tangaro putuputu uaia ra e teia au nuti nei. Inara kare teia e taui i te tika e te anoano maata nei te tangata i te au ngai ravarai i te aroa, te akaperepere, e te tu tangi. Te nakunaku ua nei tatou no taua ngakau aroa ra! Penei e putuputu atu taua au manako ngakau ra i te taangaangaia i te tuatau Kiritimiti, me tuatua me kore me imene te manganui no runga i ‘te au e te tu meitaki ki te tangata.’​—Luka 2:14, King James Version.

 Penei kare te akaari anga i te ngakau aroa i te mea ngoie i roto i tetai ao mata piko e te aroa kore te mea maata. Ko te tu matauia koia oki na te tu takinga kino e te kore e kea atu e akamaka i te mataara ki te rauka anga te puapinga e te re. Te akara anga e manganui te aru nei i te irinakianga e e meitaki roa atu te tu kino i te ngakau aroa ua. Ngoie ua i te noinoi e te manako ia koe uaorai i te takore i te ngakau aroa.

Tei tupu mai, e manganui tei tuku ia ratou uaorai na mua, ma te kore e kea atu i te manako e te anoano o etai atu tangata. Te au tangata rongonui i te tarekareka e te tamataora e akariro putuputuia ana ratou ei “au tane tikai” (au tumu toa) kare e akaari ana i te tu maru e te akaperepere. E akapera ana rai tetai au tutara poritiki.

No reira, e mea tau kia ui tatou e: Eaa ra tatou ka akaari ei i te tu tangi? E akakeuanga ririnui ainei te ngakau aroa no te tu meitaki? E eaa ra te ka tauturu ia tatou kia akaari i te ngakau aroa? Ka uriuri te atikara ka aru mai i teia au uianga.

[Pia i te kapi 3]

•E tu paruparu ainei kia akaari i te ngakau aroa?

•E akakeuanga puapinga ainei to te ngakau aroa?

•Na roto i teea au mataara tau e rauka ai ia koe te akaari i te tu tangi?