Akamanako Marie i te ‘Rave Karape Anga i Taau Apiianga’
Akamanako Marie i te ‘Rave Karape Anga i Taau Apiianga’
“E tutu aere i te tuatua, . . . e ako tikai, e ako ma te tuatua, kia akamaroiroi, ma te akakoromaki anga roa e te rave karape anga i te apiianga.”—2 TIMO. 4:2, NW.
1. Eaa te akaue anga ta Iesu i oronga ki tana au pipi, e eaa te akaraanga tana i akanoo?
NOATU te au angaanga umere no te rapakau anga ta Iesu i rave i te tuatau o tana angaanga orometua i te enua nei, kua kite matau tikaiia aia, kare e ei tangata rapakau anga me kore ei tangata rave temeio, mari ra ei puapii. (Mare. 12:19; 13:1) Ko te akakitekite aere anga i te tuatua meitaki o te Patireia o te Atua ta Iesu angaanga puapinga maata rava, pera katoa rai ki tana au pipi i teia tuatau. Kua orongaia ki te au Kerititiano te akauenga kia rave ua atu rai i te angaanga no te akariro anga i te au tangata ei pipi na te apiianga i te au tangata kia akono i te au mea ravarai ta Iesu i akaue mai.—Mata. 28:19, 20.
2. Eaa ta tatou ka rave e rauka ai i te akatupu i ta tatou tukuanga angaanga no te tutu anga?
2 E rauka ai i te akatupu i ta tatou angaanga kia akariro i te au tangata ei pipi, kia tauta putuputu tatou kia riro mai ei au puapii meitaki rava atu. Kua akakite mai te apotetoro ko Paulo i te puapinga maata no teia kite karape i te tataanga ki tona tokorua tutu anga ko Timoteo. Kua tuatua aia e: “Kia matakite ia koe, e taau e apii ra; e tamou tika rai i te reira: tei te akapera oki e oraʼi koe, e te aronga katoa e akarongo mai ia koe ra.” (1 Timo. 4:16) Te tu apiianga ta Paulo e akamanako ra kare ko te akakite ua mai anga i te kite. Te itae ra te au orometua Kerititiano tau tikai i te au ngakau o te au tangata e te akakeu ra ia ratou kia rave i te tauianga i roto i to ratou oraanga. E ravenga karape teia. No reira, ka akapeea tatou i te akatupu i te “rave karape anga i te apiianga” me oronga tatou i te tuatua meitaki no te Patireia o te Atua ki tetai ke?—2 Timo. 4:2, NW.
Akatupu i te “Rave Karape Anga i te Apiianga”
3, 4. (a) Akapeea tatou me akatupu i te “rave karape anga i te apiianga”? (e) Akapeea te Apii Orometua Teokaratiki i te tauturu anga ia tatou kia riro mai ei au puapii tau tikai?
3 Te akataka maira tetai tikitinari i te “rave karape anga” e e “mea tukatau ia tei rauka mai na te apiianga, te taangaanga anga, me kore te tirotiro matatio anga.” Te anoanoia ra tatou kia akono meitaki katoa i teia au tu e toru kia riro mai ei au puapii tau tikai no te tuatua meitaki. Te mataara anake ua e marama tikai ei tatou i ta tatou tumu manako koia oki na te apiianga i te reira na roto i te pure. (E tatau ia Salamo 119:27, 34.) Ka tauturuia tatou na te akarakara anga i te au orometua tau tikai, ia ratou e apii ra kia kiteaia mai ta ratou au ravenga no te apiianga e kia aru i ta ratou apiianga. E te rave putuputu anga i tetai tauta anga pakari kia taangaanga i ta tatou i kite mai te tauturu ra ia tatou kia akamako mai i to tatou au tu kite.—Luka 6:40; 1 Timo. 4:13-15.
4 Ko Iehova to tatou Pu Ikuiku Maata Rava Atu. Na roto i te tuanga kiteaia o tana akaaerenga, te oronga maira aia ki tona au tavini i runga i te enua nei i te arataki anga e akapeea ratou i te akatupu anga i ta ratou angaanga tutu anga. (Isa. 30:20, 21, NW) No teia akakoroanga nei, te akono ra te au putuputuanga ravarai i te Apii Orometua Teokaratiki i te au epetoma ravarai, kua akapapaia ei tauturu i te katoatoa e piri maira kia riro ei aronga akakitekite tau tikai i te Patireia o te Atua. Te puka maata no teia apii koia oki ko te Pipiria. Te akakite maira te Tuatua akauruia a Iehova kia tatou e eaa te ka apiiia. Pera katoa, te akakite maira te reira e eaa te au ravenga no te apiianga ka tau tikai e te meitaki. Te akamaara putuputu maira te Apii Orometua Teokaratiki kia tatou e ka riro mai tatou ei au puapii meitaki rava atu me akatumu tatou i ta tatou apiianga ki runga i te Tuatua a te Atua, kia taangaanga tau tikai i te au uianga, kia apii na roto i tetai tu mama ua, e e akaari i tetai manako ngakau tae ki tetai ke. Ka akara matatio takitai ana tatou i teia au tumu manako. E oti ka uriuri tatou e akapeea me itaeia te ngakau o tetai tangata apiipii.
Akatumu i Taau Apiianga ki Runga i te Tuatua a te Atua
5. Eaa te tumuanga no ta tatou apiianga, e no teaa ra?
5 Kua akanoo a Iesu, te puapii maata rava atu o te au tangata ravarai, i tana au apiianga ki runga i te au Tuatua Tapu. (Mata. 21:13; Ioa. 6:45; 8:17) Kua tuatua aia, kare i tona uaorai tikaanga, mari ra na roto i te ingoa o Tei tono mai iaia. (Ioa. 7:16-18) Ko tera te akaraanga ta tatou ka aru. No reira, ta tatou e tuatua ra mei tera ngutupa ki tera ngutupa i roto i te angaanga orometua me kore i te au apii Pipiria oronga ua i te kainga kia akara mouia ki runga i te mana o te Tuatua a te Atua. (2 Timo. 3:16, 17) Kare rava to tatou manako kikite i to tatou tuanga nei e aite atu ki te tu tau tikai e te mana o te au Tuatua Tapu akauruia. E mana anga to te Pipiria. Noatu e eaa te tumu manako ta tatou e aruaru ra i te tauturu kia marama tetai tangata apiipii, ko te ravenga meitaki roa atu ka rauka ia tatou i te taangaanga koia oki, e tuku iaia kia tatau e eaa ta te au Tuatua Tapu e tuatua ra no runga i te reira.—E tatau ia Ebera 4:12.
6. Akapeea tetai puapii i te akapapu anga e te marama tikai ra te tangata apiipii i te tumu manako e akamanakoia ra?
6 Inara, kare te aiteanga o teia e, kare tetai puapii Kerititiano e anoanoia kia akapapa no tetai apii Pipiria. Ei tuke anga, e mea tau kia akamanako meitaki i te iki anga e ko teea te au irava tei akakiteia mai ta te puapii me kore ta te tangata apiipii ka tatau i roto i te Pipiria i te tuatau o te apiianga. Tei matauia, e meitaki i te tatau i taua au irava te oronga maira i te tumuanga no to tatou au irinakianga. E mea tau katoa i te tauturu i te tangata apiipii kia marama aia i te irava tataki tai tana e tatau ra.—1 Kori. 14:8, 9.
Ui i te Au Uianga Tau Tikai
7. Eaa ra te uiui anga i te au uianga ra i riro ei ei ravenga meitaki no te apiianga?
7 I te ui meitaki anga i te au uianga te akakeu ra i te manako e te tauturu ra i te puapii kia itaeia te ngakau o te tangata apiipii. No reira, eiaa e akamarama ua atu i te au irava ki te tangata e apii ra koe, e ui ra kiaia e kia akamarama mai aia i te reira kia koe. I tetai au taime penei ka inangaroia tetai uianga ke mai me kore tetai au uianga i te tauturu i te tangata e apii ra koe kia marama mai. Me ui koe i te au uianga na roto i teia tu ei apiianga i te tangata apii ra, tei tupu mai, te tauturu ra koe iaia kare e kia marama ua i te au tumuanga mari katoa ra kia irinaki papu tikai aia no runga i taua taopenga ra.—Mata. 17:24-26; Luka 10:36, 37.
8. Akapeea tatou e kite ei e eaa to roto i te ngakau o te tangata apiipii?
8 Te ravenga apiianga e taangaangaia ra i roto i ta tatou au puka koia oki ko te au uianga e te au pauanga. Kare e ekokoanga, ka pau viviki ua mai te maataanga o te au tangata ta tatou e apii ra i te Pipiria i te au uianga i neneiia, i te taangaanga anga i te manako i roto i te au parakarapa aiteite ua ki te uianga. Noatu rai, ko te puapii te inangaro ra i te itae i te ngakau kare e mareka ua i te au pauanga tika. Ei akaraanga, penei ka rauka i tetai tangata apiipii i te akamarama meitaki mai e eaa ta te Pipiria e akakite maira no runga i te moeaana. (1 Kori. 6:18) Inara, te akakite maira te au uianga manako tau e eaa tikai ta te tangata apiipii e manako ra no runga i tana i kite mai. No reira, penei ka ui te puapii e: “Eaa ra te Pipiria i ture ei i te au pirianga ainga i vao ake i te akaipoipo? Eaa toou manako no runga i teia ture tei orongaia mai e te Atua? I toou manako e e akameitakianga ainei tetai no te akono anga i te au turanga akono tau o te Atua?” Te akaari maira te pauanga ki taua uianga ra e eaa to roto i te ngakau o te tangata apiipii.—E tatau ia Mataio 16:13-17.
Akangoie Ua
9. Eaa ta tatou ka akamanako me oronga atu i te akakitekite anga Tuatua Tapu?
9 Te maataanga o te au tuatua mou i roto i te Tuatua a te Atua e mea ngoie ua tikai. Ko te au tangata ta tatou e apii ra i te Pipiria penei kua akaoripuia e te au apiianga a te akonoanga pikikaa. Ta tatou tuanga ei au puapii koia oki kia akataka maramarama ua i te Pipiria. Te au puapii tau tikai te oronga ngoie ua ra i te manako, ma te taka meitaki, e te tano tikai. Me aru tatou i teia kaveinga, kare tatou e oronga i te tuatua mou ei mea ngata kia maramaia mai. E kopae i te au akataka anga anoano koreia. Kare e anoanoia kia tuatua no runga i te au tu ravarai o te irava ta tatou e tatau ra. E akamou ngoie ua ki runga i te mea puapinga i te akataka anga i te tumu manako te akamanakoia ra. Ka ariki rekareka mai te tangata apiipii i te au tuatua mou oonu o te Tuatua Tapu iaia e tere meitaki ra ki mua i roto i tona marama.—Ebe. 5:13, 14.
10. Eaa te au tumu ka akapapu tatou e eia tumu manako ka uriuriia i te tuatau apiianga Pipiria?
10 Eia tumu manako ka apiiia i roto i te tuanga apii okotai? I te akamanako anga i teia, te anoanoia ra te kite meitaki. Tukeke te au tu e te au turanga o te tangata apiipii e te puapii, inara kia akamanako ua rai tatou e, to tatou akakoroanga ei puapii koia oki e tauturu atu i te aronga e apii ra tatou kia akatupu i te akarongo ketaketa. No reira, e tuku tatou kia rava tona taime no te tatau, kia marama, e kia ariki i te tuatua mou tei akakiteia mai i roto i te Tuatua a te Atua. Kare tatou e apii e kia maata atu te tumu manako tana ka rauka i te marama. I taua taime rai, kia tere meitaki ua te apii. Me mou mai i te tangata e apii ra tatou tetai tumu manako, ka teke atu tatou ki mua.—Kolo. 2:6, 7.
11. Eaa te apiianga no runga i te apii ta tatou ka kite mai mei te apotetoro ko Paulo?
11 Kua oronga te apotetoro ko Paulo i te karere no te tuatua meitaki na roto i tetai tu maramarama ua i te tuatua anga ki te aronga ou. Noatu rai e kua apii meitaki tikaiia aia, kua kopae aia i te au tuatua mamaata. (E tatau ia 1 Korinetia 2:1, 2.) Te tu ngoie ua o te tuatua mou no te Tuatua Tapu te arataki maira e te akamerengo ra i te au tangata ngakau tae. Kare tetai tangata e anoanoia ra ei tangata kite apii teitei kia marama i te reira.—Mata. 11:25; Anga. 4:13; 1 Kori. 1:26, 27.
Tauturu i te Aronga Apiipii kia Akaperepere i ta Ratou e Apii Ra
12, 13. Eaa te ka akakeu ra i tetai tangata apiipii kia rave i tana i apiiia? E akatutu mai.
12 Kia tau tikai, te anoanoia ra kia akakeu ta tatou apii i te ngakau o te tangata apiipii. Kia marama rai te tangata apiipii e akapeea te manako e tau ei kiaia uaorai, akapeea aia e puapingaia ai, e akapeea tona oraanga e meitaki mai ei me aru aia i te akauenga Tuatua Tapu.—Isa. 48:17, 18.
13 Ei akaraanga, penei e akamanako ana tatou ia Ebera 10:24, 25, te akamaroiroi maira i te au Kerititiano kia akaputuputu mai ma te au taeake irinaki no te akamaroiroianga Tuatua Tapu e te taokotaianga aroa. Me kare te tangata apiipii i aere mai ake ki te au uipaanga putuputuanga, penei ka akamarama poto ua atu tatou e akapeea te reira me akonoia e eaa te ka uriuriia. Penei ka akakite atu tatou e e tuanga no te akamorianga ta tatou au uipaanga putuputuanga e e akaari e e puapinga te reira kia tatou uaorai. Penei ka pati atu tatou i te tangata apiipiii kia aere mai. I tona akakeuia anga no te ariu mai anga ki te au akauenga Tuatua Tapu, ko tona anoanoia kia akarongo kia Iehova, kare e ei akamareka ua anga i te tangata e apii ra iaia.—Gala. 6:4, 5.
14, 15. (a) Eaa ta te tangata apiipii Pipiria ka kite mai no runga ia Iehova? (e) Akapeea te kite no te tu peretana o te Atua e akapuapinga ai i te tangata apiipii Pipiria?
14 Ko tetai akameitakianga puapinga ka rauka mai i te aronga apiipii no te apiianga i te Pipiria e te taangaanga anga i ta te reira au kaveinga koia oki ka kite mai e ka ariki rekareka mai ratou ia Iehova ei peretana. (Isa. 42:8) Kare aia e ei Metua aroa ua e Tei Anga ra e te Pu no te ao katoa e pini ua ake, kareka ra te akaari katoa maira aia i tona tu peretana e te au tu ki te aronga te inangaro ra iaia e te tavini ra iaia. (E tatau ia Exodo 34:6, 7.) Te vaitata anga a Mose i te arataki i te iti tangata o Iseraela kia vao mei te tuikaaanga i Aiphiti, kua akataka atu a Iehova iaia uaorai ra na te tuatua anga i te tuatua e: “Ka riro au i taku rai ka akariro.” (Exo. 3:13-15, NW) Te akakite maira teia e ka riro a Iehova i te rave i tei anoanoia ra e ia kia rauka i te rave i tana au akakoroanga no tona iti tangata ikiia. Tei tupu mai kua kite mai te ngati Iseraela ia Iehova i roto i te au turanga ei Akaora, ei Tumutoa, Tei Oronga, e Tei Akatupu i te au taputou, e i roto i tetai ua atu au turanga.—Exo. 15:2, 3; 16:2-5; Iosu. 23:14.
15 Penei kare te aronga ta tatou e apii ra i kite ana i te tauturu anga no ko mai ia Iehova mei ia Mose rai. Inara, te tere ra te aronga ta tatou e apii ra ki mua i roto i te akarongo e te ariki rekareka ra i ta ratou i kite mai e te akamata ra i te taangaanga i te reira, kare e ekokoanga e ka kite mai ratou i te anoano kia irinaki kia Iehova no te maroiroi, te pakari, e te arataki anga. Ia ratou e rave ra i te reira, ka kite katoa mai ratou ia Iehova i roto i tona au turanga ei Ako pakari e te irinakiia, ei Paruru, e te Oronga aroa mai anga i te au mea pouroa ta ratou e anoano ra.—Sala. 55:22; 63:7; Mase. 3:5, 6.
Akaari i te Manako Aroa
16. Eaa ra e kare ko te tu kite natura te mea puapinga maata rava kia riro mai tatou ei puapii tau tikai?
16 Me te manako ra koe e kare koe e tukatau roa ana i te apii atu mei taau rai e inangaro ra, auraka e taitaia. Ko Iehova raua ko Iesu te akaaere ra i te porokaramu no te apiianga e raveia ra i te ao katoa i teia tuatau. (Anga. 1:7, 8; Apo. 14:6) Ka turu mai raua i ta tatou au tauta anga kia riro mai ta tatou au tuatua ei tupuanga tau ki te tangata ngakau tika. (Ioa. 6:44) Te aroa ngakau tae o te puapii no te tangata tana e apii ra ka rauka i te akarava atu i te ngai e ngere ra te tu kite natura. Kua akaari mai te apotetoro ko Paulo e kua marama aia i te puapinga tikai no te aroa atu anga i te aronga e apiiia ra.—E tatau ia 1 Tesalonia 2:7, 8.
17. Akapeea tatou i te akaari anga i te manako ngakau tae ki te tangata apiipii Pipiria tataki tai?
17 Mei tera katoa rai, ka rauka ia tatou i te akaari i te manako ngakau tae ki te tangata apiipii Pipiria tataki tai na te akapou anga i tetai taime kia kite meitaki tikai iaia. Ia tatou e uriuri ra i te au kaveinga Tuatua Tapu kiaia, penei ka matau tatou i te kite i tona au turanga. Penei ka akara tatou e kua rotai takere tona oraanga ki tetai au tumu tana i kite mai i roto i te Pipiria. I roto i tetai au ngai, penei te anoanoia ra rai aia kia rave i te au akatikatika anga. Na te tauturu anga i te tangata apiipii kia kite mai e akapeea te au mea e orongaia ra i te tuatau no te au tuanga apiianga Pipiria e tau ra kiaia uaorai, ka rauka ia tatou i te tauturu aroa atu iaia kia riro mai ei pipi tikai na Karaiti.
18. Eaa ra i puapinga ai kia pure tatou ma te tangata e apii ra tatou e no te tangata apiipii rai?
18 Te mea puapinga maata rava atu, ka rauka ia tatou i te pure ma te tangata e apii ra tatou e no te tangata apiipii rai. E mea tau kia kite meitaki aia e to tatou akakoroanga ra koia oki kia tauturu iaia kia kite meitaki tikai i Tei Anga mai iaia, kia piri vaitata atu Kiaia, e kia puapingaia mei Tana aratakianga. (E tatau ia Salamo 25:4, 5.) Me pure tatou i ta Iehova tauturu anga no te au tauta anga a te tangata apiipii kia taangaanga i tana e apii ra, ka kite mai i reira te tangata apiipii i te puapinga maata i te riro anga mai ‘ei tangata rave i te tuatua.’ (Iako. 1:22) E te akarongo maira te tangata apiipii ki ta tatou au pure ngakau tae, ka kite katoa aia e ka akapeea me pure. Mei teaa ra te rekareka te tauturu anga te reira i te aronga apiipii Pipiria kia akatupu i to ratou uaorai pirianga kia Iehova!
19. Eaa te ka akamanakoia i roto i te atikara e aru maira?
19 Te akamaroiroiia ra tatou i te kite e kua tere atu ki te ono e te apa mirioni te Au Kite takapini i te ao katoa te akatupu maroiroi ra i te “rave karape anga i te apiianga,” ma te akakoroanga i te tauturu atu i te aronga ngakau tae tataki tai kia akono i te au mea ravarai ta Iesu i akaue mai. Eaa te au tupuanga tei rauka mai no ta tatou angaanga tutu anga? Ka akamanakoia te pauanga ki teia uianga i roto i te atikara e aru maira.
Maara Ainei ia Koe?
• Eaa ra te au Kerititiano ka anoanoia ai kia akatupu i te “rave karape anga i te apiianga”?
• Akapeea tatou i te taangaanga anga i ta tatou apiianga kia tau tikai?
• Eaa te ka rauka i te akarava atu i te ngai e ngere ra tatou i te tu kite natura no te apiianga i ta tatou tuanga ra?
[Au Uianga Apii]
[Tutu i te kapi 9]
Kua o ainei koe ki roto i te Apii Orometua Teokaratiki?
[Tutu i te kapi 10]
Eaa ra i puapinga ai kia pati atu i te tangata e apii ra koe kia tatau mai i te Pipiria?
[Tutu i te kapi 12]
Pure kapiti koe e taau tangata e apii ra