Akapuapinga Raua i to Raua Oraanga​—Ka Akapera Ainei Koe?

KO MARC, tetai taeake i Kanata, e angaanga ana aia na tetai kamupani maani ropoti matini umere tikai, e taangaangaia ana e te au akaaereanga maani apinga o te mareva. E angaanga ana aia i tetai taime ua e e tavini ana ei painia tamou. Inara kua oronga mai te akaaere i tetai ngai angaanga teitei atu na Marc​—e angaanga tinamou e te aka moni. Eaa ra ta Marc i rave?

Ko Amy, tetai tuaine i te Piripini, e tavini ana aia ei painia tamou iaia e akaoti ra i tana apiianga. I muri ake i te karatuati anga, kua orongaia mai tetai ngai angaanga tinamou nana te ka anoanoia tetai tuanga maata rava o tona taime inara e mauruuru tikai te moni ka koi mai. Eaa ra ta Amy ikianga i rave?

E tukeke te nga ikianga ta Marc raua ko Amy i rave, e ko tei tupu mai no ta raua nga ikianga, te akatutu maira te reira i te tu pakari o te ako tei orongaia ki te au Kerititiano i Korinetia i taito. Kua tata te apotetoro ko Paulo e: “E tau . . . te aronga i rave i to teianei ao ra, mei te mea e kare i rave [“pu ua ana i te reira,” NW].”​—1 Kori. 7:29-31.

E Rave i to Teianei Ao, Eiaa ra e Rave Pu ua i te Reira

I mua ake ka kite ei tatou e eaa tei tupu kia Marc raua ko Amy, ka akamanako poto ana tatou i te tuatua “to teianei ao” (me kore, koʹsmos i roto i te reo Ereni) ta Paulo i taangaanga i roto i tana reta ki to Korinetia. I roto i taua tuanga ra o te Pipiria, te tuatua ra te koʹsmos i te akatereanga o te au mea i roto i te ao ta tatou e noo nei​—i te katoaanga o te taiate tangata—​e te kapiti maira te reira i te au apinga rikiriki noa ua nei tei riro ei tuanga no te au ra o te oraanga, mei te are, te kai, e te kakau. * E rauka ai taua au mea e anoanoia ra no te au ra, ka anoanoia te maataanga ia tatou kia angaanga. E tika rava e kare a tatou ravenga mari ra kia taangaanga i to teianei  ao i te akatupu anga i ta tatou apainga Tuatua Tapu kia rauka i te akono ia tatou uaorai e to tatou au pamiri. (1 Timo. 5:8) Inara, i taua taime rai, te kite ra tatou e “te ngaro ke nei teianei ao.” (1 Ioa. 2:17) No reira, ka rave tatou i to teianei ao ki te turanga tei tau eiaa ra e rave ‘pu ua i te reira.’​—1 Kori. 7:31, NW.

Akakeuia e te ako a te Pipiria kia akaiti mai i ta ratou taangaanga anga i te ao ki te turanga tei tau, e manganui ua atu te au taeake e te au tuaine tei akamanako mari akaou i to ratou au turanga, akaiti mai i te taime pou i te ngai angaanga, e kua akamama mai i te tu o to ratou oraanga. I muri ake i te rave anga i te reira, kare i roa kua kitea mai ia ratou e kua akapuapinga atu ratou i to ratou oraanga no te mea e maata atu to ratou taime pou ki to ratou au pamiri e ki roto i te angaanga a Iehova. Tetai katoa, kua riro to ratou oraanga mama ua ei manono ia ratou kia akaiti mai te irinakianga ki runga i teianei ao e kia maata atu ki runga ia Iehova. Ka akapera ainei koe​—i te akamama mai i toou oraanga kia rauka i te akamaata atu i te au anoano o te Patireia o te Atua?​—Mata. 6:19-24, 33.

“Piri Roa Atu Maua kia Iehova i Teianei”

Kua akarongo a Marc, tei taikuia atu i te akamataanga, ki te ako a te Pipiria eiaa e taangaanga pu ua i to teianei ao. Kua patoi aia i te ngai angaanga meitaki atu tei orongaia mai kiaia. Nga mea ra ua i muri mai kua oronga mai te akaaere o Marc i tetai aka moni maata atu i te manono iaia kia ariki i te ngai angaanga ou. “E timataanga tikai,” e karanga ra a Marc, “inara kua patoi akaou atu au.” Kua akamarama mai aia e eaa te tumu: “Kua inangaro maua ko taku vaine, ko Paula i te akapou i to maua oraanga i te tavini anga ia Iehova ma te maroiroi katoa. No reira, kua iki maua kia akamama mai i te tu o to maua oraanga. Kua pure maua kia Iehova kia oronga mai i te pakari kia tupu to maua akakoroanga e kua akanoo i te ra e akamata ai maua i te tavini pu tikai ia Iehova.”

Kua akakite a Paula e: “E angaanga ana au e toru ra i te epetoma ei tekeretere i tetai are maki e te meitaki rai te moni. E tavini katoa ana au ei painia tamou. Inara, mei ia Marc rai, kua inangaro au kia rauka iaku i te tavini ia Iehova i te ngai ua atu e anoano maataia ra tetai aronga tutu aere i te Patireia. Inara i te tuku atu anga au i taku reta kia akamutu i te angaanga, kua karanga mai toku akaaere e kua tukatau meitaki tikai au no te ngai angaanga a te tekeretere maata tei va ua akenei. Ko te ngai angaanga tutaki maata roa atu te reira i te are maki, inara kua akamou rai au ki taku ikianga kia akamutu. I te akakite atu anga au i te tumu i kore ei au i inangaro i taua ngai ra, kua akameitaki mai aia iaku no toku akarongo.”

I muri poto ua ake i te reira, kua tae mai tetai tukuanga angaanga na Marc raua ko Paula kia tavini ei nga painia takake i roto i tetai putuputuanga meangiti, i tetai tuanga mamao i Kanata. Eaa tei tupu i to raua neke anga? Kua karanga a Marc e: “I muri ake i te akaruke anga i te ngai angaanga moni meitaki tei rave mai ana au vaitata rai no te apa o toku oraanga, kua matakutaku rai au, inara kua akameitaki mai a Iehova i ta maua angaanga orometua. E maata tikai to maua rekareka e rauka maira i te tauturu anga i etai ke kia kite i teia au apinga aroa pae vaerua. Kua tauturu katoa te angaanga orometua tamou i te akapuapinga atu i to maua oraanga akaipoipo. No ta maua au pukapukaanga e akamou ua ana maua i te reira ki runga i te au mea puapinga​—i te au tumu manako pae vaerua. Piri roa atu maua kia Iehova i teianei.” (Anga. 20:35) Te karanga katoa ra a Paula e: “Me akaruke koe i taau ngai angaanga e te au turanga  mareka ua o te ngutuare, ka anoano pakariia kia tuku tikai koe i toou irinakianga ki roto ia Iehova. I akapera maua e kua akameitaki mai a Iehova ia maua. Kua akaari mai te au taeake e te au tuaine akaperepere i roto i to maua putuputuanga ou e te aroaia maira maua e te inangaroia maira. I teianei te taangaanga nei au i te maroiroi taku i akapou ana ki runga i taku ngai angaanga i mua ana i te tauturu i te tangata i te pae vaerua. Te rekareka maata nei au i te rave i teia tukuanga angaanga.”

‘Puapingaia, Kare ra e Mataora Ana’

Kua iki a Amy, tei taikuia i mua ake, i tetai arataa ke. Kua ariki aia i te ngai angaanga tinamou e te tutaki maata tei orongaia mai kiaia. Kua karanga a Amy e: “I te mataiti mua, kua vai maroiroi rai au i roto i te angaanga orometua inara kua kite au i te akakoroanga maata tikai o toku oraanga e taui marie atura mei te au anoano o te Patireia ki te ngai angaanga teitei atu. Kua orongaia mai tetai au ngai teitei atu tei riro ei timataanga e kua akamata au i te akapou i toku maroiroi i te kake anga atu ki runga i te taoonga teitei. I te au apainga o taku ngai angaanga e maata atura, te meangiti ua maira toku taime ki roto i te angaanga orometua. I te openga, kua akamutu takiri au i te tutu aere.”

I te oki anga i te akamanako i taua taime ra, kua akakite a Amy e: “I te pae o te moni kua puapingaia au. E maata taku ngai e aere ana e te rekareka ra i te turanga ngateitei e rauka maira no toku taoonga i te angaanga. Inara, kare au e mataora ana. Noatu te moni i rauka mai, e maata ua atu toku au manamanata. Kua umere ra oki au e eaa ra te tarevake. I te openga kua kite au i reira e na te aruaru anga i tetai ngai angaanga i roto i teianei ao, kua vaitata takiri au i te ‘taka ke rava mai mei te akarongo.’ Taopenga mai, mei ta te Tuatua tikai a te Atua e akakite ra, kua rokoia au e te ‘iriea e manganui.’”​—1 Timo. 6:10.

Eaa ta Amy i rave? Kua karanga aia e: “Kua pati au ki te aronga pakari kia tauturu mai iaku i te akaoki akaou mai i toku maroiroi pae vaerua e kua akamata iora i te aere ki te au uipaanga. I tetai taime e imene ra, kua akamata au i te aue. Kua maara iaku toku tu mataora i te rima mataiti i piri ana au ki te tutu aere anga ei painia, noatu toku ngere i te pae materia i taua taime ra. Kua kite au i reira e ka anoanoia au kia akamutu i te kaimoumou i toku taime i te arumaki moni e ka anoanoia au kia tuku i te au anoano o te Patireia na mua. Kua ariki au i tetai ngai angaanga akaaka mai, tera te aiteanga ka topa e 50 patene o taku moni, e kua akamata au i te piri akaou atu ki roto i te angaanga tutuanga.” Kua akakite a Amy ma te mataora e: “Kua rauka iaku te mataora maata o te tavini anga ei painia no etai au mataiti. Teianei te kite nei au i te tu merengo mou tikai tei kore roa au i kite ana toku taime e angaanga ra na teianei ao.”

Ka rauka ainei ia koe i te akatanotano i toou au turanga e te akamama mai i te tu o toou oraanga? Me taangaanga koe i taua taime ra kia rauka i te akamaata atu i te au anoano o te Patireia, ka akapuapinga katoaia atu toou oraanga.​—Mase. 10:22.

[Tataanga Rikiriki i Raro]

[Tataanga i te kapi 19]

Ka rauka ainei ia koe i te akatanotano i toou au turanga e te akamama mai i te tu o toou oraanga?

[Pia/​Tutu i te kapi 19]

“Reka Tikai Au!”

Ko David, e tangata pakari Kerititiano i Marike, kua inangaro aia i te piri atu ki tana vaine e te tamariki i roto i te angaanga orometua tamou. Kua rauka iaia i te akanoo i tetai ngai angaanga no tetai au taime ua i ko i te kamupani e angaanga ana aia, e kua akamata atu i te tavini ei painia tamou. Kua akapuapingaia ainei te taui anga i tona oraanga? Tetai au marama i muri mai, kua tata a David ki tetai taeake e: “Kare atu e apinga mareka maata roa atu mari ra ko te piri pu tikai ki te tavini anga ia Iehova ma to tetai pamiri. Kua manako tikai au e ka pou rai tetai tuatau e matau ei au ki te angaanga painia kareka ra, e reka tikai au! E aka akamaroiroianga tikai.”

[Tutu i te kapi 18]

Marc raua ko Paula i roto i te angaanga orometua