Karangaia e kua Tau kia Aratakiia ki te Au Pupui Anga o te Vai Ora

“Na te Punua-mamoe . . . e angai ia ratou, e e arataki oki ia ratou ki te au pupui anga o te vai ora.”​—APO. 7:17.

1. Akapeea te Tuatua a te Atua i te akataka mai anga i te au Kerititiano akatainuia, e eaa te angaanga ta Iesu i oronga na ratou?

TE AKATAKA maira te tuatua a te Atua i te au Kerititiano akatainuia e akono ra i te au anoano o Karaiti i te enua nei, ei “tavini akono meitaki e te pakari.” I to Karaiti tutaka anga i te “tavini” i te mataiti 1918, kua kite aia i te tu akarongo mou tikai o taua aronga akatainuia ra i te enua nei i te tua anga i te “kai” pae vaerua i te “ora mou ra.” No reira i muri ake, kua mareka rava te Pu ko Iesu, i te akamana ia ratou “ei akaaere i te au apinga ravarai nana ra.” (E tatau ia Mataio 24:45-47.) Na roto i teia mataara, i mua ake ka rauka ai tetai tuanga i te rangi, te akono ra te aronga akatainuia i te aronga akamori ke atu o Iehova i te enua nei.

2. E akataka mai i te au apinga ravarai a Iesu.

² E mana to te pu ki rungao i tana au apinga ravarai me kore au mea pouroa, e ka rauka iaia i te taangaanga i te reira me tau i tona inangaro. Te kapiti katoatoa maira te au apinga ravarai a Iesu Karaiti, te Ariki akateronoia o Iehova, i te au mea  tini ravarai o te Patireia i te enua nei. Te kapiti maira te reira i te “aronga maata rava” ta te apotetoro ko Ioane i kite i roto i te orama. Te akataka maira a Ioane i te aronga maata rava mei teia rai e: “Akara atura au, e i na, e aronga maata rava, kare takiri e pou kia tatau, no te pa enua ravarai, e te au kopu ravarai, e te au iti-tangata ravarai, e te au reo katoa oki, i te tu ua anga ki mua i te terono, e ki mua i te Punua-mamoe, ma te kakau teatea i te kakau anga, e ma te kikau nu tamara i to ratou rima.”​—Apo. 7:9.

3, 4. Akapeea te au mema o te aronga maata rava i akameitaki maataia ai?

³ Ko te au mema o taua aronga maata rava tetai i roto i te aronga ta Iesu i taiku mai e ko tana “mamoe ke atu.” (Ioa. 10:16) To ratou manakonakoanga koia oki kia noo e tuatau ua atu i te enua parataito. Kua papu ia ratou e ka “arataki oki [a Iesu] ia ratou ki te au pupui anga o te vai ora” e “na te Atua e orei i to ratou roi-mata katoa i to ratou mata.” No taua manakonakoanga ra, “kua orei [ratou] i to ratou kakau, e kua akateatea i te toto o te Punua-mamoe ra.” (Apo. 7:14, 17) Kua tuku ratou i to ratou akarongo ki roto i te atinga a Iesu, e no reira i roto i te mata o te Atua e ‘kakau teatea’ to ratou. Kua akatikaia ratou ei au oa tuatua tika no te Atua mei ia Aberahama rai.

⁴ Tetai katoa, i te mea te manako maira te Atua i te aronga maata rava o te mamoe ke atu e tupu ua atura, ei aronga tuatua tika, ka rauka ia ratou kia manakonako atu e kia ora mai i te akapouanga o teia akatereanga o te au mea nei i te mate maata. (Iako. 2:23-26) Ka rauka ia ratou kia akavaitata atu kia Iehova, e ei pupu, tei ia ratou te manakonakoanga umere o te ora mai anga mei ia Aramakito. (Iako. 4:8; Apo. 7:15) Kare ratou i te pupu takake kareka ra te inangaro puareinga ua ra kia tavini i raro i te akatereanga a te Ariki i te rangi e tona au taeake akatainuia i te enua nei.

5. Akapeea te au mema o te aronga maata rava i te turuturu anga i te au taeake akatainuia o Karaiti?

⁵ Kua rokoia ana te au Kerititiano akatainuia e te patoianga pakari mei te ao o Satani e ka akapera ua atu rai. Noatu ra, ka rauka ia ratou kia irinaki ki runga i te turuturuanga a to ratou au oa o te aronga maata rava. I te au Kerititiano akatainuia e iti maira i teianei, te tere ua atura to te aronga maata rava ki te au anere ua atu au tauatini i te au mataiti ravarai. Kare e rauka i te aronga akatainuia i te akaaere tataki tai, mei tetai 100,000 putuputuanga Kerititiano i roto i teianei ao. No reira, ko tetai tu o te turuturuanga e rauka maira i te aronga akatainuia mei te mamoe ke atu koia oki,  ko te au tangata tukatau o te aronga maata rava e tavini ra ei aronga pakari no te au putuputuanga. Te tauturu ra ratou i te akono i te au mirioni ua atu au Kerititiano tei orongaia ki “te tavini akono meitaki e te pakari.”

6. Akapeea te turuturuanga tei orongaia ki te au Kerititiano akatainuia e to ratou au oa mamoe ke atu i te totouia anga?

⁶ Kua totou te peroveta ko Isaia no runga i te turuturuanga tei oronga puareinga uaia ki te au Kerititiano akatainuia, e to ratou au oa o te mamoe ke atu. Kua tata aia e: “Te na ko mairā Iehova, Te [“aronga angaanga tutaki koreia,” NW] no Aiphiti, e te oko na Kusa, e to Seba tangata teitei ra, te ka aere mai kia koe ra, ei tangata noou: e aru ratou ia koe.” (Isa. 45:14) Na roto i te tu akatutu, te aere nei te au Kerititiano e manakonakoanga enua to ratou i teia tuatau na muri i te pupu tavini akatainuia e tona Pupu Akaaere, te aru i ta ratou aratakianga. Ei “aronga angaanga tutaki koreia” te akapou nei te mamoe ke atu ma te inangaro puareinga ua e te ngakau katoa i to ratou maroiroi e ta ratou au apinga ei turuturu i te angaanga tutu aere i te ao katoa nei ta Karaiti i tuku mai ki tana au pipi akatainuia i te enua nei.​—Anga. 1:8; Apo. 12:17.

7. Te tereniia nei te aronga maata rava no teaa?

⁷ Ia ratou e oronga ra i ta ratou turuturuanga ki to ratou au taeake akatainuia, te tereniia ra te au mema o te aronga maata rava ei tango no te taiate tangata ou te ka vai mai i muri ake ia Aramakito. Ka anoanoia taua tango ra kia ketaketa kia ngaueue kore, e tona au mema kia inangaro puareinga ua e kia rauka katoa i te aru i te aratakianga a te Pu. Te orongaia nei te tuatau no te au Kerititiano tataki tai kia akaari mai e ka tau aia kia taangaangaia e te Ariki, ko te Karaiti ko Iesu. Na te akono anga i te akarongo e te akaari mai anga i te tu tiratiratu i teianei, te akaari ra aia e ka ariu puareinga ua aia ki te aratakianga ta te Ariki ka oronga mai kiaia i roto i te ao ou.

Akapapu te Aronga Maata Rava i to Ratou Akarongo

8, 9. Te akapeea nei te au mema o te aronga maata rava i te akapapu anga i to ratou akarongo?

⁸ Te akapapu nei te au oa mamoe ke atu o te putuputuanga o te au Kerititiano akatainuia i to ratou akarongo na roto i te au mataara tukeke. Te mea mua, te turuturu nei ratou i te aronga akatainuia i roto i te tutu aere anga i te tuatua meitaki o te Patireia o te Atua. (Mata. 24:14; 28:19, 20) Te rua, te kauraro puareinga ua nei ratou ki te aratakianga e orongaia maira e te Pupu Akaaere.​—Ebe. 13:17; e tatau ia Zekaria 8:23.

⁹ Te toru, te turuturu nei te au mema o te aronga maata rava i to ratou au taeake akatainuia na te akono rotai anga i ta Iehova au kaveinga tuatua tika. Te tauta nei ratou i te akatupu i te “inangaro, te rekareka, te au, te akakoromaki, te takinga meitaki, te meitaki, [“te akarongo,” NW], Te maru, te akono meitaki.” (Gala. 5:22, 23) Teia tuatau, penei ka riro te akaari rotai anga i taua au tu ra, e kare ki te akatupu anga i “te au angaanga a te kopapa” ei mea reka koreia. Noatu ra, kua iki rai te au mema o te aronga maata rava kia kopae i “te moeaana, te akaturi, te tuatua viivii ra, e te kanga, Te akamori idolo, te purepure, te makitakita, te tamaki, te akarere, te riri, te karo, te pae ke, te tuatua tarevake, Te vareae, te ta tangata, te konā kava, te kariei, e mei te reira te tu.”​—Gala. 5:19-21.

10. Eaa ra te ikianga a te au mema o te aronga maata rava i tuku?

¹⁰ I te mea e e tu apa ua to tatou, ka ngata rai i te akatupu i ta te ua o te vaerua, te kopae i te au angaanga a te kopapa, e te patoi atu i te taomianga e taangaanga pakariia nei e te ao o Satani. Noatu ra, kua iki rai tatou e auraka e akatika i te manako akaparuparu tei tupu no te au tu apikepike uaorai, te au tupuanga puapinga kore poto ua, me kore te au tu tukatau kore o te kopapa, kia akatuke i te tu matutu o to tatou akarongo me kore kia akaiti mai i to tatou aroa no Iehova. Kua kite tatou e ka rave rai a Iehova mei tana i taputou​—i te akono i te aronga maata rava kia ora atu na roto i te mate maata.

11. Eaa te au ravenga ta Satani e taangaanga ana i roto i tana au tautaanga kia akaapikepike i te akarongo o te au Kerititiano?

¹¹ Noatu ra, te vai matakite ua nei rai tatou no te mea kua kite tatou e ko te Tiaporo tikai to tatou enemi, e kare aia e tuku ngoie ua ana i te au. (E tatau ia 1 Petero 5:8.) Kua titau ana aia i te taangaanga i te au apoteiti e etai ke atu kia akanauru ia tatou kia irinaki e e pikikaa te au apiianga e aru ra tatou. Kareka ra e puapinga kore ua ana taua ravenga ra. Mei te reira katoa i tetai au  taime noatu te akamarieia ra te angaanga tutu aere e te takinga kino, e riro ua ana ra te reira ei akaketaketa roa atu i te akarongo o te aronga e takinga kinoia ra. No reira, e taangaanga putuputu ana a Satani i te ravenga tana e manako ra e ka puapinga maata atu i te akaapikepike i to tatou akarongo. E taangaanga ana aia i te au tu manako akaparuparu. Kua akamatakiteia ana te au Kerititiano o te anere mataiti mua no runga i teia tu kino i te akakiteia anga kia ratou e: “Akamaara marie oki iaia [Karaiti], ko tei akakoromaki i te reira tu akakino a te aronga rave ara iaia uaorai.” No teaa ra? “Kia kore kotou e akaroiroi, kia kore oki e taitaia to kotou ngakau.”​—Ebe. 12:3.

12. Akapeea ra te ako a te Pipiria i te akamaroiroi anga i te aronga tei rokoia e te manako akaparuparu?

¹² I manako ana rai koe e kia tuku i te au? E manako ana ainei koe i tetai au taime e kare oou puapinga? Me koia ia, auraka e akatika ia Satani kia taangaanga i taua au manako ra ei arai ia koe mei te tavini anga ia Iehova. Ka riro te apii oonu i te Pipiria, te pure akatenga, e te tae putuputu ki te au uipaanga e te taokotai atu anga ki te aronga mei te reira te akarongo, ei akaketaketa ia koe e ei tauturu ia koe kia kore e ‘taitaia toou ngakau.’ Kua taputou mai a Iehova e ka tauturu aia i te aronga e tavini ra iaia kia rauka akaou te maroiroi, e e mea mou tana taputou. (E tatau ia Isaia 40:30, 31.) E akara tamou ki runga i te angaanga Patireia. E kopae i te au angaanga kaimoumou taime, e akamou ki te tauturu anga i etai ke. I reira koe e akamaroiroiia ai kia akakoromaki noatu te tu manako akaparuparu.​—Gala. 6:1, 2.

Mei Roto i te Mate ki Roto i te Ao Ou

13. Eaa te angaanga e tiaki maira i te aronga ka ora atu ia Aramakito?

¹³ I muri ake ia Aramakito, e manganui ua atu te aronga tuatua tika kore ka akatuia mai te ka anoano i tetai ikuikuanga no runga i to Iehova au arataa. (Anga. 24:15) Ka anoanoia ratou kia apii no runga i te atinga oko o Iesu; maata atu i te reira, ka anoanoia ratou kia apii i te akono i te akarongo i roto i taua atinga ra e rauka mai ei te au puapinga no te reira. Ka anoanoia ratou kia kopae i te au irinakianga pikikaa o muao e kia akaruke takiri i to ratou tu oraanga i mua ana. Ka anoanoia ratou kia apiiia i te tu tangata ou te ka akataka ia ratou ei au Kerititiano mou. (Ephe. 4:22-24; Kolo. 3:9, 10) E maata te angaanga a te au mema o te mamoe ke atu te ka ora atu a taua tuatau ra. E pereperekavana anga maata tikai te ka rauka i te rave anga i taua angaanga ra na Iehova ma te kore te au taomianga e te au peu o teia ao kino!

14, 15. E akataka mai no runga i te komunikeitianga ka raveia i rotopu i te aronga ka ora mai mei te mate maata e te aronga tuatua tika ka akatuakaouia mai.

¹⁴ E maata katoa ta te au tavini akarongo mou tei mate i mua ake i te angaanga orometua a Iesu  i te enua nei ka apii a taua taime ra. Ka apii ratou no runga i te akatakaanga o te Mesia tei taputouia mai, ta ratou i manakonako ana inara kare rava i kite ana. I to ratou oraanga i muao, kua akaari ke ana ratou i to ratou tu puareinga ua kia apiiia e Iehova. Ka akamanako ua ana i te tu pereperekavana e te tu ngateitei ka rauka i te tauturu anga ia ratou​—ei akaraanga, i te akamarama anga kia Daniela no runga i te akatupuanga o te au totou tana i tata inara kare i marama ana!​—Dani. 12:8, 9.

¹⁵ E tika e, noatu e maata ta te aronga i akatuia mai ka anoanoia kia kite mei ia tatou, e maata katoa ta tatou au uianga ka ui kia ratou. Na ratou e akakite mai kia tatou i te au tupuanga ravarai tei taikuia mai i roto i te Pipiria inara kare i akataka tataki tai ia mai ana. E akamanako ana mei teaa ra te mataora kia kite i te au mea no runga ia Iesu uaorai mei tona taeake kopu tangata mai ko Ioane Papetito! Te au mea ka kite tika mai tatou mei taua au kite akarongo mou ra kare ekoko e, e maata roa atu te marama o te Tuatua a te Atua ta te reira ka oronga mai no tatou, i ta tatou i rauka i teianei. Te au tavini akarongo mou o Iehova tei mate​—kapiti mai te au mema o te aronga maata rava tei mate i te tuatau openga—​ka oki mai ratou ki te ‘tuakaouanga meitaki rava.’ I akamata ratou i ta ratou angaanga na Iehova i roto i tetai ao e akatereia ra e Satani. E pereperekavana anga tikai te ka rauka ia ratou kia rave mou atu rai i ta ratou angaanga i raro i te au turanga memeitaki roa atu o te ao ou!​—Ebe. 11:35; 1 Ioa. 5:19.

16. Kia tau ki te totou, ka akapeea te rave anga i te Ra Akavaanga?

¹⁶ A tetai taime i te tuatau o te Ra Akavaanga, e nga puka tetai ka eeuia. Kapiti atu ki te Pipiria, ko teia te ka akatumuia te akavaanga ki runga no te katoatoa rava e ora ra e me kua tau rai ratou kia rauka te ora mutu kore. (E tatau ia Apokalupo 20:12, 13.) Me tae ki te openga o te Ra Akavaanga, kua rava rai te tuatau i rauka i te tangata tataki tai kia akaari mai e i teea tua aia o te maroanga no te turanga ngateitei o te ao e pini ua ake. Ka kauraro ainei aia ki te tutaraanga a te Patireia e ka akatika i te Punua Mamoe kia arataki iaia ki “te au pupui anga o te vai ora”? Me ka patoi ainei aia, na te kopae anga i te kauraro ki te Patireia o te Atua? (Apo. 7:17; Isa. 65:20) Me tae taua taime ra, kua rauka ke ana tetai tuatau no te katoatoa i te enua nei kia rave i ta ratou uaorai ikianga, ma te kore e tamanamanataia e te ara akatuangaia me kore e te au turanga kino. Kare roa e rauka i tetai tangata kia akaekoko i te tu tika tikai o ta Iehova akavaanga openga. Ko te aronga kino ua rai kare e rauka kia akaoraia, te ka takoreia e mutu kore ua atu.​—Apo. 20:14, 15.

17, 18. Eaa te tapapaanga pereperekavana ta te au Kerititiano akatainuia e te mamoe ke atu e manako ra no te Ra Akavaanga?

¹⁷ I te mea kua karangaia e kua tau kia rauka te Patireia, te akara rekareka atu nei te au Kerititiano akatainuia i teia tuatau, ki te tutara anga a te Ra Akavaanga. E akangateiteianga maata tikai te ka rauka ia ratou! Na taua manakonakoanga tikai e akakeu ra ia ratou kia akono i te akoanga ta Petero i oronga ki to ratou au taeake i te anere mataiti mua e: “Ka akamaroiroi, kia kitea tikaia to kotou kapiki angaia e te iki angaia; kia pera oki kotou, kare ua ïa e inga: Ka oronga uaia mai oki te o no kotou ki roto i te basileia mutu kore o to tatou Atu o Iesu Mesia to tatou Ora ra.”​—2 Pete. 1:10, 11.

¹⁸ Te pereperekavana nei te au mamoe ke atu ma to ratou au taeake akatainuia. Kua iki rai ratou e kia turuturu i to ratou au taeake. Te akakeuia nei rai ratou ei au oa no te Atua i teia tuatau, kia akapou i to ratou maroiroi ki roto i te angaanga a te Atua. I te tuatau o te Ra Akavaanga, ka mataora maata roa ratou i te turuturu i te au akanoonooanga a te Atua ma te ngakau katoa, ia Iesu e arataki ra ia ratou ki te au pupui anga o te vai ora. E oti i te openga iora e karangaia ai ratou e kua tau ei au tavini no Iehova i te enua nei e tuatatau ua atu!​—Roma 8:20, 21; Apo. 21:1-7.

Maara Ainei ia Koe?

• Eaa te o maira ki roto i te au apinga ravarai a Iesu?

• Akapeea te au mema o te aronga maata rava i te turuturu anga i to ratou au taeake akatainuia?

• Eaa te au angaanga takake e te manakonakoanga ta te aronga maata rava e rekareka ra?

• Eaa toou manako i te Ra Akavaanga?

[Au Uianga Apii]

[Tutu i te kapi 25]

Te au mema o te aronga maata kua orei i to ratou kakau e kua akateatea i te toto o te Punua Mamoe

[Tutu i te kapi 27]

Eaa taau e manakonako ra kia kite mei te aronga akarongo mou ka akatuakaouia mai?