“Kia Matakite i te Angaanga i Rauka ia Koe i te Atu”

“Kia matakite i te angaanga i rauka ia koe i te Atu, kia oti meitaki ia koe.”​—KOLO. 4:17.

1, 2. Eaa te apainga a te au Kerititiano ki te au tangata ravarai?

E APAINGA pakari tikai ta tatou ki te au tangata te noo takapini ra ia tatou. Te au ikianga ta ratou ka rave i teianei ka riro mai ei ora me kore ei mate i te tuatau o “te mate maata.” (Apo. 7:14) Kua tuatua te tangata tei akauruia kia tata i te puka o Maseli e: “E akaora i te aronga i aratakiia e ta; te aronga i vaitata i te mate ra: kia kore ra koe e rave.” E au tuatua puapinga tikai! Me kare e akamatakiteia atu te au tangata no te ikianga ta ratou ka rave e vai ra i mua ia ratou ka aere mai te apa ki runga ia tatou. Ko te tika, te karanga ra taua irava rai e: “Kia karanga koe e, I na, kare matou i kite iaia; kare ainei tei kimi matatio i te ngakau nei e akamanako? kare ainei tei tiaki mai i to vaerua ra e kite? kare ainei aia e akautunga mai i te tangata nei i tana ra angaanga?” Te taka meitaki ra e, kare e rauka i te au tavini o Iehova i te tuatua e ‘kare ratou i kite’ i te kino ta te au tangata e aro ra.​—Mase. 24:11, 12.

² Te akaperepere ra a Iehova i te oraanga. Te raurau maira aia i tona au tavini kia rave i te au tauta anga i te tauturu i te akaora mai i te au tangata e manganui te ka rauka ia ratou. Ko te au tavini tataki tai o Iehova e mea tau kia akakitekite aere i te karere akaora i te ora tei kiteaia i roto i te Tuatua a te Atua. Aiteite ua ta tatou angaanga ki ta te tiaki tei akatangi i tetai akamatakiteanga i tona kite atu anga i te tumatetenga ka tupu mai. Kare tatou e inangaro kia iri mai te akaapa anga ki runga ia tatou me ka mate atu tetai tangata. (Ezeki. 33:1-7) No reira, e puapinga tikai e kia akakoromaki ua tatou i roto i ta tatou au tauta anga i te ‘akakite ua i te tuatua’!​—E tatau ia 2 Timoteo 4:1, 2, 5.

3. Eaa te au tumu manako ta teia atikara e te nga atikara e rua e aru maira ka uriuri?

³ Te akamanako ra teia atikara e akapeea koe i te autu anga i te au arai anga i roto i taau au angaanga orometua no te akaora anga e akapeea koe i te tauturu anga i te au tangata e manganui. Te atikara te aru maira ka tauturu ia koe kia riro mai ei puapii tukatau no te au tuatua mou puapinga maata. Te toru o te atikara te ripoti maira i etai au tupuanga akamaroiroi anga tei rauka i te aronga akakitekite aere i te Patireia i te ao katoa. Inara, i mua ake ka akamanako ei tatou i teia au tumu manako, e meitaki i te akara akaou e eaa ra i kino roa ai to tatou tuatau.

Te Tumu i Ngere ei te Manganui i te Manakonakoanga

4, 5. Eaa ta te au tangata ravarai e kite nei, e eaa ta te au tangata e manganui i rave?

⁴ Te akakite maira te au tupuanga i te ao e te noo nei tatou i roto i te “openga o te akatereanga o te au mea nei” e te vaitata rava maira te openga. Te kite nei te au tangata ravarai i te au tupuanga e te au turanga ta Iesu e tana au pipi i akakite mai e ka riro ei akairo no “te au ra openga.” Kua rokoia te au tangata ravarai e te “au mamae no te mate,” kapiti mai te au tamaki, te rava kore o te kai, te ngaruerue enua, e tetai ua atu au tumatetenga te tupu nei ki te au tangata katoa. Te tupu ra te kino, te noinoi, e te au tu akono tau kore i te Atua i te au ngai ravarai. Pera katoa rai te au tangata te tauta ra i te aru i te au turanga Pipiria, e e “au tuatau kikino [teia] tei ngata roa no te akono atu.”​—Mata. 24:3, 6-8, 12, NW; 2 Timo. 3:1-5, NW.

⁵ Inara, kare te maataanga o te au tangata i kite i te aiteanga tikai o te au tupuanga i te ao. Tei tupu mai, e manganui te manamanata ra no runga i to ratou uaorai ora e no to ratou au pamiri. Te mate anga tetai tei akaperepereia me kore no tetai au tumatetenga uaorai te akatupu maira i te mamae ki te au tangata e manganui.  Me kare e kite tika tikai e eaa ra taua au mea ra i tupu ei e ka kiteaia iea te pauanga ra, kare o teia au tangata nei manakonakoanga.​—Ephe. 2:12.

6. No teaa ra i kore ei e rauka ia “Babulonia maata” i te tauturu i tana au pipi?

⁶ Kare a “Babulonia maata,” te patireia o te akonoanga pikikaa o teianei ao, i oronga mai ana i te pumaana ki te au tangata ravarai. I tetai tua, na roto “i te wina ra i tana akaturi anga,” e manganui te au tangata tana i akaoripu i te pae vaerua. Pera katoa, na te akariro anga iaia mei tetai vaine akaturi, kua akavare e kua akatere te akonoanga pikikaa i “te au ariki o te enua nei,” na te taangaanga anga i te au apiianga pikikaa e te au ravenga purepure kia tapu i te maataanga o te au tangata kia kauraro ma te ekoko kore ki to ratou au pu i roto i te poritiki. No reira kua rauka mai i te akonoanga pikikaa te akatere anga e te akakeu anga, e i taua taime rai, kua kopae takiri aia i te akonoanga no te tuatua mou.​—Apo. 17:1, 2, 5; 18:23.

7. Eaa te manakonakoanga no te au tangata e manganui, inara akapeea e rauka ai i te tauturu i etai pae?

⁷ Kua apii mai ana a Iesu e te aere ra te maataanga o te au tangata na te ara atea e te pararauare te taki atura ki te mate. (Mata. 7:13, 14) Ko etai aronga tei runga ratou i taua mataara pararauare no te mea kua kopae tikai ratou i ta te Pipiria e apii maira, inara ko tetai pae e manganui tei runga i reira no te mea kua akavareia ratou, me kore kare ratou i apiiia ana e eaa tikai ta Iehova e umuumu maira mei ia ratou. Penei ka taui etai pae i to ratou tu oraanga me kua orongaia atu kia ratou te au tumuanga Tuatua Tapu taka meitaki kia rave i te reira. Inara ko te aronga te noo ra rai i roto ia Babulonia Maata e te kopae ra rai i te au turanga Pipiria kare ratou e ora mei roto mai “i te mate maata.”​—Apo. 7:14.

Kia Tutu Aere ua rai ‘ma te Kore e Tuku Ua’

8, 9. Eaa ta te au Kerititiano o te anere mataiti mua i rave i te aro atu anga i te patoianga, e no teaa ra?

⁸ Kua karanga a Iesu e ka tutu aere tana au pipi i te tuatua meitaki o te Patireia e ka akariro i te tangata ei pipi. (Mata. 28:19, 20) No reira, ka akamanako ua rai te au Kerititiano mou kia piri atu ki roto i te angaanga tutu anga ei tumuanga no te tu tiratiratu ki te Atua e e umuumuanga puapinga maata no to ratou akarongo. No reira, kua akakoromaki katoa te au pipi mua a Iesu i te aro atu anga i te patoianga. Kua irinaki ratou ki runga ia Iehova no te maroiroi, i te pure anga e kia tauturu mai aia ia ratou kia “tuatua ua i [tana] tuatua ma te mataku kore.” I te pau anga mai, kua akaki a Iehova ia ratou ki te vaerua tapu, e kua tuatua ua atu ratou i te tuatua a te Atua ma te mataku kore.​—Anga. 4:18, 29, 31.

⁹ Te kino pakari mai anga te patoianga, kua akamutu ainei te au pipi a Iesu i te tutu aere i te tuatua meitaki? Kare rava. No to ratou riri i te tutu aere anga te au apotetoro ra, kua opu te au arataki akonoanga ngati Iuda i te au apotetoro, kua tamataku atu ia ratou, e kua papa atu ia ratou. Inara, “kare e rā i tukua [te au apotetoro]; i te apii anga atu e te tuatua anga atu ia Iesu  Mesia.” Kua marama meitaki ratou e ‘ko te Atua ta ratou e akarongo e tikaʼi auraka te tangata.’​—Anga. 5:28, 29, 40-42.

10. Eaa te au akaaoanga ta te au Kerititiano e aro ra i teia tuatau, inara eaa te ka tupu mai no to ratou tu memeitaki?

¹⁰ Kare ra te maataanga o te au tavini o te Atua i teia tuatau i tukunaia atu ana kia papaia me kore kia tapekaia i roto i te are auri no ta ratou au angaanga tutu anga. Inara, te aro atura te au Kerititiano mou katoatoa i te au timataanga e te au akaaoanga tukeke. Ei akaraanga, penei te akamaroiroi maira toou akava ngakau tereniia e te Pipiria kia aru koe i tetai arataa no te tu mareka koreia me kore i tetai te ka kiteaia mai e e tuke rai koe. Penei te manako maira te au oa angaanga, te au oa apii, me kore te au tangata tupu e e tuke ua ake rai koe no te mea kua akanoo koe i taau au ikianga ki runga i te au kaveinga Pipiria. Te vai nei te ao i roto i te poiri i te pae vaerua, inara kia ‘kakā te au Kerititiano mei te rama’ rai. (Phili. 2:15) Penei te kite ra e te ariki rekareka ra tetai aronga ngakau aroa e akarakara maira i taau au angaanga memeitaki e kua akakaka ia Iehova.​—E tatau ia Mataio 5:16.

11. (a) Akapeea etai pae i te ariu mai anga ki te angaanga tutu anga? (e) Eaa te tu patoianga ta te apotetoro ko Paulo i aro atu ana, e akapeea aia i te ariu atu anga ki te reira?

¹¹ Te anoanoia ra te mataku kore kia rave ua atu tatou i te tutu aere anga i te karere o te Patireia. Penei ka aviri mai tetai pae tangata, pera katoa te au kopu tangata ia koe me kore ka tauta na roto i tetai au tu i te akaparuparu ia koe. (Mata. 10:36) Kua papaia ana tikai te apotetoro ko Paulo kare e okotai ua taime no tona rave akarongo mou anga i tana angaanga orometua. Ka akara ana e eaa tana i rave no taua patoianga: “Kua kite oki kotou e mate ua matou i muatangana, e te takinga-kino maataia mai,” i tata mai ei aia, “i maroiroi ra matou i to matou Atua i te tuatua anga atu ia kotou i te evangelia a te Atua i roto rai i te taumāro maata.” (1 Tesa. 2:2) Kua umuumuia te mataku kore kia tuatua ua atu a Paulo i te tuatua meitaki i muri ake i te opuia anga, te aeaeia anga te kakau, te papaia anga aia ki te rakau, e te uriia anga ki roto i te are tapekaanga. (Anga. 16:19-24) Akapeea i rauka mai ei iaia te mataku kore kia tuatua ua atu? No tona anoano maata i te rave i tana angaanga tutu anga tei orongaia mai e te Atua.​—1 Kori. 9:16.

12, 13. Eaa te au akaaoanga ta etai aronga e aro ra, e akapeea ratou i te tauta anga kia autu atu ratou i te reira?

¹² Ka riro katoa mai te reira ei akaaoanga i te akono tamou anga i to tatou maroiroi i te au ngai kare te tangata e mou ana i te kainga me kore i te ngai kare te maataanga e ariu mai ana ki te karere o te Patireia. Eaa ra ta tatou ka rave i roto i taua au turanga? Penei ka kite mai tatou e te anoanoia ra te mataku kore kia tuatua atu ki te au tangata i roto i te au turanga mareka ua. Penei ka akatano katoa tatou i ta tatou papaanga me kore ka tuku i ta tatou au tauta anga ki runga i te tutu aere anga ki te au ngai ka rauka ia tatou i te aravei atu i te au tangata.​—E akaaite ia Ioane 4:7-15; Anga. 16:13; 17:17.

¹³ Ko tetai au turanga ngata ta te manganui e akakoromaki ra ko te pakari anga e te kopapa apikepike, penei kua kotingaia ta ratou ka rauka i te rave i roto i te angaanga tutu anga. Me e tika tera kia koe, auraka e taitaia. Te kite maira a Iehova i toou au tu kotinga e te ariki rekareka maira i taau ka rauka i te rave. (E tatau ia 2 Korinetia 8:12.) Noatu e eaa te tu o te kino ta tatou ka aro atu​—te patoianga, te tu manako kore, me kore te makimaki—​e rave i te ka rauka i toou turanga i te rave i te oronga anga i te tuatua meitaki ki tetai ke.​—Mase. 3:27; e akaaite ia Mareko 12:41-44.

‘Kia Matakite i Taau Angaanga’

14. Eaa te akaraanga ta te apotetoro ko Paulo i akanoo no te au taeake Kerititiano, e eaa te akoanga tana i oronga mai?

¹⁴ Kua akono pakari te apotetoro ko Paulo i tana angaanga orometua, e kua akamaroiroi aia i te au taeake irinaki kia akapera rai. (Anga. 20:20, 21; 1 Kori. 11:1) Ko tetai tangata ta Paulo i iki kia akamaroiroi atu ko te Kerititiano ko Arekipo o te anere mataiti mua. I roto i tana reta ki to Kolosa, kua tata a Paulo e: “E ka karanga atu kia Arekipo, Kia matakite i te angaanga i rauka ia koe i te Atu, kia oti meitaki ia koe.” (Kolo. 4:17) Kare tatou i kite e koai a Arekipo me kore eaa tona au turanga, inara i te akara anga kua ariki aia i tetai angaanga orometua. Me e Kerititiano akatapuia koe, kua ariki katoa rai koe i tetai angaanga orometua.  Te matakite ua ra ainei koe i taau angaanga orometua kia rauka i te akatupu i te reira?

15. Eaa te o maira ki roto i te akatapuanga Kerititiano, te taki atu anga ki teea au uianga?

¹⁵ I mua ake ka papetitoia ai tatou, kua akatapu tatou i to tatou oraanga kia Iehova na roto i te pure ngakau tae. Teia te aiteanga kua akakoro oki tatou i te rave i tona anoano. No reira e mea meitaki kia ui tatou kia tatou uaorai i teianei e, ‘Ko te rave anga ainei i to te Atua ra anoano te mea puapinga maata tikai i roto i toku oraanga?’ Penei e tukeke ta tatou au apainga te inangaro maira a Iehova kia akono tatou​—mei te akonoanga i to tatou pamiri. (1 Timo. 5:8) Inara akapeea tatou i te taangaanga anga i te toenga o to tatou taime e te maroiroi? Eaa te mea puapinga maata i roto i to tatou oraanga?​—E tatau ia 2 Korinetia 5:14, 15.

16, 17. Eaa te au mea ta te au Kerititiano mapu me kore ta te aronga kare e maata ana ta ratou au apainga ka akamanako atu?

¹⁶ E mapu Kerititiano akatapuia ainei koe, kua oti me kore te vaitata ra taau apii i te akamutu? Penei, kare aau au apainga teiaa no te ngutuare. No reira, eaa taau e parani ra i te rave i roto i toou oraanga? Eaa te au ikianga te ka tauturu meitaki ia koe i te akatupu i taau taputou kia rave i to Iehova ra anoano? E manganui tei akatanotano i ta ratou au angaanga kia rauka ia ratou i te painia, e tei tupu mai kua kite mai ratou i te rekareka maata e te merengoanga.​—Sala. 110:3; Kohe. 12:1.

¹⁷ Penei e tangata mapu ou ua koe. E angaanga tinamou taau inara kare e maata ana te au apainga mari ua ko te akono ia koe uaorai. Kare e ekokoanga e e reka ana koe i te kapiti atu ki roto i te au angaanga a te putuputuanga i te ka rauka ia koe na roto i taau papaanga. Penei ka rauka ia koe te rekareka maata atu? Kua manako ana ainei koe i te akamaata atu i taau angaanga orometua? (Sala. 34:8; Mase. 10:22) I roto i etai au ngai, te anoano maataia ra rai te angaanga kia raveia kia taeria te katoatoa e te karere ora no te tuatua mou. Ka rauka ainei ia koe i te rave i te au akatikatika anga i roto i toou oraanga, penei na te tavini anga i tetai ngai te anoano maataia ra te aronga akakitekite aere i te Patireia?​—E tatau ia 1 Timoteo 6:6-8.

18. Eaa te au akatikatika anga ta tetai nga tokorua mapu i rave, e eaa tei tupu mai?

¹⁸ E akamanako ana i te akaraanga o Kevin raua ko Elena, no Marike mai. * Mei tei matauia i te au mapu i to raua ngai tei akaipoipo ou ua akenei, kua manako raua e ka oko mai raua i tetai are. Te angaanga tinamou ra raua e ka rauka i te akono tamou i tetai tu oraanga mareka ua. Inara, no te maata o to raua taime ki runga i te angaanga e te  au angaanga i te kainga kare e rava ana to raua taime no te angaanga tutu anga. Kua kite mai raua e vaitata rai e te pou atura to raua taime e te maroiroi ki runga i ta raua au apinga. Inara, i to raua akara anga i te tu oraanga ngoie o tetai nga tokorua painia mataora, kua iki a Kevin raua ko Elena i te taui i te akakoroanga maata o to raua oraanga. I muri ake i te pati anga i te tauturu na roto i te pure kia Iehova, kua oko atu raua i to raua are e kua neke atu ki roto i tetai apatimani. Kua akatopa mai a Elena i te au ora e angaanga ra aia e kua riro mai ei painia. Kua akamaroiroiia e te au tupuanga tei rauka i tana vaine i roto i te angaanga orometua, kua akaruke a Kevin i tana angaanga tinamou e kua akamata i te painia. I tetai tuatau i muri mai, kua neke atu raua ki tetai enua i Marike Apatonga i te angaanga i te ngai te anoano maataia ra te aronga tutu aere o te Patireia. “E mataora ua ana to maua oraanga akaipoipo,” i karanga ai a Kevin, “inara maata atu te tu merengo o to maua mataora.”​—E tatau ia Mataio 6:19-22.

19, 20. Eaa ra te tutu aere anga i te tuatua meitaki i riro ei ko te angaanga puapinga maata rava atu ia i teia tuatau?

¹⁹ Te tutu aere anga i te tuatua meitaki ko te angaanga puapinga maata rava atu ia e raveia nei i runga i te enua i teia tuatau. (Apo. 14:6, 7) Te tauturu maira te reira i te akatapuanga i to Iehova ingoa. (Mata. 6:9) Te akatikatika ra te karere o te Pipiria i te au oraanga o te au tauatini ua atu e manganui tei ariki mai i te reira i te au mataiti ravarai, e te taki atura teia ki to ratou ora. Inara, ka ‘akapeea oki ratou e kite ei me kare e akakiteia?’ i ui ei te apotetoro ko Paulo. (Roma 10:14, 15) Ka akapeea ra? Kare ainei koe e akakoro i te rave i te au mea pouroa te ka rauka ia koe i te akatupu i roto i taau angaanga orometua?

²⁰ Ko tetai mataara ka rauka ia koe i te tauturu i te au tangata kia marama i te puapinga tikai no teia tuatau ngata e te au mea i tupu no te au ikianga ta ratou i rave koia oki na te riro anga mai ei puapii meitaki. Akapeea ra koe i te rave anga i teia ka uriuriia te reira i roto i te atikara e aru maira.

[Tataanga Rikiriki i Raro]

Akapeea Koe me Pau?

• Eaa ra te apainga a te au Kerititiano ki te au tangata ravarai?

• Akapeea tatou i te akakoromaki anga i te au arairai anga ki ta tatou angaanga tutu anga?

• Akapeea tatou i te akatupu anga i te angaanga orometua ta tatou i ariki ana?

[Au Uianga Apii]

[Tutu i te kapi 5]

Te anoanoia ra te mataku kore kia tutu aere me tupu mai te patoianga

[Tutu i te kapi 7]

Eaa taau ka rave me tutu aere koe i te au ngai kare te tangata e noo mou ana i te kainga?