Me Ruruia te Au Kerititiano Mei te Titona

I MUA poto ua ake i tona matenga, kua akamatakite a Iesu i tana au pipi e: “I na, i pati anā Satani ia kotou, e ruru mei te sitona e ruruia ra.” (Luka 22:31) Ea ra te aiteanga i taua tuatua nana?

I to Iesu tuatau, e maata te taime e te maroiroi e pou ana i te kokoti anga i te titona. Te mea mua, e akaputu mai ana te aronga kokoti i te rara titona mei roto i te koro. I reira, ka papa ratou i te au rara ki runga i tetai ngai marokiakia me kore ka taangaanga i te au manu o te pama ei kika i te tereti papa titona na runga ake i te au rara kia atiati ungaunga rava te reira. Na teia e akatakake mai i te titona mei te au rara e te ota. Aru mai, ka pei te aronga tanu kai i te ungaunga titona ki roto i te reva. Ka pururu mai te kiko, me kore te ua o te titona ki runga i te taua o te ngai papa titona, na te matangi i reira e pupui ke atu i te ota. Te openga, ka ruru meitakiia te kiko me kore te ua i te akatakake mai i te reira mei tetai ua atu au mea tau kore.

Tika atura ki te tuatua a Iesu e, kare rava a Satani i tukutuku ana i te kaitamaki i te au pipi a Iesu i taua tuatau ra, e te kaitamaki nei rai aia ia tatou i teia tuatau. (Ephe. 6:11) E tika, e kare na Satani e akatupu ana i te au tu ngata ravarai e kite nei tatou i te oraanga. (Kohe. 9:11) Noatu ra, e aka inangaro rai to Satani i te taangaanga i tetai ua atu ravenga ka rauka iaia i te takino i to tatou tu tiratiratu. Ei akaraanga, penei ka timata aia ia tatou kia aru i te tu oraanga noinoi apinga materia, kia iki i te tu tamataoraanga tau kore, me kore kia piri ki roto i te tu tau kore o te ainga. Penei ka taangaanga katoa aia i te au oa i te apii me kore i te ngai angaanga e te au taeake kopu tangata kare i te Kite kia maro ia tatou kia aruaru pakari i ta teia ao e oronga maira i te pae apii e te ngai angaanga. Tetai katoa, penei ka taangaanga tika ua a Satani i te takinokino i te tauta anga kia takino i to tatou tu tiratiratu ki te Atua. Pera katoa, e maata te au mataara ke atu ta Satani e taangaanga ana ei ruru ia tatou, i na te reira tuatua ai.

Ka akapeea ra tatou i te patoi anga atu i teia enemi ririnui? Kare e rauka ia tatou i roto i to tatou uaorai maroiroi. E maroiroi atu a Satani ia tatou; inara, kua kite tatou e e maroiroi kino roa atu a Iehova ia Satani. Me irinaki mou tikai tatou i roto ia Iehova, pure akatenga no te pakari e te ngakau toa i te akakoromaki, e te irinaki pu tikai ki runga i tana aratakianga, ka akaketaketa aia ia tatou kia patoi atu i ta Satani au ravenga kino.​—Sala. 25:4, 5.

Me timataia, ka anoanoia kia rauka ia tatou te tu karape e ‘kite ei i te meitaki e te kino’ e te kopae anga i reira i te au ravenga akavare a Satani. (Ebe. 5:13, 14) Ka tauturu mai a Iehova ia tatou i te akatupu i taua tu karape ra. E oti ka anoanoia tatou kia mou piri tikai i te arataa tika, noatu eaa te tu. Me aru tatou i ta Iehova aratakianga, kare roa aia e poka i te turu i to tatou akakoroanga kia rave ma te ngakau mataku kore i te mea tika.​—Ephe. 6:10.

Ka titau a Satani kia ruru ia tatou mei te titona te tu. Kareka ra na roto i to Iehova maroiroi, ka rauka ia tatou i te patoi atu iaia, ma te akarongo turori kore. (1 Pete. 5:9) Ae, te akamaroiroi maira te Tuatua a Iehova ia tatou e: “E patoi atu i te diabolo, e nana e rere ke atu.”​—Iako. 4:7.