Te Ariu Maira “Te Aronga i Akonoia”
Te Ariu Maira “Te Aronga i Akonoia”
“Te aronga i akonoia no te ora mutu kore ra, kua akarongo anake ïa.”—ANGA. 13:48.
1, 2. Akapeea te au Kerititiano mua i te ariu anga ki ta Iesu totou e ka tutu aereia te tuatua meitaki i te pa enua ravarai?
KUA akonoia i roto i te puka Pipiria o Angaanga te papaanga mataora roa atu e akapeea te au Kerititiano mua i te ariu mai anga ki ta Iesu totou, e ka tutu aereia te tuatua meitaki o te Patireia i te ao katoa. (Mata. 24:14) Kua akanoo mai te aronga tutu maroiroi i te akaraanga, no te aronga ravarai te ka aru atu ia ratou. Tei tupu mai no te akakitekite maroiroi anga a te au pipi a Iesu i Ierusalema, tauatini ua atu au tangata tei piri mai ki te putuputuanga i te anere mataiti mua, e “e manganui oki to te kau taunga” tei kapitiia mai.—Anga. 2:41; 4:4; 6:7.
2 E maata te aronga ta te au mitinari mua i tauturu kia ariki mai i te Akonoanga Kerititiano. Ei akaraanga, kua aere atu a Philipa ki Samaria, ko te ngai ia i akarongo mai ei te urupu tangata ki tana au tuatua. (Anga. 8:5-8) Mamao te au ngai i aere ei a Paulo ma te au oa tukeke, i te tutu aere anga i te karere Kerititiano i Kupero, i te au tuanga o Asia Minora, i Makedonia, i Ereni, e i Itaria. I roto i te au oire i te ngai e tutu aere ra aia e manganui te aronga ngati Iuda e te aronga Ereni tei riro mai ei aronga irinaki. (Anga. 14:1; 16:5; 17:4) Kua rave a Tito i te angaanga orometua i Kereta. (Tito 1:5) Te angaanga pakari ra a Petero i Babulonia, e te tae anga te tuatua i tata ei aia i tana reta mua, mei te mataiti 62-64 T.N., kua kite meitakiia te angaanga a te au Kerititiano i Ponoto, i Galatia, i Kapadokia, i Asia, e i Bitunia. (1 Pete. 1:1; 5:13) E tuatau mataora tikai te reira! No te tu maroiroi o taua aronga Kerititiano tutu aere i te anere mataiti mua i karanga ai to ratou au enemi e kua rauka ia ratou i te ‘tarurike i te pa enua ravarai.’—Anga. 17:6; 28:22.
3. Eaa te au tupu anga te rauka maira i te aronga akakitekite aere i te Patireia o teia tuatau i roto i ta ratou au angaanga tutu anga, e eaa ra toou manako?
3 I roto i teia au tuatau, kua kite katoa te putuputuanga Kerititiano i te tupuanga meitaki. Kare ainei koe e akamaroiroiia ana me tatau koe i te ripoti mataiti a te Au Kite o Iehova e te kite anga i te au tupuanga tei rauka mai i te ao katoa nei? Te pumaana ra ainei toou ngakau i te kite e kua tere atu ki te ono mirioni te au apii Pipiria ta te aronga akakitekite aere o te Patireia i rave ana i te mataiti tavini anga 2007? Pera katoa, te aronga tei tae mai ki te Akamaaraanga no te mate o Iesu Karaiti i te mataiti i topa akenei, te akakite maira e mei te tai ngauru mirioni tangata kare i te Au Kite no Iehova te inangaro maira i te tuatua meitaki tei tae mai ki teia akamaara anga puapinga maata. Te akakite maira teia e e maata rai te angaanga te ka raveia.
4. Koai ma te ariu maira ki te karere o te Patireia?
4 I teia tuatau, mei te anere mataiti mua rai, ko “te aronga i akonoia no te ora mutu kore ra” tei ariu mai ki te karere o te tuatua mou. (Anga. 13:48) Te akapiri vaitata maira a Iehova i taua au tangata ra ki roto i tana akaaerenga. (E tatau ia Hagai 2:7.) Eaa ra te tu manako no te angaanga orometua Kerititiano ta tatou e inangaro ra i te akono tamou kia taokotai pu tikai ki teia angaanga akaputuputu anga?
Tutu Aere ma te Papakitai Kore
5. Ko teea tu tangata tei rauka mai ta Iehova akaperepere anga?
5 Kua marama te au Kerititiano o te anere mataiti mua e “kare te Atua e akono i te tu o te tangata: Ko te mataku ra iaia, e ko te rave i te tuatua-tika, i te pa enua ravarai, ko tei kiteia mai ïa e ia.” (Anga. 10:34, 35) Me e pirianga meitaki to tetai tangata kia Iehova me kare, tei runga te reira i tona taangaanga anga i te akarongo i roto i te atinga oko o Iesu. (Ioa. 3:16, 36) E to Iehova ia anoano e ‘kia ora te tangata katoatoa, e kia rauka te kite i te tuatua-mou.’—1 Timo. 2:3, 4.
6. No runga i teaa ka matakite ei te aronga tutu aere i te Patireia, e no teaa ra?
6 E tarevake tikai no te aronga akakitekite aere i te tuatua meitaki i te akavaavaa atu i te au tangata no runga i to ratou iti tangata, te turanga puapinga, te tu o te akaraanga, te turanga o te akonoanga, me kore no tetai ua atu tu. E akamanako ana: Kare ainei koe i mataora ana e, kare te tangata tei tuatua mua mai kia koe no runga i te au tuatua mou o te Tuatua Tapu ra i akavaavaa ana ia koe? No reira eaa i reira ka kopae ei i te oronga atu i tetai karere te ka akaora mai i tetai ua atu tangata te ka akarongo mai ki te reira?—E tatau ia Mataio 7:12.
7. Eaa tatou ka kopae ei i te akava atu i te aronga e tutu aere atura tatou?
7 Kua iki a Iehova ia Iesu ei Akava; no reira, kare o tatou tikaanga kia akava atu i tetai ke. E mea tau te reira, no te mea—kare i aite mei ia Iesu rai—te akava ua ra tatou “i ta [to tatou] mata i akara” me kore “i ta [to tatou] taringa i akarongo ra,” kareka ra te kite maira a Iesu i te au manako oonu e te au tumu manako o te ngakau.—Isa. 11:1-5; 2 Timo. 4:1.
8, 9. (a) Eaa to Saula tu i mua ake ka riro mai ei aia ei Kerititiano? (e) Eaa ta te tupuanga o te apotetoro ko Paulo e apii maira kia tatou?
8 Kua riro mai te au tu tangata ravarai ei au tavini no Iehova. Ko tetai akaraanga meitaki koia oki no Saula o Tareso, tei riro mai i muri mai ko te apotetoro ko Paulo. E tangata patoitoi riri tikai te Pharisea ko Saula i te au Kerititiano. No te mea kua irinaki tikai aia e kua tarevake ratou kua akaue atura aia kia takinga kino i te putuputuanga Kerititiano. (Gala. 1:13) I te manako o te tangata, i te akara anga kare i tapapaia atu ana e koia tetai tangata te ka riro mai ei Kerititiano. Inara, kua kite atu a Iesu i tetai apinga meitaki i roto i te ngakau o Saula e kua iki iaia kia akatupu i tetai angaanga takake. Tei tupu mai, kua riro mai a Saula ko tetai mema maroiroi roa atu i te angaanga i roto i te putuputuanga Kerititiano i te anere mataiti mua.
9 Eaa ta te tupuanga no te apotetoro ko Paulo e apii maira kia tatou? I roto i ta tatou ngai tutu anga, penei ake te vai ra tetai au pupu tangata akara anga te riri maira ratou i ta tatou karere. Noatu e akara anga ekokoia ra e kare tetai ia ratou e riro mai ei au Kerititiano mou, auraka ra tatou e akamutu i te tauta i te uriuri manako kia ratou. I tetai au taime ko tetai aronga kare i manakoia atu ana e ka akarongo mai ko ratou te akarongo maira. Ta tatou akauenga koia oki kia tutu aere ua atu rai ki te katoatoa ‘ma te kore e tuku ua.’—E tatau ia Angaanga 5:42.
Au Akameitakianga e Tapapa Atura i te Aronga Tutu Aere ‘ma te Kore e Tuku Ua’
10. Eaa ra tatou kare ei e tapupu i te tutu aere ki te au tangata akara anga matakuia ra? E akakite mai i te au tupuanga o toou ngai.
10 Ka riro te tu o te akara anga ei mea pikikaa. Ei akaraanga, kua akamata a Ignacio * i te apii i te Pipiria ma te Au Kite o Iehova iaia i roto i te are auri i tetai enua i Marike Apatonga. Kua mataku te tangata iaia no tona tu kino. Tei tupu mai, kua taangaanga te au mouauri te maani ra e te oko ra i te au apinga ki te au oa mouauri ia Ignacio kia koi mai i te au kaiou mei te aronga marie i te tutaki mai. Inara, ia Ignacio e tere marie ra ki mua i te pae vaerua e te taangaanga i tana i kite mai, kua riro mai teia tangata takinokino o mua ana ei tangata takinga meitaki. Kare tetai tangata i taangaanga akaou ana iaia kia koi i te au kaiou, inara kua mareka ua a Ignacio e kua taui te au tuatua mou Pipiria e te vaerua o te Atua i tona tu. Kua mataora katoa aia no te tu papakitai kore a te au papuritia Patireia tei tauta tikai i te apii atu iaia.
11. Eaa tatou ka oki ua ai i te atoro i te au tangata?
11 Ko tetai au tumu i oki ua ai tatou i te atoro i te au tangata kua tuatua takere ana tatou kia ratou Koheleta 9:11.) Penei na te au tupuanga i te ao e akakeu ra i te au tangata kia akamanako pakari tikai no runga i to ratou tuatau ki mua. Penei e na taua au tupuanga ra e akariro i tetai tangata kare i akarongo mai ana i mua ana—me kore kua patoitoi katoa mai ana—kia ariu mareka ua mai. No reira, auraka tatou e tapupu i te oronga atu i te tuatua meitaki ki tetai ke i te au atianga tau ravarai.
no runga i te tuatua meitaki, koia oki ka taui rai to ratou au turanga e te au tu e kua taui rai te reira. I to tatou atoro openga anga, penei kua rokoia tetai papaki e te maki kino, kua ngere i te ngai angaanga, me kore kua mate tetai tei akaperepereia. (E tatau ia12. Akapeea tatou i te manako atu anga i te au tangata ta tatou ka tutu aere atu, e no teaa ra?
12 E tu matauia no te tangata i te akavaavaa e te akava i te au tangata ke. Inara, te kite maira a Iehova i te au tangata ei aronga tataki tai. Te kite maira aia i to ratou tu meitaki takitai. (E tatau ia 1 Samuela 16:7.) I roto i ta tatou angaanga orometua, e tauta tatou kia akapera katoa rai. E manganui te au tupuanga te akaari maira i te meitaki e tupu ana me e manako papu to tatou no te katoatoa ta tatou ka tutu aere atu.
13, 14. (a) Eaa ra tetai painia i manako papu kore ei no runga i tetai vaine tana i aravei ana i roto i te angaanga orometua? (e) Eaa ta tatou i kite mai no teia tupuanga?
13 Te rave ra a Sandra, e tuaine painia i te angaanga orometua mei tera are ki tera are i runga i tetai airani i te Karapieni i tona aravei atu anga ia Ruth, tei piri maroiroi tikai ki roto i te au angaanga tamataora anga a te enua. E rua taime i te akakoronaia anga a Ruth ei ariki vaine no te angaanga tamataora anga a te enua. Kua akaari mai aia i te inangaro ngakau tae ki ta Sandra e tuatua ra, no reira kua akapapaia tetai apiianga Pipiria. Te maara ra ia Sandra e: “I toku aere atu anga ki roto i tona pia noonoo anga, kua kite atu au ia Ruth i roto i tetai tutu maatamaata i roto i te kakau purapura tamataora anga, pera katoa tana au kapu i re mai. Kua tarevake au i te manako anga e kare roa tetai tangata rongonui e piri ra ki roto i te au angaanga tamataora anga e inangaro mai i te tuatua mou. Kua akamutu au i te atoro akaou iaia.”
14 I tetai tuatau i muri mai, kua aere mai a Ruth ki te Are Uipaanga Patireia, e te oti anga te uipaanga, kua ui aia kia Sandra, “Eaa koe i akamutu ei i te aere mai i te apii iaku?” Kua tataraapa a Sandra e kua akapapa akaou i te rave i te apii. Kua tere viviki a Ruth ki mua, kua akaatea aia i tona au tutu o te angaanga tamataora, kua piri mai ki roto i te au angaanga katoatoa a te putuputuanga, e kua akatapu aia i tona oraanga kia Iehova. E tika rai, kua kite mai a Sandra e e tarevake tona manako mua anga.
15, 16. (a) Eaa ra tei tupu mai i te akakitekite anga tetai papuritia ki tetai o te kopu tangata? (e) Eaa ra te turanga o tetai kopu tangata ka kore ei e riro ei akaparuparu ia tatou i te akakitekite atu anga kiaia?
15 Te kite katoaia ra te au tupuanga papu ki te manganui tei akakitekite aere ana ki te au mema pamiri irinaki kore, noatu e i te akara anga kare teia aronga e ariu mareka ua mai. E akamanako ana, ei akaraanga, i te turanga o Joyce, e tuaine Kerititiano i Marike. E apaina putuputuia ana tona taokete tane ki roto i te are auri mei tona mapu anga mai. “E karanga ana te au tangata e e puapinga kore ua tona oraanga,” i akakite mai ei a Joyce, “no te mea e kai ana aia i te au apinga akakona, te keikeia, e te rave i tetai ua atu au mea kino. Noatu rai, e eaa te au turanga, e 37 mataiti i
toku oronga ua anga i te tuatua mou Pipiria kiaia.” Kua akameitakiia mai tikai tana au tautaanga akakoromaki i te tauturu atu i tona kopu tangata i te akamata anga aia i te apii i te Pipiria ma te Au Kite o Iehova e kua rave i te au tauianga maata i roto i tona oraanga. Tei tupu ua akenei, i te 50 anga o tona mataiti, kua papetitoia to Joyce taokete tane i ko i te uruoaanga tapere i California, i Marike. Te karanga ra a Joyce e: “Kua aue rekareka tikai au. Mataora tikai au no te mea kare roa au i akaruke ana iaia!”16 Penei ka emiemi koe i te tuatua atu ki tetai o toou kopu tangata no runga i te au tuatua mou Pipiria no te mea no to ratou tu oraanga. Inara, kare taua tu emiemi i tapupu ana ia Joyce i te tuatua atu ki tona taokete tane. No te mea, akapeea tetai e kite ei e eaa to roto i te ngakau o tetai tangata? Penei te kimi ra tera tangata ma te ngakau tae i te akonoanga tuatua mou. No reira, auraka e tapupu i te oronga atu kiaia i te atianga kia rauka te reira.—E tatau ia Maseli 3:27.
E Puka Meitaki Tikai no te Apii Pipiria
17, 18. (a) Eaa ta te au ripoti takapini i te ao e akakite maira no runga i te puapinga o te puka Eaa Tikai ta te Pipiria e Apii Maira? (e) Eaa te au tupuanga akamaroiroi anga tei rauka mai ia koe i to taangaanga anga i teia puka?
17 Te akaari maira te au ripoti no te au enua takapini i te ao nei e e manganui te aronga ngakau tika tataki tai tei ariu mareka ua mai ki te puka apii Eaa Tikai ta te Pipiria e Apii Maira? E maata te au apii ta Penni i akamata, e tuaine painia aia i Marike, i te taangaanga anga i teia puka. E rua nga apii te raveia ra ki tetai nga tangata pakarikari e nga mema akamori maroiroi no ta raua akonoanga. Kare i papu ia Penni e ka akapeea ratou me ariu mai ki te au tuatua mou o te Tuatua Tapu tei akakiteia mai i roto i te puka ta te Pipiria e Apii Maira. Noatu rai, kua tata aia e, “No te tu taka meitaki, tau, e te tano tikai i te orongaia mai anga te apiianga, kua ariki vave ua ratou i ta ratou i apiiia ei tuatua mou, kare e taumaro e kare e manamanata i te pae manako.”
18 Kua akamata a Pat, e papuritia i Peritane, i te apii i te Pipiria ki tetai vaine e vaine oro kimi ora no tetai enua mai i Asia. Kua maroia te vaine kia akaruke i tona enua i muri ake i te apainaia anga e te au vaeau meameaau tana tane e tana tamariki tamaroa, e kare roa aia i kite akaou ana ia ratou. Kua tamatakutakuia tona oraanga, kua tutungiia tona are, e kua tauatiia ana aia e tetai pupu tangata. No teia tupuanga pouroa kiaia ra kua manako aia e kare ona akakoroanga i roto i te oraanga, e e maata te au atianga kua manako aia i te tamate iaia. Inara, kua oronga te apiianga Pipiria i te manakonakoanga kiaia. “Te tu ngoie o te au akamaramaanga e te au akatutuanga i roto i te puka ta te Pipiria e Apii Maira kua riro mai ei tupu anga meitaki kiaia,” i tata mai ei a Pat. Kua tere viviki te vaine e apii ra, kua tau kia riro mai ei papuritia kare i papetitoia ake, e kua akakite mai i tona anoano kia papetitoia aia i tera mai akaputuputuanga. Mei teaa ra te rekareka i te tauturu anga i te au tangata ngakau tae kia marama e kia ariki
rekareka mai i te manakonakoanga tei orongaia mai e te au Tuatua Tapu!“Auraka Tatou e Roiroi i te Takinga-Meitaki”
19. No teaa ra i rapurapuia ai te angaanga tutu anga?
19 I te au ra tataki tai tei topa ki muri, no runga i te tu rapurapu o ta tatou angaanga kia tutu aere e kia akariro i te au tangata ei pipi ra, te maata ua atura te tu rapurapu anga. E tauatini ua atu te aronga i akonoia te ariu maira ki ta tatou tutu anga i te au mataiti ravarai. Inara, ‘te vaitata maira te rā maata o Iehova,’ te aiteanga ko te aronga te noo ra rai i roto i te poiri i te pae vaerua te ‘vaitata ra ki te mate.’—Zepha. 1:14; Mase. 24:11.
20. Eaa ta tatou tataki tai ka akakoro tikai i te rave?
20 Ka rauka rai ia tatou i te tauturu i taua au tangata. Inara e rauka ai ia tatou i te rave i te reira, e puapinga maata tikai kia aru tatou i te au Kerititiano o te anere mataiti mua, “kare e rā i tukua ia ratou, i te apii anga atu e te tuatua anga atu ia Iesu Mesia.” (Anga. 5:42) E aru i to ratou akaraanga na te akakoromaki anga noatu te tu kino, na te akono marie anga i te ‘tu karape o taau apiianga,’ e na te tutu aere anga ki te katoatoa ma te papakitai kore! “Auraka tatou e roiroi i te takinga-meitaki,” me akakoromaki ua tatou, e maata te au akameitakianga ta tatou ka kokoti no te akamareka anga tu-Atua.—2 Timo. 4:2; e tatau ia Galatia 6:9.
[Tataanga Rikiriki i Raro]
^ para. 10 Kua tauiia tetai au ingoa.
Akapeea Koe me Pau?
• Koai ma te ariu maira ki te tuatua meitaki?
• Eaa ra tatou ka kopae ei i te akavaavaa i te aronga ta tatou e tutu aere atura?
• Eaa te au tupuanga i rauka mai mei te puka Eaa Tikai ta te Pipiria e Apii Maira?
[Au Uianga Apii]
[Au Tutu i te kapi 13]
Te ariu maira te aronga ngakau tika e tauatini ua atu
[Au Tutu i te kapi 15]
Eaa ta tatou ka kite mai no te au taui anga ta te apotetoro ko Paulo i rave?
[Tutu i te kapi 16]
Te aronga akakitekite aere i te tuatua meitaki kare ratou e akavaavaa i te au tangata