Te Tuanga Apii Ou no Te Punanga Tiaki

TE MAKATINI taau e tatau nei ko te itiu muaia no te tuanga apii no Te Punanga Tiaki. Te inangaro nei matou i te akamarama atu i tetai au akapapaanga ou no teia makatini.

Kua neneiia te tuanga apii no te Au Kite o Iehova e no te aronga apiipii Pipiria te tere meitaki ra ki mua. Ka neneiia e tai taime i te marama e a me kore e rima atikara apii i roto i reira. Kua neneiia te papaanga no te akamanako anga i teia au atikara apii i runga i te kapi o mua o te makatini. Kare i aite ki te tuanga a te papuriki no Te Punanga Tiaki, kare te au akatutuanga i runga i te kapi o mua i te kopi o te tuanga apii e tuke i roto i te itiu tataki tai, no te mea kare te reira e orongaia i roto i te angaanga orometua.

I runga i te kapi 2 o te makatini, ka kite koe i tetai akakiteanga poto ua e te puapinga no te akakoroanga o te au atikara apii tataki tai e tetai atu au atikara pera katoa te papaanga no te au atikara turu. Ka kite mai te aronga akaaere i te Apii Punanga Tiaki e e puapinga maata tikai taua atikara ia ratou e akapapa ra i tetai uriurianga tau no te au atikara i ko i te uipaanga a te putuputuanga.

Ka kite koe e e poto roa ake te au atikara apii i to te au atikara o mua ana. Tei tupu mai, e maata atu te taime i te akamanakoanga i te au irava puapinga i te tuatau o te Apii Punanga Tiaki. Te akamaroiroi pumaana atu nei matou ia koe kia akara pouroa i te au irava tei taikuia i te au epetoma ravarai. Ko tetai au irava tei akaariia mai kua akairoia mai e “e tatau ia” e kia tatauia rai te reira e kia uriuriia te reira i te tuatau o te Apii Punanga Tiaki. Penei ka tatau katoaia tetai au irava me e taime tetai. I roto i etai au atikara, ka kite koe i te au irava kua akairoia e “kia akaaite ia.” Mei te mea e kare taua au irava ra e akapapu tika maira i te au tumu manako maata i roto i te parakarapa, kare te reira e tatauia i ko i te uipaanga a te putuputuanga. Noatu rai, tei roto i te au irava “kia akaaite ia” te akakiteanga umere tei kapitiia mai ei akarava atu, me kore penei te oronga tika maira te reira i te turu anga kare i taikuia mai no te au tumu manako te uriuriia ra. Te akamaroiroi atu nei matou ia koe kia tatau i te reira ia koe e akapapa ra i te Apii Punanga Tiaki. Penei ka rauka ia koe i te taiku mai i te reira i roto i taau au pauanga.

Kare te ripoti o te mataiti e tataia i roto i Te Punanga Tiaki. Akamata mai i te mataiti 2008, ka neneiia te reira i roto i te kapi i roto roa i Ta Tatou Angaanga Patireia e pera katoa i roto i te Yearbook. Inara, mei tei akakiteia mai i runga akenei, te kapiti maira te tuanga apii i tetai au atikara turu. Noatu e kare te maataanga o teia au atikara e akamanakoia i ko i te uipaanga a te putuputuanga, te akamaroiroiia atu nei koe kia tatau meitaki tikai i te reira. Tei roto katoa i reira te kai no ko mai i “te tavini akono meitaki e te pakari.”​—Mata. 24:45-47.

Taopenga mai, ko te nga makatini e rua no te tuanga apii e te tuanga a te papuriki o Te Punanga Tiaki kare i te nga makatini tuke ke. Ko Te Punanga Tiaki Akakiteanga i te Patireia o Iehova nga mea roa ai e rua. Aiteite ua te au parakarapa i roto i te kapi 2 o nga makatini roa ai, te akamarama maira i te akakoroanga o Te Punanga Tiaki. Ka kapitiia mai nga itiu ki roto i te voriumu papaanga o te mataiti. E te tumu manako no roto mai i nga atikara ka kiteaia i roto te atikara “Maara Ainei ia Koe?” te ka neneiia i roto i te tuanga apii.

Mei te mataiti 1879, e te au tuatau tamakianga tei aereia mai, te turanga ngata i te pae puapinga, e te takinokino anga, te akakite tiratiratu ua mai anga rai Te Punanga Tiaki i te tuatua mou no runga i te Patireia o te Atua. Te pure nei matou e ma ta Iehova akameitakianga, ka akakite uaia atu rai i roto i te akapapaanga ou. E te pure nei matou e kia akameitaki mai a Iehova ia koe, ko koe te tangata e tatau ra, ia koe e taangaanga meitaki ra i te tuanga apii ou no Te Punanga Tiaki.