E Aru i te Mitinari Maata Rava Atu
E Aru i te Mitinari Maata Rava Atu
“E aru mai kotou iaku mei iaku katoa i aru i te Mesia nei.”—1 KORI. 11:1.
1. Eaa tatou ka aru ei ia Iesu Karaiti?
KUA aru te apotetoro ko Paulo i te Mitinari maata rava atu, ko Iesu Karaiti. Kua raurau katoa a Paulo i tona au taeake Kerititiano e: “E aru mai kotou iaku mei iaku katoa i aru i te Mesia nei.” (1 Kori. 11:1) I muri ake i to Iesu oronga anga i tetai apiianga ki tana au apotetoro no te tu akaaka na te orei anga ma te akaaka i to ratou vaevae, kua akakite aia kia ratou e: “Kua tuku atu na oki au i te akaraanga na kotou, ko taku i raveo ia kotou nei, kia akapera katoa kotou.” (Ioa. 13:12-15) Ei au Kerititiano i teia tuatau, e apainga ta tatou kia aru ia Iesu Karaiti i roto i ta tatou au tuatuaanga e te au angaanga e i roto i te au tu e akaari maira tatou.—1 Pete. 2:21.
2. Noatu e kare koe i ikiia ana e te Pupu Akaaere ei mitinari, eaa ra te tu ka rauka ia koe kia tatanu?
2 I roto i te atikara i mua ake, kua apii tatou e ko te mitinari, koia oki ko tetai tei tonoia ei tangata apii evangeria—tetai tei apai i te tuatua meitaki ki etai ke. No runga i teia, kua tuku mai a Paulo i tetai au uianga umere tikai. (E tatau ia Roma 10:11-15.) E akara, e kua ui atu te apotetoro e: ‘Eaa oki ratou e kite ei me kare e akakiteia atu?’ I reira kua taiku atu aia i te au tuatua mei roto i te totou a Isaia e: ‘Manea te vaevae o te aronga i apai mai i te tuatua reka o te au, ko te apai mai i te evangelia o te meitaki ra!’ (Isa. 52:7) Noatu e kare koe i ikiia ana e i tonoia ana kia tavini ei mitinari i roto i tetai tukuanga angaanga i te enua ke, ka rauka rai ia koe kia tatanu i te tu maroiroi i te apii evangeria, i te aru anga ia Iesu ei tangata akakitekite maroiroi i te tuatua meitaki. Te mataiti i topa e, 6,957,852 papuritia o te Patireia tei ‘rave i te angaanga a te aronga apii evangeria’ i roto i te au enua e 236.—2 Timo. 4:5.
“Kua Akaruke Matou i te Au Mea Katoa, e kua Aru Mai ia Koe”
3, 4. Eaa ta Iesu i akaruke atu i runga i te rangi, e eaa te anoanoia ra kia rave tatou kia riro mai ei au pipi nana?
3 Ei akatupu i tana angaanga i tukuia mai i runga nei te enua, kua “tuku ke atura ra [Iesu] i tona uaorai tu, e kua rave i to te tavini,” e akaruke atura i tona oraanga e te kaka i te rangi. (Phili. 2:7) Noatu eaa ta tatou ka rave i te aru anga ia Karaiti, kare roa te reira e rauka kia akaaiteia atu ki ta Iesu i rave i te aere mai anga ki te enua nei. Inara ka rauka ia tatou kia vai ngaueue kore ua ei au pipi nana, auraka e nakunaku atu i te au mea tei rauka ana ia tatou i roto i te ao o Satani.—1 Ioa 5:19.
4 I tetai atianga, kua akakite te apotetoro ko Petero kia Iesu e: “I na matou, kua akaruke matou i te au mea katoa, e kua aru mai ia koe.” (Mata. 19:27) Kua akaruke viviki ua a Petero, Anederea, Iakobo, e Ioane i ta ratou au kupenga i te patiia anga kia aru ia Iesu. Kua akaruke ratou i ta ratou pitiniti tautai e kua akariro i te angaanga orometua ei angaanga tinamou na ratou. Kia tau ki te papaanga o te Evangeria a Luka, kua tuatua a Petero e: “I na matou, kua akaruke i te au mea katoa, e kua aru mai nei ia koe.” (Luka 18:28) Kare te maataanga ia tatou i anoanoia ana kia akaruke pouroa atu i ta tatou “au mea katoa” kia rauka i te aru ia Iesu. Inara, kua anoanoia rai tatou kia ‘akaruke ia tatou uaorai’ kia riro mai ei au pipi na Karaiti e ei au tavini ngakau tae no Iehova. (Mata. 16:24) Kua taopenga mai taua arataa ra ki te au akameitakianga mou tikai. (E tatau ia Mataio 19:29.) Ka apai mai te tu maroiroi i te apii evangeria i te aru anga ia Karaiti i te rekareka ki to tatou ngakau, mei te mea tikai e e tuanga meangiti ta tatou i roto i te tauturu anga i tetai tangata kia akavaitata atu ki te Atua e tana Tamaiti akaperepere.
5. Akakite mai i tetai tupuanga e akatutu maira e eaa ta tetai tuitarere penei ka iki i te rave, i te kite anga i te tuatua mou o te Pipiria.
5 Tetai tangata Paratiri ko Valmir, e noo ra i uta roa i te enua i Turiname, e tangata ko auro aia i roto i te maina. E tangata kai kava aia e noo ra i tetai oraanga tau kore. Tetai taime iaia i roto i te oire maata, kua akamata te Au Kite o Iehova i te apii i te Pipiria kiaia. Kua apii aia i te au ra katoatoa, rave i te au tauianga, e kare i roa kua papetitoia. I tona kite anga e te riro ra tana ngai angaanga ei akangata i te akarotai anga i te oraanga ki tona akarongo ou i roto i te Pipiria, kua oko aia i tana pitiniti puapingaia e kua oki atu ki Paratiri i te tauturu i tona pamiri kia kite i te tuatua mou. I te kite anga i te tuatua mou o te Pipiria, e maata ua atu te au tuitarere tei akaruke puareinga ua i te au ngai angaanga i roto i te au enua e maata te puapinga e kua oki ki to ratou au enua anau, ko te akakoroanga kia tauturu i to ratou au kopu tangata e etai atu i te pae vaerua. Te akaari maira taua au papuritia o te Patireia i te tu maroiroi tikai i te apii evangeria.
6. Eaa te ka rauka ia tatou kia rave me kare e rauka ia tatou kia neke ki te ngai tei anoano maataia te aronga akakitekite i te Patireia?
6 E maata rai te Au Kite tei rauka i te neke atu ki te au ngai e anoano maataia ra te aronga tutu aere i te Patireia. Kua neke katoa atu tetai papaki ki tetai au enua ke angaanga ai. No tatou uaorai, penei no to tatou au turanga kare e rauka ia tatou kia neke, inara ka rauka ia tatou kia aru i te akaraanga a Iesu na te rave ua atu anga rai i te ka rauka ia tatou.
Oronga Mai a Iehova i te Terenianga e Anoanoia Ra
7. Eaa te au apii e vai nei no te tereni anga i te aronga tei inangaro i te akameitaki roa atu i to ratou kite ei aronga akakitekite i te Patireia?
7 Mei ia Iesu rai i ariki i te terenianga mei tona Metua, ka puapinga katoaia tatou kia taangaanga i te apiianga ta Iehova e oronga maira i teianei. Kua tuatua a Iesu uaorai e: “Kua tataia oki i roto i te au peroveta ra e, ‘Ka ope takiri ratou i te apiiia e te Atua.’” (Ioa. 6:45; Isa. 54:13) Teia tuatau, e au apii tetai tei akakoro tikaia ei akapapa ia tatou ei aronga akakitekite i te Patireia. Kare e ekoko, e kua puapingaia tatou katoatoa na roto i tetai au mataara mei te Apii Orometua Teokaratiki i roto i to tatou au putuputuanga. E tikaanga ngateitei tikai to te au painia kia tae ki te Apii Tavini Anga Painia. E maata ua atu te au painia tukatau kua roa tei rauka te rekareka maata i te tae anga ki te apii no te rua taime. Kua tae katoa te aronga pakari e te au tavini tauturu ki te Apii Orometua Patireia i te akameitaki roa atu i to ratou tu kite i te apii e te mataara e tavini ra ratou i te au taeake irinaki. E maata rai te aronga pakari kare i akaipoipo e te au tavini tauturu tei na roto ana i te Apii Terenianga Orometua, ei akapapa ia ratou i te tauturu i etai ke i roto i te angaanga tutu aere. E e maata te au taeake e te au tuaine tei rauka te au tukuanga angaanga i te au enua ke, tei tereniia ana i ko i te Apii Pipiria Punanga Tiaki o Gileada.
8. Eaa ta tetai au taeake i inangaro puareinga ua i te akaatinga no te terenianga ta Iehova e oronga maira?
8 E manganui te Au Kite o Iehova tei rave i tetai au tauianga kia tae ki teia au apii nei. E tae ei ki te Apii Terenianga Orometua i Kanata, kua akaruke a Yugu i tana ngai angaanga no te mea kare tona pu i akatika mai i tana patianga kia akamutu no tetai tuatau ua. “Kare au e taitaia ana i te reira,” i tuatua ai a Yugu. “Tera ra, naringa ratou i akatika mai kia akamutu au no tetai tuatau ua, penei ka irinaki mai rai ratou e kia noo tinamou atu au ki te kamupani i te akaari anga i toku tiratiratu. I teianei ra kua va ua au no tetai ua atu tukuanga angaanga ka rauka iaku mei ko mai ia Iehova.” I te taangaanga meitaki anga i te terenianga e orongaia maira e te Atua, e manganui tei akaatinga puareinga ua i tei akaperepere maataia ana e ratou i mua ana.—Luka 5:28.
9. E oronga mai i tetai akaraanga e akaari maira i te puapinga maata o te apiianga Tuatua Tapu e te tautaanga pakari.
9 E riro ana te apiianga Tuatua Tapu e te tautaanga pakari ei tauturu puapinga tikai. (2 Timo. 3:16, 17) Ka akamanako ana i tei tupu kia Saulo i Kuatemara. E pakipakitai aia i te anau mai anga tei akamarie i tona manako, e kua akakite tetai o tona au puapii ki tona mama e eiaa e maro i te tamaiti kia apii i te tatau, no te mea ka akamanamanata ua rai te reira iaia. Kua akaruke a Saulo i te apii e kare rai e kite ana i te tatau. Inara, kua apii tetai Kite ia Saulo i te tatau, na te taangaanga anga i te poroutia Apply Yourself to Reading and Writing. I te openga, kua tere meitaki ua atu a Saulo ki te turanga no te oronga i tetai au akoanga i roto i te Apii Orometua Teokaratiki. I muri mai kua aravei te mama o Saulo i tona puapii i roto i te angaanga orometua mei tera are ki tera are. I te rongo anga e kua kite a Saulo i te tatau, kua pati atu te puapii iaia kia apai mai ia Saulo i te epetoma ka aru mai. I tera mai epetoma, kua ui atu te puapii kia Saulo e, “Eaa taau ka apii mai iaku?” I reira kua akamata a Saulo i te tatau atu i tetai parakarapa mei roto i te puka Eaa Tikai ta te Pipiria e Apii Maira? “Te ngata nei tikai iaku i te akamanako e naau e apii mai nei iaku i teianei,” i tuatua atu ei te puapii. Kare i rauka ana i te tapu i tona aue, kua takave mai aia ia Saulo.
Apiianga e Akakeu ra i te Ngakau
10. Eaa te apinga meitaki rava ka rauka i te taangaanga i roto i te apii anga i te tuatua mou o te Pipiria?
10 I akatumu a Iesu i tana apiianga ki runga i ta Iehova i apii tika atu kiaia e ki runga i te au ikuikuanga e kiteaia ra i roto i te Tuatua a te Atua tei tataia. (Luka 4:16-21; Ioa. 8:28) E aru tatou ia Iesu na te akono anga i tana akoanga e te tamou marie anga ki te au Tuatua Tapu. No reira ei tuatua okotai ta tatou ravarai e ei manako okotai, e ka tauturu teia i to tatou tu okotai. (1 Kori. 1:10) Te rekareka maata nei tatou e te oronga maira “te tavini akono meitaki e te pakari” i te au puka tei akatumuia ki runga i te Pipiria ei tauturu ia tatou kia tamou marie i te tu okotai i roto i ta tatou apiianga e kia akatupu i ta tatou angaanga ei aronga apii evangeria! (Mata. 24:45; 28:19, 20) Tetai o teia au puka nei koia oki ko, ta te Pipiria e Apii Maira, te ka rauka i teianei i roto i te au reo e 179.
11. Akapeea tetai tuaine i Etiopia i autu ei i te patoianga na te taangaanga anga i te puka ta te Pipiria e Apii Maira?
11 Ka riro katoa te apii i te au Tuatua Tapu na te taangaanga atu anga i te puka ta te Pipiria e Apii Maira ei taui i te ngakau o te aronga patoi. I tetai atianga te rave ra a Lula, e tuaine painia i Etiopia i tetai apii Pipiria e kua tomo pu ua mai tetai kopu tangata o te tangata apiipii e kua tuatua mai e eiaa raua e rave i taua apii ra. Kua akamarama maru ua atu a Lula ki taua kopu tangata ra, i te taangaanga anga i te akatutuanga no runga i te moni pikikaa i roto i te pene 15 o te puka ta te Pipiria e Apii Maira. Kua maru mai taua vaine ra e kua akatika kia akamata akaou raua i te apii. Tei tupu, kua tae mai aia ki te apii tei aru mai e kua pati mai i tetai apii Pipiria nana uaorai, e te oronga katoa mai i te tutaki no te reira! Kare i roa ana kua apii aia e toru taime i te epetoma e kua tupu meitaki ua atu tona turanga pae vaerua.
12. Oronga mai i tetai akaraanga i te akaari mai e akapeea te au mapu e puapinga meitakiia ai i te apii atu anga i te tuatua mou o te Pipiria.
12 Ka rauka i te au mapu kia tauturu i etai ke na roto i te taangaanga anga i te puka ta te Pipiria e Apii Maira. I Vaii, ia Keanu, e 11 ona mataiti e tatau ra i teia puka i te apii, kua ui mai tetai o tona au oa apii kiaia e, “Eaa koe kare ei e akono i te au orote?” Kua tatau atu a Keanu i te pauanga mei roto tika atu i te tumu tuatua o te apenetiki “Ka Akono Ainei Tatou i te Au Orote?” I reira kua uri aia ki te papaanga o te au tumu manako e kua ui ki te tamaiti e ko teea tana tumu manako inangaro roa atu. E kua akamataia atu tetai apii Pipiria. I te mataiti tavinianga i topa, e 6,561,426 apii Pipiria ta te Au Kite o Iehova i akamata, e e manganui ua atu tei taangaanga i te puka ta te Pipiria e Apii Maira. Te taangaanga ra ainei koe i teia puka i roto i te au apii Pipiria?
13. Na roto i teea mataara e riro ana te apii i te Pipiria ei akakeuanga pakari ki runga i te tangata?
13 Ka riro te apii i te au Tuatua Tapu na te taangaanga atu anga i te puka ta te Pipiria e Apii Maira ei akakeuanga pakari ki runga i te aronga tei inangaro i te rave i te anoano o te Atua. Kua akamata atu tetai tokorua painia takake i Norue i tetai apii Pipiria ki tetai pamiri no Tamapia mai. E toru tamariki tamaine a nga tokorua no Tamapia mai e kare raua e inangaro akaou ana i tetai pepe. No reira i te nui anga te vaine, kua iki raua e titiri i te pepe. I etai au ra i mua ake ka aravei atu ei i tetai taote, kua apii raua i te pene i raro i te upoko tuatua “To te Atua Manako i te Ora.” Kua riro te tutu o te tamaiti kare i anauia ake i roto i taua pene ra ei akatukia oonu tikai i taua tokorua ra e kua iki iora raua eiaa e titiri i te pepe. Kua tupu meitaki atu rai to raua turanga pae vaerua e kua tapa i te ingoa o to raua puapii ki runga i ta raua pepe tamaroa ou i anau mai.
14. Akatutu mai e akapeea te akarotai anga i te oraanga ki ta tatou e apii nei i te akatupu anga i te au mea memeitaki.
14 Tetai tuanga puapinga o te mataara e apii ana a Iesu koia oki e akarotai ana aia i tona oraanga ki tana e apii ra. E manganui ua atu te tangata e mareka ana i te tu mako o te Au Kite o Iehova, tei aru ia Iesu i roto i teia tu. Tetai tangata pitiniti i Nu Tireni kua vaiia tona motoka e kua keiaia tana kiri. Kua ripoti atu aia i teia ki te akava, ko tei tuatua mai e: “Ko te ravenga ua rai e oki akaou mai ei taau apinga koia oki me riro e na tetai o te Au Kite o Iehova e kite mai i te reira.” Na tetai Kite e tua nuti pepa ra i kite i te kiri. I te akakiteia atu anga teia, kua aere mai te pu o te apinga ki ko i te kainga o te tuaine nana i kite. Kua pumaana tikai aia i te kite anga e tei reira rai tetai pepa puapinga maata tikai kiaia. Kua akakite te tuaine kiaia e, “E mea tau rava e kia akaoki atu au i te apinga kia koe, no te mea ko au tetai o te Au Kite o Iehova.” Kua va ua iora taua tangata pitiniti ra, no te mea kua maara iaia te tuatua a te akava kiaia i taua popongi tikai. Te taka meitaki ua ra e, te akarotai ra te au Kerititiano mou i to ratou oraanga ki te au apiianga e kiteaia ra i roto i te Pipiria e i te aru anga ia Iesu.—Ebe. 13:18.
E Aru i to Iesu Tu ki te Tangata
15, 16. Akapeea tatou i te akapiri vaitata mai anga i te tangata ki te karere ta tatou e tutu aere nei?
15 Kua riro to Iesu tu ki te tangata ei akapiri vaitata mai ia ratou ki tana karere. Ei akatauanga, no tona tu aroa e te tu akaaka kua rauka ua i te aronga maru i te aere mai kiaia. Kua akaari aia i te ngakau aroa ua no te aronga tei akavaitata mai kiaia e kua akapumaana atu ia ratou ki te au tuatua takinga meitaki, i te akaora atu anga i te manganui i te pae kopapa. (E tatau ia Mareko 2:1-5.) Kare e rauka ia tatou te rave i te au temeio, ka rauka ra ia tatou i te akaari i te aroa, te tu akaaka, e te ngakau aroa ua—e au tu anake te ka tauturu i te akavaitata mai i te tangata ki te tuatua mou.
16 E tuanga maata ta te ngakau aroa ua i roto i te atoro anga tetai painia takake ko Tariua te ingoa i te kainga o tetai tangata pakari ko Beere te ingoa, e noo ra i runga i tetai airani mamao i Kiribati i te Patipika Tonga. Noatu kua akaari mai taua tangata ra i tona inangaro kore i te akarongo mai, inara te kite ra a Tariua e kua akangoru tetai tua iaia e kua tupu te ngakau aroa ua iaia. “I akarongo ana ainei koe e eaa ta te Atua e taputou maira no te au tangata maki e te pakari?” i ui atu ei aia. I reira kua tatau atu aia i tetai tuanga mei te totou a Isaia. (E tatau ia Isaia 35:5, 6.) No te umere, kua tuatua mai taua tangata ra e, “Kua tatau ana au i te Pipiria no te au mataiti e kua atoroia mai ana e tetai mitinari mei roto i taku akonoanga, e oti akera kare rava au i kite ana i tena i roto i te Pipiria.” Kua akamataia tetai apii Pipiria kia Beere, e kua tupu meitaki ua atu tona turanga i te pae vaerua. Ae, e kino tikai tona pirikoki, inara kua papetitoia aia i teianei, koia te arataki ra i te akono atu anga i tetai pupu mamao ki vao, e e rauka ua ana iaia i te aere ki te au ngai katoatoa o taua airani ra i te tutu aere i te tuatua meitaki.
E Aru ua Atu rai ia Karaiti
17, 18. (a) Akapeea koe e riro ei ei tangata apii evangeria meitaki tikai? (e) Eaa te vai maira no te aronga e rave maroiroi ra i ta ratou angaanga orometua?
17 Mei ta te au tupuanga rekareka i roto i te angaanga orometua e akatutu putuputu maira, ka riro tatou ei aronga apii evangeria meitaki tikai me tatanu e me akaari tatou i roto i to tatou oraanga i te au tu ta Iesu i akaari mai. E tau tikai i reira, e kia aru tatou ia Karaiti ei aronga apii evangeria maroiroi!
18 Te riro anga tetai papaki ei au pipi na Iesu i te anere mataiti mua, kua ui atu a Petero e: “Eaa te ka rauka ia matou?” Kua pau atura Iesu e: “E te tangata katoatoa no toku nei ingoa i akaruke ei i te are, e te au taeake, e te au tuaine, e te metua tane, e te metua vaine, e te vaine, e te tamariki, e te enua, e anere ua atu tana e ka rauka, e e rauka oki iaia te ora mutu kore.” (Mata. 19:27-29) Papu roa e ko te reira ta tatou ka kite me aru ua atu rai tatou i te Mitinari maata rava atu, ko Iesu Karaiti.
Akapeea Koe me Pau?
• Akapeea a Iehova i te tereni anga ia tatou kia riro ei aronga apii evangeria?
• No teaa te puka ta te Pipiria e Apii Maira i puapinga meitakiia ai i roto i ta tatou angaanga orometua?
• Akapeea tatou i te aru anga ia Iesu i roto i to tatou tu ki te tangata?
[Au Uianga Apii]
[Tutu i te kapi 17]
I to Iesu pati anga ia Petero, Anederea, Iakobo, e Ioane kia aru iaia, kua aru vave atura ratou kare i tivata
[Tutu i te kapi 19]
Te au puka mei te puka ta te “Pipiria e Apii Maira” ka tauturu te reira ia tatou kia akamou marie i te tu okotai i roto i ta tatou apiianga