E Tuku ia Iehova ki Mua ua rai ia Koe
E Tuku ia Iehova ki Mua ua rai ia Koe
“Kua tuku au ia Iehova ei mua ua rai iaku.”—SALA. 16:8.
1. Akapeea te au tua o te Pipiria i te akakeuanga ia tatou?
TE VAI ra i roto i te Tuatua a Iehova tetai rekoti meitaki rava tei tataia no te au ravenga angaanga a te Atua ki te au tangata ravarai. Te taiku maira te reira i te au tangata e manganui e e tuanga ta ratou i roto i te akatupu anga i to te Atua akakoroanga. E tika rai, kare ta ratou au tuatua e te au angaanga i kapitiia mai i roto i te Pipiria ei tua tamataora ua anga ia tatou. Kareka ra, te akavaitata ra taua au papaanga ia tatou ki te Atua.—Iako. 4:8.
2, 3. Akapeea tatou e marama ai i teia au tuatua i roto ia Salamo 16:8?
2 Pouroa tatou e maata ta tatou ka kite mai mei te au tupuanga o te au tangata tei kitea meitakiia i roto i te Pipiria—ko Aberahama, Sara, Mose, Ruta, Davida, Esetera, te apotetoro ko Paulo, e tetai aronga ke atu. Inara, ka puapinga katoaia tatou mei te au papaanga no te aronga kare i kite meitaki katoaia. I te akamanako anga i te au tua o te Pipiria ka tauturu te reira ia tatou kia aru rotai i te au tuatua a te tata taramo e: “Kua tuku au ia Iehova ei mua ua rai iaku; tei toku rima katau aia kare au e ngaueue.” (Sala. 16:8) Akapeea tatou e marama ai i teia au tuatua?
3 E taangaanga ua ana tetai vaeau i tana koke ki tona rima katau, i te akaruke paruru kore anga i te reira tua e tei tona rima kaui te paruru. Inara, tei te tua katau tona taeake i te paruru anga iaia. Me akamanako ua rai tatou ia Iehova e e rave i tona anoano, ka paruru mai aia ia tatou. No reira ka akara tatou e akapeea i te akamanako anga i te au papaanga Pipiria i te akaketaketa anga i to tatou akarongo kia ‘tuku ia Iehova ki mua ua rai ia tatou.’
Ka Pau Mai a Iehova i ta Tatou Au Pure
4. E oronga mai i tetai akaraanga Tuatua Tapu te akaari maira e te pau maira te Atua i te au pure.
4 Me tuku tatou ia Iehova ki mua ua rai ia tatou, ka pau mai aia i ta tatou au pure. (Sala. 65:2; 66:19) Tei ia tatou te akapapu anga no runga i teia i roto i te turanga o te tavini pakari roa o Aberahama, penei ko Eliezera. Kua tono a Aberahama iaia ki Mesopotamia i te kimi i tetai vaine mataku Atua na Isaaka. Kua pure a Eliezera i te aratakianga a te Atua e kua kiteaia mai te reira te aere mai anga a Rebeka i te akaainu i tana au kamera. No tana pure akatenga ra, kua kite mai e Eliezera i te vaine te ka riro mai ei vaine akaperepere na Isaaka. (Gene. 24:12-14, 67) E tika rai, e tukuanga angaanga takake ta te tavini o Aberahama. Inara kare ainei i te mea tau e kia irinaki papu ua rai tatou e te akarongo maira a Iehova i ta tatou au pure?
5. Eaa ra tatou ka karanga ai e ka puapinga katoaia te pure poto ua anga e te muteki kia Iehova?
5 I tetai au taime, penei te anoanoia ra tatou kia pure viviki ki te Atua no tetai tauturu. I tetai atianga, kua kite atu te Ariki ko Aretekasaseta o Peresia e te kinokino ua ra te mata o te tangata apai kapu nana ko Nehemia. “Eaa taau e pati mai?” i ui ei te ariki. “Pure atura [a Nehemia ki] te Atua no te rangi.” Poto ua te taime i pure ei a Nehemia i taua pure. Inara, kua pau mai te Atua i te reira, no te mea kua turu mai te ariki ia Nehemia kia patu akaouia te au patu o Ierusalema. (E tatau ia Nehemia 2:1-8.) Ae, ka puapinga katoaia rai te pure poto ua anga e te muteki.
6, 7. (a) No runga i te pure, eaa te akaraanga ta Epaphera i akanoo mai? (e) Eaa ra tatou ka pure ei no tetai ke?
6 Te raurauia ra tatou kia “pure oki tetai i tetai,” noatu rai e kare i oronga vivikiia mai ana te akapapu anga kia tatou e ka pauia mai taua au pure. (Iako. 5:16) Kua pure akatenga a Epaphera, “e orometua tuatua-mou na te Mesia,” no te aronga tei piri mai kiaia i roto i te akarongo. I te tataanga mai mei Roma, kua tuatua a Paulo e: “Ko Epaphera, e tavini no te Mesia, no ko na mai ia kotou na [to Kolosa], te aroa atu nei ia kotou, e te tauta marie anga i te pure ia kotou kare e tivata, kia mou apa kore rai kotou ma te ki i te kite i te au anoano katoa o te Atua ra. Ei kite oki au nona, e e maroiroi maata tona ia kotou, e to Laodikea, e to Ierapoli.”—Kolo. 1:7; 4:12, 13.
7 I roto i taua ngai rai o Asia Minora te au oire o Kolosa, Laodikea, e Ierapoli. Kua noo te au Kerititiano i Ierapoli i rotopu i te aronga akamori i te atua vaine ko Kipere, kua akakokoia mai te aronga i Laodikea e te au apinga materia, e kua akakinoia te au tangata o Kolosa e te au apiianga a te tangata. (Kolo. 2:8) No reira a Epaphera, no Kolosa mai aia, i ‘tauta marie ei iaia uaorai i te pure’ no te aronga irinaki i roto i taua oire ra! Kare te Pipiria i akakite mai ana e akapeea te au pure a Epaphera i te pauia anga mai, inara kare aia i akamutu ana i te pure no te au taeake irinaki; auraka katoa rai tatou. Noatu e kare tatou e “akamanamanata ia etai ke ra,” penei te kite ra tatou e te tupu ra tetai timataanga pakari no te akarongo ki tetai au mema o te pamiri me kore ki tetai taeake. (1 Pete. 4:15) E mea tau tikai kia pure tatou kia tatou uaorai nona ra! Na te au pure a tetai ke i tauturu ia Paulo, e meitaki katoa atu te ka rauka mai na roto i ta tatou au pure.—2 Kori. 1:10, 11.
8. (a) Akapeea tatou i kite ei e ka ariki mai te aronga pakari o Ephesia i te puapinga o te pure? (e) Eaa ra to tatou tu no runga i te pure ki te Atua?
8 Te akara maira ainei tetai ke ki runga ia tatou ei au tangata e ei au vaine no te pure? I muri ake te aravei atu anga a Paulo i te aronga pakari mei Ephesia mai, “kua tuturi iora aia ki raro, kua pure iora e ratou katoa.” E oti “aue anake iora ratou ravarai, takave maira ki runga i te kaki o Paulo, kua ongi maira iaia: no te tuatua tana i tuatua ra e, kare rava ratou e kite akaou mai i tona mata, i maata ravaʼi to ratou aue.” (Anga. 20:36, 37) Kare tatou i kite i te au ingoa o taua aronga pakari, inara papu e ka ariki mai ratou i te puapinga o te pure. E mea tau kia akaperepere tatou i te akameitakianga no te pureanga ki te Atua e kia “apai i te rima viivii kore ki runga” na roto i te akarongo e ka pau mai to tatou Metua i te rangi i ta tatou pure.—1 Timo. 2:8.
E Akarongo Pu Tikai i te Atua
9, 10. (a) Eaa te akaraanga tei akanooia e te au tamaine a Zelophehada? (e) Akapeea te akarongo o te au tamaine a Zelophehada i te akakeu anga i te manako o tetai Kerititiano kare i akaipoipo no runga i te akaipoipo?
9 Ka riro te akamanako ua anga rai ia Iehova ei tauturu ia tatou kia akarongo kiaia, e ka kokoti tatou i te au akameitakianga no te reira. (Deu. 28:13; 1 Samu. 15:22) Te umuumu maira teia i tetai ngakau akarongo. E akamanako ana i te tu o nga tuaine toko rima, te au tamaine a Zelophehada, tei ora ana i to Mose tuatau. I roto i te au ngati Iseraela, e peu matauia kia orongaia ki te tamariki tamaroa te tuanga kainga mei to ratou metua tane. Kua mate te tangata ko Zelophehada e kare ana tamariki tamaroa, e kua akakite iora a Iehova e kia orongaia te katoaanga o te tuanga kainga no taua au vaine ra e rima—okotai ra umuumuanga. E akaipoipo ratou i te au tamaroa a Manase kia vai ua rai te tuanga kainga i roto i taua kopu tangata ra.—Nume. 27:1-8; 36:6-8.
10 Kua irinaki te au tamaine a Zelophehada e ka tupu meitaki mai te au mea ravarai me akarongo ratou ki te Atua. “E kua pera oki te au tamaine a Zelophehada i ta Iehova i akaue mai kia Mose ra,” i karanga ai te Pipiria. “I akaipoipoia iora oki taua au tamaine a Zelophehada ra, ko Mahala, e ko Tireza, e ko Hogela, e ko Mileka, e ko Noa, ko te au tamariki a te taeake o to ratou ra metua tane: I akaipoipoia iora ratou ki roto i te au kopu-tangata a te tamariki a Manase, te tamaiti a Iosepha ra, vaoo marie iora i ta ratou tuanga i roto i te kopu ra i te kopu-tangata o to ratou metua tane.” (Nume. 36:10-12) Kua rave taua au vaine akarongo ra i ta Iehova i akaue mai. (Iosu. 17:3, 4) Mei taua tu akarongo rai, e akarongo katoa te au Kerititiano vaerua pakari kare i akaipoipo ake ki te Atua, na te akaipoipoanga “kia tau ra i te Atu.”—1 Kori. 7:39.
11, 12. Akapeea a Kaleba i te akaari anga e kua irinaki aia i te Atua?
11 E akarongo meitaki tikai tatou kia Iehova, mei ia Kaleba ngati Iseraela rai. (Deu. 1:36) I muri ake i te akaoraia anga mai a Iseraela mei ia Aiphiti i te 16 anere mataiti M.T.N., kua tono a Mose e 12 tangata kia tutaka aere ia Kanaana, inara e 2 ua rai nga tangata tutaka—ko Kaleba raua ko Iosua—tei raurau i te au tangata kia irinaki pu tikai ki te Atua e kia tomo atu ki roto i te enua. (Nume. 14:6-9) E 40 mataiti i muri mai, te ora ua ra rai a Iosua raua ko Kaleba e te aru totomapu tikai ra ia Iehova, e kua rave mai te Atua ia Iosua kia arataki i te ngati Iseraela ki roto i te Enua Taputouia. Inara, i te akaraanga kua mate te aronga tino ngauru tutaka akarongo kore i to Iseraela aaere ua anga e 40 mataiti i roto i te metepara.—Nume. 14:31-34.
12 Ei tangata pakari tei ora mai i te au tupuanga kia Iseraela i roto i te metepara, kua tu a Kaleba ki mua ia Iosua e kua tuatua e: “Kua aru totomapu tikai ra au i toku Atua ra ia Iehova.” (E tatau ia Iosua 14:6-9.) Kua pati a Kaleba e 85 ona mataiti e kia orongaia mai kiaia te tuanga i te maunga ra ta te Atua i taputou ana kiaia, noatu e te nooia ra e te au enemi te reira ngai ma to ratou au oire maata tei araiia ki te patu.—Iosu. 14:10-15.
13. Noatu te au timataanga, ka akameitakiia tatou me rave tatou i teaa?
13 Mei ia Kaleba akarongo mou rai, ka rauka ia tatou te turuanga a te Atua me ‘aru totomapu tikai tatou ia Iehova.’ Me aro atu tatou i te au arai anga maata, ka akameitakiia tatou ia tatou e ‘aru totomapu tikai ra ia Iehova.’ Inara na te rave anga i te reira i roto i te oraanga, mei ta Kaleba rai i rave, ka riro mai ia ei akaaoanga. Noatu e e akamata anga meitaki to te Ariki ko Solomona, i tona ruaine anga ra kua arataki ke tana au vaine ra i tona ngakau kia akamori atu i te au atua pikikaa, e “kare akerai i aru totomapu tikai ia Iehova, mei to tona metua mei to Davida i aru ra.” (1 Ari. 11:4-6) Noatu te au timataanga ta tatou ka aro atu, e akarongo meitaki ua rai tatou ki te Atua e kia tuku ua rai iaia ki mua ia tatou.
E Irinaki ua rai kia Iehova
14, 15. Mei te au tupuanga o Naomi, eaa taau i kite mai no te anoano kia irinaki ki te Atua?
14 Ka tau tatou kia irinaki tikai ki te Atua me te taitaia ra tatou no te mea e akara anga puapinga kore to tatou tuatau ki mua. E akamanako ana i te vaine ruaine ko Naomi , kua mate tana tane e tana nga tamaiti. I tona oki anga ki Iuda mei Moabi ra, kua tuatua aia ma te aue: “Auraka au kia tuatuaia ia Naomi [“Rekareka,” akara i te koromu], kia tuatuaia ra au ia Mara [“Mamae,” akara i te koromu]; e tumatetenga maata oki ta te Mana katoatoa i tuku mai iaku nei. I aere oki au ma te ki, e kua akaoki akaou mai a Iehova iaku ma te ngere: eaa oki kotou i karanga mai ei iaku ia Naomi, tei akaapa mai a Iehova iaku, e kua tuku mai te Mana katoatoa i te tumatetenga iaku nei?”—Ruta 1:20, 21.
15 Na te tatau meitaki anga i te puka o Ruta e akaari mai e kua irinaki ua rai a Naomi kia Iehova, noatu e kua taitaia aia. Taui takiri tikai tona au turanga! Riro mai te unonga tamaine takaua a Naomi ko Ruta ei vaine na Boaza e kua anau mai i tetai tamaiti. Riro iora a Naomi ei vaine ikiiki no te tamaiti, e te karanga ra te papaanga e: “E na te au vaine tupu ra i tapa i tona ingoa, tuatua akera, E utaro ta Naomi kua anau; e tapa iora ratou i tona ingoa ko Obeda: ko te metua aia no Iese, i te metua no Davida ra.” (Ruta 4:14-17) Me akatuakaouia mai a Naomi ki runga i te enua nei, ka kite aia e kua riro mai a Ruta, koia katoa tetai i reira, ei tupuna vaine no Iesu, te Mesia. (Mata. 1:5, 6, 16) Mei ia Naomi rai, kare i papu ia tatou e eaa te ka tupu mai no te au turanga papu kore. No reira, e irinaki ua rai tatou ki te Atua, mei tei akoia mai i roto ia Maseli 3:5, 6 e: “E irinaki kia Iehova ma to ngakau katoa ra; auraka ra e irinaki ki toou uaorai kite. Auraka e akangaropoina iaia i toou katoa ra au aerenga; e nana e akakite kia koe i toou ra au arataa.”
E Irinaki ki Runga i te Vaerua Tapu
16. Akapeea te vaerua tapu o te Atua i te tauturu anga i tetai aronga pakari i Iseraela taito?
16 Me tuku putuputu tatou ia Iehova ki mua ia tatou, nana e arataki ia tatou ma tona vaerua tapu. (Gala. 5:16-18) Tei rungao te vaerua o te Atua i te aronga pakari e 70 tei ikiia kia tauturu atu ia Mose i te ‘rave i taua apainga ra o te au tangata’ no Iseraela. Ko Eledada raua ko Medada te nga ingoa anake ua tei akakiteia mai, inara kua tauturu te vaerua i te katoatoa kia rave i ta ratou au angaanga. (Nume. 11:13-29) Kare e ekokoanga e, e nga tangata tau raua, mataku Atua, irinakiia, e te pikikaa kore mei te aronga rai tei ikiia i mua ana. (Exo. 18:21) Te akaariia nei e te aronga pakari Kerititiano taua au tu ra i teia tuatau.
17. Eaa te tuanga ta te vaerua tapu o Iehova i rave i te patu anga i te tapenakara?
17 E tuanga maata ta te vaerua tapu o Iehova i akatupu te patu anga i te tapenakara i roto i te metepara. Kua iki a Iehova ia Bezaleela e koia te tangata maata no te au angaanga e te tangata akatu i te tapenakara, i te taputou anga e ka ‘akaki ia aia ki te vaerua o te Atua, i te pakari, e te karape, e te kite, e te au angaanga katoa ra.’ (Exo. 31:3-5) Kua rave te au tangata ‘ngakau karape’ i te angaanga i te pae ia Bezaleela e i tona tauturu ko Aholiaba na te rave anga i te tukuanga angaanga umere. Pera katoa, kua akaue te vaerua o Iehova i te au tangata ngakau oronga kia oronga aroa ua i te au mea ravarai. (Exo. 31:6; 35:5, 30-34) Te akakeu katoa ra taua vaerua i te au tavini o te Atua i teia tuatau kia rave katoa rai i te ka rauka ia ratou, i te kimi anga na mua i te au anoano o te Patireia. (Mata. 6:33) Penei e tu karape to tatou, inara te anoanoia ra tatou kia pure no te vaerua tapu, e kia tuku na te reira e arataki ia tatou me ka rauka ia tatou i te akaoti i te angaanga ta Iehova i oronga mai ki tona au tangata i teia tuatau.—Luka 11:13.
E Akatapu ua rai ia Iehova Sabaota
18, 19. (a) Eaa ra te tu ta te vaerua tapu o te Atua e akatupu ra i roto ia tatou? (e) Eaa taau i kite mai mei te au akaraanga o Simeona raua ko Ana?
18 Te akatupu ra te vaerua tapu i roto ia tatou i tetai tu akangateitei i te tuku putuputu ua anga ia Iehova ki mua ia tatou. Kua akakiteia ki te au tangata o te Atua i taito ra e: “Ko Iehova Sabaota ra, ta kotou e akatapu.” (Isa. 8:13) Ko Simeona raua ko Ana tetai nga tangata ruaine akono Atua i te anere mataiti mua i Ierusalema. (E tatau ia Luka 2:25-38.) Kua tuku a Simeona i tona akarongo ki roto i te au totou no te Mesia e “te tapapa ra i te akapumaana no Iseraela.” Kua riringi mai te Atua i te vaerua tapu ki rungao ia Simeona e kua akapapu atura kiaia e ka ora ua atu rai aia e ka kite i te Mesia. E ko te reira tei tupu. I tetai ra i te mataiti 2 M.T.N., kua apai a Maria, te metua vaine o te pepe raua ko Iosepha te metua angai, ia Iesu ki te iero. Kua akakeuia e te vaerua tapu, kua tuatua a Simeona i te au tuatua totou no runga i te Mesia e kua akakite atura i te ngakau aue o Maria, tei rokoia e te mamae i te patitiia anga a Iesu ki runga i tetai rakau tamamae anga. Inara e akamanako ana i te rekareka maata i to Simeona mou anga ki roto i tona nga rima “i te Mesia a te Atu [Iehova]”! E akaraanga meitaki tikai no te tu akono Atua ta Simeona i akanoo no te au tavini o te Atua i teia tuatau!
19 Te vaine takaua e 84 mataiti e te akono Atua ko Ana, “kare rava aia i akaruke i te iero.” Kua akamori aia ia Iehova i te po e te ao “ma te pure e te akakoreanga kai.” Te reira katoa a Ana te apainaia anga mai te pepe ko Iesu ki ko i te iero. Mei teaa ra tona rekareka i te kite atu anga i te Mesia no te tuatau ki mua! E tika rai, kua ‘akapaapaa aia i te Atua, e kua tuatua iora i te tamaiti ki te aronga katoa i tapapa i te ora i Ierusalema.’ Kua akakeuia a Ana kia oronga i teia nuti meitaki ki tetai ke! Mei ia Simeona rai raua ko Ana, te rekareka tikai ra te aronga ruaine Kerititiano i teia tuatau e noatu eaa te ruaine anga o te tangata ka rauka rai ia ratou i te tavini ia Iehova ei Au Kite nona.
20. Noatu e eaa to tatou au mataiti, eaa te anoanoia ra kia rave tatou, e no teaa ra?
20 Noatu e eaa to tatou au mataiti, te anoanoia ra tatou kia tuku ua rai ia Iehova ki mua ia tatou. Ei reira aia e akameitaki mai ei i ta tatou au tauta anga akaaka kia akakite aere ki tetai ke no runga i tona taoonga ariki e tana au angaanga umere. (Sala. 71:17, 18; 145:10-13) Inara, me ka akangateitei tatou ia Iehova, e akaari tatou i te au tu akono tau i te Atua. Eaa i reira ta tatou ka kite mai no runga i taua au tu na te akara matatio akaou anga i te au papaanga Pipiria?
Akapeea Koe me Pau?
• Akapeea tatou e kite ei e te akarongo maira a Iehova ki te au pure?
• Eaa ra tatou ka akarongo meitaki tikai ei ki te Atua?
• Me te taitaia ra tatou, eaa ra tatou ka irinaki ua rai ei kia Iehova?
• Akapeea te vaerua tapu o te Atua i te tauturu anga i tona au tangata?
[Au Uianga Apii]
[Tutu i te kapi 4]
Kua puapingaia ta Nehemia pure kia Iehova
[Tutu i te kapi 5]
I te akamaaraanga i te au akameitakianga i rauka ia Naomi ka tauturu mai ia tatou kia irinaki kia Iehova