Iesu Karaiti​—Te Mitinari Maata Rava Atu

“Ko au te komono no ko mai iaia, e Nana i tono mai iaku.”​—IOA. 7:29, NW.

1, 2. Eaa teia mea e mitinari, e koai te ka tau kia kapikiia e ko te Mitinari maata rava atu?

EAA taau e manako ana me rongo koe i te tuatua “mitinari”? E manako ana tetai aronga i te au mitinari o Kerititome, te manganui ia ratou e o ana ki roto i te au angaanga poritiki e te kimi puapinga o te au enua e angaanga ra ratou. Inara, ei Kite no Iehova, penei ka manako koe i te au mitinari tei tonoia e te Pupu Akaaere kia tutu aere i te tuatua meitaki i roto te au enua tuke tuke takapini i teianei ao. (Mata. 24:14) Kua oronga teia au mitinari i to ratou taime e te maroiroi ma te karapii kore ki te akakoroanga ngateitei i te tauturu anga i te tangata kia akavaitata atu ki te Atua ko Iehova e kia rekareka i tetai pirianga akaperepereia ma ia.​—Iako. 4:8.

² Kare te nga tuatua “mitinari” e te “au mitinari” e kitea i roto i te tuanga maata o te Bibilia Tapu Ra. Inara i roto ia Ephesia 4:11, te tuatua Ereni tei uriia ei “apii evangeria,” ka tau katoa kia uriia ei “au mitinari.” Ko Iehova te Apii Evangeria maata rava atu, inara kare e tau kia kapiki iaia e ko te Mitinari maata rava atu, no te mea kare rava aia i tonoia mai ana e tetai tangata. Inara no runga i tona Metua i te rangi, kua tuatua a Iesu Karaiti e: “Ko au te komono no ko mai iaia, e Nana i tono mai iaku.” (Ioa. 7:29, NW) Na roto i tetai akatutuanga i te aroa maata no te tangata o teianei ao, kua tono mai a Iehova i tana Tamaiti anau tai ki te enua nei. (Ioa. 3:16) Ka tau a Iesu kia kapikiia e ko te Mitinari maata rava atu, te Mitinari meitaki rava atu, no te mea okotai rai tumu i tonokia mai ei aia ki te enua nei koia oki, kia “akakite i te tuatua-mou.” (Ioa. 18:37) Kua puapinga meitakiia aia i te akakite aere anga i te tuatua meitaki o te Patireia, e te rauka nei rai ia tatou te au akameitakianga no tana angaanga. Ei akaraanga, ka rauka ia tatou i te taangaanga i tana au ravenga no te apiianga i roto i ta tatou angaanga orometua, noatu e e mea tukuia tatou ei au mitinari e me kare.

3. Eaa te au uianga ta tatou ka akamanako?

³ E akatupu mai ana ta Iesu angaanga ei tangata akakite aere i te Patireia i te au uianga mei teia te tu: Eaa ta Iesu i kite i tona taime i te enua nei? No teaa tana apiianga i puapingaia ai? E na teaa i akapuapinga meitaki i tana angaanga orometua?

Ngakau Inangaro Puareinga ua i Roto i te Au Ngai Ou

4-6. Eaa ra tetai au tauianga ta Iesu i aro atu i te tonokia mai anga ki te enua nei?

⁴ No te au mitinari e te au Kerititiano i teia tuatau e neke ana ki te au ngai e anoano maataia ra te aronga tutu aere i te Patireia, penei ka anoanoia ratou kia akamatau ki te au tu i raro roa ake i te turanga o te oraanga tei matauia ana e ratou. Inara kare roa e rauka ia tatou kia akamanako atu i te tuke i rotopu i to Iesu au turanga i runga nei i te enua e to runga i te rangi, te ngai i noo ana aia e tona Metua i rotopu i te au angera e tavini ra ia Iehova ma te akakoroanga tiama. (Iobu 38:7) Kare e aiteia te aka tuke kia noo i  rotopu i te au tangata ara i roto i tetai ao kino! (Mare. 7:20-23) Kua akaau katoa ana a Iesu i te tauetono anga i rotopu i tana au pipi piri vaitata tikai. (Luka 20:46; 22:24) E tika, kua akono ua rai aia ma te tu apa kore i te au mea ravarai tei tupu kiaia i te enua nei.

⁵ Kare a Iesu i akamata i te tuatua i te reo o te tangata na roto i te tu temeio; i akamata aia i te apii i te reira mei te pepe anga mai. E aka tauianga tikai teia mei te riro anga ei akatere i te au angera i runga i te rangi! I runga nei i te enua, okotai rai a Iesu reo i tuatua ai i roto i “te au reo a te tangata.” E tuke takiri roa mei ‘te au reo a te au angera.’ (1 Kori. 13:1, NW) No runga ra i te taangaanga anga i te au tuatua meitaki, kare roa e tangata i rauka ana i te tuatua mei ia Iesu te tu.​—Luka 4:22.

⁶ E akamanako ana i tetai au mataara ke tei taui maata roa atu i te au mea ravarai no te Tamaiti a te Atua i tona aere mai anga ki te enua nei. Noatu e kare a Iesu i anauia mai ma te ara a Adamu, kua riro mai ra Aia ei tangata, mei te aronga rai te ka riro mai ei “au taeake” nona, me kore ei au pipi akatainuia nana. (E tatau ia Ebera 2:17, 18.) I te po openga o tona oraanga i te enua nei, kua tapu marie a Iesu eiaa e pati ki tona Metua i te rangi kia tono mai “i te angela raungauru ma rua te manotini.” Inara ka akamanako ua ana i te au angera e mana tona to Mikaela te Angera Maata i rungao ia ratou! (Mata. 26:53; Iuda 9) Ae, kua rave ana a Iesu i te au temeio; inara, ko tana i rave i te enua nei, e meangiti ua rai te reira me akaaiteia atu ki tei rauka ana iaia i te rave i runga i te rangi.

7. Akapeea te ngati Iuda i te akono anga i te au mea o te Ture?

⁷ I te tuatau o tona oraanga ei “Logo,” i mua ake ka riro mai ei aia ei tangata, kare e kore e ko Iesu te Vaa Tuatua o te Atua tei arataki i te ngati Iseraela na roto i te metepara. (Ioa. 1:1; Exo. 23:20-23) Inara i “tukuia mai oki te ture kia [ratou] na roto i te tupati angela ra, e kare akenei [ratou] i akono i te reira.” (Anga. 7:53; Ebe. 2:2, 3) Ko te tika, kua ngere te au arataki akonoanga ngati Iuda i te kite no runga i te aiteanga tikai o te Ture. Ei akaraanga, e akamanako ana i te ture o te Tapati. (E tatau ia Mareko 3:4-6.) Ko te au tata tuatua e te au Pharisea kua ‘akaruke ratou i te au mea mamaata o te ture, te tuatua-tau, te aroa, e te akarongo.’ (Mata. 23:23) Noatu ra, kare a Iesu i tuku i te au e kare i akamutu ana i te akakite aere i te tuatua mou.

8. Eaa ka rauka ai ia Iesu kia tauturu mai ia tatou?

⁸ E ngakau inangaro puareinga ua to Iesu. Na te aroa no te tangata e te inangaro maata kia tauturu ia ratou, i akakeu iaia. Kare rava i ngaro ana tona tu maroiroi i te apii evangeria. E no tona akarongo mou ia Iehova i te tuatau i runga nei i te enua, kua “riro atura [a Iesu] ei tumu no te ora mutu kore no te aronga katoa e akarongo iaia ra.” Pera katoa, “koia uaorai oki i mate i te mea rokoia e te timataanga ra, e tika oki iaia kia tauturu mai i te aronga [mei ia tatou ] i timataia ra.”​—Ebe. 2:18; 5:8, 9.

Tereni Meitakiia ei Puapii

9, 10. Eaa te tu o te terenianga tei rauka ia Iesu i mua ake ka tonokia mai ei ki te enua nei?

⁹ I mua ake ka tonoia ai te au Kerititiano i teia tuatau ei au mitinari, e akateateamamao ana te Pupu Akaaere ia ratou kia tereniia. I tereniia ana ra a Iesu Karaiti? Ae, kare ra aia i aere ana ki te apii a te au rapi i mua ake ka akatainuia ai aia ei Mesia; e kare katoa aia i apiiia ana e te au arataki rongonui o te akonoanga. (Ioa. 7:15; akaaite ia Angaanga 22:3.) Eaa ra i reira a Iesu i tukatau ei i te apii?

¹⁰ Noatu e eaa te apiianga tei rauka ia Iesu mei tona metua vaine ko Maria, e tona metua angai ko Iosepha, ko te terenianga puapinga maata roa atu tei rauka iaia no te angaanga orometua, no ko mai ia i te Tumu teitei rava atu. No runga i teia, kua tuatua a Iesu e: “Kare oki i taku uaorai te tuatua taku i karanga atu na; na te Metua ra i tono mai iaku nei, i akaue mai iaku i te tuatua, kia tuatua au e kia apii au.” (Ioa. 12:49) E akara ana e kua orongaia tetai ikuikuanga akataka meitakiia ki te Tamaiti no runga i tana ka apii atu. I mua ake ka aere mai ei ki te enua nei, kare e ekoko e e maata ua atu to Iesu taime i akapou ana i te akarongo i te ikuikuanga a tona Metua. Eaa atu ei ra te terenianga meitaki atu tei rauka iaia?

11. I tae roa ki teea turanga ta Iesu akaata mai anga i te tu o tona Metua ki te tangata nei?

 ¹¹ Mei te taime mai i angaia ai aia, e pirianga mou tikai to te Tamaiti ki tona Metua. I te tuatau i mua ake ka riro mai ei aia ei tangata, kua kite a Iesu i to te Atua tu ki te tangata na te akara matatio anga i ta Iehova au akonoanga ia ratou. Kua akaataia mai te aroa o te Atua no te tangata nei na roto i te Tamaiti tei tae roa ki te turanga tei akatutu mai i te pakari, i rauka ai iaia kia karanga e: “Tei te au tamariki a te tangata ra toku mataora anga.”​—Mase. 8:22, 31.

12, 13. (a) Akapeea a Iesu i te kite anga i te apii na roto i te akara matatio anga i te au akonoanga a tona Metua ki te ngati Iseraela? (e) Akapeea a Iesu i te taangaanga anga i te terenianga tei rauka iaia?

¹² Te terenianga tei rauka i te Tamaiti te kapiti katoa maira i te akara matatio anga e e akapeea ana tona Metua me akono atu i te au turanga ngata. Ei akaraanga, ka akamanako ana i ta Iehova au akonoanga ki te ngati Iseraela akarongo kore. Te akakite ra a Nehemia 9:28 e: “E au iora to ratou, kua oki akaou ratou e rave i te kino ki mua ia koe [Iehova]: i vaooiaʼi ratou e koe ki te rima o to ratou au enemi, tei tutara ki runga ia ratou: kia oki ra ratou, e kia kapiki atu kia koe ra, kua akarongo mai koe i runga i te rangi; e manganui toou akaora anga atu ia ratou, no toou ra aroa.” Na te angaanga kapiti anga e te akara matatio anga ia Iehova, kua rauka ia Iesu i te akaari mai i taua tu ngakau aroa ua no te tangata i tona ngai e angaanga ra.​—Ioa. 5:19.

¹³ Kua taangaanga a Iesu i teia terenianga i te akono atu anga i tana au pipi ma te ngakau aroa ua. I te po i mua ake i tona matenga, pouroa te au apotetoro tei akaperepere maataia e ia kua ‘akaruke iora iaia, e oro atura.’ (Mata. 26:56; Ioa. 13:1) Kua akakore katoa rai te apotetoro ko Petero ia Karaiti e toru taime! Noatu ra, kua akatuera rai a Iesu i te mataara no tana au apotetoro kia oki mai kiaia. Kua akakite aia kia Petero e: “I pure ana ra au ia koe, kia kore e ope toou akarongo: e kia akaariuia mai koe ra, ka akatinamou atu i to au taeake.” (Luka 22:32) Kua akatumuia te Iseraela vaerua ki runga i te tango o “te au aposetolo e te au peroveta ra,” e tei runga i te au toka o te tango no te koro o Ierusalema Ou te au ingoa o te au apotetoro tiratiratu e 12 a te Punua Mamoe, ko Iesu Karaiti. E tae mai ki teia tuatau, te tupu ruperupe nei rai te au Kerititiano akatainuia e to ratou au taeake akatapuia, koia te “mamoe ke atu,” ei akaaerenga tutu aere i te Patireia i raro ake i te rima mana o te Atua e te aratakianga a tana Tamaiti akaperepere.​—Ephe. 2:20; Ioa. 10:16; Apo. 21:14.

Te Mataara i Apii ei a Iesu

14, 15. Na roto i teea au mataara i tuke ei ta Iesu apiianga mei ta te au tata tuatua e te au Pharisea?

¹⁴ Akapeea a Iesu i te taangaanga anga i tana i tereniia i te apii anga i tana au pipi? Me akaaite tatou i te mataara e apii ana a Iesu ki ta te au arataki akonoanga o te ngati Iuda, ka kite takarere meitaki ua atu tatou i te turanga teitei o te mataara e apii ana a Iesu. Kareka te au tata tuatua e te au Pharisea kua ‘akakore ratou i ta te Atua akauenga i ta ratou uaorai ikuiku.’ Te tuke ra, ko ta Iesu i tuatua kare nana uaorai; kua apii ua rai aia i te tuatua me kore i te karere a te Atua. (Mata. 15:6; Ioa. 4:10) Ko te reira katoa te ka anoanoia tatou kia rave.

¹⁵ Te vai ra tetai tumu ke mai tei akatuke takiri ia Iesu mei te au arataki akonoanga. No runga i te au tata tuatua e te au Pharisea, kua tuatua aia e: “E akono kotou, e e rave i te au mea katoa, ta ratou e tuatua mai; auraka ra kotou e aru i ta ratou akonoanga: ko te tuatua ua oki ta ratou, kare ra e akono.” (Mata. 23:3) E taangaanga ana a Iesu i tana i apii. Ka akamanako ana ra tatou i tetai akaraanga e akapapu maira e e tika rai teia.

16. Eaa koe ka karanga ai e kua akarotai a Iesu i tona oraanga ki tana au tuatua tei rekotiia i roto ia Mataio 6:19-21?

¹⁶ Kua raurau a Iesu i tana au pipi kia ‘akaputu  i te apinga ki runga i te rangi.’ (E tatau ia Mataio 6:19-21.) I akarotai ana ra a Iesu i tona uaorai oraanga ki taua akoanga ra? Ae, no te mea kua akakite tika ua mai aia i te tika no runga iaia uaorai e: “E ana to te suoli; e toanga to te manu o te reva; kareka te Tamaiti a te tangata nei, kare ona e urunga upoko.” (Luka 9:58) E oraanga mama ua to Iesu. Ko tana angaanga maata e akakite aere i te tuatua meitaki o te Patireia, e kua akatutu mai aia i te aiteanga o te rangatira mai anga mei te au apiapianga e rauka maira no te akaputu i te apinga i te enua nei. Kua akaari a Iesu e e meitaki roa atu te akaputu i te apinga ki runga i te rangi, “te ngai e kore ei e pou i te uu e te pe, kare oki te keia e tomo i reira ka keiaʼi.” Te aru ra ainei koe i ta Iesu akoanga kia akaputu i te apinga ki runga i te rangi?

Au Tu i Marekaia ai a Iesu e te Tangata

17. Eaa te au tu tei akariro ia Iesu ei tangata apii evangeria takake rava?

¹⁷ Eaa te au tu tei akariro ia Iesu ei tangata apii evangeria takake rava? Tetai, koia oki, ko tona tu ki te tangata tana i tauturu ana. Tetai o te au tu memeitaki o Iehova ta Iesu i akaata mai koia oki ko te tu akaaka, te aroa, e te ngakau aroa ua. E akara ana ra e akapeea teia au tu i te akapiri mai anga i te manganui kia Iesu.

18. Eaa ka tau ei kia karangaia e e tu akaaka to Iesu?

¹⁸ I te ariki anga i te tukuanga angaanga kia aere mai ki te enua nei, “kua tuku ke atura ra [Iesu] i tona uaorai tu, e kua rave i to te tavini, i te riro anga mai mei te tangata nei te tu.” (Phili. 2:7) E tu akaaka tikai. Tetai katoa, kare rava a Iesu i akavaavaa ana i te tangata. Kare i roto iaia te tu e, ‘I aere roa mai au mei te rangi, no reira e akarongo mai kotou iaku.’ Kare i aite ki te aronga tei akariro ia ratou uaorai ei mesia pikikaa, kare roa a Iesu i akapaapaa aere ana i tana angaanga ei Mesia tika tikai. I tetai au taime kua akakite aia ki te tangata e auraka e akakite aere ki etai ke e koai aia me kore eaa tana i rave. (Mata. 12:15-21) Kua inangaro a Iesu e na te tangata rai e rave i ta ratou uaorai ikianga kia aru iaia no te mea i akatumuia te reira ki runga i ta ratou uaorai i kite. E akameitakianga tikai ki tana au pipi e kare to ratou Atu i tapapa mai e kia aite rai ratou ki te au angera ara kore tana i piri atu ana i te rangi!

19, 20. Akapeea ra te aroa e te ngakau aroa ua i te akakeu anga ia Iesu kia tauturu i te tangata?

¹⁹ Kua akaari katoa a Iesu Karaiti i te aroa​—te tu maata  roa atu o tona Metua i te rangi. (1 Ioa. 4:8) Kua apii a Iesu i te aronga e akarongo maira iaia no tona aroa ia ratou. Ei akatauanga, ka akamanako ana i tona manako ngakau no tetai tutara mapu. (E tatau ia Mareko 10:17-22.) Kua “aroa atura [Iesu] iaia” e kua inangaro i te tauturu iaia, inara kare te tutara mapu i inangaro ana i te akaruke i tana au apinga kia riro mai ei pipi na Karaiti.

²⁰ Tetai o to Iesu au tu akaperepere koia oki ko tona ngakau aroa ua. Mei te au tangata ara pouroa te tu, te aronga tei ariu mai ki tana apiianga kua teiaa i te au manamanata. No tei marama ua i teia, kua apii atura a Iesu ia ratou ma te ngakau aroa ua e te tangi. Ei akatutu: I tetai atianga, e maata tikai te angaanga a Iesu e tana au apotetoro kare atura o ratou taime i te kaikai. Eaa ra to Iesu tu i tona kite atu anga e kua akaputuputu mai tetai urupu? “Tangi atura [aia] ia ratou, no te mea, mei te mamoe tiaki kore ratou, e kua apii atura aia ia ratou i te au tuatua e manganui.” (Mare. 6:34) Kua kite a Iesu i te turanga taitaia o te tangata i tana ngai e angaanga ra e kua akapou atura i tona maroiroi i te apii anga ia ratou e i te rave anga i te au temeio kia puapingaia ratou. Tetai aronga no tona au tu memeitaki i varenga mai ei ratou, kua akakeuia e tana au tuatua, e kua riro mai ei au pipi nana.

21. Eaa te ka akamanakoia i roto i te atikara e aru maira?

²¹ E maata ua atu ta tatou ka kite no runga i ta Iesu angaanga orometua i te enua nei, mei ta te atikara e aru maira ka akaari mai. Na roto i teea au mataara ke atu e rauka ai ia tatou te aru ia Iesu Karaiti, te Mitinari maata rava atu?

Akapeea Koe me Pau?

• Eaa te terenianga tei rauka ia Iesu i mua ake ka aere mai ei ki te enua nei?

• Akapeea te mataara e apii ana a Iesu i teitei rava atu ei i ta te au tata tuatua e te au Pharisea?

• Eaa te au tu i marekaia ai a Iesu e te tangata?

[Au Uianga Apii]

[Tutu i te kapi 15]

Akapeea a Iesu i te apii anga i te au urupu?