Te 123 Karatuatianga Gileada

Raurauia te Au Karatuati Gileada Kia “Akamata i te Ko”

I TE Maanakai, o Tepetema 8, 2007, kua tae atu tetai urupu e 6,352 tangata mei te au enua mai e 41 ki te karatuatianga o te 123 o te pupu Apii Pipiria Punanga Tiaki o Gileada. I te ora 10:00 i te popongi, kua turou atu te tiamana o te porokaramu, ko Anthony Morris o te Pupu Akaaere, i te au manuiri. I muri ake i te au tuatua akamataanga, kua akaaravei atu aia i te vaa tuatua mua, ko Gary Breaux o te Kumiti Manga o Marike.

Kua akapapu atu te Taeake ko Breaux ki te aronga apiipii e noatu eaa te tu o to ratou akaraanga i te kopapa, i roto ra i te mata o Iehova e manea tikai te aronga e rave ra i Tona anoano. (Iere. 13:11) Kua raurau aia i te au karatuati kia akono marie rai i taua tu manea ra. Aru mai, kua akaketaketa atu a Gerrit Lösch o te Pupu Akaaere e e mea tau rai kia manako atu i tetai tutaki me tavini tatou ia Iehova. (Ebe. 11:6) Inara, ko to tatou akakoroanga ko te aroa karapii kore.

Tei aru mai kua raurau te akaaere o te Tipatimani o te Apii Teokaratiki, ko William Samuelson, i te au karatuati kia vai tiratiratu e te ngaueue kore ki te angaanga ngateitei i tukuia mai kia akakite aere i te Ariki e tutara nei e kia akakite i to ratou tu ngateitei na roto i to ratou tu akono meitaki. * Kua akamaroiroi atu a Sam Roberson, te tauturu akaaere o te Tipatimani o te Apii Teokaratiki, i te au karatuati kia akara ua rai i te au tu memeitaki i roto i etai ke. I reira e rauka meitaki ei i te au karatuati kia “aroa atu i te au taeake.”​—1 Pete. 2:17.

I muri ake i taua au tuatua akamaroiroi ra, kua uiui atu te puapii o Gileada ko Mark Noumair ki tetai au mema o te au karatuati tei akakitekite mai i te au mea ta ratou i kite i roto i te angaanga orometua i te tuatau o te apiianga i Gileada. Kare roa te aronga e akarongo maira i ekoko ana no runga i to ratou inangaro no te angaanga orometua e to ratou anoano kia tauturu i etai ke. E oti kua uiui atu a Kent Fischer no te Opati o Betela i Patterson ki te au mema o te Kumiti Manga mei te au enua mai e toru e au mitinari tetai i reira. Kua riro te au tuatua a teia au taeake meitaki i te akapapu ki te au manuiri, tei kapiti mai i te au metua o te au karatuati e, te akono meitakiia ra te au mitinari ou i roto i ta ratou au tukuanga angaanga. Aru mai kua uiui atu a Izak Marais no te Tipatimani o te Au Angaanga Uri Reo ki tetai au mitinari kua roa i te tavini anga, tei riro te au tupuanga ta ratou i kite ei momua no te rekareka maata ta te au karatuati ka kite.

Te tuatua puapinga roa atu i roto i te porokaramu, na Geoffrey Jackson o te Pupu Akaaere i oronga, no runga i te tumu tuatua “I Muri Ake i ta Kotou i Akarongo Akenei​—Eaa ta Kotou ka Rave?” Kua uriuri atu te Taeake ko Jackson, tei tavini ana ei mitinari vaitata rai e 25 mataiti i te Patipika Tonga, i te akaopengaanga o te Tuatua i runga i te Maunga. I roto i taua akoanga ra, kua tuatua a Iesu no runga i tetai nga tangata, tetai e  tangata pakari e tetai e neneva, e patu are ana. Kua akakite te vaa tuatua e penei tei roto nga are roa ai i taua ngai rai. Inara, kua patu te tangata neneva ki rungarunga ua, ki runga i te one, kareka ra te tangata pakari kua ko aia ki raro roa e kitea uaia atu iaia tetai papa ei patu i te tango ki runga. Kia tupu tetai uriia ririnui, kua vai rai te are tei patuia ki runga i te papa, kareka te mea tei patu uaia ki runga i te one kua ngaangaa rava akera ia.​—Mata. 7:24-27; Luka 6:48.

Kua akamarama a Iesu e te akatutu maira te tangata neneva i te aronga tei akarongo ua i te apiianga a Iesu e kare ra i taangaanga i te reira. Kua aite rai te tangata pakari mei te aronga tei akarongo e tei taangaanga i te au tuatua a Iesu. Kua akakite te Taeake ko Jackson ki te au karatuati, “Me taangaanga kotou i roto i te angaanga mitinari i ta kotou i apii, ka aite rai kotou mei te tangata pakari.” I reira i te akaopengaanga, kua raurau atu aia i te au karatuati kia “akamata i te ko” i roto i ta ratou au tukuanga angaanga mitinari.

I te openga, kua rauka i te au karatuati ta ratou au tiporoma e te au tukuanga angaanga, e kua oronga atu te Taeake ko Morris i tetai au akoanga i te akaopenga anga. Kua akamaroiroi atu aia i te au karatuati kia aru ua rai ia Iesu e auraka rava e poka i te irinaki ki runga ia Iehova no te maroiroi. I reira kua akaotiia te porokaramu karatuatianga.

[Tataanga Rikiriki i Raro]

[Pia i te kapi 31]

TE AU TU O TE PUPU

Numero o te au enua tei komonoia: 10

Numero o te au enua tei tukuia: 24

Numero o te aronga apiipii: 56

Mataiti avereti: 33.5

Au mataiti avereti i roto i te tuatua mou: 17.9

Au mataiti avereti i roto i te angaanga orometua tamou: 13.8

[Tutu i te kapi 32]

Te 123 Pupu Karatuatianga o te Apii Pipiria Punanga Tiaki o Gileada

I te papaanga i raro ake, kua tanumeroia te au pa mei mua ki muri, e kua papaia te au ingoa mei te kaui ki te katau i te pa takitai.

(1) Esparza, E.; Papaya, S.; Bilal, A.; Suárez, M.; Evers, E.; Dimichino, K. (2) Rosa, M.; Fujii, R.; Ratey, O.; Leveton, J.; Van Leemputten, M. (3) Boscaino, A.; Beck, K.; Budanov, H.; Braz, C.; Peltz, K.; Siaw, A. (4) Leveton, S.; Santikko, H.; Conte, S.; Wilson, J.; Rylatt, J.; Pierce, S.; Fujii, K. (5) Rosa, D.; Boscaino, M.; Austin, V.; Rodiel, P.; Bilal, P.; Dimichino, P. (6) Ratey, B.; Czyzyk, D.; Clarke, C.; Riedel, A.; Esparza, F.; Siaw, P.; Van Leemputten, T. (7) Rodiel, J.; Evers, J.; Green, J.; Czyzyk, J.; Santikko, M.; Rylatt, M. (8) Peltz, L.; Austin, D.; Riedel, T.; Beck, M.; Pierce, W.; Conte, S.; Green, S. (9) Suárez, J.; Clarke, J.; Papaya, S.; Budanov, M.; Wilson, R.; Braz, R.