Tamou kia Kite mei te Au Tarevake o te Ngati Iseraela

KUA kite te ngati Iseraela e eaa ta Iehova e tapapa maira mei ia ratou i to ratou tomo atu anga ki roto i te Enua Taputouia. Kua akaue te Atua na roto ia Mose e: “E arumaki kotou i to taua enua ra i mua ia kotou, e kia akangaa roa oki i ta ratou au toka i akatikitikiia ra, e akapou takiri roa oki kotou i to ratou au idolo i akatoia ra, e uritumu roa oki kotou i to ratou au ngai teitei ra.”​—Nume. 33:52.

Auraka roa te iti tangata Iseraela kia papau i tetai koreromotu ki te au tangata o te enua, e auraka katoa e akamou i tetai pirianga akaipoipo ki tetai ua atu ia ratou. (Deu. 7:2, 3) No reira, kua akamatakite tika ia te iti tangata ikiia o te Atua e: “Kia matakite ia koe, ko te papau aea koe i te koreromotu i to taua enua taau e aere na; ko te riro aea oki ei ereere ia koe na.” (Exo. 34:12) Kareka ra, kua akarongo kore te ngati Iseraela i te Atua e kua akaereereia atura. Na teaa ra i akatupu i to ratou uaorai kino? Eaa te au apiianga akamatakite ta tatou ka tamou mai mei tei tupu kia ratou?​—1 Kori. 10:11.

Mei te Akataeake Anga ki te Akamori Itoro

Na te akavianga i te Enua Taputouia, kua autu vave ua te ngati Iseraela ki rungao i te au iti tangata e noo i reira. Inara, kare te au tamariki a Iseraela i akono pouroa ana i te au akauenga a te Atua. Kare oki ratou i akapou takiri i te enemi. (Aka. 1:1–​2:10) Mari ra, i te noo anga te ngati Iseraela ki rotopu i te au ‘vaka tangata e itu’ tei noo i taua enua ra, kua riro te piri putuputu ua rai ki te tangata o taua au enua ra ei akatupu i tetai au pirianga taeake. (Deu. 7:1) Eaa ra ta teia i akatupu ki te ngati Iseraela? Te akakite ra te Pipiria e: “Kua rave ratou i ta ratou au tamaine ei vaine na ratou; e kua oronga atu i ta ratou au tamaine ei vaine na ta ratou au tamariki tamaroa, e kua araara i to ratou au atua. Kua rave te tamariki a Iseraela i te kino ki mua i te mata o Iehova, e kua akangaropoina i to ratou Atua ia Iehova, e kua araara i te au Baala e te au Asetoreta ra.” (Aka. 3:5-7) No runga i te iti tangata o Iseraela, kua taki atu te akataeake anga ki te au tangata o te enua ki te pirianga akaipoipo kia ratou e te akamori itoro. I te akamouia anga rai te au pirianga akaipoipo, kua iti takiri mai te inangaro o to Iseraela kia tuaru atu i te au  peikani mei roto i te enua. Kua takinoia te akamorianga mou, e kua akono atura te au ngati Iseraela uaorai i te au atua pikikaa.

Ei au oa no ratou i teianei, kua riro te au tangata o te Enua Taputouia ei kino pae vaerua maata roa atu ki te ngati Iseraela i to te taime ia ratou e riro ra ei au enemi. E akamanako ana i tetai mataara ke penei i tupu ana te kino i te pae akonoanga.

Mei te Tanutanu ki te Akamorianga Baala

I te tomo anga ki roto te Enua Taputouia, kua akamutu rai te turanga tuitarere o te tamariki o Iseraela e e manganui tei riro mai ei aronga tanutanu. Te au ravenga tanutanu ta ratou i taangaanga kua aite rai ki te au tu tei raveia ana e te iti tangata tei tatanu ana i te enua i mua ake ia ratou. I te akaraanga, kua aere mamao roa atu teia tauianga o te taangaanga anga i te ravenga tanutanu a te iti tangata Kanaana. Na te piri atu anga ki te tangata o reira kua akavare katoaia atu te au ngati Iseraela kia ariki i to ratou au irinakianga tei piri atu ki te angaanga tanutanu.

E maata te au Baala ta te ngati Kanaana e akamori ana​—e au atua tei manakoia e ka akauua mai i te one. Kapiti mai te tatanu anga i te enua e te kokoti anga i tona mou, i te openga kua piri atu te ngati Iseraela ki roto i te akangateitei anga i te au atua o te ngati Kanaana e na ratou i oronga mai i te mou. No reira e manganui ua atu to Iseraela tei rave akapikikaa ua i te akamori ia Iehova, kareka ra ko te tikaanga tikai kua piri takiri rava ratou ki roto i te akamorianga apoteiti.

Akamatakiteanga Pakari no Tatou i Teia Tuatau

Kare e kore, e kare ua o te ngati Iseraela manako kia piri atu ki roto i te akamorianga a Baala e ta te reira au peu viivii i te taime mua i aravei ei ratou i te tangata o te Enua Taputouia. E oti akera, ko te reira tikai ta to ratou pirianga ki taua au tangata ra i akatupu mai. Kare ainei e ko taua au tu kino rai ta tatou ka tapapa atu me akataeake tatou ki te aronga noatu te tu oaoa inara kare o ratou au irinakianga Kerititiano, au turanga akono tau, e te au kaveinga? E tika e, ka anoanoia rai kia piri atu ki te aronga irinaki kore i ko i ta tatou au ngai angaanga, i te apii, me kore penei i te kainga. Inara, te akamatakite maira te akaraanga o te ngati Iseraela ia tatou e ko te umuumu atu i taua tu pirianga ra e akatupu manamanata ua rai ia. Te akakite ua maira te Pipiria i teia tuatua tika papu tikai e: “E kino te tuatua meitaki i te kapiti anga kikino ra.”​—1 Kori. 15:33.

Teia tuatau, e maata te au akaaoanga e aro atu nei tatou tei aiteite rai ki te au mea ta te ngati Iseraela i aro ana. I roto i te taiate o teia tuatau e maata ua atu te au apinga e te au tangata e akariroia ana e te tangata mei te itoro rai. Te kapiti maira te reira i te moni, te aronga akatutu teata, te aronga tarekareka oro, te au akatereanga poritiki, tetai au arataki akonoanga, e te au mema pamiri katoa. Penei e ka riro tetai ua atu o teia aronga ei mea inangaro maata roaia e tatou i roto i te oraanga. Ka riro te akatupu anga i te au pirianga taeake ki te aronga kare e inangaro ia Iehova i te arataki ia tatou ki roto i te kino pae vaerua.

Kua riro te ainga kare i tikaia e te ture ei tuanga puapinga no te akamorianga ia Baala tei riro ei akavare e ei akanauru i te manganui o te ngati Iseraela. Te riro nei rai taua au ereere ra ei akaturori i tetai aronga i roto i te iti tangata o te Atua. Ei akaraanga, penei e pata ua rai i te pitopito komupiuta i roto i te ngai muna o tona uaorai ngutuare ta tetai tangata inangaro i te akarakara me kore ta tetai tangata kamakura ka rave, ei takino i tona akava ngakau meitaki. E mea taitaia tikai no tetai Kerititiano kia akanauruia mai e te au apinga akatupu inangaro ainga tau kore i runga i te Internet!

“E Ao to Tei Akono i Tana Au Tuatua-Akakite”

Ko te tukuanga tika kia akarongo ia Iehova e kia kore e akarongo iaia i roto i te iki anga i to tatou au oa, tei te tangata tataki tai uaorai. (Deu. 30:19, 20) No reira, ka anoanoia tatou kia ui kia tatou uaorai e: ‘Koai ma taku e piri atu ana ki te rave anga i tetai au angaanga i te au taime va? Eaa tikai te au mea puapinga kia ratou e to ratou au turanga akono tau? E akamori ana ratou ia Iehova? Ka riro ainei te kapiti atu anga kia ratou ei akamaroiroi iaku kia riro ei Kerititiano meitaki?’

Kua imene te tata taramo e: “E ao to te aronga apa kore i te arataa, ko tei aaere na te ture a Iehova. E ao to tei akono i tana au tuatua-akakite, ko tei kimi iaia ma te ngakau katoa.” (Sala. 119:1, 2) E tika roa e, “e ao to te aronga katoa i mataku ia Iehova; ko tei aere na tona ra au arataa.” (Sala. 128:1) No runga i te iki anga i te aronga ka piri tatou, e tamou tatou kia kite mei te au tarevake o te ngati Iseraela e kia akarongo takiri atu kia Iehova.​—Mase. 13:20.

[Tutu i te kapi 26]

Ka riro te akataeake anga ki te aronga kare e inangaro ia Iehova i te arataki ia tatou ki te akamori itoro