Akanooanga Puapinga Tikai

E AKANOOANGA puapinga tikai taku no tetai araveianga. I na kia akamarama atu au e eaa tei taki atu iaku, e metua vaine Paniora mapu ua, kia maani i taua akanooanga ra.

Kare e au e te rotai i roto i te ngutuare o toku nga metua. Kua rokoia to matou pamiri e te tumatetenga maata i te mate anga toku tungane no muri ake iaku i roto i tetai u anga taitaia tikai, i te a o tona mataiti. Tetai katoa, kua riro te au peu kino a to matou papa ei akangata no toku mama kia kite i te mataora i roto i te akaipoipo. Inara, kare taua tu ngata i arai ana iaia mei te apii ua mai rai i te au tu tau puapinga ki roto ia maua ko toku tungane no mua ake iaku.

Kare i roa, kua akaipoipo toku tungane, e pera katoa rai au. I muri ua mai i te reira, kua kiteaia mai e e cancer to toku mama, tei taki atu ki tona mate i te openga. Inara i mua ake ka mate ei, kua oronga mai aia i tetai mea puapinga tikai kia maua.

Kua tuatua ana tetai o tona au oa kiaia no runga i te manakonakoanga Tuatua Tapu o te tuakaouanga, e kua ariki toku mama i te patianga kia rave i tetai apiianga Pipiria. I te pae openga o tona oraanga, kua riro te karere Pipiria o te manakonakoanga ei oronga i te aiteanga mou tikai i roto i tona oraanga e te tauturu iaia kia kite i te mataora.

I to maua kite anga i te akakeuanga meitaki o te karere Pipiria ki runga iaia, kua akamata katoa maua ko toku tungane i te apii i te Tuatua a te Atua. Kua papetitoia au ei Kite no Iehova i te marama i mua ake i te anauanga te rua o taku nga tamariki, e tamaine purotu tikai, tei tapa maua i te ingoa ko Lucía.

Te ra o toku papetitoanga e mea puapinga tikai te reira kiaku. Tetai tumu koia oki kua riro au i teianei na Iehova, i te akatapuanga iaku kiaia kia tavini iaia e mutu kore ua atu. Tetai tumu akaou mai koia oki ka rauka i reira iaku i te akakite atu i toku irinakianga ki taku tamaiti e taku tamaine akaperepere.

Kare ra i roa ana kua tamanamanataia te rua o te tumu no toku mataora. I te a mataiti anga a Lucía, kua akamata aia i te kite i te pakari o te mamae kopu. Muri ake i tetai au akarakaraanga, kua akamarama mai te taote io maki e e tuma to runga i tona ate mei te anani rai te maatamaata. Kua akamarama mai te taote e e neuroblastoma to Lucia, koia oki e tuma cancer kakai. Ko te akamata anga ia o te itu mataiti i ta Lucía tamakianga i te cancer, tei kapiti mai i te noo anga ki roto i te are maki no tetai au tuatau roa.

Tu Akaatinga

I roto i teia au mataiti ngata tikai, e akamaroiroi putuputu ua mai ana a Lucía iaku ma te takaveanga e te ongianga akapumaana. Kua umere katoa te aronga angaanga o te are maki i tona tu e akakoromaki ra i te maki. E inangaro ua ana aia i te taokotai ki te au neti, te tauturu ia ratou i te tua aere i te ioketi, te vai ua rakau, e tetai atu au apinga ki te tamariki o te are maki i roto i te au pia vaitata ua mai. Kua oake katoa te au neti i tetai pereue teatea no Lucía e tetai kati meangiti ki runga i tona pereue i te akataka mai iaia ei “tauturu neti.”

“Kua akatukia tikai a Lucía i toku ngakau,” i akamaara ai tetai vaine angaanga are maki. “E tamaine maroiroi aia, e te kikite, e e mea inangaro roa nana i te toroa tutu. E apinga tikai aia i te oraora e te manako aronga mamaata, e tu aronga mamaata tikai tona.”

E rauka mai ana to Lucía maroiroi e te tu ngaueue kore mei roto i te Tuatua a te Atua. (Ebe. 4:12) Kua papu tikai iaia e i roto i te ao ou, “e kore rava te mate, e te aue, e te mii; e te mamae oki,” mei ta te Tuatua a te Atua e taputou maira. (Apo. 21:4) E mea inangaro nana te tangata, e papa ua ana aia i te au atianga ravarai i te akakite aere i te karere Pipiria. Kua riro to Lucía manakonakoanga ngaueue kore i roto i te tuakaouanga ei tauturu iaia kia akamou marie ua rai i tona manako ngakau e te tu maoraora noatu kua kite aia e kare  aia e meitaki. (Isa. 25:8) Kua tamou marie rai aia i taua tu ra e tae ua atu ki te ra i mate ei aia no te cancer.

I taua ra rai i maani ei au i tetai akanooanga puapinga tikai no tetai araveianga. Ngata tikai ia Lucía i te akapuera ua i tona nga mata. Kua mou ua tona papa i tetai o tona nga rima iaku e mou ra i tetai mai. “Eiaa e manamanata, kare au e akaruke ia koe,” i koumuumu atu ei au. “E akaea marie ua. Me ara mai koe, ka meitaki ua koe. Kare koe e kite akaou i te mamae, e tei te pae ua au ia koe.”

Teianei ka akono rai au i taua akanooanga ra. Kua kite au e kare te tuatau o te tiaki atu anga iaia i te mea ngoie. Inara kua kite katoa au e me akakoromaki au ma te irinaki ki roto ia Iehova e te akono marie i toku tu tiratiratu kiaia, tei reira rai au me akatuakaouia mai aia.

Ta Lucía Tuanga

Kua riro to Lucía akaraanga ngakau toa, pera te turuturuanga meitaki a te putuputuanga, ei akatupu i tetai akakeuanga pakari ki runga i taku tane, tei kore i piri mai ki toku irinakianga. I te ra i mate ei a Lucía, kua akakite mai aia kiaku e kua kimikimi marie ana aia i tona manako. Etai au epetoma i muri mai, kua pati aia i tetai tangata pakari i roto i te putuputuanga no tetai apiianga Pipiria. Kare i roa ana kua akamata taku tane i te tae mai ki te au uipaanga katoatoa. Ma te tauturu a Iehova kua akamutu aia i te kai avaava, tetai apinga kare roa i rauka ana iaia i te rave.

Kare te taitaia taku e kite nei no te mate o Lucía i ngaro takiri, inara te akameitaki nei au ia Iehova no te tuanga ta Lucía i akaruke mai. E akapumaana ua ana maua ko taku tane i tetai e tetai ki te manakonakoanga o te tuakaouanga, e te akamanako ua anga i te taime e kite akaou ei maua ia Lucía​—i tona mata oraora, nga mata punupunu e tona nga paparinga ka kitea uaia atu nga nioka me katakata mai.

Kua akatukia katoa te tumatetenga o taku tamaine i tetai vaine e noo ra i te reira ngai. I tetai popongi Maanakai uaua, kua aere mai tetai vaine ki to matou kainga, e aere ana tana tamaiti ki taua apii rai i aere ana a Lucía. Kua mate tetai tamaiti akaou mai ana, e 11 mataiti i taua taime ra, no taua maki rai. I tona kite anga e eaa tei tupu kia Lucía, kua kitea mai i taua vaine ra te ngai e noo ra matou e kua aere mai i te atoro ia matou. Kua inangaro aia kia kite e te akapeea ra au i te akakoromaki ua anga i te mate o Lucía e kua manako mai aia e kia akamata matou i tetai pupu tauturu ei akapumaana i tetai atu au mama ke i roto i taua au turanga ra.

Kua akamarama atu au e kua rauka iaku uaorai te akapumaanaanga mou tikai i roto i tetai o te au taputou a te Pipiria, tei meitaki rava atu i ta tetai ua atu tangata ka oronga mai. Kua kaka ua tona mata iaku e tatau atura kiaia i te au tuatua a Iesu i rekotiia i roto ia Ioane 5:28, 29. Kua ariki mai aia i tetai apiianga Pipiria e kare i roa ana kua akamata i te kite i “te au o te Atua, ko tei maata ua atu i te kite tangata.” (Phili. 4:7) Maata te taime me apii kapiti maua i te Pipiria, e noo ana maua e akamanako ia maua uaorai i roto i te ao ou, e turou atura i to maua au aronga akaperepere i roto i te tuakaouanga.

Ae, kua akaruke mai to Lucía oraanga poto ua i tetai tuanga mutu kore. Kua tauturu tona akarongo i te akarotai mai i to matou pamiri i roto i te tavini anga i te Atua, e kua akamatutu katoa atu i toku akakoroanga kia vai ngaueue kore ua i roto i te akarongo. Kare rava e ekoko, e pouroa tatou e aronga akaperepere to tatou i mate te ka akatuakouia mai, e akanooanga puapinga tikai ta tatou no tetai araveianga.

[Tutu i te kapi 20]

Te parataito ta Lucía i toroa