Akatotoa Anga i te Tuatua Meitaki i te Ngai Teitei i te Andes
Akatotoa Anga i te Tuatua Meitaki i te Ngai Teitei i te Andes
TERA matou i reira, e 18 matou, i runga i te taua repo. Te ruketekete ua ra i roto i to matou au pute moe, akarongo ua ai matou i te ua pakari e pururu maira ki runga i te punu o te tauu are. I te akara anga i te turanga o teia manga kapakapa meangiti ua, kua akamanako matou e me ko matou rai te au tangata mua ki reira.
Eaa ra teia au tangata e 18 ka atoro ei i teia ngai? Te akamouia ra te pauanga ki runga i to matou anoano kia akatupu i te akauenga a Iesu kia tutu aere i te tuatua meitaki “ki te openga o te enua.” (Anga. 1:8; Mata. 24:14) Te aere ra matou i te tutu aere i roto i tetai ngai mamao i te Andes o Porivia.
Te Tae Anga ki Reira
Te akaaoanga mua koia oki ko te tae ua anga ki reira. Kua kitea mai ia matou e kare te au apinga akaoro o te papuriki ki taua au ngai mamao ra e aru ana ki te ora tikai i akatakaia. I te tae mai anga to matou bus, i kite ei matou e e meangiti roa mai te reira i tei manakoia, no reira kare tetai pae ia matou i tu i te nooanga. Inara i te openga kua tae atu matou ki te ngai ta matou e akakoro ra.
Ko to matou akakoroanga koia oki kia taeria te au oire i runga i te au ngai teitei o te Andes o Porivia. No reira i muri ake i te terepu na runga i te bus, kua tari mai te aronga i roto i to matou pupu i te au apinga, ma te aere marie ua anga na muri i tetai e tetai na runga i te ara maunga kake tu ua.
Noatu te akaraanga rikiriki o te au oire, varavara ra oki te au are, no reira e maata ua atu te au ora e pou ana i te atoro i te oire okotai. Noatu eaa te mamao i aere ei matou, e are ua rai tetai e kite mamaoia atura. E ngaro putuputu ana matou i roto i te au ngai amingimingi aere te mataara.
“Eaa Kotou i Kore ei i Aere Takere Mai?”
Tetai vaine kua poitirere tikai aia no te mamao i to matou aere ua mai anga na raro e kua akatika mai aia i tona ngai tunu kai e tana vaie ei tunu i ta matou kai no te avatea. I te kite anga eaa ta te Pipiria e apii maira no runga i te turanga o tei mate, kua ui mai tetai tangata e, “Eaa kotou i kore ei i aere takere mai?” E aka inangaro tikai tona e i to matou akaruke anga i tona oire, kua aru mai rai aia ia matou i te uiui akaou mai i tetai au uianga ia matou e aere ra i te ara. Tetai tangata ke mai kare roa aia i rongo ana i te Au Kite o Iehova e kua akaari mai i te inangaro maata no ta matou au puka. Kua akameitaki maata mai aia ia matou no tei aere mai e kua oake mai i te taviri o tetai kapakapa are kia matou kia moe ki reira i taua po ra.
Tetai po, no te poiri tangotango kua patu kite kore ua atu matou i to matou au puakapa ki rotopu tikai i tetai koanga ro kerekere mamaata. E mea viviki roa ratou i te akaari mai to ratou mareka kore na te katikati anga ia matou. E aka roiroi oki to matou i te neke anga, te mea meitaki ra, kare i roa ana i te akaraanga kua akaruke au ua mai te ro ia matou.
I te akamataanga kua mamae tikai to matou tua e te kaokao no te mea i moe ua matou ki runga i te one, inara i te roaanga po kua matau ua matou i te reira. I te popongi ake
anga kua ngaropoina rai tetai ua atu tu mauiui e te mamae ia matou e akara ra i te au o manea kare i taviiviiia ake e te tiao rangi e tere marie ua ra na te tapa e te au take maunga taurekareka kua ki i te kiona e kite mamao uaia atura. Na te punakinaki ua o te ara vai e te tangitangi o te manu i tamanamanata i te turanga muteki ua i reira.Te oti mai anga i te pai i roto i te ara vai, kua uriuri kapiti matou i tetai irava Pipiria, kai ti, e kua akamata atu i te kake marie ua ki runga i te maunga ki te au oire mamao atu. Kua pauna meitakiia te maroiroi i te kake anga. Kua aravei matou i tetai vaine pakari tei aue i tona kite anga e tei roto te ingoa o te Atua, ko Iehova, i te Pipiria. Kua tukia tikai tona ngakau. Teianei ka rauka iaia i te kapiki i te ingoa o te Atua na roto i tana au pure!
Tetai tangata ruau kua akakite aia e kua maara mai te Atua iaia, e kua akamata i te imene, i te imene anga e na te au angera i tono mai ia matou. Tetai tangata ke mai, e kino tikai tona maki kare e rauka kia akaruke i tona are, kua akakite mai aia kia matou e kare e tangata i tona uaorai oire e manako ana i te atoro mai iaia. Kua umere tikai aia e kua aere roa mai matou mei La Paz. Pera rai tetai tangata akaou mai kua umere tikai aia e kua atoro mai te Au Kite o Iehova i te tangata i roto i to ratou au kainga, tera te au akonoanga ka kapiki ua mai ia ratou ki te oe a te are pure.
Kare e uira i roto i te au are i taua ngai ra, no reira ka aere te tangata ka moe me poiri e ka tu mai ki runga me iti te ra. No reira, e kitea ai te tangata i te kainga, e akamata ana matou i te tutu aere i te ora ono i te popongi. Me kare kua pou takere te maataanga o te tangata i te angaanga i roto i te au one kai. I muri mai, tetai aronga kua akamata ke ana i te angaanga, kua rekareka ua i te akamutu kia akarongo mai ki ta matou karere mei te Tuatua a te Atua, penei i te tuku katoa i tetai taime no te puakatoro kia akangaroi meitaki mei te kika anga i te arote. Maata te au tangata tei te kainga rai kua tuku mai i te uru mamoe kia noo matou ki runga e oti e kapiki ei i te pamiri ki te ngai okotai kia akarongo mai. Tetai aronga pama e oronga mai ana i tetai au pute titona mamaata no to ratou mareka i te au puka Pipiria i akaruke atu ei matou na ratou.
“Kare Kotou i Akangaropoina Iaku”
E tika oki e, no te tangata kia tere ki mua i roto i te kite o te Pipiria, e maata atu i te okotai ua atoroanga te ka anoanoia no ratou. E maata ua atu tei pati akatenga mai kia oki atu matou kia apii akaou ia ratou. No teia, e maata rai to matou au terepu i aere ana ki teia tuanga o Porivia.
Tetai terepu i muri mai, kua mataora tikai tetai vaine pakari e kua oki atu matou, e kua karanga mai e: “Mei te tamariki rai kotou naku. Kare oki kotou i akangaropoina iaku.” Kua akameitaki mai tetai tangata ia matou no ta matou angaanga e kua pati mai ia matou kia noo ki tona kainga me oki akaou mai matou. Penei ko te tutaki maata roa atu no ta matou au tautaanga koia oki i te rongo anga e ko tetai vaine tei araveiia ana i tetai terepu o matou i muao, kua neke atu ki te oire maata e te tutu aere nei i te tuatua meitaki i teianei.
Tae ki te ra openga o to matou terepu mua, kua pou rai to matou karatini no te umu e kua vaitata ta matou kai i te pou. Kua koi aere mai matou i te vaie ei tau i tetai ai, kua tunu i ta matou kai openga, e kua oki aere ua na raro. E mamao tikai matou mei te oire tei reira te bus ka na runga atu matou. I te openga ra, kua tae atu matou i roto ua i te poiri.
Oki Anga ki te Kainga
E au manamanata rai tei tupu i te oki anga no te mea kua kino te bus. Kua pou rai tetai taime, i rauka ai tetai mataara no matou na muri i tetai toroka kua ki ua i te tangata. Kua oronga mai teia i tetai tuatau no matou kia tutu atu ki te au patete tei inangaro kia kite e eaa ta matou angaanga i reira. Noatu to ratou tu akama ua, e mareka ua mai ana ra te tangata e te oaoa.
Muri ake i tetai iva ora i te noo ua anga ki muri i taua toroka ra, kua tae atu matou ki te kainga—mau e kua mate i te anu. Inara kare taua terepu ra i puapinga kore ua. I te aere atu anga na te ara, kua rauka ia matou i te akanoo i tetai apiianga Pipiria ki tetai vaine i roto i te oire maata.
E tikaanga umere tikai kia akakite aere i te tuatua meitaki ki te tangata i roto i taua au ngai mamao ra. E a au oire tei rauka ia matou i te tutu aere ki reira, e te au oire rikiriki ua kare e rauka kia tareia. Kua maara ia matou te au tuatua: “Te manea o te vaevae o te karere ki runga i te maunga, o tei apai mai i te tuatua meitaki ra, o tei tutu aere i te au ra; o tei apai mai i te tuatua meitaki ra, o tei tutu aere i te ora ra.”—Isa. 52:7; Roma 10:15.
[Tutu i te kapi 17]
Papa ua i te akakite i te tuatua meitaki