E Mea Ora te Tuatua a Iehova

Au Manako Maata mei te Puka a Luka

KUA kiteaia mai e no te aronga tatau ngati Iuda tikai i tataia ai te Evangeria a Mataio, e no te aronga kare i te ngati Iuda te Evangeria a Mareko. Inara, no te au tangata o te au pa enua ravarai i tataia ai te Evangeria a Luka. Kua tataia mei te mataiti 56-58 T.N., e papaanga katoa te puka a Luka no te oraanga e te angaanga orometua a Iesu.

Ma te manako aroa papu ei tangata rapakau maki ra, kua kitea puia e Luka “te au tuatua katoa mei muatangana mai, manako akenei e, e mea tika” e kua pou i tetai tuatau e 35 mataiti​—mei te mataiti 3 M.T.N. ki te mataiti 33 T.N. (Luka 1:3) Vaitata rai e 60 patene o te au tuatua i roto i te Evangeria a Luka kare i kapitiia mai ki roto i tetai atu au Evangeria.

ANGAANGA OROMETUA MUA

(Luka 1:1–​9:62)

I muri ake i te akakite anga i te au mea no runga i te anaunga o Ioane Papetito e o Iesu, te akakite maira a Luka kia tatou e kua akamata a Ioane i tana angaanga orometua i te 15 mataiti o to Kaisara Tiberio tutaraanga, koia oki, i te tuatau tupuanga rau i te mataiti 29 T.N. (Luka 3:1, 2) Na Ioane i papetito ia Iesu i te tuatau pururu anga rau o taua mataiti ra. (Luka 3:21, 22) I te tae anga ki te mataiti 30 T.N., ‘kua oki mairā Iesu ki Galilea e apii atura i roto i to ratou au sunago.’​—Luka 4:14, 15.

Kua akamata a Iesu i tana tere tutu anga mua i Galilea. Kua akakite aia ki te urupu tangata e: “E tutu aere rai au i te evangelia o te basileia o te Atua i te au oire ke atu e tikaʼi.” (Luka 4:43) Kua apai rai aia ia Simona te tangata ravakai e tetai ke. Kua tuatua aia e: “Mei teianei atu, e tangata taau e rauka.” (Luka 5:1-11; Mata. 4:18, 19) Tei ia Iesu te au apotetoro 12 i te tuatau o te rua o tona tere tutu anga i Galilea. (Luka 8:1) I te toru o te tere, kua tono aia i te 12 “kia tutu aere i te basileia no te Atua, e e akaora oki i te aronga maki.”​—Luka 9:1, 2.

Pauia te Au Uianga Tuatua Tapu:

1:35​—E tuanga ainei ta te ua o te vaine i te tauturu ia Maria kia nui? I riro mai ei te tamaiti a Maria ei uanga tika tikai no tona ui tupuna ko Aberahama, Iuda, e Davida, mei ta te Atua i taputou ra, kua riro rai tona ua ei tauturu kia nui mai aia. (Gene. 22:15, 18; 49:10; 2 Samu. 7:8, 16) Inara, kua taangaangaia te vaerua tapu o Iehova kia taui mai i te oraanga apa kore o te Tamaiti a te Atua e te akato anga kia nui mai. (Mata. 1:18) I te akara anga kua akakore atu teia i tetai ua atu tu apa te vai ra i roto i to Maria ua e mei te akamataanga mai tikai kua paruruia te pepe e tupu maira kia kore e tu i te ara.

1:62​—Kua murare e kua turi ainei te taringa o Zakaria? Kare. Ko te mea kino ua ko tana tuatua. Kua ui tetai pae ‘ma te tungou’ e eaa tana e anoano ra kia tapaia te tamaiti, kare ra no te mea e kua turi te taringa o Zakaria. Penei te rongo ua maira aia i te tuatua anga tana vaine no runga i te ingoa te ka tapaia ta raua tamaiti. Penei kua ui ana tetai pae kia Zakaria no runga i teia na te rave anga i tetai akairo anga rima. Ko tana tuatua ua te anoanoia ra kia rapakauia e te akakite maira e kare to Zakaria taringa i kino.​—Luka 1:13, 18-20, 60-64.

2:1, 2​—Akapeea te papaanga ki teia “tata anga muatangana” i te tauturu anga i te akakite mai i te tuatau i anauia ai a Iesu? I raro ake ia Kaisara Auguso, e rua tata anga i raveia​—te mea mua, i te mataiti 2 M.T.N. i te akatupuanga ia Daniela 11:20 e te rua i te mataiti 6 me kore i te mataiti 7 T.N. (Anga. 5:37) E tutara a Kurenio no Suria i te tuatau i raveia ai teia nga tata anga, i te akara anga e rua taime i te mou anga i taua taoonga. Te akakite maira ta Luka papaanga i te tata anga mua i te ra o to Iesu anauanga e ko te mataiti 2 M.T.N. te reira.

2:35​—Akapeea te “koke” roroa i te koputa rava anga i te ngakau o Maria? Te taiku ra teia i te taitaia ta Maria i kite mai i tona kite atu anga i  te kopae anga te maataanga o te au tangata ia Iesu ei Mesia e te mamae tana i kite mai no runga i to Iesu mate mamae tikai.​—Ioa. 19:25.

9:27, 28​—Eaa a Luka i karanga ai e kua tupu te akatuke anga i te “po varu” i muri ake i te taputou anga a Iesu ki tana au pipi e kare etai ia ratou e “rokoia e te mate” e tae akera ki te kite atu anga ratou iaia i te aere anga mai i roto i tona Patireia, inara te akakite maira a Mataio raua ko Mareko e no te “po ono akera” i tupu ei te reira? (Mata. 17:1; Mare. 9:2) I te akara anga kua kapiti akaou mai a Luka e rua nga ra​—te ra no te taputou anga e te ra no te akatupu anga.

9:49, 50​—Eaa ra a Iesu i kore ei i tapu i tetai tangata mei te tuaru anga i te au temoni ki vao, noatu e kare taua tangata ra i aru mai ana iaia? Kare a Iesu i tapu ana i taua tangata ra no te mea kare te putuputuanga Kerititiano i akatinamouia ake. No reira, kare e umuumuia e kia aru mai taua tangata ra ia Iesu e kia rauka i te akono i te akarongo i roto i to Iesu ingoa e te tuaru anga i te au temoni.​—Mare. 9:38-40.

Au Apiianga no Tatou:

1:32, 33; 2:19, 51. Kua akono a Maria i roto i tona ngakau i te au tupuanga e te au tuatua te akatupu ra i te au totou. Te akaperepere ra ainei tatou i ta Iesu i totou mai no runga i “te akaopengaanga o te akatereanga o te au mea nei,” na te akaaiteanga i tana i tuatua mai ki te tupu ra i teia tuatau?​—Mata. 24:3, NW.

2:37. Te apii maira te akaraanga o Ana kia tatou e kia akamori ngaueue kore ua rai tatou ia Iehova, kia “tamou marie tikai i te pure,” e auraka e akaruke i “ta tatou akaputuputu anga” i ko i te au uipaanga Kerititiano.​—Roma 12:12; Ebe. 10:24, 25.

2:41-50. Kua tuku a Iosepha i te au anoano pae vaerua ko te mea mua i roto i tona oraanga e kua akono i te turanga i te pae kopapa e te pae vaerua o tona ngutuare tangata. I roto i teia au turanga nei, kua akanoo aia i tetai akaraanga meitaki no te au upoko o te ngutuare tangata.

4:4. Auraka tatou e tuku i tetai ra kia topa e kare tatou i akamanako ana i te au mea i te pae vaerua.

6:40. E mea tau kia akanoo tetai puapii no te Tuatua a te Atua i tetai akaraanga tau no te aronga tana e apii ra. E mea tau kia akono aia i tana e akakite ra.

8:15. Kia ‘tāpu piri tikai i te tuatua e te uua anga i te ua’ ma te akakoromaki, e mea tau kia marama, kia ariki rekareka, e kia akamanako tatou i te Tuatua a te Atua. Te anoanoia ra te akamanakoanga na roto i te pure i te tatau anga i te Pipiria e te au puka tei akatumuia ki runga i te Pipiria.

TA IESU ANGAANGA OROMETUA I MURI MAI

(Luka 10:1–​24:53)

Kua tono akera a Iesu e 70 aronga ke na mua ake iaia ki roto i te au oire e te au ngai i Iudea. (Luka 10:1) Kua aere aia “na roto i te au oire e te au vila, i te apii aere anga.”​—Luka 13:22.

E rima ra i mua ake i te Pasa i te mataiti 33 T.N., kua aere atu a Iesu ki Ierusalema na runga i tetai punua atini. Kua tae mai te tuatau no te akatupuanga i tana au tuatua ki te au pipi e: “E manganui to te Tamaiti a te tangata nei mate e tikaʼi, e e akarukeia aia e te aronga pakari, e te kau taunga nunui ra, e te au tata tuatua ra, e e tamate ravaia oki, e e akatu akaouia kia tae ki te po toru.”​—Luka 9:22, 44.

Pauia te Au Uianga Tuatua Tapu:

10:18​—Eaa ta Iesu e karanga ra i tona akakite anga ki te au pipi e 70 e: “Kua kite au ia Satani i te topa anga, mei te uira no runga i  te rangi ra”? Kare a Iesu e akakite maira e kua uri takereia mai a Satani mei te rangi mai. Kare te reira i tupu ana e tae roa akera i muri poto ake i te akanooia anga a Karaiti ei Ariki i te rangi i te mataiti 1914. (Apo. 12:1-10) Noatu e kare e rauka ia tatou i te akakite papu tikai, na te tuatua anga no runga i tetai mea te ka tupu i te tuatau ki mua mei te mea rai e kua tupu takere te reira, i te akara anga te akakite maira a Iesu e ka tupu tikai te reira.

17:34-37​—Koai ma “te au aeto” e eaa “te ngai kopapa” ta ratou e akaputuputu maira? Ko te aronga tei “riro” atu me kore i akaoraia, kua akaaiteia ki te au aeto kite mamao. Ko “te ngai kopapa” e akaputuputu maira ratou, koia oki, ko te Karaiti mou tikai i roto i tona turanga akara koreia e te kai vaerua ta Iehova i oronga mai na ratou.​—Mata. 24:28.

22:44​—No teaa ra a Iesu i kite ei i te mamae maata? E maata te au tumu i tupu ei teia. Te taitaia ra a Iesu eaa ta tona mate ei tangata kino ra ka akatupu ki te Atua ko Iehova e ki Tona ingoa. Pera katoa, kua kite meitaki tikai a Iesu e ko tona oraanga mutu kore e te tuatau ki mua no te tangata ravarai te vai ra te reira i runga i tona vai akarongo mou anga.

23:44​—Na te arai anga ainei a te marama i te ra i akatupu i te poiri tei pou e toru ora? Kare. Te arai anga te marama i te ra e tupu ua ana te reira i te tuatau o te marama ou, kare i te marama ki katoa, mei te tu rai i te tuatau o te Pasa. Te poiri tei tupu mai i te ra o to Iesu mate e temeio ia no ko mai i te Atua.

Au Apiianga no Tatou:

11:1-4. Na te akaaiteanga i teia au apiianga ki te au tuatua tuke ua ake o te pure akatutuanga, tei orongaia mai i roto i te Tuatua i runga i te Maunga i etai 18 marama i mua atu, te akaari meitaki maira kia tatou e e auraka ta tatou au pure kia riro ei pure taokioki ua anga no tetai au tuatua.​—Mata. 6:9-13.

11:5, 13. Noatu e te inangaro ra a Iehova i te pau mai i ta tatou au pure, e pure putuputu ua rai tatou.​—1 Ioa. 5:14.

11:27, 28. Ka tupu mai te mataora tika tikai na te rave akarongo mou anga i to te Atua anoano e kare e na roto i te au pirianga pamiri me kore te au akakoroanga materia.

11:41. Ta tatou au apinga oronga ua no te akaaroa no roto mai te reira i tetai ngakau aroa e te puareinga ua.

12:47, 48. Te tangata e maata atu tana apainga inara kare e akono ana i te reira, maata atu tona apa i to te tangata kare i kite me kore kare i marama pu tikai i tana au apainga.

14:28, 29. E mea meitaki kia akamou ua ki ta tatou ka peke.

22:36-38. Kare a Iesu i pati ana e kia apai tana au pipi i tetai apinga tamaki ei paruruanga me kore ei paruru ia ratou uaorai. Inara, te au koke i rauka mai ia ratou i te po i pikikaaia ai a Iesu kua riro mai ei apii atu i tetai apiianga puapinga maata na Iesu kia ratou e: “Ko tei rave i te koke ra, ka mate ïa i te koke.”​—Mata. 26:52.

[Tutu i te kapi 31]

Kua akanoo a Iosepha i tetai akaraanga meitaki ei upoko no te ngutuare tangata

[Tutu i te kapi 32]

Kua tata a Luka i te papaanga tau tikai no runga i to Iesu oraanga e te angaanga orometua