“Koai te Tangata Pakari e te Kite i Roto ia Kotou Na?”

“Koai te tangata pakari e te kite i roto ia kotou na? kia na te akono meitaki aia i te akakite mai i tana angaanga ma te maru e te pakari tikai.”​—IAKO. 3:13.

1, 2. Eaa te ka tau kia tuatuaia no runga i te manganui tei manakoia e e pakari?

KOAI taau e manako ana e e tangata pakari mou tikai? Penei ko toou nga metua, tetai tangata ruau, me kore tetai poropeta o te apii koreti? Penei ka riro toou tupuanga mai e te au turanga o toou oraanga ei akakeu i toou manako e koai te tangata pakari. Inara, ko tei maata atu ki te au tavini o te Atua, koia oki ko tona manako.

² Kare te katoatoa ta teianei ao e manako ra e e pakari, i te pakari mou tikai i roto i te mata o te Atua. Ei akaraanga, kua tuatua a Iobu ki te au tangata tei manako i ta ratou uaorai au tuatua e e au tuatua pakari, inara kua taopenga atu aia e: “Kare oki e tangata pakari i kitea e au i roto ia kotou.” (Iobu 17:10) No runga i te aronga tei kopae i te kite o te Atua, kua tata te apotetoro ko Paulo e: “I akatangata pakari oki ratou, e riro atura ei neneva.” (Roma 1:22) E na roto i te peroveta ko Isaia, kua akakite papu tika atu a Iehova uaorai e: “E ae oki ia ratou, to tei karape i to ratou uaorai mata.”​—Isa. 5:21.

3, 4. No tetai kia rauka te pakari mou tikai, eaa te umuumuia ra?

³ Te taka ua ra, e ka anoanoia tatou kia akapapu tikai e eaa te akariro ra i tetai ei tangata pakari mou tikai e rauka ai iaia te akaperepereanga a te Atua. Te oronga maira a Maseli 9:10 i teia akamaramaanga kia tatou e: “Ko te akamataanga o te pakari ra, ko te mataku ïa ia Iehova: e te kite i te au mea tapu ra, ko te kite ïa.” Ka anoanoia kia rauka i te tangata pakari te mataku tau tikai no te Atua e te akangateiteianga no tona au turanga. Inara, e maata atu te anoanoia ra i to te ariki ua i te kite manako no runga i to te Atua vaianga e tona au arataa. Te akamaroiroi maira te pipi ko Iakobo i to tatou manako no runga i teia. (E tatau ia Iakobo 3:13.) Ka akara ana i te tuatua e: “Kia na te akono meitaki aia i te akakite mai i tana angaanga.” E mea tau kia kiteaia rai te pakari mou tikai i roto i taau ka rave e taau ka tuatua i te au ra ravarai.

⁴ Te kapiti maira te pakari mou tikai i te tukuanga tika tau e te taangaanga anga i te kite e te marama na roto i te mataara puapinga. Eaa ua ai te au angaanga ka akaari mai e kua rauka ia tatou taua tu pakari ra? E maata ta Iakobo au apinga i tata te ka kitea papuia i roto i te au angaanga a te aronga tei rauka te pakari. * Eaa tana i tuatua mai te ka tauturu ia tatou kia rauka te au pirianga meitaki ma to tatou au taeake irinaki, e ma te au tangata katoa i vao ake i te putuputuanga?

Na te Au Angaanga e Akataka Mai i te Tangata Pakari Mou Tikai

5. Ka akapeea ra te tangata pakari mou tikai me akono meitaki iaia uaorai?

⁵ E mea puapinga kia ripiti akaouia e kua akapiri atu a Iakobo i te pakari ki te tu akono meitaki. No te mea e ko te mataku i te Atua te akamataanga o te pakari, ka tauta maata te tangata pakari kia akarotai i tona tu akono meitaki ki to te Atua au arataa e tona au turanga. Kare tatou i anauia mai ma te pakari no ko mai i te Atua. Noatu ra, ka rauka rai ia tatou te reira na roto i te apii putuputu ua rai i te Pipiria e te akamanako anga i te reira. Ka tauturu teia nga mea ia tatou kia rave i ta  Ephesia 5:1 e raurau maira e: “Ei aru kotou i te Atua.” Te maata atu i ta tatou akono meitaki kia rotai ki to Iehova tu peretana, ko te maata atu ia ta tatou akaari mai anga i te pakari na roto i ta tatou au angaanga. E teitei roa atu to Iehova au aerenga i to te tangata nei. (Isa. 55:8, 9) No reira ia tatou e aru ra i te mataara e rave ra a Iehova i te au mea, ka kite mai i reira te aronga i vao e e tuke rai tatou.

6. Eaa te tu maru i riro ei ei akapapuanga no te tu akono Atua, e ka akapeea tetai me akaari mai i teia tu?

⁶ Te akakite maira a Iakobo e ko te mataara okotai e aite ei kia Iehova koia oki kia rauka “te maru e te pakari tikai.” Ko te tu maru e rauka maira mei te tu pakari mou tikai, ka akakeu te reira i te tangata kia akono meitaki e kia ngaueue kore. Noatu e kare i takotingaia tona maroiroi, e maru ra oki te Atua, e kare tatou e mataku ana i te akavaitata atu kiaia. E meitaki tikai te akaata mai anga te Tamaiti a te Atua i te tu maru o tona Metua i rauka ai iaia kia karanga e: “E aere mai kotou kiaku nei, ko te aronga katoa i roiroi, e te aronga teiaa i te apainga, naku e akaanga i to kotou roi. Ka rave mai i taku amo ki rungao ia kotou, e kia apiiia kotou e au; te maru nei au, e ngakau akaaka toku, e rauka oki ia kotou te akaangaroianga i to kotou vaerua.”​—Mata. 11:28, 29; Phili. 2:5-8.

7. Eaa tatou ka akara ai kia Mose ei akaraanga meitaki no te tu maru?

⁷ Te akakite maira te Pipiria no runga i etai atu aronga ke tei meitaki tikai te akaraanga no te tu maru me kore te tu akaaka. Ko Mose oki tetai. E apainga maata tikai tana, kareka ra te akatakaia maira aia ei tangata ‘maru maata, i to te tangata ravarai o te ao katoa nei.’ (Nume. 11:29; 12:3) E akamaara katoa i te maroiroi ta Iehova i oronga kia Mose kia rave i Tona anoano. Kua mareka tikai a Iehova i te taangaanga i te aronga maru kia akatupu i tona akakoroanga.

8. Akapeea e rauka ai i te au tangata apa ua nei kia akaari mai i te tu “maru e te pakari tikai”?

⁸ Te taka ua ra, e ka rauka i te au tangata apa ua kia akaari mai i te tu “maru e te pakari tikai.” Peea ra tatou? Akapeea tatou i te akameitaki atu anga i ta tatou akaari anga i teia tu? E tuanga te tu maru no te ua o to Iehova vaerua tapu. (Gala. 5:22, 23) Ka rauka ia tatou kia pure no tona vaerua e kia tauta pakari i te akaari mai i te ua o tona vaerua, ma te irinaki e ka tauturu mai te Atua ia tatou kia akameitaki atu i ta tatou akaari mai anga i te tu maru. Ka kiteaia ia tatou te akakeuanga ririnui kia akapera, i roto i te akapapuanga a te taramo e: “E apii mai [te Atua] i te aronga ngakau maru i tona uaorai arataa.”​—Sala. 25:9.

9, 10. Eaa te tautaanga e anoanoia ra no tatou kia akaari i te tu maru mei to te Atua, e no teaa ra?

⁹ Inara, penei ka anoanoia te tauta pakari tikai kia meitaki atu i roto i teia tuanga. Penei no to tatou tupuanga mai, kare tetai pae ia tatou e akakeuia kia akaari mai i te tu maru. Tetai katoa, penei ka akamaroiroi mai te au tangata kua kite tatou e eiaa tatou e akapera, te karanga anga e kia “tamate atu rai i te ai ki te ai.” Inara, e tu pakari tikai ainei teia? Me ka mai tetai ai meangiti ua i roto i toou are, ka tamate ainei koe i te reira ki te inu me ki te vai anu? Me riringiia te inu ki runga i te ai ka kino roa atu te reira, kareka me riringiia te vai anu ki runga ka tupu tei akakoroia. Na roto rai i taua tu ra, te ako maira te Pipiria ia tatou e: “Ko te tuatua maru ra tei akaanga ke i te riri: kareka te tuatua akakoko ra, ko te riri ïa te tupu.” (Mase. 15:1, 18) Me tupu akaou mai te au manamanata, i roto me i vao ake i te putuputuanga, ka rauka ainei ia tatou te akaari e e pakari mou tikai to tatou na te pau atu anga na roto i te tu maru?​—2 Timo. 2:24.

¹⁰ Mei tei taikuia i runga akenei, ko te manganui ua atu tei akakeuia e te tu ngakau o teianei ao kua ngere ratou i te tu au marie ua, te tu ponuiaau, e te tu akamoeau. No reira, e maata ua atu ta tatou au tangata marokiakia e te akatietie ka kite. Kua kite ua a Iakobo i teia, e kua oronga mai aia i tetai au akamatakiteanga kia rauka i te aronga i roto i te putuputuanga i te paruru ia ratou kia kore e takinoia e taua tu ngakau ra. Eaa akaou atu ta tatou ka kite mei te akoanga tana i oronga mai?

Au Tu o te Aronga Ngere i te Pakari

11. Eaa ua ai te au tu e patoi ra i te pakari no ko mai i te Atua?

¹¹ Kua tata tika ua mai a Iakobo no runga i te au tu tei patoi tika atu i te pakari no ko mai i te Atua. (E tatau ia Iakobo 3:14.) Te vareae e te taumaro e au peu anake ia no te kopapa, kare no te vaerua. Ka akamanako ana e eaa te tupu ana me vai ua atu rai te aerenga manako o te kopapa. E ono au pupu “Kerititiano” e akaaere ra i tetai au tuanga o  te Are Pure o te Sepulchre Tapu i Ierusalema, tei karangaia e kua akatuia ki runga i te ngai i tamateia ai e i tanuia ai a Iesu. Kua vai ua atu rai te tu taumaro i rotopu ia ratou. I te mataiti 2006, kua akakite mai te makatini Time no runga i tetai manamanata tei tupu i muao i te “tata anga te au [mongoka i reira] no tetai au ora, . . . te tapetupetu anga i tetai e tetai ki te au mouranga kanara mamaata.” No te maata kino o to ratou irinaki kore i tetai e tetai kua orongaia te taviri o te are pure ki tetai Muslim kia akono.

12. Me ngere i te pakari, eaa ra, penei, te ka tupu?

¹² Auraka rava taua au tu taumaroanga kino ra tei akaariia mai kia kiteaia i roto i te putuputuanga Kerititiano. Inara, i tetai au taime e riro ana te au tu apa ua ei akakeu i tetai aronga kia akaari mai i te tu marokiakia kia tupu to ratou uaorai au manako. Ka taki atu te reira ki te pekapeka e te taumaro. Kua kite te apotetoro ko Paulo i teia i roto i te putuputuanga i Korinetia, no reira aia i tata ai e: “Te vai ra oki te vareae, e te taumāro, e te pae ke, i roto ia kotou na, kare aina tei ta te kopapa rai kotou, e mei to te tangata nei rai to kotou aerenga?” (1 Kori. 3:3) Kua vai rai taua turanga taitaia ra no tetai tuatau i roto i te putuputuanga i te anere mataiti mua. No reira, ka anoanoia tatou kia matakite e auraka taua tu ngakau ra kia o mai ki roto i te putuputuanga i teia tuatau.

13, 14. Oronga mai i tetai au akaraanga e akaariia mai ana te tu aerenga manako o te kopapa.

¹³ Peea ra taua tu ngakau ra e o mai ei ki roto i te putuputuanga? Penei ka akamata rikiriki ua mai te reira. Ei akaraanga, me patuia tetai Are Uipaanga Patireia, penei ka tupu mai te au tu manako keke e ka akapeea tikai te rave anga i te au angaanga. Penei ka taumaro mai tetai taeake me kare tona manako e arikiia, penei i te aoaoa mai anga i tana akaapaanga no te au ikianga tei tukuia. Penei kare katoa rai aia e inangaro i te rave angaanga akaou i runga i te angaanga patuanga! Tetai tangata ka akapera te akangaropoina ra aia e, e oti ei tetai angaanga e o maira te putuputuanga, tei runga te maataanga o te reira i te tu ponuiaau ua o te putuputuanga, e kare tei runga i tetai ravenga takake i te rave anga i te reira. Ko te tu ngakau maru ta Iehova ka akameitaki, kare ko te tu taumaro.​—1 Timo. 6:4, 5.

¹⁴ Tetai akaraanga ke mai penei me kite te aronga pakari o tetai putuputuanga i tetai tangata pakari, kua tavini ana no tetai au mataiti, i teianei ra te taka ua ra e kare e rauka ana i te aru i te au turanga tau o te Tuatua Tapu. Te kite anga e kua orongaia ana ki te taeake tetai akoanga takake i te tuatau i topa inara kare rai e meitaki atu ana, kua akatika te akaaere tutaka e kua turu i te manako kia akaateaia aia ei tangata pakari. Mei teaa ra tona manako no te reira? Ka ariki ainei aia i te tika openga a te katoatoa rava o te aronga pakari e te akoanga Tuatua Tapu na roto i te tu akaaka e te maru e ka tauta kia rauka i te aru i te au turanga tau o te Tuatua Tapu penei kia rauka iaia i te tavini akaou? Me ka akamou ainei aia i te riri e te vareae no te mea kua ngere aia i te apainga tana i mou ana? Eaa ra tetai taeake ka manako ei e kua tau aia ei tangata pakari me ko te tikaanga tikai kare aia i tau? E pakari maata atu te akaari i te tu akaaka e kia marama ua!

15. Eaa koe i manako ei e e puapinga tikai te akoanga akauruia i roto ia Iakobo 3:15, 16?

¹⁵ E tika, e te vai atura tetai au mataara ke penei te ka akaariia mai te tu mei te reira rai. Inara noatu eaa te turanga ka tupu mai, kia tauta pakari rai tatou i te kopae i taua au tu ra. (E tatau ia Iakobo 3:15, 16.) Kua kapiki a Iakobo i taua au tu ra e “no teianei ao” no te mea no te kopapa  taua au tu ra, kua ngere i te pakari no runga mai. E au tu “tangata” ia i te mea i tupu mai te reira mei te au manako tangata, tei aite ki te au tu o te au manu kare e kite i te manako. Taua au tu ra no te “demoni,” no te mea te akaata maira te reira i te au peu a te au enemi vaerua o te Atua. E mea tau kore tikai no tetai Kerititiano kia akaari mai i taua au tu ra!

16. Eaa te au akatikatikaanga ka anoanoia tatou kia rave, e ka akapeea e rauka ai ia tatou i te rave i te reira?

¹⁶ E mea meitaki no te au mema ravarai o te putuputuanga kia makitoro marie ia ratou uaorai e kia tauta pakari i te takore atu i taua au peu ra. Ei au puapii no te putuputuanga, kia akamanako ua rai te au akaaere e ka anoano katoaia kia takore ratou uaorai i te au tu tau kore. Kare te rave anga i teia i te mea mama no to tatou tu apa ua e te akakeuanga a to teianei ao. Ka tau kia akaaiteia te rave anga i te reira ki te kake anga ki runga i tetai tiketike varivari e te patekateka. Ma te kore e apinga i mou ki runga, ka pateka ua mai tatou ki muri. Inara, me mou piri tikai tatou ki te akoanga tei kiteaia i roto i te Pipiria, e pera katoa ki te tauturu tei orongaia mai e te putuputuanga a te Atua i te ao katoa nei, ka tere i reira tatou ki mua.​—Sala. 73:23, 24.

Au Tu ta Tei Pakari e Umuumu ra kia Akaari Mai

17. Mei teaa ra te tu o te tangata pakari me aro atu i te kino?

¹⁷ E tatau ia Iakobo 3:17. Ka puapingaia tatou na roto i te akamanako anga i tetai au tu te ka rauka mai mei te akaari anga i “te pakari no runga maira.” Kia vai iro koreia te o maira te vai ma ua anga e te vai viivii kore ua anga i roto i ta tatou au angaanga e te au akakoroanga. Ka anoanoia tatou kia patoi vave ua i te au apinga kino. Kia riro te rave anga i te reira mei te mea piapa ua ra. Penei kua rutu maru ana tetai taote i te reflex hammer ki runga i te uaua maata i raro ua ake i te ivi o toou turi. Kua tika viviki ua toou vaevae i te maiti anga. E mea piapa ua; kare koe i manako atu ana i te reira. Kia aite rai mei te reira te tu me timataia tatou kia rave i te kino. Kia viviki ua to tatou tu iro koreia e te akava ngakau tereniia e te Pipiria i te akakeu ia tatou kia patoi i te mea kino. (Roma 12:9) Te oronga maira te Pipiria i tetai au akaraanga no te aronga tei akapera ana, mei ia Iosepha rai raua ko Iesu.​—Gene. 39:7-9; Mata. 4:8-10.

18. Eaa ra te aiteanga e (a) kia vai ponuiaau ua? (e) e kia riro ei tangata akatupu au?

¹⁸ Te umuumu katoa maira te pakari no ko mai i te Atua kia vai ponuiaau ua tatou. Te kapiti maira teia i te kopae anga tatou i te tu ae, te tu tauetono, me kore i te au angaanga te ka takino i te au. Te akamaata atura a Iakobo no runga i teia manako i te na ko anga mai aia e: “E ruruia oki te tuatua-tika ma te au na te aronga e akatupu i te tuatua au ra.” (Iako. 3:18) E akara ana i te tuatua “e akatupu i te tuatua au ra.” I roto i te putuputuanga, te kiteaia ra ainei tatou ei aronga akatupu au me ei aronga akatupu pekapeka? E manamanata putuputu ana ainei tatou ki etai ke, te riri vave ua me kore i te akariri atu i etai ke? E maro ana ainei  tatou e kia ariki ua mai ratou i to tatou au tu me e tauta akaaka ua ana tatou i te takore atu i te au tu peu tei tau rai tetai aronga kia manako e e tau kore? Te kiteaia ra ainei tatou ei aronga tauta pakari i te akatupu i te au, papa ua i te akakore i te apa e te akangaropoina i te au tarevake o etai ke? Ka riro te tirotiro matatio tika ua ia tatou uaorai i roto i teia tu, ei tauturu ia tatou kia kite e me te anoanoia ra te akameitaki atu i ta tatou akaari mai anga i te pakari no ko mai i te Atua.

19. Akapeea tetai e kiteaia ai e e tangata tau koia oki e tangata maru?

¹⁹ Kua kapiti mai a Iakobo i te tu tau koia oki i te tu maru i te akatakaanga mai e eaa te akaata maira i te pakari no runga mai. Kua kitea uaia ainei tatou ei aronga tuku ua atu ki ta etai ke me kare e kaveinga Tuatua Tapu e o maira, kare e viviki ua i te maro atu e kia aruia to tatou uaorai au turanga? E rongo meitaki ainei to tatou no te tu au marie ua e te ngoie ua i te tuatua atu? E au akakiteanga teia e kua apiiia tatou i te tu tau koia oki te tu maru.

20. Eaa te ka tupu ia tatou e akaari maira i te au tu akono Atua tei uriuriia akenei?

²⁰ E au turanga mataora tikai te ka vai i roto i te putuputuanga i te au taeake e te au tuaine e tauta pakari ra i te akaari maata ua mai i te au tu akono Atua ta Iakobo i tata mai! (Sala. 133:1-3) Ka riro te tu maru, te tu ponuiaau, e te tu tau ki tetai e tetai ei akameitaki atu i te au pirianga e te akapapu mai e kua rauka ia tatou “te pakari no runga maira.” Te ka aru mai ka akara tatou e akapeea te apiianga kia manako atu i etai ke mei ia Iehova rai, i te tauturu anga ia tatou i roto i teia tu nei.

[Tataanga Rikiriki i Raro]

Ka Rauka Ainei ia Koe te Akataka?

• Eaa te akariro ra i tetai Kerititiano ei tangata pakari mou tikai?

• Akapeea tatou me akameitaki atu i te akaari mai anga i te pakari no ko mai i te Atua?

• Eaa te au tu e kiteaia nei i roto i te aronga kare e akaari ana i “te pakari no runga maira”?

• Eaa te au tu taau e akakoro ra kia tatanu maata roa atu?

[Au Uianga Apii]

[Tutu i te kapi 23]

I teia tuatau akapeea te tu taumaro e o mai ei?

[Tutu i te kapi 24]

E mea piapa ua ainei ia koe te kopae atu i te kino?