Te Akarongo Maira a Iehova i ta Tatou Kapiki Anga no te Tauturu
Te Akarongo Maira a Iehova i ta Tatou Kapiki Anga no te Tauturu
“Tei te aronga tuatua-tika ra to Iehova mata, e tei ta ratou kapiki tona taringa.”—SALA. 34:15.
1, 2. (a) Eaa ra te manako o te au tangata e manganui i teia tuatau? (e) Eaa ra tatou i korei e poitirere no runga i teia?
TE TUPU ra ainei te tumatetenga kia koe? Me koia ia, kare ko koe anake ua. E mirioni ua atu te au tangata te putoto ra ma te akakoromaki anga i te au taomi anga o te oraanga i te au ra ravarai i roto i teia akatereanga o te au mea kino nei. Ko tetai pae, i te akara anga kare e rauka i te akakoromaki ua i te reira. Aiteite ua tikai to ratou manako ki te tata taramo ko Davida, tei tata e: “Kua apikepike au, kua paruparu roa au; te kakaoa ua nei au i te ngarepurepu anga o toku ngakau. Kua potopoto toku aʼo, kua kore toku maroiroi: e te mārama i vai i toku mata nei, kare ua.”—Sala. 38:8, 10.
2 Ei au Kerititiano, kare tatou e poitirere no runga i te au tumatetenga o te oraanga. Te marama ra tatou e ko te “au mea no te mate” e tuanga ia no te akairo tei totouia mai no runga i to Iesu parutia. (Mare. 13:8; Mata. 24:3.) Te taiku ra te tuatua tei uriia i roto i te reo mua “au mea no te mate” ki te mamae tikai i te tuatau anau anga tamariki. Tano tikai ta te reira akamarama anga mai i te pakari tikai o te mamae o te au tangata i teia au tuatau “kino maata”!—2 Timo. 3:1.
Te Marama ua Maira a Iehova i to Tatou Au Tumatetenga
3. Eaa ta te au tangata o te Atua e kite tikai ra?
3 Te kite tikai ra te au tangata o Iehova e ka tupu katoa kia ratou teia au tumatetenga, e papu tikai, ka kino roa atu te au turanga. Kapitiia mai i tei kiteaia e te au tangata ravarai, ei au tavini no te Atua te aro katoa atu nei tatou i tetai “enemi ko te diabolo,” koia te tauta ra i te akaparuparu i to tatou akarongo. (1 Pete. 5:8) E ngoie ua i te akamanako anga mei ia Davida rai e: “Kua paruparu toku ngakau i te akakino; kua vaitata rava au i te mate: i tapapa oki au i tei aroa mai, e kare ua; e te akapumaana mai, kare rava i kitea e au”!—Sala. 69:20.
4. Eaa te akapumaana maira ia tatou me tupu te au tumatetenga kia tatou?
4 Te karanga ra ainei a Davida e kare ona manakonakoanga? Kare. E akamanako ana i tetai o tana au tuatua i roto i taua taramo rai e: “E akarongo mai oki a Iehova i te aronga akaaka ra, e kare oki e akavaavaa i tona tangata i tapekaia ra.” (Sala. 69:33) I roto i tetai manako ua, i tetai au taime penei te manako ra tatou e mei te aronga i tapekaia ra rai tatou no to tatou au tumatetenga. I te akara anga penei kare tetai ke e kite tikai ana i to tatou turanga—e penei kare rai ratou e marama ana. Inara mei ia Davida rai, ka akapumaanaia tatou i te kite anga e te marama ua maira a Iehova i to tatou au tumatetenga.—Sala. 34:15.
5. Eaa ta te Ariki ko Solomona e irinaki ra?
5 Kua akakite mai te tamaiti a Davida ko Solomona i teia tikaanga i te akatapu angaia te iero i Ierusalema. (E tatau ia 2 Paraleipomeno 6:29-31.) Kua pati aia kia Iehova kia akarongo mai i te pure a te aronga ngakau tika tataki tai tei pure atu Kiaia no runga i “tona uaorai mate, e tona uaorai kino.” Akapeea a Iehova i te akarongo mai anga ki te au pure a teia aronga tumatetenga tataki tai ra? Kua akakite mai a Solomona i tona irinakianga e kare te Atua e akarongo ua mai ki ta ratou au pure mari ra ka rave katoa aia i tetai mea ke ei tauturu ia ratou. No teaa ra? No te mea kua kite tikai aia e eaa to roto i “te ngakau o te au tamariki a te tangata nei.”
6. Akapeea tatou i te akakoromaki anga i te tumatetenga, e no teaa ra?
6 Ka rauka katoa ia tatou i te akavaitata atu kia 1 Pete. 5:7) Te manako tikai maira a Iehova e eaa te ka tupu kia tatou. Kua akakite pakari mai a Iesu i to Iehova manako aroa, i te na ko anga e: “Kare aina e taki rua mea manu rikiriki e okoia i te asario okotai nei? kare oki tetai o ratou ra e ngaro i to kotou Metua kia topa ki raro i te enua. Te rauru oki o to kotou na upoko, kua ope ïa i te tatauia. Auraka mari kotou e mataku, e maata to kotou meitaki i to te au manu rikiriki e manganui.”—Mata. 10:29-31.
Iehova na roto i te pure no runga i ‘to tatou uaorai mate, e to tatou uaorai kino,’ i to tatou au tumatetenga tataki tai. Ka akapumaanaia tatou i te kite anga e te marama ua ra aia i to tatou au tumatetenga e te manako maira aia ia tatou. Kua akapapu mai te apotetoro ko Petero i teia, te tuatua anga aia e: “E uri i to kotou tumatetenga katoa ki runga iaia; koia oki te tiaki mai ia kotou.” (Irinaki i ta Iehova Tauturu
7. Eaa te turu anga te akapapuia maira no tatou?
7 Papu tikai ia tatou e te inangaro ra e te rauka ra ia Iehova i te tauturu mai ia tatou me tupu te tumatetenga kia tatou. “Ko te Atua to tatou akapuanga e te maroiroi, e tauturu vaitata roa ïa kia rokoia e te tumatetenga.” (Sala. 34:15-18; 46:1) Akapeea te Atua i te oronga anga mai i taua tauturu ra? E akamanako ana i ta 1 Korinetia 10:13 e karanga ra e: “E tuatua-mou ra ta te Atua, e kare aia e vaoo ia kotou kia timataia, mari ra ko te tika ia kotou kia akakoromaki ra; e akatupu katoa aia i te akapuanga i taua timataanga ra, kia tika ia kotou kia akakoromaki.” Penei ka arataki a Iehova i te au tumuanga kia akakore atu i to tatou turanga manamanata, me kore ka oronga mai aia kia tatou i te maroiroi ta tatou e anoano ra kia akakoromaki atu i te reira. Noatu e eaa te tu, ka tauturuia mai tatou.
8. Akapeea tatou i te oronga anga ia tatou uaorai no ta te Atua tauturu?
8 Akapeea tatou i te ariki anga i taua tauturu ra? E akamanako ana eaa tei akoia mai kia rave tatou: “E uri i to kotou tumatetenga katoa ki runga iaia.” Teia oki te aiteanga e e oronga atu tatou i te ikianga puapinga maata kia Iehova no to tatou au manamanata katoatoa. Kare tatou e manamanata e ka irinaki marie ua kiaia kia akono mai i to tatou au anoano. (Mata. 6:25-32) Te umuumu maira taua irinakianga i te tu akaaka, kare e irinaki ki runga i to tatou uaorai maroiroi me kore i te pakari. Na te tuku akaaka anga ia tatou uaorai “i raro ake i te rima mana o te Atua,” te ariki ra tatou i to tatou turanga akaaka. (E tatau ia 1 Petero 5:6.) Tei tupu mai, na teia e tauturu ia tatou kia akakoromaki i ta te Atua i akatika ua. Penei te inangaro ra tatou i te akamaru viviki, inara te irinaki ra tatou e kua kite tikai a Iehova e aea e akapeea i te akono anga ia tatou.—Sala. 54:7; Isa. 41:10.
9. Eaa te tu o te apainga tei anoanoia a Davida kia tuku atu kia Iehova?
9 E akamaara ana ra i te au tuatua a Davida tei tataia i roto ia Salamo 55:22 e: “E tuku koe i taau apainga kia Iehova ra, e nana koe e tauturu mai; kare rava aia e vaoo ua atu i te tangata tuatua-tika kia akangaueueia ra.” I te tataanga a Davida i taua au tuatua, tumatetenga maata rava atu aia. (Sala. 55:4) Kua akamaramaia mai e kua tataia teia taramo nei i te parani muna ua anga tana tamaiti ko Abasaloma i te keia i tona taoonga ariki mei iaia. Kua piri atu rai to Davida tumukorero irinaki rava atu, ko Ahitophela, ki roto i te kotikoti kupenga. Kua oro atu a Davida ki Ierusalema no tona oraanga. (2 Samu. 15:12-14) Noatu e tei raro ake i taua au turanga tumatetenga ra, kua irinaki ua rai a Davida ki te Atua, e kare roa aia i manamanata ana.
10. Eaa ta tatou ka rave me aro atu i te au tumatetenga?
10 E mea puapinga maata tikai e kia akavaitata atu tatou, mei Davida rai, kia Iehova na roto i te pure noatu e eaa te au tumatetenga ta tatou e kite Philipi 4:6, 7.) Eaa te ka tupu mai mei taua pure ngakau tae ra? “Na te au o te Atua, ko tei maata ua atu i te kite tangata, e akamaroiroi mai i to [tatou] ngakau e to [tatou] manako i te Mesia nei ia Iesu.”
nei. E akamanako ana tatou eaa ta te apotetoro ko Paulo e raurau maira kia rave tatou no runga i teia turanga. (E tatau ia11. Akapeea “te au o te Atua” i te paruru anga i to tatou ngakau e to tatou au manako?
11 Ka akatupu ainei te pure i tetai tauianga i roto i toou turanga? Penei ka tupu te reira. Inara, kia kite ra tatou e kare a Iehova e pau ua mai ana i ta tatou au pure na roto i te tu e inangaro ra tatou. Noatu rai, te tauturu maira te pure ia tatou kia akono tau i to tatou manako, kia kore to tatou au tumatetenga e taomi takiri ia tatou. Ka rauka i “te au o te Atua” i te akamaru mai ia tatou me taomiia tatou e te au manako tumatetenga. Mei tetai nuku vaeau tei tukunaia kia paruru i tetai oire kia kore e tomoia mai, “na te au o te Atua” e paruru i to tatou ngakau e to tatou au manako. Ka tauturu katoa te reira ia tatou i te akakore atu i to tatou au manako ekoko, te mataku, e te au manako papu kore e te kopae anga kia kore tatou e ariu atu ma te manako rapurapu e te pakari kore.—Sala. 145:18.
12. E akatutu mai e akapeea e rauka ai i tetai tangata te manako au.
12 Akapeea e rauka ai ia tatou te manako au, me te na roto ra i te au tumatetenga? E akamanako ana i tetai akatutuanga i roto i tetai au tu te akataka maira i to tatou turanga. Penei te angaanga ra tetai tangata i raro ake i tetai manitia tuatua kino. Inara, e atianga to te tangata angaanga i te akakite atu i tona au manako ki tona pu o te kamupani, e tangata meitaki e te tau. Ka akapapu atu te pu ki te tangata angaanga e te marama ua ra aia i te turanga e kua akakite atu e kare e roa atu ka akaateaia te manitia mei tona taoonga. Eaa ra te manako o te tangata angaanga? I te irinaki anga i taua akapapu anga e te kite anga e eaa te ka tupu mai e akamaroiroi anga ia i tona manako kia noo ua rai, noatu e e maata te au turanga ngata tana ka aro atu i tetai au taime. Mei te reira katoa, te kite ra tatou e te marama ua ra a Iehova i to tatou turanga, e te akapapu maira aia kia tatou e kare e roa atu ka “tiriaia te tutara o teianei ao ki vao.” (Ioa. 12:31, NW) E akapumaana anga tikai!
13. Kapiti atu ki te pure anga, eaa ua atu i reira ta tatou ka rave?
13 Kua rava ua ainei, i reira, no tatou kia akakite atu i to tatou au manamanata kia Iehova na roto i te pure? Kare. E maata atu te umuumuia ra. Te anoanoia ra tatou kia aru rotai ki ta tatou au pure. Te tono anga te Ariki ko Saula i te au tangata ki te kainga o Davida kia tamate atu iaia, kua pure a Davida e: “Kia ora au, e taku Atua, i toku nei au enemi; e akatika mai koe iaku i tei tu a enemi mai iaku nei. Kia ora au i te aronga i rave i te kino ra, e akaora iaku i te au tangata toto ra.” (Sala. 59:1, 2) Kapiti atu ki te pure anga, kua akarongo a Davida ki tana vaine e kua rave i tei anoanoia ra kia ora mai aia. (1 Samu. 19:11, 12) Na roto katoa i taua tu, e pure tatou no te pakari tau kia tauturu mai ia tatou kia akakoromaki ua e penei kia akameitaki mai i to tatou au turanga tumatetenga.—Iako. 1:5.
Te Rauka Anga ia Tatou te Maroiroi kia Akakoromaki
14. Eaa te ka tauturu ia tatou kia akakoromaki ua me aro atu i te turanga manamanata?
14 Penei kare to tatou au tumatetenga e akaatea vivikiia. Penei ka tupu ua rai te reira no etai au tuatau. Me ko te reira te tu, eaa te ka tauturu ia tatou kia akakoromaki ua? Te mea mua, e akamaara e me tavini akarongo mou ua rai tatou ia Iehova noatu e eaa te au turanga ngata, te akapapu ra tatou i to tatou aroa nona. (Anga. 14:22) E akamanako ana ra i ta Satani akaapa anga no runga ia Iobu e: “Ka akamori ainei a Iobu ia koe me kare ana apinga e rauka mai no roto mai i reira? E paruru ua ana koe iaia e tona pamiri e tana au mea ravarai. E akameitaki ana koe i te au mea ravarai tana i rave, e e maata te au puakatoro taau i oronga nana ei akaki i te enua katoa. Inara kia akaatea ra koe i tana au apinga ravarai—ka akakino mai aia ia koe i mua tikai i to mata!” (Iobu 1:9-11, Today’s English Version) Na roto i tona tu tiratiratu, kua akapapu mai a Iobu e kua akatumuia taua akaapaanga ra ki runga i te pikikaa. Te akakoromaki anga tatou i raro ake i te au turanga tumatetenga, e atianga katoa to tatou i te akapapu e e pikikaa a Satani. Tei rauka mai, ka akamaroiroi to tatou akakoromaki i to tatou manakonakoanga e te irinakianga.—Iako. 1:4.
15. Eaa te au akaraanga te ka akamaroiroi ia tatou?
15 Te rua, e akamanako ana e “tei to kotou au taeake katoa i te ao nei taua au mate ra.” (1 Pete. 5:9) Ae, “kare kotou i rokoia e te timataanga, mari ra mei ta te tangata nei rai.” (1 Kori. 10:13) No reira ka rauka ia koe te maroiroi e te mataku kore na te akamanako anga i te au akaraanga o tetai ke kare e akara mou ua ki runga i toou uaorai au turanga ngata. (1 Tesa. 1:5-7; Ebe. 12:1) E akamanako meitaki ana i te akaraanga o te aronga taau i kite tei akakoromaki ua ma te akarongo mou noatu e te na roto ra i te au tumatetenga kino pakari. Kua kimi ana ainei koe i te au tua oraanga tei neneiia, te akara anga i te au papaanga no te aronga tei kite ana i tetai mea te aiteite ra ki taau e aro atu nei? Penei ka riro mai teia ei akamaroiroi anga tikai kia koe.
16. Akapeea te Atua i te akamaroiroi anga ia tatou me aro atu tatou i te au timataanga tukeke?
16 Te toru, kia akamaara ra e ko Iehova ‘te Metua o te aroa, e ko te Atua anake te pumaana; tei akapumaana mai ia tatou i to tatou au mate katoa nei, kia tika ia tatou kia akapumaana i te aronga i rokoia e te mate ra, i te pumaana a te Atua i pumaanaʼi tatou uaorai nei.’ (2 Kori. 1:3, 4) Mei te mea rai e te tu ua ra te Atua i te pae ia tatou i te akakeu e te akamaroiroi ia tatou, kare i roto i to tatou mate anake ua rai mari ra ‘i to tatou au mate katoa nei.’ Na teia i reira e tauturu ia tatou kia akapumaana atu i tetai ke tei “rokoia e te mate.” Kua kite a Paulo i te tikaanga tikai o teia au tuatua.—2 Kori. 4:8, 9; 11:23-27.
17. Akapeea te Pipiria i te tauturu anga ia tatou kia akakoromaki i te au tumatetenga o te oraanga?
17 Te a, tei ia tatou te Tuatua a te Atua, te Pipiria, tei riro ei “puapinga ra no te apiianga, te ako tika anga, te akatikatikaanga i te au mea, no te akoanga i te tu tuatua tika ra, kia mako katoa te tangata a te Atua ra, kia papa tikai no te au angaanga meitaki ravarai.” (2 Timo. 3:16, 17, NW) Kare te Tuatua a te Atua e akariro ra kia “mako” ua tatou e ‘kia papa no te au angaanga meitaki ravarai.’ Te tauturu katoa maira te reira ia tatou kia akakoromaki ua i te au tumatetenga o te oraanga. Te akariro ra te reira kia “mako katoa” tatou e kia “papa tikai.” Te tuatua tei uriia i roto i te reo mua “papa tikai” ko te aiteanga tikai “kua akapapa meitakiia.” Penei kua taangaangaia ana teia tuatua i te tuatau taito te akapapaia anga tetai pai ma te au apinga ravarai te anoanoia ra no tetai tere, me kore no tetai matini te rauka ra i te rave i tetai apinga tei tapapaia no te reira. Pera katoa, te oronga maira a Iehova na roto i tana Tuatua kia tatou i te au mea ravarai ta tatou e anoano ra kia akono i tetai ua atu mea ta tatou ka aro atu. Kia tau, ka rauka ia tatou i te karanga e, “Me akatika mai te Atua i te reira, ka akakoromaki ua au i te reira, ma tana tauturu.”
Akaoraia mei to Tatou Au Tumatetenga Ravarai
18. Na te akara mou anga ki runga i teaa e tauturu ia tatou kia akakoromaki ua ma te akarongo mou?
18 Te rima, e akara mou ua rai ki te tikaanga umere e kare e roa atu ka akaora mai a Iehova i te au tangata mei te au tumatetenga ravarai. (Sala. 34:19; 37:9-11; 2 Pete. 2:9) Tei maata atu, te akaoraia anga mai tatou e te Atua kare te aiteanga e te akaora uaia maira mei te au tumatetenga i teianei, kareka ra te rauka anga te tuatau katoa no te ora mutu kore, me i te rangi ma Iesu me kore i runga i te enua parataito.
19. Akapeea te akakoromaki anga akarongo mou e rauka mai ei?
19 Kia tae rava ki taua tuatau ra, e akakoromaki ua rai tatou i te au turanga tumatetenga o teianei ao kino. Te inangaro ua atu nei tatou i te tuatau kare teia au mea e tupu akaou mai! (Sala. 55:6-8) Kia maara ra ia tatou e te akapapu ra to tatou akakoromaki anga akarongo mou e e pikikaa te Tiaporo. Kia rauka ia tatou te maroiroi mei ta tatou au pure e to tatou taokotaianga taeake Kerititiano, i te akamanako anga e te kite katoa ra to tatou au taeake i te au timataanga mei ia tatou rai. Kia mako katoa e kia papa tikai na te taangaanga meitaki anga i ta te Atua Tuatua. Auraka rava e tuku i to tatou irinaki i roto i te utuutu anga aroa tei orongaia mai e “te Atua nona anake te pumaana” kia ngaueue kore. Kia maara ra e “tei te aronga tuatua-tika ra to Iehova mata, e tei ta ratou kapiki tona taringa.”—Sala. 34:15.
Ka Rauka Ainei ia Koe te Pau?
• Eaa to Davida manako no runga i te au tumatetenga tana i aro atu?
• Eaa te irinaki anga papu ta te Ariki ko Solomona i akakite mai?
• Eaa te ka tauturu ia tatou kia akakoromaki ua i ta Iehova i akatika ua mai?
[Au Uianga Apii]
[Tutu i te kapi 13]
Kua irinaki a Solomona e ka rave a Iehova i te angaanga no Tona au tangata tumatetenga
[Tutu i te kapi 15]
Kua tuku a Davida i tana apainga ki runga ia Iehova na roto i te pure e oti kua rave i tana i pure ana