Te Manako ra Ainei Koe i Etai Ke Mei ta Iehova e Manako Ra?
Te Manako ra Ainei Koe i Etai Ke Mei ta Iehova e Manako Ra?
“Kia kore rava te tau kore i te kopapa nei; kia arite katoa ra to te au melo akono ia ratou uaorai.”—1 KORI. 12:25.
1. Mei teaa ra toou manako ngakau i toou tomo mua mai anga ki roto i te parataito pae vaerua?
TE TAIME mua i akaatea mai ei tatou mei teia ao kino e kua akamata i te piri atu ki te iti tangata o Iehova, kare e kore kua rekareka tikai tatou i te kite anga i te aroa pumaana e te tu akono meitaki i rotopu ia ratou. E tuke tikai ki te au tangata tuatua viivii, makitakita, e te akatupu pekapeka i raro ake i te akatereanga a Satani! Kua aere mai tatou ki roto i te parataito pae vaerua tei ki ua i te au e te rotai.—Isa. 48:17, 18; 60:18; 65:25.
2. (a) Eaa ra te ka akakeu i to tatou manako no etai ke? (e) Eaa ra te ka anoanoia tatou kia rave?
2 Inara i te tuatau ka aereia, penei ka akamata tatou i te manako kino atu i to tatou au taeake no to tatou tu apa ua. Penei ka riro to tatou tu apa ua ei akakeu ia tatou kia akamaata atu i te au tarevake o to tatou au taeake e kare e akara ki te katoaanga o to ratou au tu pae vaerua. Mama ua te tuatua, kua ngaropoina ia tatou i te manako atu ia ratou mei ta Iehova e manako maira ia ratou. Me tupu teia kia tatou, ko te taime rai teia i te akara meitaki i to tatou uaorai manako e kia akarotai i te reira ki to Iehova manako tikai.—Exo. 33:13.
To Iehova Manako no to Tatou Au Taeake
3. Te akaaite ra te Pipiria i te putuputuanga Kerititiano ki teaa?
3 Mei tei rekotiia i roto ia 1 Korinetia 12:2-26, kua akaaite te apotetoro ko Paulo i te putuputuanga o te au Kerititiano akatainuia ki tetai kopapa “e manganui tona melo.” Mei te au mero kopapa rai e tuke ra tetai mei tetai, e maata katoa rai te au mema tuke tuke o te putuputuanga e to ratou au tu e te au tareni. E oti akera, te ariki maira a Iehova i teia au tu tuke tuke. E mea inangaro e e mea akaperepere nana te au mema ravarai. No reira, te ako katoa maira a Paulo i te au mema o te putuputuanga “kia arite katoa ra to te au melo akono ia ratou uaorai.” Penei ka riro teia ei mea ngata no te mea ka tuke rai to tetai ke tu tangata mei to tatou uaorai.
4. Eaa ra tatou ka anoano ei kia akatikatika i to tatou manako no to tatou au taeake?
4 Penei ka manako katoa rai tatou i te akara ua ki te au tu paruparu o to tatou au taeake. Me akapera, tera i reira te taangaanga ra tatou i tetai nenei e ngai meangiti ua rai ta tona io ka akaata mai. Kareka ta Iehova akara anga, te na roto maira i tetai io atea, te ka o mai te katoaanga o te apinga ki roto e te ngai takapini i taua apinga ra. Penei ka akara tamou ua tatou ki runga i tetai apinga kare tatou e reka ana, kareka a Iehova te akara maira aia i te tangata katoa, kapiti mai i te au tu memeitaki katoatoa o taua tangata ra. Te maata atu i ta tatou tauta kia aru ia Iehova, ko te maata roa atu ia ka rauka ia tatou i te akatupu i te tu ngakau aroa e te rotai i roto i te putuputuanga.—Ephe. 4:1-3; 5:1, 2.
5. Eaa i tau kore ei kia akava atu i etai ke?
5 Kua kite meitaki a Iesu e e tu matauia e te tangata kia akava atu. Kua ako mai aia e: “E akamutu i te akava atu kia kore kotou e akavaia mai.” (Mata. 7:1, NW) E akara e i roto i te reo mua kare a Iesu i karanga ana e: “Auraka e akava atu”; i tuatua ra aia e: “Akamutu i te akava atu.” Kua kite aia e e maata te aronga e akarongo maira iaia tei matau ua i te akaapaapa atu i tetai ke. Ka tano ainei e penei kua akatupu katoa rai tatou i taua au tu ra? Me e tu manako akapera to tatou e mea tau rava kia tauta pakari tatou i te taui, kia kore tatou e akava tau koreia mai. E tika rava e, koai ra tatou kia akava atu i tetai ta Iehova e taangaanga ra i roto i tetai taoonga akamanaia me kore kia karanga e kare aia e tau kia riro ei tuanga no te putuputuanga? Penei e au apa to tetai taeake, inara me te ariki ra rai a Iehova iaia, e mea tau ainei no tatou kia kopae iaia? (Ioa. 6:44) Te irinaki ra ainei tikai tatou e ko Iehova te arataki nei i tona iti tangata e me ka anoanoia tetai au akatikatikaanga, ka rave ainei rai aia i te reira i tona uaorai tuatau tau?—E tatau ia Roma 14:1-4.
6. Eaa ra to Iehova manako no tona au tavini?
6 Tetai apinga umere tikai no runga ia Iehova koia oki ka kite aia i roto i te au Kerititiano ravarai e eaa te ka rauka ia ratou kia rave me taeria ana ia ratou te turanga apa kore i roto i te ao ou. Kua kite katoa aia e eaa te turanga pae vaerua tei rauka takere ia ratou. No reira, kare ana tumuanga tau kia akara ua ki runga i te au tu apa o te kopapa. Ka tatau tatou i roto ia Salamo 103:12 e: “Mei te itinga o te rā e taka ke i te opunga o te rā ra, ko tana ïa akataka ke anga i ta tatou au ara ia tatou nei.” Kare aiteia to tatou uaorai rekareka maata no te reira!—Sala. 130:3.
7. Eaa ta tatou i mou mai mei to Iehova manako no runga ia Davida?
7 Te kite nei tatou i te akapapuanga i roto i te au Tuatua Tapu e e tu kite takake rava to Iehova i te akara ua ki te au tu memeitaki o te tangata. Te akataka maira te Atua ia Davida e ko “toku tavini ra kia Davida, ko tei akono i taku au akauenga, e tei aru mai iaku ma tona ngakau katoa ra, i te akono anake anga i tei tau ki toku mata nei.” (1 Ari. 14:8) E tika, kua kite tatou e kua rave ana a Davida i tetai au mea tarevake. Noatu ra, kua iki rai a Iehova kia akara mou ua ki runga i te tu meitaki no te mea kua kite aia e e ngakau tiratiratu to Davida.—1 Para. 29:17.
Kia Manako Atu i to Kotou Au Taeake Mei ia Iehova Rai
8, 9. (a) Na roto i teea au tu e rauka ai ia tatou kia aite mei ia Iehova rai? (e) Akapeea ra te akatutu anga i teia, e eaa te apiianga no tatou?
8 Ka rauka ia Iehova kia tatau i te ngakau, kare ra e rauka ia tatou. Ko teia ua rai te tumuanga tau no tatou kia kore e akava atu. Kare tatou i kite katoatoa i te akakoroanga o tetai tangata. E mea tau kia tauta rai tatou i te aru i to Iehova tu na te kore anga e akara tamou ua ki runga i te au tu apa ua o te tangata, te ka ngaro i te openga. Kare ainei teia i te akakoroanga meitaki no tatou kia aite kiaia i roto i teia tu? Me akapera tatou ka tauturu maata roa teia i te akatupu i te au pirianga ponuiaau ki to tatou au taeake e te au tuaine.—Ephe. 4:23, 24.
9 Kia akatutu atu, e akamanako ana i tetai are e kino ua atura—te pururu atura te au aravai, kua ngaangaa te au maramarama, e te au paruru o te auaro kua pe i te vai. Penei ka akara te maataanga o te au tangata i taua are ra e ka taopenga e kua tau kia ruruia ki raro; te mamae i te mata i te akara atu. Inara penei ka aere mai tetai tangata e tuke takiri tona manako i te akara anga i te reira. Penei kare aia e akara ua ra i te au manamanata o rungarunga ua, te akara mamao atura ra aia e te kite ra e te matutu ua ra te turanga are e ka rauka ua kia akaouia te are. Kua oko aia i te are e kua rave i tetai au angaanga ripea ki runga i te au ngai kino o rungarunga ua e kua akameitaki roa atu i te akaraanga o te are. I muri ake ra, kua karanga te au tangata e aere maira na reira e e are manea tikai teia. Ka rauka ainei ia tatou kia aite mei teia tangata rai tei tauta i te ripea me kore i te akaou i te are? I to te akara ua ki runga i te au apa o to tatou au taeake e kite uaia atura, ka rauka ainei ia tatou kia akamanako atu i to ratou au tu memeitaki e to ratou turanga meitaki i te pae vaerua? Me akapera tatou, ka akakeuia tatou kia inangaro i to tatou au taeake no to ratou au tu manea i te pae vaerua, mei ia Iehova rai.—E tatau ia Ebera 6:10.
10. Ka akapeea ra te akoanga ka kiteaia i roto ia Philipi 2:3, 4 i te tauturu anga ia tatou?
10 Kua oronga te apotetoro ko Paulo i tetai akoanga te ka tauturu ia tatou i roto i to tatou au pirianga ki te katoatoa rava i roto i te putuputuanga. Kua raurau atu aia i te au Kerititiano: “Auraka takiri e mea e raveia ma te taumāro, e te akanengonengo puapinga kore; ei ngakau akaaka ra, i te manako akameitaki atu tetai ki tetai, auraka iaia uaorai. Auraka te tangata e akono i tona anake uaorai au mea, e akono katoa ra i to etai ke ra au mea.” (Phili. 2:3, 4) Ka tauturu te tu akaaka ia tatou kia rauka te tu manako tau i etai ke. Ka riro katoa te akaari anga i to tatou uaorai inangaro i roto i etai ke e te akara anga i te meitaki i roto ia ratou ei tauturu ia tatou kia akamanako atu ia ratou mei ta Iehova e manako ra.
11. Eaa ua ai te au tauianga tei akatuke i tetai au putuputuanga?
11 I te au taime ua akenei, kua taopenga mai te au tauianga tuke tuke tei tupu i te ao katoa nei ki roto i te neke pu aere ua anga te tangata e manganui. Tetai au oire mamaata te nooia nei e te au tangata mei te au enua ke mai e manganui. Tetai aronga ou ua mai ki to tatou au ngai kua inangaro i te tuatua mou o te Pipiria, e kua piri mai ratou kia tatou i te akamori anga ia Iehova. Ko ratou oki “no te pa enua ravarai, e te au kopu ravarai, e te au iti-tangata ravarai, e te au reo katoa oki.” (Apo. 7:9) Tei tupu mai, e manganui ua atu to tatou au putuputuanga i teianei kua ki i te au tangata no te pa enua ravarai.
12. Eaa te manako no tetai e tetai ka anoanoia tatou kia akono marie, e eaa ra teia ka riro ei ei akaaoanga i tetai au taime?
12 I roto i to tatou putuputuanga, penei ka anoanoia tatou kia angaanga pakari atu i te akono marie anga i te tu manako tau no tetai e tetai. Te akamaara maira teia ia tatou kia akamanako i te akoanga a te apotetoro ko Petero kia akaari i “te aroa taeake pikikaa kore ra” e “kia aroa maata kotou ia kotou uaorai ma te ngakau kinokino kore.” (1 Pete. 1:22) Penei ka riro te akatupu anga i te aroa e te inangaro tika tikai ei mea ngata i roto i tetai turanga e maata te au tangata tuke tuke mei te pa enua ravarai. Penei e tuke takiri te peu a to tatou au taeake akamori mei ta tatou uaorai, mei to ratou turanga pae apii, te pae moni, e to ratou pupu tangata eteniki. Te riro ra ainei ei akaaoanga noou kia marama i te aerenga manako me kore i te au tu o tetai aronga? Penei te manako akapera ra rai ratou no runga ia koe. Noatu ra, te ikuikuia maira tatou pouroa e: “E aroa i te kapiti anga katoa o te au taeake.”—1 Pete. 2:17, NW.
13. Eaa te au akatikatikaanga i roto i to tatou aerenga manako te ka anoanoia tatou kia rave?
13 Penei e mea tau kia rave i tetai au akatikatikaanga i roto i to tatou aerenga manako kia rauka i te akamaora atu i to tatou aroa no to tatou au taeake katoatoa. (E tatau ia 2 Korinetia 6:12, 13.) E kite ana ainei tatou ia tatou uaorai i te tuatua i tetai apinga mei te “Kare au e akavaavaa ana, tera ra oki . . . ” e oti e akakite mai ei i te au tu tau kore ta tatou e manako ra e mea noa ua i roto i te au mema o tetai pupu tangata eteniki? Penei te akaari maira taua au tu manako ra e te anoanoia ra tatou kia takore i te tu akavaavaa e akamou ua ra tatou i roto i to tatou ngakau. Penei e ui tatou kia tatou uaorai e, ‘Te tauta putuputu ra ainei au kia kite i te au tangata e tuke rai ta ratou peu mei taku uaorai?’ Penei na te akara matatio anga ia tatou uaorai e tauturu ia tatou kia ariki e kia akaperepere maata atu i to tatou taokotaianga taeake pa enua.
14, 15. (a) Oronga mai i tetai au akaraanga no te aronga tei akatikatika i to ratou manako no runga i etai ke atu? (e) Ka akapeea ra tatou i te aru anga i to ratou tu?
14 Te oronga maira te Pipiria i te au akaraanga meitaki no tatou no runga i te aronga tei akatikatika i to ratou aerenga manako, tetai ia ratou ko te apotetoro ko Petero. Ei ngati Iuda, kare kore e kopae ana a Petero i te tomo ki roto i te ngutuare Kenitara. Ka akamanako ua ana e mei teaa ra tona manako i te patiia atu anga kia atoro i te ngutuare o te Kenitara peritome koreia ko Korenelio! Kua rave a Petero i te au akatikatikaanga, i te kite anga e ko to te Atua anoano ia, kia riro mai te au tangata o te pa enua ravarai ei tuanga no te putuputuanga Kerititiano. (Anga. 10:9-35) Kua anoano katoaia a Saula, tei riro mai ko Paulo i muri mai, kia rave i tetai au tauianga e kia takore i tona uaorai manako akavaavaa. Kua akatika rai aia e e pakari tikai tona makitakita i te au Kerititiano e kua “takinga-kino arite kore [aia] i te ekalesia o te Atua, e pou akera ïa.” Inara, i te akatikatikaia anga a Paulo e te Atu ko Iesu, e aka tauianga tikai tana i rave e kua akamata katoa i te ariki i te aratakianga mei te aronga tana i takinokino ana i mua ana.—Gala. 1:13-20.
15 Kare ekoko e ka rauka ia tatou kia rave i te au akatikatikaanga i roto i to tatou tu ma te tauturu a te vaerua o Iehova. Me kite tatou e te vai ra rai tetai au tu akavaavaa i roto ia tatou, e tauta tatou i te takore atu i te reira e kia ‘matakite tikai oki kia vai rai te taokotaianga a te vaerua ra i te ruru o te au.’ (Ephe. 4:3-6) Te akamaroiroi maira te Pipiria ia tatou kia “kakau na [ia tatou uaorai] i te aroa, ko taua tatua apa kore ua ra ïa.”—Kolo. 3:14.
Aru Anga ia Iehova i Roto i ta Tatou Angaanga Orometua
16. Eaa ra to te Atua anoano no te tangata?
16 “I te akono oki i te tu o te tangata nei, kare ïa i te Atua,” i tata ai te apotetoro ko Paulo. (Roma 2:11) Ko to Iehova akakoroanga ia kia kapiti mai i te au tangata o te pa enua ravarai ki roto i tana akanoonooanga no te akamorianga. (E tatau ia 1 Timoteo 2:3, 4.) I te akatupuanga i te reira, kua maani aia i tetai akanooanga no te “evangelia mutu kore” kia akakiteia “ki te pa enua katoa, e te au kopu, e te au reo, e te au iti-tangata.” (Apo. 14:6) Kua akakite a Iesu e: ‘Ko te kainga ra, koia teianei ao.’ (Mata. 13:38) Eaa ra te puapinga o teia kia koe e toou uaorai pamiri?
17. Ka akapeea ra tatou i te tauturu anga i te au tu tangata ravarai?
17 Kare e rauka i te katoatoa kia aere ki te au tuanga mamao o teianei ao i te apai i te karere o te Patireia ki etai ke atu. Noatu ra, ka rauka rai ia tatou i te apai i teia karere ki te au tangata mei te au tuanga katoatoa mai o te enua e noo ra i roto i to tatou ngai. Te kite ra ainei tatou i te au atianga tau kia akakitekite atu ki te au tu tangata ravarai, eiaa ki te aronga ua ta tatou i tutu ana no te au mataiti? Eaa tatou kore ei e akataka papu tikai i tetai tuatau kia tutu ki etai ke atu tei kore i orongaia ana tetai akakitekiteanga meitaki tikai?—Roma 15:20, 21.
18. Eaa te manako oonu ta Iesu i akaari mai no te tangata?
18 E oonu tikai to Iesu anoano kia tauturu i te katoatoa rava. Kare aia i tutu aere ua i roto i tetai ngai okotai. Te akakite maira tetai papaanga Pipiria kia tatou e kua “aere aturā [aia] na roto i te au oire e te au vila katoa.” E oti, “kia akara akera aia i te maata o te tangata, aroa atura aia ia ratou” e kua akaari maira i te anoano maata kia tauturu ia ratou.—Mata. 9:35-37.
19, 20. Eaa ua ai tetai au mataara e rauka ai ia tatou i te akaata mai i to Iehova e to Iesu manako oonu no te au tu tangata ravarai?
19 Eaa ua ai tetai au mataara ka rauka ia koe i te akatutu mai i te tu mei te reira rai? Tetai aronga kua tauta ratou i te akakitekite aere i roto i tetai au tuanga o to ratou ngai tei kore i angaanga putuputuia ana. Ka o mai te au tapere pitiniti, te au paka, te au ngai tapuanga o te au apinga akaoro, me kore a mua i te au are tarau mamaata e ngata kia tae ki roto. Tetai aronga kua tauta ana ratou i te apii i tetai reo ou kia rauka i te tutu atu ki tetai au pupu tangata eteniki e noo ra i to ratou ngai me kore ki te au pupu kare i akakitekite putuputuia atu ana i te tuatau i topa. Ka riro te kite anga e akapeea me aravei i taua au tangata ra i roto i to ratou reo tupuna i te akaari mai e te manako atura tatou ia ratou. Me kare e rauka ia tatou kia apii i tetai reo ke, ka rauka ainei ia tatou i te akamaroiroi atu i te aronga e rave ra i te reira? E tika rava e kare tatou e inangaro i te akaparuparu me kore i te akaekoko atu i to etai ke akakoroanga kia tutu aere ki te tangata mei tetai enua ke mai. Pouroa te oraanga e mea puapinga maata tikai te reira i roto i te mata o te Atua, e ka inangaro tatou kia akapera rai to tatou manako i te au mea ravarai.—Kolo. 3:10, 11.
20 Te aiteanga katoa o te kite anga i to te Atua manako no runga i te tangata koia oki kia tutu ki te katoatoa rava, noatu to ratou au turanga. Tetai aronga penei kare e kainga, kare e marikonga, me kore te taka ua ra e te noo ra i tetai oraanga tau kore. Me takinga kino mai tetai au tangata ia tatou, kare e tau e ka riro tera ei akatupu i te au manako tau kore kia tatou no runga i to ratou enua me kore i te katoaanga o to ratou pupu tangata eteniki. Kua takinga kinoia ana a Paulo e tetai aronga, inara kare rava aia i akatika ana i te reira kia akakeu iaia kia tuku i te au i te tutu atu ki taua au tu tangata ra. (Anga. 14:5-7, 19-22) Kua irinaki tikai aia e kare e kore ka ariu rekareka ua mai tetai aronga.
21. Akapeea ra te kite anga i to Iehova manako no etai ke i te tauturu anga ia koe?
21 Kua taka meitaki roa atu i teianei e te anoano maata ia nei te tu manako tau tikai—to Iehova manako—i roto i ta tatou au angaanga ka rave ma to tatou au taeake i to tatou ngai, e to tatou taokotaianga taeake pa enua, e te au tangata i roto i te ngai tutu anga. Te maata atu i ta tatou akaata mai i to Iehova manako, ko te maata atu ia tatou i te riro mai ei akakeuanga ririnui no te au e te rotai. E ka tukatau meitaki atu tatou i te tauturu i etai ke kia inangaro ia Iehova, koia te Atua “tei kore e akono mai i te tu” mari ra ko tei akaari aroa ua mai i te manako oonu no te katoatoa rava, no te mea “na tona uaorai rima oki i anga ia ratou ravarai.”—Iobu 34:19.
Ka Rauka Ainei ia Koe te Pau?
• Eaa te manako no runga i to tatou au taeake te ka tau tatou kia tauta pakari i te kopae?
• Akapeea tatou i te aru anga ia Iehova i roto i te tu e manako ana tatou i to tatou au taeake?
• Eaa taau au apiianga i mou mai no runga i to tatou manako no to tatou taokotaianga taeake pa enua?
• Akapeea tatou i te aru anga i to Iehova manako no te tangata, me aere tatou ki roto i te angaanga orometua?
[Au Uianga Apii]
[Tutu i te kapi 26]
Akapeea koe e kite ei i te au tangata o tetai atu au peu ke?
[Au Tutu i te kapi 28]
Na roto i teea au mataara e maata atu ei te au tangata ka taeria e koe i te apai i te tuatua meitaki?