Akaipoipoanga e te Riro Anga ei Metua i Teia Tuatau Openga

“Te poto nei te tuatau.”​—1 KORI. 7:29.

1. (a) Eaa te au tauianga e o maira ki roto i te au mea “ngata roa no te akono” i teianei? (e) Eaa ra tatou ka manamanata atu ei i te au tauianga i roto i te au mea puapinga ki te pamiri?

KUA totou te Tuatua a te Atua e ka akairoia “te tuatau openga” e te au tamakianga, ngaruerue enua, onge, e te maki mate. (Dani. 8:17, 19; Luka 21:10, 11) Kua akamatakite katoa mai te Pipiria e ka riro teia tuatau puapinga i roto i te tuatua enua o te tangata ei tuatau e maata te au tauianga i roto i te taiate tangata. Ko te au tu oripu ua i roto i te oraanga pamiri tetai o te au mea “ngata roa no te akono” i roto i teia “au ra openga.” (2 Timo. 3:1-4, NW) Eaa ra tatou ka manamanata atu ei i taua au tauianga ra? No te mea kua maata roa te reira e te ririnui, ka riro te reira ei akakeu i te manako o te au Kerititiano i teia tuatau no runga i te akaipoipoanga e te riro anga ei metua. Na roto ra i teea tu?

2. Eaa ra te manako o teia ao no runga i te akaipoipoanga e te kopae tokorua?

² Teia au tuatau, e mea mama ua te kopae tokorua e kua pararauare ua te reira, e te kake viviki ua atura te tareanga no te kopae tokorua i roto i te au enua e manganui. Inara, e mea tau kia taka meitaki tikai ia tatou e e tuke takiri to te Atua ko Iehova manako no runga i te akaipoipoanga e te kopae tokorua mei te manako tei ariki matauia i  roto i te ao takapini ia tatou. Eaa ra i reira, to Iehova manako?

3. Eaa ra to Iehova e to Iesu Karaiti manako no te akaipoipoanga?

³ Te tapapa maira te Atua ko Iehova i te aronga kua akaipoipo kia vai tiratiratu ua ki ta ratou tia akaipoipoanga. I tona topiri anga i te tangata mua e te vaine mua i roto i te akaipoipoanga, kua akakite a Iehova e kia ‘piri atu te tangata ki tana vaine; e ka riro oki raua ei kopapa okotai.’ I muri mai kua ripiti akaou a Iesu Karaiti i taua tuatua ra e kua kapiti atura aia e: “E ta te Atua i topiri ra, auraka te tangata e akataka ke atu.” Kua akakite akaou atura a Iesu e: “Tei kopae i tana vaine, auraka ra no te akaturi, ka akaipoipo ei i tetai, kua akaturi ïa: e ko tei akaipoipo i taua vaine i kopaeia ra, kua akaturi ïa.” (Gene. 2:24; Mata. 19:3-6, 9) No reira, te manako maira a Iehova e Iesu i te akaipoipoanga ei pirianga no te oraanga katoa te ka ope ua me mate tetai tokorua. (1 Kori. 7:39) I te mea e e akanoonooanga tapu te akaipoipoanga, auraka rava te kopae tokorua kia akariroia ei mea kangakanga ua. Ko te tika, te akakite maira te Tuatua a te Atua e e mea riri na Iehova te kopae tokorua kare e tumuanga Tuatua Tapu. *​—E tatau ia Malaki 2:13-16; 3:6.

Tu Tau i Roto i te Akaipoipoanga

4. No teaa ra tetai au Kerititiano mapu ou e tataraapa ai no tei rapurapu ua ratou i te akaipoipo?

⁴ Pou ua te manako o teia ao akono kore i te Atua ki runga i te ainga. Te au ra katoatoa, e maata ua atu ta tatou au tutu no te au mea navenave o te kopapa ka kite. Kare e rauka ia tatou i te kopae i te kino ta te reira ka akatupu ki runga ia tatou, ki runga tikai i ta tatou au mapu ou akaperepereia i roto i te putuputuanga. Akapeea ra oki te au Kerititiano mapu ou i te patoi atu anga i teia tu akakeuanga tau kore, te ka riro ei akatupu mai i te anoano no te ainga noatu me tauta ratou i te akakore atu i te reira? Tetai papaki kua timata ratou i te kimi ravenga no te reira na te akaipoipo tamariki ua anga. Na roto i taua tu ra, kua manako ratou e kare i reira ratou e o atu ki roto i te ainga tau kore. Kare ra oki i roaia, e maata ua atu tei tataraapa i taua ikianga ra. No teaa ra? Me kore ana te reka o te oraanga akaipoipo ou ua, e kite ei ratou i reira e kare ua rai to ratou tu e te aerenga manako e aiteite ana ki to ratou tokorua no runga i te au mea o te oraanga i te au ra ravarai. Te marama meitakiia atura e, te aro atura taua nga tokorua ra i tetai aka manamanata.

5. Eaa te ka tauturu i te au tokorua kia vai tiratiratu ua ki ta ratou tia akaipoipoanga? (Akara katoa i te tataanga i raro ake.)

⁵ Ko te akaipoipo ki tetai tangata​—noatu e oa Kerititiano—​tei tuke takiri mei taau i tapapa atu, e mea papu roa e ka riro ei mea ngata. (1 Kori. 7:28) Inara, noatu eaa te ngata o taua turanga ra, kua kite meitaki te au Kerititiano mou e ko te kopae tokorua tei kore i akatumuia ki runga i te tuatua tapu, kare te reira i te ravenga tau no te au manamanata e piri atura ki tetai akaipoipoanga mataora kore. No reira, ko te aronga e angaanga pakari ra i te tauta anga kia vai meitaki rai to ratou akaipoipoanga no te mea te inangaro ra ratou kia vai tiratiratu ua ki ta ratou tia akaipoipoanga, kua tau ratou i te akangateiteianga e te tauturu aroa a te putuputuanga Kerititiano. *

6. Eaa tikai to te au Kerititiano mapu manako no runga i te manakonakoanga o te akaipoipoanga?

⁶ E mapu ainei koe e kare rai i akaipoipo ake? Me koia ia, eaa tikai toou manako no runga i te manakonakoanga o te akaipoipoanga? Ka rauka ia koe i te kopae i te mamae ngakau me tiaki koe kia papa meitaki tikai koe no te akaipoipo i te pae kopapa, pae manako, e te pae vaerua, i mua ake ka akamata ai koe i tetai pirianga akainangaro ki tetai tamaine me kore tamaiti Kerititiano. E tika rai, e  kare te au Tuatua Tapu i akakite mai ana i te mataiti no te akaipoipo. * Inara, te akaari maira te Pipiria e e mea meitaki atu kia tiaki koe e kia pou taua tuatau ra o te oraanga te pakari tikai ra te au manako no te ainga. (1 Kori. 7:36) No teaa ra? No te mea ka riro te au anoano pakari no te ainga i te tarurike i te aerenga manako meitaki e te akakeu ia koe kia rave i tetai au ikianga tau kore penei te ka taopenga mai ki te mamae ngakau a muri ake. E akamaara, e ko ta Iehova akoanga pakari i roto i te Pipiria no runga i te akaipoipoanga, no toou uaorai puapinga e te mataora.​—E tatau ia Isaia 48:17, 18.

Riro Anga ei Metua Tau

7. Eaa ta tetai au tokorua mapu ou e kite ana, e eaa teia ka riro ei ei taomianga ki runga i te akaipoipoanga?

⁷ Tetai au tokorua tei akaipoipo mapu ua kua nui mai tetai pepe ia ratou e mapu tamariki ua ra. Kare tikai i rava ana tetai taime no ratou kia kite meitaki i tetai e tetai i mua ake ka anau mai ei te pepe, te ka anoanoia e 24 ora i te akono anga. Me pou ua te taime o te mama ki runga i te pepe anau ou e e mea natura uaia i te tupu, penei ka manako vareae te tane. Tetai, me kare nga metua e moe meitaki i te po ka tupu te taumaro e te manamanata te ka riro ei akatupu i te taomianga ki runga i te pirianga o te nga tokorua. Kite poitirere ua ake raua kare o raua tuatau va akaou. Teianei kare e rauka ia raua i te aere ki tetai au ngai e te rave i te au mea mei ta raua i matau i mua ana. Eaa ra oki to raua manako no runga i to raua turanga tuke?

8. Kia akamanakoia te riro anga ei metua mei teaa rai, e no teaa ra?

⁸ Mei te akaipoipoanga rai tei tau kia raveia na roto i te tu tau, e mea tau rai kia manakoia te riro anga ei metua ei apainga e ei tikaanga ngateitei no ko mai i te Atua. Noatu eaa te au akatikatikaanga ta te anau anga mai o tetai pepe ka akatupu i roto i te oraanga o nga tokorua Kerititiano, e mea tau kia tauta raua i te kimi ravenga no te reira na roto i te tu tau. I te mea kua oronga mai a Iehova i te tareni ki te tangata kia anau tamariki, ka anoanoia te au metua kia akamanako e ko te pepe anau ou e “tuanga ïa no ko ia Iehova ra.” (Sala. 127:3) Ka tauta pakari ua rai tetai metua vaine e te metua tane Kerititiano i te rave i ta raua au tuanga angaanga ei “au metua i tei tau i te Atu [Iehova] ra.”​—Ephe. 6:1.​

9. (a) Eaa te o maira ki roto i te utuutuanga i tetai tamaiti? (e) Eaa te ka rauka i te tane kia rave i te tauturu atu i tana vaine kia vai maroiroi ua i te pae vaerua?

⁹ I te utuutu anga i tetai tamaiti, e maata te au mataiti akaatinga anga e o maira. E maata ua atu te taime e te maroiroi ka pou. Ka anoanoia tetai tane Kerititiano kia marama e no tetai au mataiti i muri ake i te anau mai anga te pepe, ka tamanamanataia tana vaine i te taime o te au uipaanga e penei e iti ua rai tona au taime i te rave i tetai apii Pipiria nana uaorai e i te manakonako oonu atu no runga i te reira. Ka riro teia ei akaparuparu i tona turanga pae vaerua. Te riro anga ei metua te umuumuia ra te tane kia rave i te au mea tau pouroa ka rauka iaia i te tauturu atu i te akono i te tamaiti. Ka rauka iaia i te akarava atu i te au mea kare tana vaine i kite i ko i te au uipaanga na te uriuri anga kiaia i tetai au manako i roto i te porokaramu me tae ki te kainga. Penei kia tauturu katoa atu aia i te akono i te pepe  kia rava te taime no tana vaine i te piri maroiroi atu ki roto i te tutu anga i te Patireia.​—E tatau ia Philipi 2:3, 4.

10, 11. (a) Akapeea te au tamariki i te utuutuia anga mai i roto i te “ako a te Atu [Iehova] ra”? (e) Eaa i tau ei kia akameitakiia te au metua Kerititiano e manganui?

¹⁰ E maata roa atu te o maira ki te tu tau o te riro anga ei metua, i to te oronga ua anga i te kai, te kakau, te ngai nooanga, e te akono anga i te oraanga. I roto tikai i teia tuatau openga kino, ka anoanoia te au mapu ou kia kite mei te tamarikianga mai i te au kaveinga tau ka anoanoia ratou kia akono i te oraanga. E mea tau kia utuutuia mai te tamariki e kia “apii ra ia ratou kia pakari ma te ako a te Atu [Iehova] ra.” (Ephe. 6:4) Ko teia “ako” te o maira te tuku anga i to Iehova au manako ki roto i te manako o te tamaiti mei te varevareanga mai e tae roa atu ki te au mataiti puapinga tikai o te mapuanga mai.​—2 Timo. 3:14, 15.

¹¹ I te akakite anga a Iesu ki tana au pipi e kia aere ratou e “akariro i to te pa enua katoa ei pipi,” te papu ua ra te aiteanga o tana tuatua e kia tauturu te au metua i ta ratou tamariki kia riro mai ei au pipi. (Mata. 28:19, 20) E ngata tikai tera no te mea e maata te au taomianga ta teia ao e tuku nei ki runga i te au mapu ou. No reira, ko te au metua tei puapinga i te ngaki anga i ta ratou tamariki kia riro mai ei au Kerititiano akatapuia, kua tau tikai kia rauka te akameitakianga pumaana a te katoatoa rava i roto i te putuputuanga. Kua “vi” ia ratou te akakeuanga ririnui a teia ao na roto i to ratou akarongo e to ratou tu tiratiratu ei au metua tau tikai.​—1 Ioa. 5:4.

Akaipoipo Kore me Kare Tamariki Kore no Tetai Akakoroanga Ngateitei

12. Eaa ra tetai au Kerititiano i iki ei kia noo ua kare e akaipoipo no tetai tuatau?

¹² I te mea e “te poto nei te tuatau” e te “ngaro ke nei oki te tu o teianei ao,” te raurau maira te Tuatua a te Atua ia tatou kia akamanako i te puapinga o te noo ua kare e akaipoipo. (1 Kori. 7:29-31) No reira, kua iki tetai au Kerititiano kia noo ua kare e akaipoipo no te oraanga katoa me kore kua iki ratou kia noo ua kare e akaipoipo no tetai au mataiti ua i mua ake ka akaipoipo ei. E mea meitaki tikai e, kare ratou i akapou i to ratou tuatau va i te noo ua anga kare e akaipoipo ki te akatupu anga i to ratou uaorai au anoano. E maata ua atu tei noo ua kare i akaipoipo kia rauka ia ratou i te tavini ia Iehova “ma te iroirongata kore.” (E tatau ia 1 Korinetia 7:32-35.) Tetai au Kerititiano noo ua kare i akaipoipo te tavini nei ei au painia me kore ei au mema no te Betela. E maata te umuumu ra kia rauka i te akamaata atu i ta ratou ka rave i roto i to Iehova akaaerenga na te tauta anga kia tau no te aere ki te Apii Terenianga Orometua. No reira, ko te aronga tei tavini ana ei au orometua tamou no tetai tuatau ia ratou e noo ua ra kare e akaipoipo e oti kua iki kia akaipoipo, putuputu ratou i te karanga e te puapingaia nei rai to ratou akaipoipoanga mei te au apiianga puapinga ta ratou i mou mai i taua au mataiti mua ra.

13. No teaa tetai au tokorua i iki ei eiaa e anau tamariki?

¹³ I roto i tetai au tuanga o teianei ao, kua tupu akaou mai tetai au tauianga i roto i te oraanga pamiri​—e maata ua atu te au tokorua tei iki kia noo tamariki kore ua. Te tumu i akapera ai tetai papaki no te turanga pae moni; e tetai pae no te mea kua inangaro  ratou kia va ratou i te aruaru i tetai ngai angaanga puapinga. Te vai katoa ra i rotopu i te au Kerititiano tetai au tokorua tei iki eiaa e anau tamariki. Inara e akapera ana ratou kia va atu te tuatau no te tavini ia Iehova. Kare ra mei te mea e kare taua au tokorua ra e mataora ana i te oraanga akaipoipo tei matauia. Te mataora nei ratou. Noatu ra, te tuku puareinga ua nei ratou i te au anoano o te Patireia ei runga atu i tetai au akameitakianga e kapitiia maira ki te akaipoipoanga. (1 Kori. 7:3-5) Tetai papaki o taua au taeake ra te tavini nei ratou ia Iehova e to ratou au taeake i roto i te angaanga kotinga e te angaanga tapere me kore i ko i te Betela. Tetai pae te tavini nei ratou ei au painia me kore ei au mitinari. Kare roa a Iehova e akangaropoina i ta ratou angaanga e te inangaro ta ratou i akaari no tona ingoa.​—Ebe. 6:10.

‘Pekapeka o te Kopapa Nei’

14, 15. Eaa te ‘pekapeka o te kopapa nei’ ta te nga metua Kerititiano ka kite?

¹⁴ Kua akakite te apotetoro ko Paulo ki te au Kerititiano akaipoipo e ka kite ratou i te ‘pekapeka o te kopapa nei.’ (1 Kori. 7:28) Penei ka kapiti mai teia i te au manamanata no te oraanga kopapa no nga tokorua, ta raua tamariki, me kore to raua nga metua e pakari atura. Penei ka kapiti katoa mai te reira i te au tu ngata e te mamae ngakau i te utuutu mai anga i ta raua tamariki. Mei tei taikuia mai i te akamataanga o teia atikara, kua totou te Pipiria e ka apai mai “te au ra openga ra” i te “au tuatau kikino tei ngata roa no te akono.” I rotopu i te au apinga ngata roa no te akono koia oki ko te au tamariki “akarongo kore ki te au metua.”​—2 Timo. 3:1-3, NW.

¹⁵ Ko te utuutu anga i te tamariki e akaaoanga puapinga tikai te reira no te au metua Kerititiano. Kare tatou i paruruia mei te au tu kino o teia “au tuatau kikino.” No reira, e tamakianga motu kore tikai ta te au metua Kerititiano ki te akakeuanga kino “ta to teianei ao” ka akatupu ki runga i ta ratou tamariki. (Ephe. 2:2, 3) E kare e rauka ua ana te re i teia mea e tamakianga! Me akamutu ake tetai tamaiti me kore tamaine a tetai pamiri Kerititiano i te tavini ia Iehova, kare e aiteia te aka “pekapeka” no nga metua tei tauta i te utuutu mai i te tamaiti me kore i te tamaine i roto i te tuatua mou a te Atua.​—Mase. 17:25.

“E Tupu ei te Tumatetenga Maata”

16. Eaa te “tumatetenga” ta Iesu i totou mai?

¹⁶ Tetai ua atu “tumatetenga” e piri atura ki te akanoonooanga o te akaipoipoanga e te anau tamariki, ka takoreia te reira e tetai tumatetenga ke mai tei maata rava atu tona kino. I roto i tana totou no runga i tona parutia e te akaopengaanga o te akatereanga o te au mea nei, kua akakite a Iesu e: “E tupu ei te tumatetenga maata tei kare i tupu ana mei te akamataanga o teianei ao e tae ua mai ki teianei, kare, e kare rava e tupu akaou.” (Mata. 24:3, 21, NW) I muri mai kua akakite a Iesu e e urupu maata tetai ka ora mai mei roto i teia “tumatetenga maata.” Inara, ka tamaki ua atu rai te akatereanga a Satani e mate ua atu te reira i roto i te tamakianga openga ki runga i to Iehova Au Kite akamoeau. Kare rava e ekoko e, ka riro te reira ei tuatau ngata tikai no tatou katoatoa​—te aronga mamaata e te tamariki atu.

17. (a) No teaa tatou ka aro atu ei i te tuatau ki mua ma te irinakianga papu tikai? (e) Eaa te mea ka tau kia akakeu i to tatou manako no runga i te akaipoipoanga e te riro anga ei metua?

¹⁷ Noatu rai, eiaa tatou e mataku puapinga kore ua no runga i te tuatau ki mua. Te au metua tei vai akarongo mou rai kia Iehova ka rauka ia ratou te manakonakoanga e ka paruruia ratou ma ta ratou tamariki. (E tatau ia Isaia 26:20, 21; Zepha. 2:2, 3; 1 Kori. 7:14) No teia taime ra, kia riro te kite no runga i te au tuatau kino ta tatou e noo nei ei akakeu i to tatou aerenga manako no runga i te akaipoipoanga e te riro anga ei metua i teia tuatau openga. (2 Pete. 3:10-13) Na roto i taua tu ra, ko to tatou oraanga​—noatu e kare i akaipoipo e me kua akaipoipo, e tamariki tetai e me kare​—ka apai mai te reira i te akangateitei e te akapaapaa kia Iehova e ki te putuputuanga Kerititiano.

[Au Tataanga Rikiriki i Raro]

Na te Akamanako Akaou Anga

• No teaa ra te au Kerititiano mapu ou ka tau ei eiaa e rapurapu i te akaipoipo?

• Eaa te o maira ki te utuutu anga i tetai tamaiti?

• No teaa te manganui ua atu o te au Kerititiano i noo ua ai kare i akaipoipo me kore me kua akaipoipo, i noo tamariki kore ei?

• Eaa te “tumatetenga” penei ta te au metua Kerititiano ka kite?

[Au Uianga Apii]

[Tutu i te kapi 17]

Eaa i riro ei ei tu pakari no te au Kerititiano mapu ou kia tiaki marie e oti ka akaipoipo ei?

[Tutu i te kapi 18]

E maata te ka rauka i te tane kia rave i te tauturu i tana vaine kia piri maroiroi atu ki roto i te au angaanga pae vaerua

[Tutu i te kapi 19]

No teaa tetai au tokorua Kerititiano i iki ei eiaa e anau tamariki?