E Aru i ta te Atua Aratakianga i Roto i te Au Mea Ravarai

“Ko te Atua nei rai oki to tatou Atua e tuatau e tuatau ua atu: e arataki rai oki aia ia tatou e mate ua atu.”​—SALA. 48:14.

1, 2. Eaa ra tatou ka aru ei i ta Iehova aratakianga e kare e irinaki ua ki runga i to tatou uaorai pakari, e eaa te au uianga tei tupu mai?

ME AKAMANAKO tatou i te mea puapinga kore me kare i te au mea kino, ngoie ua i te reira i te akavare ia tatou uaorai. (Mase. 12:11) Me te inangaro tikai ra tatou i te rave i tetai apinga kare e tau ana ki tetai Kerititiano, e maata te taime ka rauka i to tatou ngakau i te akatupu mai i te au tumu akakeuanga kia rave i te reira. (Iere. 17:5, 9) No reira, kua akaari mai te tata taramo i te pakari i tona pureanga kia Iehova e: “E akakite ua mai i to mārama e te tuatua-mou; e na te reira e arataki iaku nei.” (Sala. 43:3) Kua irinaki aia kia Iehova, kare ki runga i tona uaorai pakari tei kotingaia, e kare e ngai ke atu kia akara atu aia i te tumu no te aratakianga. Mei te tata taramo rai, e meitaki kia akara tatou ki te Atua no te aratakianga.

² Eaa ra tatou ka irinaki ei ki ta Iehova aratakianga i runga rava atu i te au mea ravarai? Aea tatou e kimi ei i te reira? Eaa te au tu ta tatou ka tatanu kia puapingaia e te reira, e akapeea a Iehova i te aratakianga ia tatou i teia tuatau? Ka uriuri manakoia teia au uianga puapinga i roto i teia atikara.

Eaa ka Irinaki ei ki ta Iehova Aratakianga?

3-5. Eaa te au tumu ka irinaki tikai ei tatou ki ta Iehova aratakianga?

³ Ko Iehova to tatou Metua i te rangi. (1 Kori. 8:6) Kua kite taka meitaki aia ia tatou tataki tai e  ka rauka i te tatau i to tatou ngakau tikai. (1 Samu. 16:7; Mase. 21:2) Kua karanga te Ariki ko Davida ki te Atua e: “Kua kite koe i toku noo anga ki raro, e toku tu anga ki runga; kua kite koe i toku nei manako i te atea ke. Kare rava oki e tuatua o roto i toku vaa, i toe i te kitea puia e koe, e Iehova.” (Sala. 139:2, 4) I te mea e te kite meitaki ra a Iehova ia tatou, eaa tatou ka ekoko ei e kua kite aia eaa te mea meitaki no tatou? Pera katoa, e pakari mou tikai a Iehova. Te kite ra aia i te au mea ravarai, oonu atu tana akaraanga i ta tetai tangata, e te kite ra e eaa te ka tupu mai no te au mea mei muatangana mai. (Isa. 46:9-11; Roma 11:33) E “Atua pakari anake ra” aia.​—Roma 16:27.

⁴ Pera katoa, te aroa maira a Iehova ia tatou e te inangaro ra i tei meitaki no tatou. (Ioa. 3:16; 1 Ioa. 4:8) Ei Atua aroa, e meitaki aia kia tatou. Kua tata te pipi ko Iakobo e: “Te au mea memeitaki i o maiia ra, e te au mea tika ravarai, no runga ïa, no runga mai i te Metua o te au mārama ra.” (Iako. 1:17) Te aronga te tuku ra ia ratou uaorai kia aratakiia e te Atua ka puapinga maataia mei tona tu meitaki.

⁵ I te openga ra, ko Iehova te mana katoatoa. I roto i teia tu, kua tuatua te tata taramo e: “Ko tei noo i raro ake i te tapoki o Tei Teitei ra, ka moe aia i raro ake i te Mana katoatoa ra. Te tuatua nei au kia Iehova, Ko koe toku akapuanga, e toku pinanga; taku Atua, e taku i irinaki nei.” (Sala. 91:1, 2) Me aru tatou i ta Iehova aratakianga, te kimi ra tatou i te akapuanga ma te Atua, no te mea kare aia e poka ana. Noatu e ka aro atu tatou i te patoianga, na Iehova e turu mai ia tatou. Kare rava aia e akangaropoina ia tatou. (Sala. 71:4, 5; E tatau ia Maseli 3:19-26.) Ae, kua kite a Iehova e eaa te mea meitaki no tatou, te inangaro ra i te mea meitaki no tatou, e tei iaia te mana kia oronga mai i te mea meitaki no tatou. E mea neneva me ka kopae tatou i tana aratakianga! Aea tatou e anoano ei i taua aratakianga ra?

Aea Tatou e Anoano ei i te Aratakianga?

6, 7. Aea tatou e anoano ei i ta Iehova aratakianga?

⁶ Te anoano tikai ra tatou i ta te Atua aratakianga i roto i to tatou oraanga, mei te mapu anga mai ki te ruaine anga. Kua tuatua te tata taramo e: “Ko te Atua nei rai oki to tatou Atua e tuatau e tuatau ua atu: e arataki rai oki aia ia tatou e mate ua atu.” (Sala. 48:14) Mei te tata taramo rai, kare rava te au Kerititiano pakari e akamutu i te akara ki te Atua no te aratakianga.

⁷ Te vai katoa ra tetai au taime e, te inangaro rapurapu ra tatou i te tauturu. I tetai au taime ka kite mai tatou ia tatou uaorai i roto i te “tumatetenga,” penei te aro atu anga i te takinga kino, i tetai maki kino pakari, me kore kare e angaanga moni. (Sala. 69:16, 17) I taua taime ra, e mea pumaana tikai i te anga atu kia Iehova, i te irinaki anga e ka akaketaketa mai aia ia tatou kia akakoromaki, e kia arataki ia tatou kia rave i te au ikianga meitaki. (E tatau ia Salamo 102:17.) Inara, te anoano katoa ra tatou i tana tauturu i tetai au atianga. Ei akaraanga, me aere atu tatou i te tuatua ki to tatou au tangata tupu no runga i te tuatua meitaki o te Patireia, te anoano ra tatou i ta Iehova aratakianga kia puapingaia ta tatou akakitekite  anga. E me ka rave tatou i tetai ikianga​—me no runga i te tarekarekaanga, te kakauanga e te akamaneaanga, te kapitianga, te angaanga, te apiianga, me kore i tetai ua atu apinga​—ka manuia tatou me aru ua tatou i te au kaveinga a Iehova. Ko te tika, kare e ope ana te au turanga te anoano ra tatou i te aratakianga.

Te Au Kino no te Kore Anga e Aru i ta te Atua Aratakianga

8. Eaa te akakiteia maira i to Eva kai anga i te ua rakau tei tureia?

⁸ Inara, kia akamaara ra e kia aru puareinga ua tatou i ta Iehova aratakianga. Kare te Atua e maro mai ia tatou kia rave i te reira me kare tatou e inangaro i te rave i te reira. Te tangata mua kare i iki ana i te aru i ta Iehova aratakianga, ko Eva, e te akaari maira tona akaraanga e mei teaa tikai te kino o taua ikianga ra. E akamanako katoa ana eaa tana i rave e akakite maira. Kua kai a Eva i te ua rakau tei tureia no te mea kua inangaro aia kia ‘riro mai mei te Atua ra te tu, i te kite i te meitaki e te kino.’ (Gene. 3:5) I te rave anga i te reira, te akaari maira e kua tuku aia iaia uaorai ki runga i te ngai o te Atua, i te rave anga i tana uaorai au ikianga no te meitaki e te kino, kare i aru ana i te au kaveinga a Iehova. No reira, kua kopae aia i to Iehova tu ngateitei. Kua inangaro aia e koia uaorai tona pu. Kua aru rai tana tane, ko Adamu, i taua aerenga meameaau ra.​—Roma 5:12.

9. Me kopae tatou i ta Iehova aratakianga, eaa tikai i reira ta tatou e rave ra, e eaa ra teia kare ei e tau ana?

⁹ I teia tuatau, me kare tatou e aru i ta Iehova aratakianga, kare katoa tatou e ariki ana i tona tu ngateitei. E akamanako ana, ei akaraanga, i tetai tangata tei akarakara matau ua ana i te au angaanga ainga viivii. Me te kapiti maira aia ki te putuputuanga Kerititiano, kua kite aia i ta Iehova au kaveinga no runga i teia tumu manako. Auraka rava te au mea viivii e taikuia mai, eiaa katoa rai kia akara navenaveia atu. (Ephe. 5:3) Na te kopae anga i ta Iehova au kaveinga, te akakore ra taua tangata ra i to Iehova tu ngateitei, te kopae anga i Tona taoonga upoko. (1 Kori. 11:3) E mea tau kore tikai te reira, no te mea, mei ta Ieremia e tuatua maira e, “kare tei te tangata e aere nei, i te akono i tona uaorai takainga tapuae.”​—Iere. 10:23.

10. Eaa ra tatou ka akaari ei i tetai tu tau na roto i te tu e taangaanga ra tatou i to tatou tu rangatira?

¹⁰ Penei te ekoko ra etai pae i ta Ieremia au tuatua, i te manako anga e mei te mea e kua oronga mai a Iehova i te tu rangatira kia tatou, kare rava aia e akaapa mai ia tatou i te taangaanga anga i te reira. Noatu rai, auraka e akangaropoina e kua riro te tu rangatira ei apainga pera katoa ei apinga oronga ua. Tei runga ia tatou te apainga no te au mea ta tatou e tuatua ana e e rave ana. (Roma 14:10) Kua tuatua a Iesu e: “Ki oki o te ngakau ra e tuatuaʼi te vaa.” Kua tuatua katoa aia e: “No roto mai oki i te ngakau te manako kikino, te ta tangata, te moeaana, te akaturi, te keia, te tapepe pikikaa, e te akakino Atua.” (Mata. 12:34; 15:19) No reira, te akaari maira ta tatou au tuatua e te au angaanga i te turanga o to tatou ngakau. Te akaari maira te reira e eaa tikai to tatou tu. No reira tetai Kerititiano pakari ka kimi ei i ta Iehova aratakianga no te au mea ravarai. Na roto i taua tu ra, ka kite mai a Iehova iaia e e ‘tiratiratu tona ngakau’ e ka “takinga-meitaki” iaia.​—Sala. 125:4.

11. Eaa ta tatou ka kite mai mei te papaanga tuatua enua o Iseraela?

¹¹ E akamaara ana i te papaanga tuatua enua o Iseraela. Te rave anga te iti tangata i te au ikianga meitaki, i te akarongo anga ki te au akauenga a Iehova, kua paruru a Iehova ia ratou. (Iosu. 24:15, 21, 31) Inara, e maata te taime kua taangaanga tau kore ratou i to ratou tu rangatira. I to Ieremia tuatau, kua tuatua a Iehova no runga ia ratou e: “Kare ra ratou i akarongo mai, kare oki i anga mai i to ratou taringa, kua aere ra ratou i te tuatua, e te manako o to ratou uaorai ngakau kino, e kua kotoe atura ki muri, e kare i aere ki mua.” (Iere. 7:24-26) E mea mii tikai! Auraka rava tatou, no te tu marokiakia me kore no te manako  i to tatou uaorai anoano, e kopae i ta Iehova aratakianga e e aere kia tau i ta tatou uaorai au tuatua e no reira kua “kotoe atura ki muri, e kare i aere ki mua”!

Eaa te Umuumuia ra kia Aru i ta te Atua Akoanga?

12, 13. (a) Eaa te tu te akariro ra ia tatou kia inangaro i te aru i ta Iehova aratakianga? (e) Eaa ra te akarongo i puapinga ai?

¹² Na to tatou inangaro ia Iehova e akakeu ia tatou kia aru i tana aratakianga. (1 Ioa. 5:3) Inara, te tou maira a Paulo ki tetai apinga ke atu ta tatou e anoano ra i te tuatua anga aia e: “E aerenga akarongo oki to matou, kare i te aerenga kite mata.” (2 Kori. 5​:6, 7) Eaa i puapinga maata ai te akarongo? No te mea, na Iehova e arataki ana ia tatou na te “au ara tuatua-tika,” inara kare taua au arataa ra e arataki ana ki te apinganui me kore ki te turanga teitei i roto i teianei ao. (Sala. 23:3) No taua tumu ra, te anoanoia ra to tatou mata akarongo kia akamou ki runga i te au tutakianga aite koreia i te pae vaerua e aere maira mei te tavini anga ia Iehova. (E tatau ia 2 Korinetia 4:17, 18.) E te tauturu maira te akarongo ia tatou kia ariki mareka ua i te au apinga materia tau ua.​—1 Timo. 6:8.

¹³ Kua akakite mai a Iesu e te o maira i roto i te akamorianga mou te akaatinga uaorai, te umuumu katoaia ra te akarongo. (Luka 9:23, 24) E maata te au atinga ta tetai aronga akamori akarongo mou i rave, te akakoromaki anga i te putaua, te taomianga, te akavaavaa, e te takinga kino pakari katoa. (2 Kori. 11:23-27; Apo. 3:8-10) Na te akarongo ngaueue kore anake ua i tauturu mai ia ratou kia rave i te reira ma te rekareka. (Iako. 1:2, 3) Te akariro ra te akarongo ngaueue kore kia irinaki pu tikai tatou e ko te aru anga i ta Iehova aratakianga ko te mea meitaki ua atu rai ia te reira. E puapinga maata ua atu rai te reira no tatou. Papu tikai ia tatou e ko te tutaki no te aronga tei akakoromaki ma te tiratiratu e maata atu te reira i tetai ua atu mamaeanga poto ua.​—Ebe. 11:6.

14. Akapeea a Hagara i te akaari anga i te tu akaaka?

¹⁴ E akamanako katoa ana, i te tuanga no te tu akaaka i te aru anga i ta Iehova aratakianga. Te akaari maira te akaraanga o Hagara, te tavini vaine o Sara i teia. Te kite anga a Sara e kare aia e anau tamariki, kua oronga aia ia Hagara kia Aberahama, e kua nui mai a Hagara i ta Aberahama tamaiti. E oti, kua akangakau parau a Hagara iaia ki tona pu vaine tamariki kore. Tei tupu mai, kua “tinaimate aturā [Sara] iaia,” e oro ke atura a Hagara. Kua aravei atu tetai angera a Iehova ia Hagara e kua akakite atura kiaia e: “Ka oki ki toou pu vaine ra, ka kauraro marie atu ei koe kiaia.” (Gene. 16:2, 6, 8, 9) Penei te inangaro ra a Hagara i tetai aratakianga ke. Kia akarongo ki ta te angera akauenga, e akaruke aia i tona tu akaparau. Noatu rai, kua rave akaaka a Hagara i ta te angera i tuatua mai, e kua anauia mai tana tamaiti, ko Isemaela, ki roto i te ngai tinamou o te puakapa o tona metua tane.

15. E akamarama mai i tetai au turanga i te aru anga i ta Iehova aratakianga penei te umuumuia maira te tu akaaka mei ia tatou i teia tuatau.

¹⁵ I te aru anga i ta Iehova aratakianga penei te umuumuia ra e kia taakaaka katoa tatou ia tatou uaorai. Penei ka ariki etai pae i te manako e ko tetai tu no te tarekarekaanga ta ratou e reka ra e mea mareka kore ia kia Iehova. Penei kua akariri atu tetai Kerititiano i tetai tangata e te anoanoia ra te tataraara. Me kore kua rave paa aia i tetai tarevake e te anoanoia ra kia akakite atu i te reira. Akapeea me kua rave tetai tangata i tetai ara kino pakari? Te anoanoia ra aia kia taakaaka iaia uaorai e e aaki i te ara ki te aronga pakari. Penei ka  akaatea katoaia taua tangata ra. Kia ariki akaouia mai ki roto i te putuputuanga, e mea tau kia tataraara akaaka aia e kia uri mai. I roto i teia au turanga e te au turanga aiteitei ua, te riro ra te au tuatua a Maseli 29:23 ei akapumaana anga: “E inga te tangata i tona uaorai parau: e akangateiteiia ra te tangata ngakau akaaka.”

Akapeea a Iehova i te Aratakianga ia Tatou?

16, 17. Akapeea tatou e puapinga maata ai mei te Pipiria ei tumu no te aratakianga tu-Atua?

¹⁶ Te tumu maata rava atu no te aratakianga tu-Atua koia oki ko te Pipiria, te Tuatua akauruia a te Atua. (E tatau ia 2 Timoteo 3:16, 17.) Kia maata mai te akameitakianga mei taua Tuatua ra, eiaa tatou e tiaki ua atu e kia tupu mai tetai turanga akaaoanga i mua ake ka kimi atu ei i te au tuatua puapinga i roto i te au Tuatua Tapu. Inara, ka rave tatou i te tatauanga i te Pipiria ei peu matauia i te au ra ravarai. (Sala. 1:1-3) Na roto i taua tu ra, ka kite mai tatou i te au tuatua tei akauruia. Ka riro mai to tatou au manako mei to te Atua rai, e kia papa ua tatou i te aro katoa atu anga i te au manamanata tapapa koreia.

¹⁷ Pera katoa, e puapinga maata i te akamanako oonu i ta tatou e tatau ra i roto i te au Tuatua Tapu e e pure katoa no runga i te reira. Me akamanako tatou i te au irava Pipiria, te akamanako ra tatou e akapeea tatou i te taangaanga i teia turanga taka meitaki tikai. (1 Timo. 4:15) Me aro atu tatou i te au manamanata pakari tikai, e pure tatou kia Iehova, na te patianga i te tauturu i te kimi anga i te aratakianga ta tatou e anoano ra. Na te vaerua o Iehova e tauturu mai ia tatou kia akamaara i te au kaveinga puapinga a te Tuatua Tapu ta tatou i tatau ana i roto i te Pipiria me kore i roto i te au puka tei akatumuia ki runga i te Pipiria.​—E tatau ia Salamo 25:4, 5.

18. Na roto i teea au tu e taangaanga ana a Iehova i te taokotaianga taeake Kerititiano kia arataki ia tatou?

¹⁸ Ko to tatou taokotaianga taeake Kerititiano tetai tumu puapinga akaou i te kimianga i ta Iehova aratakianga. Ko tetai tuanga puapinga maata ki taua taokotaianga taeake ra koia oki ko “te tavini akono meitaki e te pakari” ma tona komono ko te Pupu Akaaere, tei tuku putuputu mai i te aka kai i te pae vaerua na roto i te au apinga neneiia e te au porokaramu no te au uipaanga e te au akaputuputuanga. (Mata. 24:45-47; e akaaite ia Angaanga 15:6, 22-31.) Pera katoa, i roto rai i te taokotaianga taeake Kerititiano ra ko te au tangata pakari tataki tai i te pae vaerua, ko te aronga pakari tikai, tei tau kia oronga ratou tataki tai i te tauturu e te akoanga Tuatua Tapu. (Isa. 32:1) E tumuanga puapinga katoa te aronga mapu ou i roto i te au ngutuare Kerititiano. E ravenga akamanaia mai e te Atua to ratou au metua irinaki tei akamaroiroi uaia rai ratou kia akara atu kia ratou no te aratakianga.​—Ephe. 6:1-3.

19. Eaa te au akameitakianga ta tatou e reka ra no te kimi ua atu anga i ta Iehova aratakianga?

¹⁹ Ae, na roto i tetai au mataara, te oronga maira a Iehova i te aratakianga, e e meitaki no tatou kia taangaanga pu tikai i te reira. I te tuatua anga no runga i tetai tuatau kua vai akarongo mou ana te iti tangata o Iseraela, kua tuatua te Ariki ko Davida e: “I irinaki ana to matou ai metua ia koe; kua irinaki ratou, e kua akaoraia ratou e koe. Kua kapiki ratou ia koe, e kua akaoraia; i irinaki ana ia koe, e kare i akama.” (Sala. 22:3-5) Me aru tatou i ta Iehova aratakianga ma te irinaki, ‘kare katoa tatou e akama.’ Kare tatou e mareka kore i roto i to tatou manakonakoanga. Me ‘uri atu tatou i to tatou aerenga ki runga ia Iehova,’ kare e irinaki ua ki runga i to tatou uaorai pakari, e au akameitakianga maata te ka tupu mai i teianei. (Sala. 37:5) E me akakoromaki tiratiratu tatou i roto i taua aerenga ra, ka riro mai taua au akameitakianga ei tupuanga mutu kore. Kua tata te Ariki ko Davida e: “E mea inangaro oki na Iehova te tuatua-tau, kare oki aia e akaruke i tona aronga tapu ra. E vai rai ratou e tuatau ua atu . . . Ka riro te enua no te aronga tuatua-tika, ka noo tamou rai ratou i reira.”​—Sala. 37:28, 29.

Ka Rauka Ainei ia Koe te Akataka?

• Eaa ra tatou ka irinaki ei ki ta Iehova aratakianga?

• Eaa te akakite maira me kopae tatou i ta Iehova aratakianga?

• Eaa etai au turanga te anoanoia ra tetai Kerititiano kia taakaaka?

• Akapeea a Iehova i te aratakianga ia tatou i teia tuatau?

[Au Uianga Apii]

[Au Tutu i te kapi 8]

Te akara ra ainei koe kia Iehova i roto i te au tu ravarai o toou oraanga?

[Tutu i te kapi 9]

Kua anga ke a Eva mei to Iehova tu ngateitei

[Tutu i te kapi 10]

Eaa te tu ta Hagara e anoano ra me ka aru aia i te akauenga a te angera?