Takake Kare ra i Akangaropoinaia

KUA ako te apotetoro ko Paulo i te au taeake Kerititiano e: “E takinga-meitaki tatou i te tangata ravarai, kia maata atura ki to te ngutuare o te akarongo ra.” (Gala. 6:10) Teia tuatau, ka aru tatou i te aratakianga akauruia e ka kimi i te au mataara no te rave i te meitaki ki to tatou au oa irinaki. I roto i te aronga tei anoanoia e tei tau meitaki i te akamanako anga aroa a te putuputuanga Kerititiano koia oki to tatou au tungane e te au tuaine ruaine e noo ra i roto i te au ngai akono anga i te ruaine.

Tika rai, e i roto i tetai au enua, e mea matauia no te au pamiri kia akono i te au metua ruaine i te kainga ua. Kareka ra, i tetai au enua ke, e maata te taime e noo ana te aronga ruaine ki roto i te au ngai akono anga i te ruaine te ngai ka akonoia ratou. Peea i reira te au Kerititiano ruaine e noo ana i roto i te au ngai akono anga i te ruaine? Eaa te au akaaoanga ta ratou e kite ana? Ka akapeea ra ratou me kare o ratou tauturu mei te au mema o te pamiri? Ka akapeea te putuputuanga Kerititiano i te tauturu anga ia ratou? E ka na roto i teea au mataara e puapinga ai tatou i te atoro putuputu atu ia ratou?

Au Akaaoanga e Aroia Ana i Roto i te Au Ngai Akono Anga i te Ruaine

Me neke te au Kerititiano ruaine ki roto i tetai ngai akono anga i te ruaine, penei ka taopenga mai ratou ki te ngai o tetai putuputuanga ke kare ratou i matau. Te ka tupu, penei kare te Au Kite o reira e manako mai i te atoro putuputu atu ia ratou. Tetai katoa, i roto i te ngai akono anga i te ruaine, kare e kore te au tangata e noo ra i reira e e tuke rai to ratou au irinakianga. Penei ka riro te reira ei tuku i to tatou au taeake Kite ruaine ki roto i tetai turanga ngata.

 Ei akatauanga, i tetai au ngai, e akanoonoo ana te au ngai akono anga i te ruaine kia raveia tetai au angaanga akonoanga i reira. Kua akakite tetai neti i reira e: “Kua apaiia ana tetai Au Kite ruaine kare e rauka i te komunikeiti meitaki mai, na runga i te pereo ki te pure ma te kore i uiia ana to ratou manako.” Tetai, e kapiti putuputu mai ana te aronga angaanga o te au ngai akono anga i te ruaine i te au ra anauanga, te Kiritimiti, me kore i te Easter ei taui aere i te angaanga matauia a te aronga e noo ra i reira. Tetai Au Kite i roto i te au ngai akono anga i te ruaine, kua oronga katoaia ana tetai au kai kare roa e tika i to ratou akava ngakau kia kai ratou. (Anga. 15:29) Me atoro putuputu tatou i to tatou au taeake e te au tuaine ruaine, ka rauka i reira ia tatou i te tauturu ia ratou i te akono atu i teia au akaaoanga.

Turuturuanga mei te Putuputuanga

E akamanako ua ana rai te au Kerititiano muatangana i ta ratou apainga ki te aronga ruaine me kare o ratou pamiri i te turuturu ia ratou. (1 Timo. 5:9) Mei te reira katoa, te au akaaere kia akamanako ua rai i te akapapu e auraka te aronga ruaine e noo ra i roto i te ngai akono anga i te ruaine kia kopaeia. * Kua akakite a Robert, tetai tangata pakari, e: “E mea meitaki kia aere te au akaaere Kerititiano uaorai kia atoro i te aronga ruaine kia kite tikai i to ratou au turanga e noo ra e kia pure kapiti ratou. E maata ua atu te ka rauka i te putuputuanga kia rave i te akono atu i to ratou au anoano.” Me akataka tatou i tetai taime kia atoro atu i te aronga ruaine, te akaari ra tatou e kua marama tatou e e mea puapinga tikai i roto i te mata o Iehova kia akono i te aronga matiroeroe.​—Iako. 1:27.

 I te tuatau ka anoanoia, kia akanoo puareinga ua te aronga pakari i te tauturu no to tatou au taeake e te au tuaine i roto i te ngai akono anga i te ruaine i te reira ngai. Kua akakite a Robert e penei ko tetai e anoanoia ra koia oki, “Kia akamaroiroi tatou i te au taeake e te au tuaine ruaine kia tae mai ki te au uipaanga Kerititiano me ka rauka ia ratou.” Inara, no te aronga kare e rauka akaou i te aere ki te Are Uipaanga Patireia, kia rave te aronga pakari i tetai atu au akanoonooanga ke. Ko Jacqueline, e 80 tuma ona mataiti e kua tuia e te maki osteoarthritis, e akarongorongo ana aia i te au uipaanga na roto i te terepaoni. Kua karanga aia e: “E meitaki maata tera noku kia akarongo i te au uipaanga i te taime tikai e raveia ra te reira. Kare roa au e inangaro kia kore au e akarongo ki te au uipaanga noatu eaa te tu!”

Me kare e rauka i tetai Kerititiano ruaine kia akarongo ki te au uipaanga na roto i te terepaoni, e akapapa te aronga pakari kia rekotiia te au uipaanga. Te tangata nana e kave i te au mea i rekotiia ki te taeake me kore te tuaine i roto i te ngai akono anga i te ruaine ka rauka iaia kia taangaanga i taua tuatau ra i te pukapuka akamaroiroi atu ki taua taeake ra. “Ka riro te akakite anga ki te au taeake e te au tuaine ruaine i te nuti no runga i te au mema o te putuputuanga ei akapapu kia ratou e e tuanga rai ratou no to tatou pamiri pae vaerua,” i karanga ai tetai akaaere.

Rave Tamou Atu rai i te Komunikeitianga

Te marama uaia atura e, e maata te aronga ruaine e kite ana i te tu taitaia e te manako oripu ua me neke ki roto i te ngai akono anga i te ruaine. Tei tupu mai, kua muteki ua tetai papaki e te akama ua kare e piri mai ki te tangata. Inara, me atoro tatou i to tatou au taeake e te au tuaine ruaine i muri tika ua ake i to ratou neke anga e te akaari kia ratou e te inangaro ra tatou i te akamaroiroi ua rai ia ratou, ka tauturu maata tikai tatou ia ratou i te akaoki akaou mai i to ratou manako ngakau au e te rekareka.​—Mase. 17:22.

Me kua rokoia to tatou au taeake e te au tuaine ruaine e te maki akangaro te manako me kore kare e rongo akaou ana me kore tetai au manamanata ke atu e akangata ra i te komunikeiti mai, penei ka manako tetai aronga e kare e puapinga i te atoro atu ia ratou. Inara, te riro ra ta tatou au tautaanga kia atoro ua rai ia ratou, noatu te ngata i te komunikeiti kia ratou, ei akaari e te rave tamou atu nei rai tatou i te “akangateitei anga” i to tatou au oa irinaki. (Roma 12:10) Me akamata te manako o tetai taeake ruaine i te akangaro, e akamaroiroi atu tatou iaia kia akakite mai i te au mea tei tupu ana kiaia i mua ana​—pera katoa mei tona tamarikianga mai​—me kore kia akakite mai kia tatou e i akapeea aia i kite ei i te tuatua mou o te Pipiria. Eaa ta tatou ka rave me te ngata ra iaia i te tuatua mai i te au tuatua ka tau? E akakoromaki ua me akarongo atu, e me ka tau, e taiku atu e rua me e toru au tuatua e ngata ra iaia i te kimi, me kore e akaoti atu i tona au manako e te akamaroiroi iaia kia tuatua ua mai rai. Me ekoko aia me kore me teetee te tuatua e te ngata ra ia tatou kia marama, penei e tamata kia marama i te aiteanga o tana tuatua na te akarongo meitaki anga ki te tangianga o tona reo.

Me kare rava e rauka akaou i te komunikeiti akaou kiaia, ka rauka ua i te taangaanga atu i tetai au ravenga ke. E atoro putuputu ua ana a Laurence, e painia, ia Madeleine, e tuaine Kerititiano e 80 ona mataiti kare e rauka akaou i te tuatua mai. Kua akamarama mai a Laurence e e akapeea ana aia me komunikeiti mai: “E mou ana au i te rima o Madeleine ia maua e pure kapiti ra. I te taime o te pure, ka roromi maru ua aia i toku rima e ka kamokamo i tona nga mata i te akaari mai i tana akameitakianga no teia au atianga akaperepere maataia.” Ka riro te mouanga i te rima o to tatou au oa ruaine me kore i te takave atu ia ratou ma te ngakau tae ei akapumaanaanga tikai kia ratou.

Mea Puapinga Roa kia Tae Tatou ki Reira

Penei ka riro taau atoro putuputu ua rai i te aronga ruaine ei akameitaki roa atu i te tu e akonoia ra ratou. Kua akakite a Danièle, tei atoro putuputu ua ana i to tatou au oa Kite i te au ngai akono anga i te ruaine no tetai 20 tuma mataiti e, “Me kite te aronga angaanga o tetai ngai akono anga i te ruaine e te atoro putuputuia maira tetai tangata, ka akono meitakiia aia.” Kua akakite a Robert, tei taikuia atu i runga akenei e: “Ka akarongo mai te au neti ki tetai tangata e atoro putuputu atura i te aronga e noo ra i reira. Penei kare ratou e akaari mai i taua tu akangateiteianga rai ki tetai tangata kare e aere putuputu mai ana.” I te mea e e aro putuputu ua ana te au neti i te au pamiri apeape, ka ariki rekareka roa ratou i te au tuatua akameitaki mei te aronga e atoro maira. Tetai katoa, me akatupu tatou i tetai au pirianga meitaki ki te au neti, kare e kore ka akangateitei mai ratou i te au turanga e te au irinakianga o tetai Kite ruaine e akono ra ratou.

 Ka rauka katoa ia tatou i te tatanu i tetai pirianga meitaki ki te aronga angaanga na te tauturu atu anga i te rave i te au angaanga mama ua. I tetai au ngai, e riro ana te rava kore o te aronga angaanga tereni meitakiia i te akaiti mai i te turanga meitaki o te akonoanga i te aronga ruaine. Te akakite maira a Rébecca, te neti e: “E taime manamanata tikai te tuatau kaikaianga. No reira penei e au atianga meitaki teia kia atoro i tetai taeake e te tauturu atu iaia i te kaikai anga.” Eiaa tatou e emiemi i te pati ki te aronga angaanga e ka akapeea tatou i te tauturu atu anga.

Me atoro putuputu ua rai tatou i taua ngai rai o te aronga ruaine, ka kite i reira tatou e eaa te au anoano o to tatou au taeake me kore au tuaine ruaine, e ma te tika a te aronga angaanga, ka rauka i reira ia tatou i te tauturu atu i taua au anoano ra. Ei akatauanga, penei ka rauka ia tatou i te akamanea i te pia o tetai tangata e noo ra i reira ki te au tutu o tetai au aronga akaperepereia me kore tetai au tutu na te tamariki i toroa. Ma te akamanako atu i te turanga meitaki ua o te tangata i reira, ka rauka ia tatou i te apai mai i tetai pereue moe maanaana me kore tetai au apinga no ratou uaorai mei te pua e te vai atura. Me e aua tiare to taua tangata ra, penei ka rauka ia tatou i te apai i to tatou taeake ki vao i tetai reva ou? Kua karanga a Laurence, tei taikuia mai i mua akenei e: “E tapapa ua mai ana a Madeleine i taku atoroanga i te au epetoma. Me apai mai au i te tamariki, i reira rai ka katakata mai aia e te kaka i tona nga mata!” E aka tuke maata tikai ta taua au takainga ra ka akatupu ki te aronga i roto i te ngai akono anga i te ruaine.​—Mase. 3:27.

Puapingaia Nga Tua Roa Ai

Penei ka riro te atoro putuputu ua rai i tetai tangata ruaine ei timata anga atu “i te pikikaa kore o to [tatou] inangaro.” (2 Kori. 8:8) Na teea tu? Penei ka riro ei mea mareka kore kia tatou i te kite atu i tetai taeake e paruparu ua atura. Kua akatika a Laurence e: “I te akamataanga, kua riro to Madeleine turanga paruparu ei akatukia maata iaku e ka aue ua rai au i muri ake i te au atoroanga ravarai. Inara kua kitea mai iaku e ka tauturu te pure akatenga ia tatou kia autu i to tatou mataku e te akariro ia tatou ei akamaroiroianga ki etai ke.” E maata ua atu te au mataiti, i to Robert atoro ua anga i tetai taeake Kerititiano ko Larry te ingoa tei rokoia e te maki Parkinson. Kua karanga a Robert e: “Kua kino takiri te maki o Larry e kare au e marama akaou ana i tana ka tuatua mai. Inara me pure kapiti maua, te kite ra rai au i tona akarongo.”

Me atoro tatou i te au oa irinaki ruaine, kare tatou e tauturu anake ua ra ia ratou mari ra te puapingaia ra rai tatou uaorai. Ta ratou ikianga kia akapiri vaitata ua rai kia Iehova ia ratou e noo ra i rotopu i te aronga e au irinakianga ke to ratou, te apii maira ia tatou kia rauka te akarongo e kia akaari i te ngakau toa. To ratou tu aruaru kia rauka te kai pae vaerua noatu kare e rauka ana i te akarongo mai e te kite mai, te riro ra ei akakite mai e “kare o te kai anake ra te mea e oraʼi te tangata nei, ko te au mea katoa ra no roto mai i te vaa o te Atua ra.” (Mata. 4:4) Na te rekareka ua anga i te au mea rikiriki ua nei, mei te mata katakata o tetai tamaiti me kore i te kai kapiti anga i te kai, te akamaara maira te aronga ruaine ia tatou e kia mareka ua i ta tatou i rauka. Ka riro to ratou inangaro no te au mea puapinga i te pae vaerua ei tauturu ia tatou kia akanoo i ta tatou uaorai au mea puapinga maata roa atu na mua.

E tika rai e, ka puapingaia te putuputuanga katoa mei te turuturuanga ta tatou ka oronga ki te aronga ruaine. No teaa ra? I te mea e te irinaki maata ra te aronga paruparu i te pae kopapa ki runga i te aroa taeake, te oronga maira ratou i tetai au tuatau no te putuputuanga kia tupu atu i roto i te akaari anga i te ngakau aroa ua. No reira, e mea tau no tatou katoatoa kia manako i te akono anga i te aronga ruaine, noatu ka pou tetai au tuatau roa, ei tuanga no ta tatou akono meitaki anga i tetai e tetai. (1 Pete. 4:10, 11) Me riro na te aronga pakari e apai i te aratakianga i roto i teia angaanga, ka rauka ia ratou i te tauturu i tetai au mema ke atu o te putuputuanga kia kite e auraka rava teia tuanga o ta tatou angaanga Kerititiano kia kopaeia. (Eze. 34:15, 16) Na roto i ta tatou turuturuanga puareinga ua e te aroa, te akapumaana ra tatou i to tatou au oa Kerititiano ruaine e kare ratou i akangaropoinaia!

[Tataanga Rikiriki i Raro]

[Tataanga i te kapi 28]

“Me kite te aronga angaanga i te ngai akono anga i te ruaine e te atoro putuputuia maira tetai tangata, ka akono meitakiia aia”

[Tutu i te kapi 26]

Penei ka riro ta tatou au pure ngakau tae ei tauturu i tetai oa Kite ruaine kia akaoki akaou mai i tona manako ngakau au

[Tutu i te kapi 26]

Ka riro ta tatou au tuatua akaperepere ei akamatutu i to tatou au oa irinaki tei ruaine