Kua Akanooia te Pupu Akaaere

E AU tane akatapuia te Pupu Akaaere no te Au Kite o Iehova tei akatainuia ei au tavini no te Atua. E au komono ratou no te pupu tavini akono meitaki e te pakari, tei ia ratou te apainga no te oronga anga i te kai i te pae vaerua e te oronga anga i te arataki anga e te akamaroiroi anga ki te angaanga tutu anga i te Patireia i te ao katoa.​—Mata. 24:14, 45-47.

E raveia ana te au uipaanga a te Pupu Akaaere i te au epetoma ravarai, tei matauia i te Ruitoru. Te tauturu ra teia i te au taeake kia angaanga taokotai ma te tau tikai. (Sala. 133:1) Te tavini katoa ra te au mema o te Pupu Akaaere i runga i te au kumiti tukeke. I te akono anga i te au anoano o te Patireia, e tuanga ta te kumiti tataki tai e akono ra, mei tei akataka potoia mai i raro akenei.

▪ KUMITI AKAAERE: Tei roto i teia kumiti nei te akaaere o te au kumiti ke o te Pupu Akaaere tataki tai, e tetai tekeretere e mema katoa aia no te Pupu Akaaere. Na teia e akapapu ana e te tere meitaki ra e te mako tikai ra te au kumiti katoatoa. Te manako katoa ra te reira i te au tupuanga mamaata poitirere ua, te au takinokino anga, te au tumatetenga, e tetai atu au mea puapinga e tupu ra ki te Au Kite o Iehova i te ao katoa.

▪ KUMITI TANGATA: Kua orongaia ki te au taeake i roto i teia kumiti nei te apainga no te au akanoonooanga no te turanga tangata uaorai e i te pae vaerua e te tauturu anga i te au mema pamiri o Betela i te ao katoa. Na teia kumiti e akaaere ana i te ikianga e te patianga i te au mema ou o te au pamiri o Betela e te pauanga i te au uianga no runga i ta ratou tavini anga i Betela.

▪ KUMITI NENEIANGA: Na teia kumiti e akono ana i te neneianga, te tataanga, e te tuku anga i te au puka Pipiria ki te ao katoa. Na te reira e akaaere ana i te au ngai neneianga e te au ngai e taangaangaia ra e te au taokotaianga tukeke e taangaangaia ra e te Au Kite o Iehova. Na teia kumiti e akapapa ana i te mataara meitaki atu no te taangaanga i te au moni tei orongaia mai no te angaanga Patireia i te ao katoa.

▪ KUMITI TAVINI ANGA: Na te aronga i roto i teia kumiti e akaaere ana i te angaanga tutu anga e te au tumu manako te akakoroia ra no te au putuputuanga, te au painia, te aronga pakari, e te au akaaere tutaka. Na ratou e akono ana i te akapapaanga i Ta Tatou Angaanga Patireia e te pati atu anga i te aronga apii ki te Apii Gileada e te Apii Terenianga Orometua, e i muri mai na te oronga anga kia ratou i te au tukuanga angaanga i muri ake i te karatuatianga.

▪ KUMITI APIIANGA: Na teia kumiti e akaaere ana i te ikuikuanga e orongaia maira i ko i te au akaputuputuanga, te au uruoaanga, e te au uipaanga a te putuputuanga. Na te reira e akapapa ana i te au porokaramu i te pae vaerua no te au mema pamiri o Betela e te akaaere anga i te au apii tukeke, mei te Apii Gileada e te Apii Tavini Anga Painia, pera katoa te akapapaanga i te au porokaramu tepu tuatua e te au porokaramu vitio.

▪ KUMITI TATAANGA: Tei runga i teia kumiti nei te apainga kia tuku i te kai pae vaerua ki roto i te tu tataanga no te au puka e te tua anga ki te au taeake irinaki e ki te katoatoa. Na teia kumiti e pau ana i te au uianga Pipiria e te akatika i te tumu manako mei te au irava no te nuku e te au papaanga tuatua. Na te reira katoa e akaaere ana i te angaanga urianga tei raveia i te ao katoa.

Kua akaaite te apotetoro ko Paulo i te putuputuanga o te aronga akatainuia ki tetai kopapa tangata e kua akaketaketa mai i te au ngai puapinga i tukunaia ki te au mema katoatoa e pera katoa te irinaki anga ratou ki runga i tetai e tetai, te aroa anga i tetai e tetai, e te tauturu anga i tetai e tetai, i te rave anga i te angaanga ta te Atua i oronga mai. (Roma 12:4, 5; 1 Kori. 12:12-31) Na Iesu Karaiti, te Upoko, e oronga mai ana ki te au mema akaaere i tei anoanoia no te tauturu anga meitaki, te akatereanga, e te ikuikuanga pae vaerua. (Ephe. 4:15, 16; Kolo. 2:19) Na roto i teia tu, kua akanooia te Pupu Akaaere kia rave i te arataki anga, ia Iehova e arataki ra ia ratou na roto i te vaerua tapu.