Te Vaitata Maira te Akaora Anga a te Patireia o te Atua!

“Kia tae toou basileia. Kia akonoia toou anoano i te enua nei, mei tei te ao katoa na.”​—MATA. 6:10.

1. Eaa ra ta Iesu apiianga maata?

I TO Iesu Karaiti oronga anga i tana Tuatua i runga i te Maunga, kua kapiti atu aia i tetai pure akaraanga tei tapoto ua mai i tana apiianga maata. Kua apii aia i tana au pipi kia pure ki te Atua e: “Kia tae toou basileia. Kia akonoia toou anoano i te enua nei, mei tei te ao katoa na.” (Mata. 6:9-13) “Aere atura [Iesu] na roto i te au oire, e te au vila katoa, i te tutu aere anga i te tuatua meitaki i te basileia o te Atua.” (Luka 8:1) Kua raurau a Karaiti i tana au pipi e: ‘E na mua ra kotou i te kimi i te basileia e te tuatua-tika a te Atua.’ (Mata. 6:33) Ia koe e apii ra i teia atikara, e kimi i tetai au mataara no te taangaanga i te apiianga i roto i taau angaanga orometua. Ei akatauanga, e akamanako ana e ka akapeea ra koe me pau i teia au uianga: Mei teaa ra te puapinga o te karere o te Patireia? Te anoanoia ra te tangata kia akaoraia mai mei teaa? E ka akapeea ra te Patireia o te Atua i te oronga mai anga i te akaora anga?

2. Mei teaa ra te puapinga o te karere o te Patireia?

² Kua totou a Iesu e: “E tutu aereia te evangelia o te basileia nei, e kako rava ake te ao katoa nei; ei kite no te pa enua ravarai; ko te openga iora ïa i reira ra.” (Mata. 24:14) E mea puapinga maata rava te evangeria o te Patireia o te Atua. Papu tikai e ko te karere puapinga rava atu te reira i roto i teianei ao! I roto i te 100,000 e ara atu au putuputuanga o te Au Kite o Iehova i te ao katoa, mei te itu mirioni au tavini o te Atua e piri ra ki roto i tetai angaanga tutuanga aite koreia, e akakite aere ra ki etai ke e kua akatinamouia te Patireia. Ko tona akatinamou angaia e tuatua meitaki tikai te reira no te mea ko tera te aiteanga, kua akanoo te Atua i tetai kavamani i te rangi kia akaaere pouroa i te au mea ravarai o te enua nei. I raro ake i te tutaraanga a te Patireia, ka akatupuia to Iehova anoano i te enua nei mei tei te ao katoa ra.

3, 4. Eaa ra te ka tupu me oti to te Atua anoano i te akatupuia i te enua nei?

³ Eaa te ka tupu ki te tangata me oti to te Atua anoano i te akatupuia i te enua nei? Ka “orei [oki a Iehova] i te roi-mata katoatoa; e e kore rava te mate, e te aue, e te mii; e te mamae oki, e kore katoa ïa.” (Apo. 21:4) Kare te tangata e maki akaou me kore e mate no tei anau araia mai e no te tu apa ua. Te aronga i mate tei roto i to te Atua manakonakoanga ka rauka tetai tikaanga no  ratou kia ora e mutu kore ua atu, no te mea te taputou maira te Pipiria e: “E tuakaouanga to tei mate, te aronga tuatua-tika e te aronga tuatua-tika kore.” (Anga. 24:15) Kare e tamaki akaou, kare e maki, me kore e pongi, e ka akatukeia te enua nei kia riro ei parataito. Pera katoa te au manu kino i teianei ka noo au ua ratou ma te tangata e ma tetai e tetai.​—Sala. 46:9; 72:16; Isa. 11:6-9; 33:24; Luka 23:43.

⁴ Ma taua au akameitakianga umere ra ta te tutaraanga a te Patireia ka akatupu, no reira rai te Pipiria i tuatua ai no runga i te oraanga a taua taime ra na roto i teia au tuatua akapumaana e: “Te aronga maru ra, ka noo ïa i te enua, e ka rekareka ratou i te maata o te au ra.” Inara peea i reira te aronga akatupu pekapeka? Te totou maira te au Tuatua Tapu e: “E roa poto ake, e kare ua te tangata kino ra.” Inara, ko “te aronga ra i tapapa ia Iehova ra, ko ratou te ka noo i te enua.”​—Sala. 37:9-11.

5. Eaa te ka tupu ki te akatereanga o te au mea nei i teia tuatau?

⁵ No teia au mea pouroa kia tupu, ka anoanoia teia akatereanga o te au mea nei ma tona au kavamani, au akonoanga, e te au akatereanga okooko kia akaateaia. E ko te reira tikai ta te kavamani i te rangi ka rave. Kua akauruia te peroveta ko Daniela kia totou e: “E i te au rā o taua au ariki ra [e vai nei i teianei] e akatupu ei te Atua no te rangi i tetai basileia [i te rangi], te ka kore rava e akakoreia e tuatau ua atu: kare oki taua basileia ra e riro i etai ke, e riro na te reira e akapueurikiriki e e akapou i taua au basileia katoa ra [i teia tuatau], e ka vai rai te reira e tuatau ua atu.” (Dani. 2:44) Ei reira te Patireia o te Atua​—e kavamani ou i te rangi​—e tutara ai ki rungao i te taiate tangata ou o te enua nei. Ka vai rai te “rangi ou e te enua ou . . . , i te vai tika anga o te tuatua-tika ra.”​—2 Pete. 3:13.

Anoano Maata Roaia Atu te Akaoraanga i Teianei

6. Akapeea te Pipiria i te akataka mai anga i te tu kino o teia ao kino?

⁶ I te meameaau anga o Satani, e Adamu raua ko Eva i te Atua, te inangaro anga kia iki no ratou uaorai e eaa te mea tika, e eaa te mea tarevake, kua akamata teia i tetai kaveinga tumatetenga tikai no te pamiri o te tangata nei. I mua ake i te Vaipuke i te ao katoa nei, tere atu i te 1,600 mataiti i muri mai, “e kino maata to te tangata i te enua nei, e kua kino anake te au manako katoa, e te akakoroanga katoa o to ratou ngakau i te au rā katoa ra.” (Gene. 6:5) Mei te 1,300 mataiti i muri mai, kua kite mai rai a Solomona i te kino pakari o te au turanga e kua tata aia e: “Kua akameitaki iora au i tei mate ra, tei mate takere ana, i te aronga e ora nei, ko e ora e teia noaʼi. Ko tera ra tei maata i te meitaki i to raua katoa, ko tei kore i anau mai, ko tei kore i kite i te angaanga kino i raveia i raro ake i te rā nei.” (Kohe. 4:2, 3) Tetai 3,000 mataiti akaou i muri mai i te reira kua tae mai tatou i reira ki to tatou nei tuatau, e te tupu maata ua atura te kino.

7. Eaa i teianei i anoano maata roaia atu ei te akaoraanga a te Atua?

⁷ Noatu te tika ua ra e kua roa te tuatau i te vai ua anga te kino, te anoano maata roaia atu nei ra te akaoraanga a te Patireia o te Atua i teianei i to tetai ua atu rai taime. E kino pakari roa atu te au turanga o te 100 mataiti i topa i to mua ana, e te kino ua atura. Ei akaraanga, te ripoti maira te Worldwatch Institute e: “E toru taime maata atu te au tangata tei kinokino mei [te 20] anere  mataiti i te au tamaki katoatoa o te anere mataiti mua TA ki te 1899.” Mei te mataiti 1914 mai tere atu i te 100 mirioni oraanga tei mate i roto i te au tamaki! Kua tamanako mai tetai enetaikoropitia e kua taeria te 60 mirioni tangata tei mate i roto i te Tamaki II o te Ao. I te mea e kua papa ua tetai au enua i teianei e ta ratou au apinga tamaki nukiria, ka rauka ua i te tangata nei i te takore takiri i tetai au tuanga maata rava o te tangata i teia ao. E noatu te tere anga ki mua o te taineti e te vairakau, i te au mataiti ravarai mei te rima mirioni tamariki te mate ra rai no te onge.​—Akara i te pene 9 o te puka Eaa Tikai ta te Pipiria e Apii Maira?

8. Eaa ra ta te au tauatini ua atu au mataiti a te tutaraanga a te tangata i akapapu mai ma te ekoko kore?

⁸ Kua puapinga kore te au tautaanga a te tangata kia takore i te kino. Kare rava te au akaaerenga poritiki, kimi puapinga, e te akonoanga o teianei ao i akatupu ana i te anoano tumu o te tangata no te au, te turanga puapinga, e te oraanga kopapa meitaki. Kare i rauka i te akatikatika i te au manamanata maata e aro atu nei i te tangata, kua akamaata atu ra teia au akaaerenga i te reira. Te tika ua ra, e te akapapu ua maira te au tauatini ua atu au mataiti o te tutaraanga a te tangata i te tika tikai o te au tuatua e: “Kare tei te tangata uaorai tona aerenga: kare tei te tangata e aere nei, i te akono i tona uaorai takainga tapuae.” (Iere. 10:23) Ae, “te tutara ra tetai tangata ki rungao i tetai, ei mate nona uaorai.” (Kohe. 8:9) Pera katoa, “te ngunguru anake nei te au mea katoa i angaia mei te mamae anau ra.”​—Roma 8:22.

9. Eaa te au turanga ta te au Kerititiano e tapapa atu nei i roto i teia “au tuatau openga”?

⁹ No runga i to tatou nei tuatau, kua totou te Pipiria e: “Ka tupu te kino maata i taua tuatau openga ra.” I muri ake i te akataka anga i te au turanga o te au tuatau openga i raro ake i te tutaraanga a te tangata, te akakite ra te totou e: “Ko te au tangata kikino e te aronga pikikaa ra, e tupu rai to ratou kino, e e maata atu.” (E tatau ia 2 Timoteo 3:1-5, 13.) Ko ta te au Kerititiano te reira e tapapa atu nei, no te mea “te vai ua nei rai to te ao ravarai i raro ake i taua vaerua kino ra,” ko Satani. (1 Ioa. 5:19) Inara, ko te tuatua meitaki kare e roa atu ana ka akaora mai te Atua i te aronga tei inangaro iaia. Ka akaoraia mai ratou mei teia ao, e aere viviki ua atura mei te kino ki te kino maata rava.

Te Tumu Tau ua rai kia Irinakiia no te Akaoraanga

10. Eaa i riro ei e ko Iehova ua rai te Tumu tau kia irinakiia no te akaoraanga?

¹⁰ Ia koe e tutu aere ra i te tuatua meitaki, e akakite atu e ko Iehova ua rai te Tumu tau kia irinakiia no te akaoraanga. Nona anake ua rai te mana e te anoano kia akaora i tona au tavini mei tetai ua atu turanga kino. (Anga. 4:24, 31; Apo. 4:11) Papu tikai ia tatou e ka akaora ua rai a Iehova i tona iti tangata e ka akatupu i tona au akakoroanga, no te mea kua taputou mai aia e: “Ko taku oki i maara ra, ko te reira te ka tupu.” Ko tana tuatua “kare e oki puapinga kore ua mai [kiaia].”​—E tatau ia Isaia 14:24, 25; 55:10, 11.

11, 12. Eaa te akapapuanga ta te Atua i oronga mai ki tona au tavini?

¹¹ Kua akapapu mai tikai a Iehova e ka akaora aia i tona au tavini me apai mai aia i te akautungaanga ki runga i te aronga kino. I te tono anga i te peroveta ko Ieremia kia tuatua ma te mataku kore ki te aronga rave maata i te ara, kua tuatua atura te Atua e: “Auraka e mataku.” No teaa ra? “Ei vaitata katoao au ia koe ei akaora, ia koe.” (Iere. 1:8) Mei te reira katoa rai, i mua ua ake ka takore ei a Iehova i nga oire kino o Sodoma e Gomora, kua tono aia e rua nga angera kia taki mai ia Lota e tona pamiri ki vao mei taua ngai ra kia ora. “I akatopa mai ei a Iehova i te teio, e te ai . . . ki runga ia Sodoma, e Gomora.”​—Gene. 19:15, 24, 25.

¹² E i te ao katoa nei rai, ka akaora a Iehova i te aronga e rave ra i tona anoano. I tona takore anga i te ao taito kino i roto i te Vaipuke, kua “akaora iora ra [aia] ia Noa i te tangata i ako i te tutua-tika ra, ma etai e tokoitu ra.” (2 Pete. 2:5) Ka akaora akaou rai a Iehova i te aronga tiratiratu me takore aia i te ao kino o teia tuatau. No reira te akakite maira Tana Tuatua e: “E kimi ia Iehova, e te aronga akaaka ravarai o te enua nei . . . e kimi i te tuatua-tika, e kimi i te akaaka, peneiake kotou ko te uunaia i te rā e riri ei a Iehova ra.” (Zepha. 2:3) Te ka tupu mai no taua takoreanga o te ao katoa nei, ko ‘te aronga tiratiratu  te ka noo i te enua, ka tipu keia ra te aronga kino i te enua nei.’​—Mase. 2:21, 22.

13. Ka akapeea ra te au tavini o Iehova i mate, me akaoraia?

¹³ Inara, e manganui ua atu te au tavini o te Atua tei mate takere no te maki, te takinokino, e tetai atu au tumu ke. (Mata. 24:9) Ka akapeea i reira teia aronga katoatoa me akaoraia? Mei tei akakiteia i mua akenei e, “e tuakaouanga to . . . te aronga tuatua-tika.” (Anga. 24:15) Kare e aiteia te akapumaanaanga e vai ra i roto i te kite anga e kare rava e apinga e rauka i te arai ia Iehova mei te akaora anga i tona au tavini!

E Kavamani Tuatua Tika

14. Eaa tatou i papu ei e e kavamani tuatua tika te Patireia o te Atua?

¹⁴ I roto i taau angaanga orometua, ka rauka ia koe kia akamarama e ko to Iehova Patireia i runga i te rangi e kavamani tuatua tika te reira. E tika rava teia no te mea te akaata maira te reira i to te Atua au tu umere tikai, mei te tuatua tau, te tuatua tika, e te aroa. (Deu. 32:4; 1 Ioa. 4:8) Kua oronga te Atua i te Patireia ki roto i te rima o Iesu Karaiti, koia tei tukatau rava atu kia tutara i te enua. Kua akakoro katoa a Iehova kia apaiia e 144,000 Kerititiano akatainuia mei te enua nei e kia akatuia atu ki te oraanga i te rangi ei aronga akatuangaia na Karaiti te ka piri atu kiaia i roto i te akatere anga i te au mea katoa o te enua nei.​—Apo. 14:1-5.

15. Akakite mai i te tuke i ta te Patireia o te Atua tutaraanga e ta te tangata nei tutaraanga.

¹⁵ Mei teaa ra te aka tuke maata i rotopu i ta Iesu tutaraanga e te 144,000 e ta te au tangata apa ua nei! Te au tutara o teia akatereanga o te au mea nei kua takinga kino putuputu ana ratou e kua arataki i to ratou au tangata ki te au tamakianga, tei taopenga mai ki te au mirioni ua atu tei tamateia. No reira rai te au Tuatua Tapu e ako ua mai nei ia tatou e eiaa e irinaki ki te tangata nei, “kare oki ona ora”! (Sala. 146:3) Inara e tu meitaki tikai te ka akairo i ta Karaiti tutaraanga! “E aere mai kotou kiaku nei, ko te aronga katoa i roiroi, e te aronga teiaa i te apainga, naku e akaanga i to kotou roi. Ka rave mai i taku amo ki rungao ia kotou, e kia apiiia kotou e au; te maru nei au, e ngakau akaaka toku, e rauka oki ia kotou te akaangaroianga i to kotou vaerua. Te maru nei taku amo, e te māmā nei taku apainga.”​—Mata. 11:28-30.

Te Au Tuatau Openga Kare e Roa Atu kua Ope!

16. Ka akapeea teia au tuatau openga me akaopeia?

¹⁶ Kua noo mai ana teia ao i roto i te au tuatau openga, me kore i “te akaopengaanga o te akatereanga o te au mea nei,” mei te mataiti 1914 mai. (Mata. 24:3, NW) Kare e roa atu ana i teianei, ka tupu ta Iesu i karanga e ko te “mate maata.” (E tatau ia Mataio 24:21.) Ka akapou taua mate aite koreia ra i to Satani ao katoa. Inara akapeea te mate maata me akamata mai? E akapeea te reira me akaopeia?

17. Eaa ta te Pipiria e akakite maira no te akamata anga o te mate maata?

¹⁷ Ka akamata viviki ua mai te mate maata. Ae, ka aere poitirere ua mai te “rā o te Atu” me “tuatua oki te tangata e, e au, e kare e kino.” (E tatau ia 1 Tesalonia 5:2, 3.) Ka akamata te mate tei  totouia mai, me manako te pa enua e kua vaitata ua i te kitenaia e ratou te pauanga ki to ratou au manamanata maata. Ka riro te takoreanga viviki ua o “Babulonia maata,” te patireia akonoanga pikikaa o te ao nei, ei poitirere maata ki to te ao. Ka va ua iora te ui ariki e etai atu me tukuia te akautungaanga ki runga ia Babulonia Maata.​—Apo. 17:1-6, 18; 18:9, 10, 15, 16, 19.

18. Akapeea a Iehova me ariu mai ki te tamakianga a Satani ki runga i Tona iti tangata?

¹⁸ Me tae ki te taime tau tikai, e kitea ai e “e akairo to roto i te rā, e to roto i te marama, e to roto i te au etu,” e “e kiteaʼi te akairo o te Tamaiti a te tangata ki runga i te rangi.” Ei reira tatou ka ‘akateitei ei ia tatou uaorai no te mea te vaitata maira oki to tatou ora.’ (Luka 21:25-28; Mata. 24:29, 30) Ka tanga mai a Satani, me kore a Goga, i tona au nuku ki runga i te iti tangata o te Atua. No runga ra i te aronga e tamaki maira i tona au tavini akarongo mou, te karanga maira a Iehova e: “Ko tei akatukia atu oki ia kotou ra, kua akatukia ïa i tona koringo mata nei.” (Zeka. 2:8) No reira, kare ta Satani au titauanga kia takore ia ratou e manuia. No teaa ra? No te mea ka ariu viviki ua mai te Atu Ngateitei ko Iehova i te akaora i tona au tavini.​—Eze. 38:9, 18.

19. Eaa tatou ka papu ei e ka akatupu rai to te Atua au nuku akapou i ta Satani akatereanga?

¹⁹ Me tanga mai ana te Atua ki runga i to te pa enua, ‘ka kite oki ratou e ko Iehova aia.’ (Eze. 36:23) Ka tono mai aia i tona au nuku akapou​—e raungauru ua atu o te tauatini au mea ora vaerua tei riro na Iesu Karaiti e arataki​—ei takore i te toenga o to Satani akatereanga i runga nei i te enua. (Apo. 19:11-19) Me akamaara tatou e i tetai atianga okotai kua rauka i tetai angera okotai ua e tai ua rai po i te ‘ta e okotai anere, e varu ngauru ma rima, i te tausani’ au enemi o te Atua, ka papu roa ia tatou e ka rauka ngoie ua i te nuku o te rangi i te takore takiri i te au tuanga iti poepoe ravarai o to Satani akatereanga i runga nei i te enua me tae ki te openga o te mate maata i roto ia Aramakito. (2 Ari. 19:35; Apo. 16:14, 16) Ka uriia atu a Satani e tana au temoni ki raro i te vaarua takere kore e okotai tauatini mataiti. E te openga i reira, ka takoreia ratou.​—Apo. 20:1-3.

20. Eaa ta Iehova ka akatupu na roto i te Patireia?

²⁰ Ka tamaia te au kino i runga i te enua, e ka noo rai te au tangata tuatua tika e mutu kore ua atu i teia ao katoa. Kua akapapu tika ia maira i reira e ko Iehova te Akaora Maata. (Sala. 145:20) Na roto i te Patireia, ka akatika aia i tona tu ngateitei, ka akatapu i tona ingoa tapu, e ka akatupu i tona akakoroanga mekameka no te enua nei. Kia rauka ia koe te rekareka maata i roto i taau angaanga orometua ia koe e akakite aere ra i te tuatua meitaki e te tauturu anga atu i te aronga “i akonoia no te ora mutu kore” kia kite e te vaitata maira te akaora anga a te Patireia o te Atua!​—Anga. 13:48.

Maara Ainei ia Koe?

• Akapeea a Iesu i te akakite mai anga i te puapinga o te Patireia?

• Eaa i maata roa atu ei te anoano no te akaora anga i teianei i to mua ana?

• Eaa te au tupuanga ta tatou ka tapapa atu i te tuatau o te mate maata?

• Akapeea a Iehova i te akapapu anga e koia te Akaora Maata?

[Au Uianga Apii]

[Au Tutu i te kapi 12, 13]

Kua totou te Tuatua a te Atua i tetai angaanga tutuanga aite koreia i te ao katoa no to tatou nei tuatau

[Tutu i te kapi 15]

Mei ia Iehova i akaora ia Noa e tona pamiri, ka akaora rai Aia ia tatou

[Tutu i te kapi 16]

Na Iehova “e orei i te roi-mata katoatoa; e e kore rava te mate.”​—Apo. 21:4