Ariki i to Iehova Mana Akaaere

“Ko teia oki te aiteanga o te aroa i te Atua, kia akono tatou i tana au akauenga, e inara kare tana au akauenga i te mea teiaa.”​—1 IOA. 5:3.

1, 2. (a) Eaa ra te manako no te kauraro anga ki te mana akaaere i riro ei e mea reka koreia ki te manganui i teia tuatau? (e) Te aronga te karanga ra e kare ratou e aru ana i te katoatoa kua akarangatiraia ainei tikai ratou? E akamarama mai.

KARE te “mana akaaere” i te tuatua rekaia i teia tuatau. E manganui te reka kore ra i te manako no te kauraro anga ki te anoano o tetai tangata ke. “Kare ia koe te tika iaku” te tu ia o te aronga kare e aru ana i te katoatoa e akakite maira. Inara, kua akarangatira tikai ia ainei teia au tangata? Kare rava! Te maataanga te aru ua ra i te au turanga e manganui o tetai ke tei “akatau atu i teianei ao.” (Roma 12:2) Kare i riro ana ei aronga takake, e ‘tuikaa ratou na te kino,’ i te taangaanga anga i te au tuatua a te apotetoro Kerititiano ko Petero. (2 Pete. 2:19) Te aere ra ratou ki “ta to teianei ao ra, ta te ariki mana o te reva ua nei, te vaerua e angaanga ririnui nei i roto i te aronga akarongo kore,” ko Satani te Tiaporo.​—Ephe. 2:2.

² Kua tuatua tetai tangata tata e: “Kare au e akatika i toku nga metua, i tetai taunga, i tetai orometua, i tetai guru me kore i te Pipiria kia iki e eaa taku e manako ra e ko te tika.” E tika rai, penei te akakino ra etai i to ratou mana akaaere me kore kare e tau ia ratou to tatou akarongo. Inara ko te patoi tika atu anga ainei i tetai anoano no te aratakianga te pauanga? Na te akara poto anga i te au tataanga i roto i te nutipepa e oronga mai i tetai pauanga mareka koreia. E mea tumatetenga tikai e i te taime e anoano tikai ra te au tangata i te aratakianga, e maata ua atu te au tangata kare e inangaro ana i te ariki mai i te reira.

To Tatou Manako no te Mana Akaaere

3. Akapeea te au Kerititiano o te anere mataiti mua i te akaari anga e kare ratou e kauraro ua atu ki te mana akaaere a te tangata?

³ Ei au Kerititiano, e tuke to tatou turanga i to teianei ao. Kare tatou e rave ua i te mea tei akakiteia mai kia tatou ma te kore e uriuri manako ana i te reira. Ei tukeanga, i tetai au taime e patoi  ana tatou i te kauraro atu ki te anoano o tetai ke noatu e me e au taoonga akaaere to ratou. Kua tupu katoa teia ki te au Kerititiano i te anere mataiti mua. Ei akatauanga, te akaueia anga te au apotetoro kia akamutu i te tutu aere, kare ratou i tuku ua ki ta te taunga maata e te au mana akaaere e tuanga ratou no te Sunederi. Kare ratou i akaruke ana i to ratou tu akono tau kia aru ua i te mana akaaere a te tangata.​—E tatau ia Angaanga 5:27-29.

4. Eaa te au akaraanga mei te au Tuatua Tapu Epera te akaari maira e kua aru te au tangata e manganui o te Atua i tetai mataara kare e rekaia ana?

⁴ E maata te au tavini o te Atua i mua ake i te tuatau Kerititiano kua akapapu katoa mai i te reira. Ei akaraanga, kua patoi a Mose “kia tapaia i te tamaiti a te tamaine a Pharao ra; E mea meitaki iaia te rave katoa i te mate i te kapiti anga i te au tangata o te Atua,” noatu e ka tupu mai “te riri o te ariki” me raveia te reira. (Ebe. 11:24, 25, 27) Kua patoi a Iosepha i te au akameamea anga a te vaine a Potiphara, tei iaia te mana i te akakino e te akatupu i te pekapeka kiaia. (Gene. 39:7-9) “Te manako ra te ngakau o Daniela e, auraka aia e viivii i taua tuanga kai a te ariki ra,” noatu e kare tona turanga no runga i taua tumu ra i te mea ngoie kia arikiia mai e te aronga taoonga maata o Babulonia. (Dani. 1:8-14) I roto i te tataanga tuatua enua, te akaari maira taua au akaraanga e kua mou ngaueue kore te au tangata o te Atua no te tika, noatu e eaa te ka tupu mai. Kare ratou i tuku ua ki ta te tangata ei akamareka ua ia ratou; auraka katoa tatou.

5. Eaa ra te tuke o to tatou manako no te mana akaaere ki to teianei ao?

⁵ Kare to tatou turanga mataku kore e akaaite uaia ki te tu marokiakia; kare katoa tatou i aite ana ki tetai aronga tei rave i te meameaau ei akaari ua anga e kare ratou e ariki ana i te akatere anga poritiki. Kareka ra, te tauta ra tatou i te ariki i to Iehova mana akaaere i runga ake i tetai ua atu tangata. Me patoi mai te ture a te tangata i te ture a te Atua, mama ua te ikianga e eaa ta tatou ka rave. Mei te au apotetoro i te anere mataiti mua, e akarongo tatou ki te Atua auraka te tangata.

6. Eaa ra i riro ei e e mea meitaki ua rai kia akono i te au akauenga a Iehova?

⁶ Eaa tei tauturu ia tatou kia ariki i te mana akaaere o te Atua? Te ariki ra tatou i te turanga tei akakiteia mai i roto ia Maseli 3:5, 6 e: “E irinaki kia Iehova ma to ngakau katoa ra; auraka ra e irinaki ki toou uaorai kite. Auraka e akangaropoina iaia i toou katoa ra au aerenga; e nana e akakite kia koe i toou ra au arataa.” Te irinaki ra tatou e ko tetai ua atu mea ta te Atua e umuumu maira ia tatou ka puapinga ua rai tatou i te openga. (E tatau ia Deuteronomi 10:12, 13.) E tika rai, kua akataka mai a Iehova iaia uaorai ki te ngati Iseraela “ko tei akakite ia koe i te mea e puapingaʼi koe na; ko tei arataki ia koe na te arataa e tau ei kia aere koe ra.” Kua akakite katoa mai aia e: “Angairi koe i akarongo mai ki te au akauenga naku! kua riro ïa toou au mei te vai taʼe ra; e taau tuatua-tika mei te ngaru moana ra.” (Isa. 48:17, 18) Te irinaki ra tatou i taua au tuatua ra. Papu ia tatou e e meitaki ua rai no tatou kia akonoia te au akauenga a te Atua.

7. Eaa ta tatou ka rave me kare tatou e marama tikai ana i tetai akauenga tei akanooia i roto i te Tuatua a te Atua?

⁷ Te ariki ra tatou i to Iehova mana akaaere e te akarongo iaia noatu e kare tatou e marama tikai ana i te tumu i akanooia ai tetai umuumuanga i roto i tana Tuatua. Kare teia i te manako kore; e irinaki tikai teia. Te akaata maira te reira i te irinaki anga ngakau tae e kua kite a Iehova e eaa te mea meitaki no tatou. E akakite anga katoa to tatou akarongo i to tatou aroa, no te mea kua tata te apotetoro ko Ioane e: “Teia oki te inangaro i te Atua, ko te akono i tana au akauenga.” (1 Ioa. 5:3) Inara te vai ra tetai tu no to tatou akarongo auraka e ngaropoina ia tatou.

Tereni i to Tatou Kite Ngakau

8. Akapeea to tatou “kite ngakau kia tereniia” i te piri atu anga ki te ariki anga i to Iehova mana akaaere?

⁸ Te akakite maira te Pipiria kia tatou e kia rauka ia tatou to tatou “kite ngakau kia tereniia i te kite i te tika e te tarevake.” (Ebe. 5:14, NW) No reira, kare to tatou akakoroanga e kia akonoia te au ture a te Atua ma te kore e akamanako atu ana i te reira; inara, te inangaro ra tatou kia rauka te “kite i te tika e te tarevake” tei akatumuia ki runga i to Iehova au turanga. Te inangaro ra tatou i te kite i te pakari o to Iehova au arataa, kia rauka ia tatou i te tuatua mei te tata taramo rai e: “Te vai nei oki taau ture tei roto i toku nei ngakau.”​—Sala. 40:8.

9. Akapeea tatou i te akarotai anga i to tatou akava ngakau ki to Iehova au turanga, e eaa ra i puapinga ai kia rave tatou i te reira?

 ⁹ Kia ariki rekareka i te au ture a te Atua mei te tata taramo ra, te anoanoia ra kia akamanako oonu tatou e eaa ta tatou e tatau ra i roto i te Pipiria. Ei akaraanga, me kite mai tatou i tetai umuumu anga a Iehova, penei ka ui tatou e: ‘Eaa ra teia akauenga me kore teia kaveinga i pakari ei? Eaa ra i riro ei e e mea meitaki noku ra kia akarongo au? Eaa te au tupuanga kino te ka tupu mai ki te aronga kare i akarongo ana ki te akoanga a te Atua i roto i teia tumu manako?’ Me rotai to tatou akava ngakau ki to Iehova au arataa, penei ka rave tatou i te au ikianga te rotai ra ki tona anoano. Ka rauka ia tatou i te ‘kite i to Iehova ra anoano’ e ka aru atu i te reira na roto i tetai mataara no te akarongo. (Ephe. 5:17) Kare teia i te mea mama ua.

Tauta a Satani i te Akakino i to te Atua Mana Akaaere

10. Eaa tetai ngai te kimi ra a Satani i te akakino i to te Atua mana akaaere?

¹⁰ Kua roa a Satani i te kimi anga i te akakino i to te Atua mana akaaere. Kua akaariia mai tona vaerua akatakake anga i roto i tetai au tu e manganui. Ei akaraanga, e akamanako ana i te akangateitei koreia anga ta te Atua akanoonooanga no te akaipoipo. Kua iki etai pae i te noo ua kare e akaipoipo, ko tetai te kimi ra i tetai au mataara kia matara mai mei to ratou tokorua. Penei te ariki ra te aronga i roto i nga pupu ki ta tetai vaine akatutu teata i tuatua mai ana e: “Kare e rauka e e tai ua tokorua no te tane e te vaine.” Kua tuatua katoa aia e: “Kare au i kite ana i tetai tangata tei tiratiratu ana ki tona tokorua me kore te inangaro ra kia tiratiratu ua rai.” I te akamanako anga i tona uaorai au pirianga autu kore, kua akakite katoa tetai tangata akatutu teata reka maataia e: “Kare i papu iaku e me ko to tatou tu tikai ia kia noo ua ki taua tokorua no te toenga o to tatou oraanga.” E meitaki tikai kia ui tatou kia tatou uaorai e, ‘Te ariki ra ainei au i to Iehova mana akaaere no runga i te akaipoipo, me kore te akakeu ra ainei te tu o teianei ao i toku manako e kare te akaipoipo e tinamou ana?’

11, 12. (a) Eaa ra ka ngata ei i te au mapu i te ariki i to Iehova mana akaaere? (e) E akakite mai i tetai tupuanga tei akaari mai e e neneva tikai te kopae anga i te au ture e te au kaveinga a Iehova.

¹¹ E mapu ainei koe i roto i to Iehova akaaerenga? Me koia ia, penei ko koe tikai tetai takete no ta Satani au tauta anga kia akakino i to Iehova mana akaaere. Penei na “te au anoano o to mea ou anga ra” pera katoa te akakeu ra te taomi anga a toou au oa kia manako koe e e teiaa tikai te akono anga i te au ture a te Atua. (2 Timo. 2:22) Auraka e tuku i te reira kia tupu mai. E tauta kia kite i te pakari no te au turanga a te Atua. Ei akaraanga, te akakite maira te Pipiria kia koe e “e rere ke mei te moeaana.” (1 Kori. 6:18, NW) E ui akaou kia koe uaorai i teia au uianga: ‘Eaa ra taua akauenga i pakari ei? Akapeea au e puapinga ai i te akarongo anga ki teia tumu manako?’ Penei kua kite koe i etai aronga tei kopae i te akoanga a te Atua e kua rokoia e te au turanga kino no taua tarevake ra. Te mataora tikai ra ainei ratou i teianei? E meitaki atu ainei to ratou oraanga i ta ratou i rekareka ana i mua atu ana i te taokotai mai anga ki to Iehova akaaerenga? Kua kite mai ainei ratou i te taviri no te mataora kare te toenga o te au tavini o te Atua i kite mai ake?​—E tatau ia Isaia 65:14.

¹² E akamanako ana i te au tuatua i tuatuaia ana i tetai ua ake taime, na tetai Kerititiano ko Sharon te ingoa: “No te kore anga e akarongo ki te ture a Iehova, kua tuia au i teianei e te maki kino pakari ko te AIDS. E oki putuputu ua ana au  i te akamaara i te au mataiti mataora e manganui i toku tavini anga ia Iehova.” Kua kite mai aia e e neneva rai i te aati anga i te au ture a Iehova e tano tikai e kia akono aia i te reira ma te akangateitei anga maata. E paruru anga te au ture a Iehova ia tatou uaorai. Kua mate a Sharon e itu ua rai epetoma i muri ake i te tataanga i te au tuatua i runga akenei. Mei ta tona tupuanga kino e akaari maira, kare a Satani apinga meitaki i te oronga mai ki te aronga tei riro ei tuanga no teia akatereanga kino. Ei “metua oki no te pikikaa,” e manganui tana au taputou i papau ana, inara kare aia i akono ana i te reira, mei tana taputou rai i papau ana kia Eva. (Ioa. 8:44) E tika rai, e meitaki ua atu rai i te ariki i to Iehova mana akaaere.

Patoi i te Vaerua Akatakake

13. Eaa tetai ngai ka anoanoia tatou kia matakite i tetai vaerua akatakake anga?

¹³ I te ariki anga i to Iehova mana akaaere, te anoanoia ra tatou kia matakite i tetai vaerua akatakake. Ka rauka i tetai tu akaparau i te akatupu i te manako i roto ia tatou e kare tatou e inangaro atu i te aratakianga no ko mai i tetai ke. Ei akaraanga, penei ka patoi atu tatou i te akoanga tei orongaia mai e te aronga te rave ra i te arataki anga i rotopu i te au tangata o te Atua. Kua akatumu te Atua i tetai akanoonooanga te rauka ra i te pupu tavini akono meitaki e te pakari i te oronga mai i te kai pae vaerua i te ora mou. (Mata. 24:45-47) E mea tau kia ariki akaaka tatou e ko teia te mataara e akono ra a Iehova i tona au tangata i teia tuatau. Kia aite tatou mei te au apotetoro akarongo mou. Te akaturoriia anga etai au pipi, kua ui a Iesu ki te au apotetoro e: “Ka aere katoa ainei kotou?” Kua pau atu a Petero e: “E te Atu, ka aere tika matou kiaai ra? tei ia koe te tuatua o te ora mutu kore ra.”​—Ioa. 6:66-68.

14, 15. Eaa ra tatou ka kauraro akaaka ai ki te akoanga a te Pipiria?

¹⁴ I te ariki anga i to Iehova mana akaaere te kapiti maira i te aru rotai anga i te akoanga tei akatumuia ki runga i tana Tuatua. Ei akaraanga, kua akamatakite mai ana te pupu tavini akono meitaki e te pakari ia tatou e “kia ara ra, e e akono meitaki.” (1 Tesa. 5:6) E tau tikai taua akoanga i teia tuatau openga e e manganui tei riro “ei akaperepere ia ratou uaorai, ei noinoi.” (2 Timo. 3:1, 2) Te akakeuia ra ainei tatou e taua au tu e tupu ra i teianei? Ae. Na te aruaru anga i te au akakoroanga o teianei ao, penei ka tavarengaia tatou i te pae vaerua, me kore ka ariki tatou i tetai manako noinoi apinga. (Luka 12:16-21) No reira, e meitaki tikai i te ariki i te akoanga a te Pipiria e kia kopae i te tu karapii o te oraanga te tupu maata ra i roto i te ao o Satani!​—1 Ioa. 2:16.

¹⁵ Na te aronga pakari tei ikiia e tua nei i te kai pae vaerua no ko mai i te pupu tavini akono meitaki e te pakari ki to ratou putuputuanga. Te ako maira te Pipiria ia tatou e: “E akarongo i to kotou au arataki, e kauraro atu kotou: te tiaki ra ratou i to kotou au vaerua, e akakiteia oki ta ratou tuatua ia kotou i te Atua ra; kia akakite ra ratou ma te rekareka, eiaa ma te aue; kare oki e puapingaia ta kotou i te reira.” (Ebe. 13:17) Ko te aiteanga ainei teia e e au tangata apa kore te aronga pakari o te putuputuanga? Kare rava! Te kite meitaki maira te Atua i to ratou tu apa i tetai ua atu tangata. Noatu rai, te inangaro maira aia kia kauraro tatou. Na te taokotaianga ki te aronga pakari, noatu e aronga apa ratou, e akapapu anga ia e te ariki ra tatou i to Iehova mana akaaere.

Te Puapinga no te Tu Akaaka

16. Akapeea tatou i te akaari anga i te ngateitei no Iesu ei Upoko no te putuputuanga Kerititiano?

¹⁶ Kia maara ua rai ia tatou e ko Iesu te Upoko mou o te putuputuanga. (Kolo. 1:18) Ko tetai tumu ia ka kauraro akaaka ai tatou ki te aratakianga a te aronga pakari tei ikiia, i te oronga  “maata rava i te akangateitei” kia ratou. (1 Tesa. 5:12, 13) E tika rai, ka rauka i te aronga pakari o te putuputuanga i te akaari mai e te kauraro katoa ra rai ratou na te oronga matakite anga i te karere a te Atua ki te putuputuanga, kare e oronga i to ratou uaorai au manako. “Auraka kia rai to [ratou] manako i te tangata nei i tei tataia ra” ei akamaroiroi anga i to tetai uaorai manako.​—1 Kori. 4:6.

17. Eaa ra ka riro ei te tu anoano noinoi ei kino?

¹⁷ Te anoano pouroaia ra te katoatoa i roto i te putuputuanga kia matakite i te kimi anga i to ratou uaorai kaka. (Mase. 25:27) I te akaraanga, ko te tu ia o tetai pipi ta te apotetoro ko Ioane i aravei atu. Kua tata aia e: “Ko Dioterepe ra, ko tei akateitei iaia uaorai ki rungao ia ratou ra, kare aia e āriki mai ia matou. E teianei, kia tae atu au ra, kare e ngaro iaku tana e rave ra, i te tuatua aere anga ia matou i te tuatua akakino ra.” (3 Ioa. 9, 10) E apiianga te reira no tatou katoa i teia tuatau. E tumu anga meitaki no tatou kia akaatea takiri i tetai ua atu anoano noinoi te ka kite tatou i roto ia tatou uaorai. Te akakite maira te Pipiria kia tatou e: “Ko te parau to te mate ra na mua, e te ngakau nengonengo ra, to te inga ïa na mua.” Te aronga tei ariki i to te Atua mana akaaere e patoi atu ratou i te tu ereere no te ngakau parau, me raveia te reira ka taki atu ki te akangateitei kore.​—Mase. 11:2; 16:18.

18. Eaa te ka tauturu ia tatou kia ariki i to Iehova mana akaaere?

¹⁸ Ae, e akariro i te reira ei akakoroanga naau kia patoi atu i te vaerua akatakake anga o teianei ao e kia ariki i to Iehova mana akaaere. Mei tetai taime ki tetai taime, e akamanako meitaki tikai i te akameitakianga maata tei orongaia mai kia koe kia tavini ia Iehova. Mei te mea e tei rotopu koe i te au tangata o te Atua te akapapu maira ia e kua akapiri vaitata mai aia ia koe na roto i tona vaerua tapu. (Ioa. 6:44) Auraka e akangaropoina i toou pirianga ki te Atua. E tauta i roto i te au tu ravarai o te oraanga kia akaari e te kopae ra koe i tetai vaerua akatakake anga e te ariki ra koe i to Iehova mana akaaere.

Maara Ainei ia Koe?

• Eaa te o maira i te ariki anga i to Iehova mana akaaere?

• I akapeea te tereni anga i to tatou kite ngakau i te piri atu anga ki te ariki anga i to Iehova mana akaaere?

• Ko teea te au ngai te tauta ra a Satani i te akakino i to te Atua mana akaaere?

• Eaa ra i puapinga ai te tu akaaka i te ariki anga i to Iehova mana akaaere?

[Au Uianga Apii]

[Tutu i te kapi 18]

“Ko te Atua ta matou e akarongo e tikaʼi auraka te tangata”

[Tutu i te kapi 20]

E tu pakari te aru ua rai i to te Atua au turanga